Read Mokpwe Matiyò 17 Bible Online

Matiyò 17 - Mokpwe bible

Matiyò 17

¹O mburzà yà mèènyà mòtòhwa Yerzù rzìi a wòwa Pètrò, Jèmìrzì, na Jèmìrzì ŋmanyàŋgò wa enì Yòwanìrzɛ̀ rzìi a hwa timba ò hvàko ema e kàrzamì ò ekì ema hwà mà hwɛ wɔ̀ mɛnɛ.

²Aŋga rzɔ ndi Yerzù à mà atikòwɛ ò wòrzò wò awu, wòrzò wa eni wò ma hvànya ndi nàa igbèyi, lìhwatù la eni hvɛ lì ma ayèŋgòwɛ̀ mbɔmi yà ŋmàye mò rzɛŋgɛ-rzɛŋgɛ.

³Liwòkimɛnɛ Hwà-òkòwèlì hwa eni rzìi hwa ɛnɛ nà òma Mòrzè nà Èlàyijà hwà mà wurze rzìi hwa wòteyà lì òhwìrzɛ̀nɛ̀ Yerzù.

⁴Pètrò rzìi a òhweyà Yerzù nanù ema, “Rzàŋgò ò lɔ̀wu na òma i hwèlì anù. O lìŋgàni tɛ nà òŋga màwòndò màyàwò, lɔ̀kɔ lì hwɛ ndi è là aŋgɔ̀, Mòrzè hvɛ lɔ̀kɔ, lìnɛyi hvɛ e là ama Èlàyijà.”

⁵Nà òma à mà hwɛ lì òhwa, lìmbàkì ema lì ma ɛneya rzìlìhwà lì ma hwa hwànda, lìlò lì ma wurza ò lìŋgi lìmbàkì lì ma òhwa ema, “È Ŋmanà wà ami wà ndìŋgɛ ya màlìŋgò ònò, ema a nò òkirzɛ̀ mɔ̀nyɛ̀ŋgì, e mò hweyàne!”

⁶Nà òma Hwà-òkòwèlì hwa eni hwà mà hweye lìŋgi lìlò, hwà mà lɛmbeya mòkambiya, rzìi hwa rzuma màwɔ̀ŋgɔ̀ŋgɔ ma awu nà marzò ma awu ò rze.

⁷Yerzù à mà ɛndɛ ò èki ema hwà mà hwɛ rzìi a hwahwakɛ̀ màà mà eni. Rzìi à òhwa nanù ema, “È tɛ̀mɛ̀, e rza òka wɔ̀ŋgɔ̀.”

⁸Ndi nà òmà hwà mà karzɛ màrzò ma awu hwa rzi ɛnɛ hvɛ tɔ̀ mòtò lì aka tɛ Yerzù mɔ̀ mɛnɛ.

⁹Nà òmà hwa mà hwɛ lì rzìhwa ò èŋge hvàko, Yerzù rzìi a hwa kànèyà nanù ema, “È rzi kèka lì òhweyà tɔ̀ mòtò mamɛ e ɛni natɛ̀ɛ nà è hvònda ema Lohwà à ò hvùmùlɛ̀ è Ŋmanà wà è Mòtò wà Hwènàmà.”

¹⁰Hwà-òkòwèlì hwa eni rzìi hwa mò ijòwa nanù ema, “Mamɛ ndeŋgatɛ Hwà-òkòlèlì hwa mbenda hwa òhwa nanù ema, Èlàyijà ndi à lòma lì jà ndèŋgànà è Mɔ̀ ema à Ɔ̀kirzɛ̀hwɛ̀yi e?”

¹¹Yerzù rzìi a hwa alàhwɛ̀ nanù ema, “Nà è jɔ̀kɛ̀, Èlàyijà ndì a hwɛni lì lòma lì jà, ò lì tɛ̀yirzɛ̀ hweyà hwè arzɛ gbamù.

¹²Ndi nà è òhweyà ema Èlàyijà à mà màà lì jà, ndi hwa rzi mò embe, hwa mà mò gbeyàna ndi nà òmà hwà mà lìŋganè. Nànù mɛnɛ hvɛ ndi è Ŋmanà wà è Mòtò wà Hwènàmà mɔ̀ hvɛ à ò tàkɛ ò màà mà awu.”

¹³Aŋga ndi Hwà-òkòwèlì hwa eni hwa a ayèmbɛ nanù ema a òhwa ndi lì hvòmɛ̀nɛ̀ Yòwanìrzɛ̀ è Mòlùhwìrzèlì.

¹⁴Nà òma Yerzù na Hwà-òkòwèlì hwa eni hwà mà timbè ò lì ùŋmànɛ̀lɛ̀ e ŋgìndì ya hwatò, mòtò mɔ̀kɔ à mà jèeyà Yerzù rzìi a mò rzùmeya màwɔ̀ŋgɔ̀ŋgɔ̀ ò wòrzò wa eni a mò òhweyà ama,

¹⁵“Ìi Rzàŋgò òkeya e ŋmanà wà ami wà mùnyanà ììlì! À hvòkòwa, à tàka rzayì-rzayì, à yɔ̀ki hvɛ lì kpa ò tenì yà mùnya nà malìhwa.

