Read Mokpwe Matiyò 19 Bible Online

Matiyò 19 - Mokpwe bible

Matiyò 19

¹Nà òma Yerzù à mà kulɛ̀ lì òhwa hwenè hweyà à mà anjiya ò erzòòkà yà Galìlì rzìi à ɛ̀ndɛ ò erzòòkà yà Jùdeyà rzìi à aka ò mòrzò mò Jɔdànì.

²Ŋgindi ndɛnɛ yà hwatò ema mò nɔ̀ŋgɔ rzìi à kùwa lì wɔ̀wìrzɛ̀ hwaŋga hwa arzɛ ema hwa mà ɔ̀kirzɛ̀ aŋga.

³Lòŋgò là Ihvalìrzàyì hwa mò jèeyà ò lì mò rzɔ njɔ̀mì, rzìi hwa mò ijòwa nanù ema, “È mbenda è ŋgbelì wònja nanù ema mòtò à òŋwe lìhwa è rzi hwɛ njɔ̀mì e?”

⁴Yerzù rzìi à hwa timbirzɛlɛlɛ nanù ema, “È rzìi laŋgì ò è kààtì yà Lohwà nanù ema natɛ̀ɛ nà ò hwèwòtèlì Lohwɛ̀ à mà hwa wèka wɔ̀ munyanà nà mòlanà e?

⁵Lohwɛ̀ rzìi a òhwa nanù ema, ‘Ene ŋgàna ɔ̀ndeŋgàtɛ̀ ŋmanà wa munyanà a hwɛ̀mɛ̀ rzàŋgɛ na nyàŋgɛ rzìi a uŋma jòjìyɛ̀ wa eni rzìi hwahwàkɛ hwa alàtànɛ̀ ò lì hwɛ mòtò mɔ̀kɔ.’

⁶Hwa mà jà rzɔ ndi mòtò mɔ̀kɔ hwa rza enje hvɛ hwahwàkɛ ò èŋgànɛ̀lɛ̀ rzɔ mamɛ ema Lohwɛ̀ a làti mòtò wà hwènàmà a rzi keka lì e wùùlɛ̀.”

⁷Ihvalìrzàyì hwa mà mò ijòwa nanù ema, “È hwèlì tɛ nanù, mamɛ ndeŋgàtɛ̀ Mòrzè à mà ŋgba hwatò e wònja nanù ema, mòtò a hwɛnì lì ŋgba jòjìyɛ̀ wa eni è kààtì ò lì uŋmɛ̀lɛ̀ nanù ema, hwà mà òŋwa lìhwa rzìi à mò hvayà à mà à ɛ̀ndɛ ònɛyi e?”

⁸Yerzù rzìi à hwa timbirzɛlɛlɛ nanù ema, “Mòrzè à mà e ŋgba wònja ema e òŋwe mààhwà ma anyu èhwanja mèèmà me anyu me eti. Ndi e rzi hwɛ nanù natɛ̀ɛ na ò hwewòtelì hwe ene rze.

⁹Nà e òhweyà na e jɔ̀kɛ̀ nanù ema tɔ̀ ima mòjòmɛ̀ ema mò hvayi e jòjìyɛ̀ ya eni e rzi hwɛ ema ò nyòla ya mòrzònje mò lìhwa eŋge tumba mòtò e hwàyi tɛ òhvɛhvɛ mòlanà nanù òma a undi e mbenda ya mòrzònje mò lìhwa.”

¹⁰Hwà-òkòwèlì hwa eni rzìi hwa mò òhweyà nanù ema, “È hwèlì tɛ ema nanù ndi hwètɛ̀yìrzèlì hwe mòjòmɛ̀ na e jòjìyɛ̀ ya eni hwe hwèlì nanù òma ò hwèlì gbamù ema mòtò a rzìi hwaa rzɔ.”

¹¹Yerzù rzìi a timbirzɛlɛlɛ ama, “Rzeketɛ tɔ̀ ima mòtò ndì a emeyà hwene hwèyòkòlelì, lì aka tɛ hwaŋga hwatò mɛnɛ ema Lohwɛ̀ à mà ŋgbe.

¹²È hwɛni lì hwiya nanù ema, màandà mà kòki ɔ̀ndeŋgàtɛ̀ lòŋgò la hwatò hwa rza hwaa hwalana. Èhwanja nanù ndi lòŋgò la awu hwà mà ŋyahwɛnɛ, hwanɛ̀yi hvɛ hwatò ndi hwà mà hwa gbeyà ò lì hwɛ nanù, lòŋgò hvɛ hwa agbèelɛ ndi nanù aŋga nanù hwa gbèeyà èwòlò ya lìkànèyà là ama Lohwɛ̀. Inyɛ̀ e mɔ̀ ema a tanɛ ò lì emeyà hwene hwèyòkòlèlì inyɛ a hwe emeyà.”

¹³Lòŋgò la hwatò hwà mà jàneyà Yerzù hwàànà hwarzàlì ò lì arza nanù ema Yerzù a hwa hwàkɛ màa a hwa kanɛ̀lɛ̀lɛ̀. Ndì hwà-òkòwèlì hwa eni hwà mà lòmeya e wɔ̀ ema hwà mà hwa jànà.

¹⁴Yerzù rzìi a hwa òhweyà ama, “È hwɛmɛ hwàànà hwarzàlì hwa jèe na imba e rzi keka lì hwa iŋga èhwanja ini nyayi ja hwatò ndi i hwɛnì lìkànèyà là ŋmanyu.”

