Read Mokpwe Matiyò 16 Bible Online

Matiyò 16 - Mokpwe bible

Matiyò 16

¹Lòŋgò la Hvàlìrzàyì na i Rzàdòrzi hwa mà jèeyà Yerzù. Hwà mà arza lì mò kpɛ njɔ̀mì, ò èŋgànɛ̀lɛ̀ hwà mà mò ijòwa ema a hwa uŋmɛ̀lɛ̀ èmbànèlì ema e uhwɛlɛlɛ ò ŋmanyu yà lohwà.

²Ndi Yerzù à mà hwa alàhwɛ̀ nanù ema, “O ehwànàmòkò e òhwa nanù ema, ‘Wùùnyà wò ò lɔ̀wu èhwanja lìwòhwɛ̀ la ŋmanyu lì teya.’

³Wò yàhwì hvɛ tɛ, è òhwa nanù ema, ‘È mbuwà e hwɛni lì yɔ̀ɔ̀ èhwanja lìwòhwɛ̀ la ŋmanyu lì teya, ndèŋgànà wùùnyà hvɛ wò kaki.’ Inyɔ è tànɛyi lì laŋga hwèhwɛ̀ɛ̀lì hwe wùnyà ndi è ayèmbɛ̀nɛ̀ ò lì emba hweyà ema hwe gbèyɛ̀nɛ̀ yàwònò.[7]

⁴Ene nyɔ̀ŋgɔ̀nì ya wòhwe ema e rza arza lì hweyàna Lohwɛ̀, e arza ndi embànèlì ya mànyakà! Ndi inyɔ e rza ò luwa tɔ̀ embànèlì lì aka e embànèlì ya mànyakà ya ama Jona e mòòhwèlì wà èlìŋgɛ̀.” Yerzù à mà hwa hwɛmɛ rzi a ɛ̀ndɛ e ye eni.

⁵Yerzù na Hwà-òkòwèlì hwa eni hwà mà akà lì ɛ̀ndɛ ɔ̀nɛyi èhvarzù ya yùlu, ndi Hwà-òkòwèlì hwà mà hvòŋga lì wòwa hwèhvòòtò.

⁶Yerzù rzìi a hwa òhweyà nanù ema, “È àŋgòhweyà ehwìndi yà Ihvalìrzàyì nà Irzàdùrzì.”

⁷Hwà-òkòwèlì hwa eni rzìi hwa òhwirzɛnɛ mɔ̀kɔ nà ɔ̀nɛyi nanù ema, “À òhwa ndi nanù èhwanja i rza jànì tɔ̀ èhvòòtò.”

⁸Yerzù à ma hwiyà mamɛ ema hwà mà hwɛ lì òhwa, rzìi a hwa ijòwa nanù ema, “Mamɛ ndeŋgatɛ e à òhwànɛ̀lɛ̀ nanù ema i rza jàni hwèhvòòtò e? Mamɛ ndeŋgatɛ lìlòkɛ̀ la anyu lì tùù nanù e?

⁹È rza òhvi lì rzɔ̀ŋgìtɛ̀nɛ̀ hvɔ̀ni e? È rza tànɛyi lì ɔ̀ŋgɛ̀lɛ̀ e hvònda ema nà mà lìrzɛ hwekòlì hweta hwe hwatò na hwèhvòòtò hweta e? Ŋgata iti ja hwehvetɛlɛ ema e ma rzaŋge e?

¹⁰È ma hvòŋga hvɛ ema nà mà lìrzɛ hvɛ hwekòlì hweni hwe hwatò na lìrzàmbà la hwèhvòòtò e? Ŋgata iti ja hwèhvatèlì ema e ma rzaŋge e?

¹¹È hvònda na me e òhweyà nanù ema e aŋgòhweya ehwindi na rza òhwe ndi lì hvòmɛ̀nɛ̀ hwehvòòtò. È aŋgòhweyà ehwindi ya Ihvalìrzàyì na Irzàdùrzì.”

¹²Hwà-òkòwèlì hwa eni rzìi hwa rzɔ̀ŋgìtɛ̀nɛ̀ nanù ema Yerzù a rzi hwɛ̀ ndi lì hwa òhweyà ema hwa aŋgòhweyà ehwindi ema hwa gbeyàna hwèhvòòtò. Ndi à mà hwɛ ndi lì hwa òhweyà ema hwa àŋgòhweyà hwèyòkòlelì hwe Ihvàlìrzàyì na Irzàdùrzì.

¹³Yerzù à mà anjiya aŋga rzìi a ɛ̀ndɛ ò erzòòkà e kòmbɛ̀nɛ̀ e mbòwà ya Kàyìrzèrìyà Hvìlìpì. Nà òma à mà uke aŋga à mà ijòwa Hwà-òkòwèlì hwa eni nanù ema, “Njɛnɛ hwatò hwa òhwa ema è Ŋmanà wà è Mòtò wà Hwènàmà a hwèlì e?”

¹⁴Rzìi hwa mò alàhwɛ̀ nanù ema, “Lòŋgò hwa òhwa nanù ema ò hwèlì ndi Yòwanìrzɛ̀ è Mòlùhwìrzèlì. Hwanɛ̀yi hvɛ hwa òhwa nanù ema ò hwèlì ndi Èlàyijà. Hwanɛ̀yi wɔ̀ hvɛ hwa òhwi nanù ema ò hwèlì ndi Jèrìmayà tɔ̀ òhvɛhvɛ Mòòhwèlì wa Èlìŋgɛ̀.”