¹⁶Nà mà mò jàneyà Hwà-òkòwèlì hwa aŋgɔ̀ ndi hwa rzìi tanɛ lì mò wɔ̀wìrzɛ̀.”

¹⁷Yerzù rzìi a alàhwɛ̀ nanù ema, “Bɔ̀ɔ! Inyɔ ene nyɔ̀ŋgɔ̀nì yà wòhwe ema è rza hwɛ̀nɛ̀ lìlòkɛ̀, nà hwɛ nà inyɔ natɛ̀ɛ nà rzìtii e? Nà è ajùlɛ̀nɛ̀ hvɛ natɛ̀ɛ nà ima hvònda e? È nò jàneyà òŋgò ŋmanà ònò.”

¹⁸Yerzù rzìi a kànèyà eŋge èlìŋgɛ̀ ya wòhwe rzìi e wurza òŋgò ŋmanà wa munyanà, lìwòkimɛnɛ a wɔ̀wɔ̀.

¹⁹O mburza hvònda Hwà-òkòwèlì hwa ama Yerzù hwà mà mò jèeyà rzìi hwa mò ijòwa ò wùndɛ̀ nanù ema, “Mamɛ ndeŋgatɛ irzɔ i rza tàneyà lì hvayà ene èlìŋgɛ̀ ya wòhwe e?”

²⁰Yerzù rzìi a hwa alàhwɛ̀ nanù ema, “Inyɔ e rzi tànɛyi lì hvaya eŋge èlìŋgɛ̀ èhwanja lìlòkɛ̀ la anyu lì rza òlò. È hwɛni tɛ lìlòkɛ ema lì òlò ndi nàa ŋmanà hvɔ̀ŋgɔ̀ wa wòrzaŋgò, e tànɛyi e kànèyà mònò mòoli nanù ema, ‘Anjiya anu, ò ɛ̀ndɛ ɔnɛyi!’ Ndèŋgànà mò ɛndɛ. È tànɛyi lì gbeyà tɔ̀ mamɛ.”

²¹O rza enje tɔ̀ eyà ema e tànɛyi lì hvaya ini nyayi ja hwèlìŋgɛ lì aka tɛ màkanɛ̀ na mòkìyà njàwò. [9]

²²Nà òma Yerzù nà Hwà-òkòwèlì hwa mà arzàŋganɛ ò erzòòkà yà Galìlì, Yerzù rzìi a hwa òhweyà nanù ema, “È Ŋmanà wà è Mòtò wà Hwènàmà à ò ŋgbààhwà ò màà mà hwatò,

²³hwa mò òŋwa ndi ò mèenyà me ùkirzɛ̀ meyawò a ò hvùmùlɛ̀hwɛ na Lohwɛ̀.” Ndi Hwà-òkòwèlì hwa eni hwà mà hweye ene eyà, hwà mà lɛmbeya ndùtù rzayì-rzayì.

²⁴Ndi na òma Yerzù na Hwà-òkòwèlì hwa eni hwà mà ùke ò e mbòwa ya Kàpɛ̀nàwɔ̀mì, hwàrzàŋgèlì hwa è njàŋge yà è Ndawò yà Lohwà hwà mà jèeyà Pètrò rzi hwa mò ijòwa nanù ema, “È Mòòkòlèlì wà anyu mɔ̀ à rzàawà è njàŋge ò Ndawò yà Lohwà e?”

²⁵Pètrò rzìi a hwa alàhwɛ̀ nanù ema, “Ɛ̀ɛ, à è taŋga.” Nà òma Pètrò ama kpeya ò ndawò, Yerzù rzìi a lòma lì mò òhweyà nanù ema, “Ìi Rzìmɔ̀nì mamɛ ò wa ò ɔ̀ŋgɛ̀lɛ̀ e? Njɛnɛ a rzàawà e njàŋge ya wònja na e yà lìkànèyà ò ma ikiŋgɛ ja ene rze e? I wònja ja èkòmè ŋga hwàyɛ̀ni e?”

²⁶Rzìi à mò alàhwɛ̀ nanù ema, “Hwàyɛ̀nì.” Yerzù rzìi a mò alàhwɛ̀ nanù ema, “Eŋge ŋgàna e hwèlì ndi nanù ema i wònja i rza hwɛnì lì rzàawa.”

²⁷Ndi ò lì arza nanù ema i rza hwa tàtìrzɛ̀, ɛ̀ndɛ ò yulu ò aŋgbe lìyɔ̀hwi la aŋgɔ̀. È nyàmà ya wòrzò ema o ò lɛ̀mbɛ, ò e lìhvòhwè e wàna ò ùŋmanɛlɛ kahvà ema i lòŋgamɛnɛ ò lì jò rzaweya e njàŋge ya arzu ya e ndawò yà Lohwà. O ji wòwe ò ɛndɛ ò jò rzaweya e njàŋge ya arzu ya e Ndawò ya Lohwà.