¹⁵Nà òma à mà kulɛ lì hwa hwàkɛ màa rzìi a anjiya aŋga a ɛ̀ndɛ e ya eni.

¹⁶Mòtò mɔ̀kɔ à mà jèeyà Yerzù rzi à mò ijòwa nanù ema, “Ìi Mòòkòlèlì, i ma lìtumba la eyà ya gbamù ema na hwɛni lì gbeyà ò lì lùwa lòŋgɛ la gbìndèyà e?”

¹⁷Yerzù rzìi a mò alàhwɛ̀ nanù ema, “Mamɛ ònò ijòwàna lì hvòmɛ̀nɛ̀ hweyà hwe lɔ̀wu e? O hwèlì ndi mòtò mɔ̀kɔ mɛnɛ ema a hwèlì e mòtò wa gbamù. O arza tɛ lòŋgɛ la gbìndèyà, ika imbenda.”

¹⁸Oŋgò mòtò rzìi a mò ijòwa nanù ema, “Ima mbenda e?” Yerzù rzìi a mò timbirzɛlɛ nanù ema, “O rzi òŋwa mòtò, ò rzi gbeyà mòrzònje mò lìhwa, ò rzi ihwa, ò rzi tɛ̀mɛ̀ mbòŋgi ya mòlàŋgà,

¹⁹luwɛ rzɔ̀ŋgɛ na nyɔ̀ŋgɛ rzìi ò lìŋgàne hvɛ ŋmànyàŋgò wa aŋgɔ̀ na òma wa àlìŋgànɛ ò wà witi.”

²⁰Eŋge erzɔ̀mbɛ̀ ya mòtò rzìi e a alàhwɛ̀ nanù ema, “Nà ma ika ini mbenda ja arzɛ. Mamɛ hvɛ na hwɛni lì gbeyà e?”

²¹Yerzù rzìi a mò alàhwɛ̀ hvɛ nanù ema, “O arza tɛ lì hwɛ ema ò rza òhvɛ njɔ̀mì, ɛ̀ndɛ ò àhwirzɛ̀ lìrzàŋgò la aŋgɔ̀ la arzɛ ò ŋgbe mèlìrza me hwatò wòŋgò wòlì. O gbe tɛ nanù, ò luwa mònàmɛ̀ ò ŋmanyu yà lohwà. Eŋge hvònda ndi ò nò nɔ̀ŋgɔ.”

²²Nà òma eŋge erzɔmbɛ ya èwàŋgì e ma hweye nanù, rzìi a ɛ̀ndɛ na ŋmèma mò rzɔ̀luu èhwanja à mà hwɛ ndi èwàŋgì ndɛnɛ.

²³Yerzù rzìi a òhweyà Hwà-òkòwèlì wa eni nanù ema, “Nà e òhweyà ndi e jɔ̀kɛ̀ ema e ambani èhwàŋgì ya mòtò ò lì kpèeyà ò lìkànèyà la ŋmanyu yà lohwà.

²⁴Nà e òhweyà hvɛ ema, e rza ambani èembè nàa e Kamɛlì ò lì akeyà ò lìhvɔ̀ndi la ndɔ̀ndɔ̀kì, ndi e ambani èwàŋgì ya mòtò ò lì kpèeyà ò lìkànèyà là ama Lohwɛ̀.”

²⁵Nà òma Hwà-òkòwèlì hwa eni hwà mà hweye nanù hwà mà tàmà rzayì-rzayì rzìi hwa mò ijòwa ema, “Njɛnɛ rzɔ a tànɛyi lì rzùŋgahwà e?”

²⁶Yerzù rzìi a hwa ɔ̀ŋgɔ kòò, rzìi a hwa alàhwɛ̀ nanù ema, “Ene eyà ya ambani mòtò wa hwènàmà ndi e hwèlì tɛ na Lohwɛ̀, hwe arzɛ hwe gbèyɛ̀nɛ.”

²⁷Pètrò rzìi a ijòwa Yerzù nanù ema, “Ɔ̀ŋgɔ tɛ, irzɔ i hwɛmi hwe arzɛ ò lì ò nɔ̀ŋgɔ! Mamɛ rzɔ e ò hwɛ mɔrzɛŋgi mò arzu e?”

²⁸Yerzù rzìi a tìmba hvɛ lì hwa òhweyà nanù ema, “Nà e òhweyà ndi e jɔ̀kɛ̀ e hvònda ema è Ŋmanà wà è Mòtò wà Hwènàmà a ò lìya ò mbòkò ya lìkànèyà la eni la èluhwe, ò e rze ema e ò jɛ̀ɛ̀ inyɔ lìyòme la hwatò na hwahwakɛ ema e nò nɔŋgi e ò lìya ò mbòkò ja lìkànèyà ò lì kàyìrzɛ̀ lìyòmɛ̀ la matumba na mahwakɛ ma Irzàyɛ̀lì.

²⁹Tɔ̀ ima mòtò hvɛ ema à mà hwɛmɛ mandawò me enì, wònyànyàŋgò tɔ̀ indòmɛ ja eni, e rzaŋgò tɔ̀ e nyàŋgò, hwàànà na erzaŋgò ya eni ya arzɛ ò nyòla ami a hwe lùwa egbe ya ŋgelì, a lùwa hvɛ lòŋgɛ la gbìndèyà.

³⁰Ndi rzayì-rzayì naŋgɛ ema hwa hwèlì ò wòrzò wɔ̀ ndi hwa ò lìiya ò mburza, rzayi-rzayi hvɛ ema hwa lìyelì ò mburza wɔ̀ ndi hwa ò hwɛ ò wòrzò.”