¹⁵Yerzù rzìi a hwa ijòwa hvɛ nanù ema, “Njɛnɛ inyɔ hwìti e òhwa nanù ema na hwèlì e?”

¹⁶Rzìmɔ̀nì Pètrò rzìi a mò alàhwɛ̀ nanù ema, “O wa ndi ò hwèlì è Mɔ̀ ema à Ɔ̀kirzɛ̀hwɛ̀yi, è Ŋmanà wà ama Lohwà ema lì hwèlì lòŋgɛ.”

¹⁷Yerzù rzìi a mò alàhwɛ̀ nanù ema, “Mònàmɛ̀ nà ò wa Rzìmɔ̀nì è ŋmanà wà ama Jona. Rzeketɛ è mòtò wa hwènàmà ndi à òhwèlì ene eyà, ndi Tatɛ̀ wa ami ema a hwèlì ò ŋmanyu yà lohwà mɔ̀ ndi à gbèyi ema òhwe nanù.

¹⁸Pètrò[8] na òhweyà nanù ema ò hwèlì ndi ɛ̀kɔ̀kɔ̀ ya lìŋyàyi. O ŋmanyu ya ene ɛkɔkɔ ya lìŋyàyi ndi na òŋga mìitelì me ami. Tɔ̀ è ŋginyà ya e kpelì e rza tànɛyi lì anana meŋge miitelì.

¹⁹Nà ò ŋgbà hwèlìhvòwànì hwe lìkànèyà la ŋmanyu. Mamɛ ema e kakahwi ò rze, e kakahwi hvɛ ò ŋmanyu yà lohwà, mamɛ hvɛ ema e kanɛ̀lɛhwi ò rze, e kanɛ̀lɛhwɛ hvɛ ò ŋmanyu yà lohwà.”

²⁰Yerzù rzìi a kànèyà Hwà-òkòwèlì hwa eni ama hwa rzi keka lì òhweyà tɔ̀ mòtò ema mɔ̀ ndi à hwèlì è Mɔ̀ ema à Ɔ̀kirzɛ̀hwɛ̀yi.

²¹Lìwòteyà eŋge hvònda Yerzù à mà wòteyà lì nɔŋgeya Hwà-òkòwèlì hwa eni, lì hwa telɛlɛ ema a hwɛnì lì ɛ̀ndɛ ò Jèrurzalɛ̀mù. Aŋga a hwɛnì lì akeyà mètàkà jɔɔ-jɔɔ ò màà mà hwàmbaki hwa mbòwà, na Ipìlìrzì ndɛnɛ na Hwà-òkòlèlì hwa mbenda. A ma hwa òhweyà hvɛ ama a hwɛnì lì òŋwahwa rzìi ò menya meyàwò, à ò hvùmùlɛ̀hwɛ.

²²Pètrò à mà mò wòwa rzìi a mò ɛ̀ndɛnɛ ò tòŋgòŋgò, rzìi à mò kanja nanù ema, “Ìi Rzàŋgò Lohwà a rza tànɛyi lì emeyà ema e ò gbèyɛ̀nɛ!”

²³Yerzù à mà ayèŋgòwɛ̀ rzìi a òhwàna Pètrò nànù ema, “O nò anjiya ò wòrzò wa ami Mòkarzɛ̀! Mamɛ ndeŋgatɛ ònò keka ò lì gbeyà hweyà ema Lohwɛ̀ a lùteyà e? O òhwa ndi nanù na màlùtèyà ma mòtò wa hwènàmà rzeketɛ màlùtèyà ma ama Lohwɛ̀.”

²⁴Yerzù rzìi a òhweyà Hwà-òkòwèlì hwa eni nanù ema, “Tɔ̀ ima mòtò ema arza lì nò nɔ̀ŋgɔ a hwɛnì lì ahvòŋgɛ, rzìi a hwanɛ̀ e mbarzà ya eni rzìi à nò òŋgama.

²⁵Tɔ̀ ima mòtò ema à arza lì rzùŋga lòŋgɛ là eni, à lì wɔ̀lɛ̀nɛ̀, ndi tɔ̀ njɛnɛ ema à wɔ̀lɛ̀nɛ̀ lòŋgɛ là eni ò nyòla yà amì, à lì rzùŋga.

²⁶Ima mɔ̀rzɛ̀ŋgì ema mòtò à lùwà à yàlɛ̀ tɛ è rze yà arzɛ, rzìi à wɔ̀lɛ̀nɛ̀ lòŋgɛ là eni e? È rza tànɛ̀ lì hwɛ nanù! Mamɛ mòtò à tànɛyi lì ŋgbà ò lì tikòwàna lòŋgɛ là eni e?

²⁷Nà è òhweyà hwene hweyà hwe arzɛ nanù èhwanja è Ŋmanà wà è Mòtò wà Hwènàmà à ò jà ò èluhwe yà ama è Tatɛ̀ wà eni nà ì aŋgèlì jà eni. À jelì tɛ, à kɔ̀kìrzɛ̀ nà lì nàmìrzɛ̀ tɔ̀ ima mòtò ò lì hvòmɛ̀nɛ̀ mamɛ ema tɔ̀ ima mòtò à mà gbèèyɛ̀.

²⁸Nà è òhweyà nà è jɔ̀kɛ̀ nanù ema, lòŋgò la anyu è hwèlì anù ema è rza ŋwa, natɛ̀ɛ e hvònda hwa ɛnɛ è Ŋmanà wà è Mòtò wà Hwènàmà a jà na lìkànèyà là eni ò rze.”