Read Mokpwe Matiyò 2 Bible Online

Matiyò 2 - Mokpwe bible

Matiyò 2

¹Nà òma Yerzù à mà ŋyahwe ò mbòwà yà Bɛ̀tlɛ̀hɛmù, ò erzòòkà yà Jùdèyà, ò eŋge hvòndà Hɛ̀rɔ̀dì ndi à mà hwɛ è Kiŋgɛ̀. Hwàlaŋgà rzòmbe hwa mà uhwèyà wate[1] rzi hwa jà ò mbòwà yà Jèrurzalɛ̀mù.

²Hwaŋga hwàlaŋgà rzòmbe hwa mà ùke ò Jèrurzalɛ̀mù rzi hwa ijòwa nanù ema, “One òŋgò ŋmanà ema à ŋyahwì è Kiŋgɛ yà wònyà Yudà e? Ì ɛni è rzòmbe wàte, è jò uŋmɛ̀lɛ̀ nanù ema à ŋyàhwì. Ɔ̀ndeŋgàtɛ̀ ì jelì ò lì mò ŋgba èluhwe.”

³Kiŋgɛ Hɛ̀rɔ̀dì à mà hwèye ene eyà, è mà mò tàkirzɛ̀ màlùtèyà mà eni rzayì-rzayì. Ene eyà è mà mò tàkirzɛ̀ rzìi è tàkirzɛ̀ hvɛ hwatò hwa arzɛ hwa Jèrurzalɛ̀mù.

⁴Hɛ̀rɔ̀dì à mà hwɛlìrzɛ̀ ipìlìrzì ndɛnɛ nà hwà-òkòlèlì hwa mbendà hwa arzɛ èki yɔ̀kɔ. Rzìi à hwa ijòwa nanù ema, “One òŋgò ema à Ɔ̀kirzɛ̀hwɛ̀yi à hwɛnì lì ŋyàhwɛ̀lɛ̀ e?”

⁵Hwa mà mò alàhwɛ̀ nanù ema, “À ŋyàhwɛ̀lɛ̀ ndi ò mbòwà yà Bɛ̀tlɛ̀hɛmù, ò erzòòkà yà Jùdeyà. È mòòhwèlì wà èlìŋgɛ̀ à mà tìla nanù ema,

⁶‘Inyɔ hwatò hwa Bɛ̀tlɛ̀hɛmù, ò mɔ̀nyɛ̀ mò Judà, è mbòwà yà anyu è hwèlì ndi mbòwà hvɔ̀kɔ ema è ŋgbààhwi èluhwe ò ìtììtènì jà màmbòwà mà èkòmè yà Judà. Èhwanja ò ìtììtènì jà anyu o ò wurza mòtò ema à ò tìmbɛ hwatò hwa ami hwa Èkòmè yà Irzàyɛ̀lì.’”

⁷Hɛ̀rɔ̀dì rzìi à mà hwèye nanù, à hwɛlɛ hwaŋga hwàlaŋgèlì hwa rzòmbe ò wùndɛ̀, rzìi à hwa ijòwa lìrzàkò kɔ̀yi-kɔ̀yi ema eŋge rzòmbe è mà wùrzè.

⁸Rzìi à hwa òma ò lì ɛ̀ndɛ ò Bɛ̀tlɛ̀hɛmù nanù ema, “È ɛ̀ndɛ, è arze òŋgò ŋmanà kɔ̀yi-kɔ̀yi. È ɛni tɛ èki ema òŋgò ŋmanà à ŋyahwɛ̀lɛ̀yi, è tìmbè è jè è nò òhweyà, òma imba hvɛ nà mà ɛ̀ndɛ ò lì mò ŋgba èluhwe.”

⁹Nà òma hwa mà hwèye mamɛ̀ è Kiŋgɛ̀ è mà òhwè, rzi hwa wòteyà lì ɛ̀ndɛ hvɛ. Hwa mà ɔ̀ŋgɔ ò ŋmanyu rzi hwa ɛnɛ eŋge rzòmbe, ema hwa mà lòmè lì ɛnɛ wàte, è ɛ̀ndɛ ò wòrzò wò awu. Eŋge rzòmbe è mà ɛ̀ndɛ natɛ̀ɛ, rzi è tɛ̀mɛ̀ èki ema òŋgò ŋmanà à mà ŋyahwɛ̀lɛ̀.

¹⁰Nà òma hwa mà ɛnɛ è rzòmbe hwa mà hwɛnɛ mɔ̀nyɛ̀ŋgì rzayì-rzayì.

¹¹Nà òma hwa mà kpèeyà ò ndawò, hwa mà ɛnɛ mòŋgò ŋmɛ̀ɛ̀ŋgɛ̀ mò ŋmanà nà nyàŋgɛ Màlìyɛ̀. Hwa mà rzùma màwɔ̀ŋgɔ̀ŋgɔ̀ ò rze, rzi hwa ŋgba è ŋmanà èluhwe. Hwa mà wùrzìrzɛ̀ màhwèyà ema hwa mà jàneyà è ŋmanà. Manù màhwèyà ma mà hwɛ ndi Gòòlò,[2] lìyɔ̀ki ema lì òhvi erzunju yà hvɛ̀ɛ̀hvɛ̀ɛ̀ ema lì hwɛ̀lɛ̀hwɛ̀ hvìlàŋgìrzɛ̀nì[3] nà màyi.[4]

¹²Nà òmà hwa mà kulɛ̀ lì ŋgbà è ŋmanà èluhwe, rzi hwa wòteyà lì tìmba ò èkòmè yà awu. Ndi hwa mà tìmbeya ndi èhvɛhvɛ njiya, èhwanja Lohwɛ̀ à mà hwa kòkòhwɛ̀lɛ̀ ò ndɔ̀tɔ̀, ema hwa rzi keka lì tìmba ò mà Hɛ̀rɔ̀dì hvɛ.

¹³È hvònda hwaŋga hwàlaŋga rzòmbe hwa mà ɛ̀ndɛ, aŋga ndi è aŋgèlì yà ama Tatɛ̀ è mà wurzeyà Jòrzɛ̀hvù ò ndɔ̀tɔ̀ nanù ema, “Imòwa, ò wòwè è ŋmanà nà nyàŋgɛ è ɛndɛ̀ ò Ìjiptò. È hwɛ aŋga natɛ̀ɛ nà lìrzàkò ema nà è òhwèyà ema è anjiye aŋga, èhwanja Hɛ̀rɔ̀dì à hwɛni lì òma hwatò lì jà ò lì arza ò nò ŋmanà ò lì mò òŋwa.”

¹⁴Jòrzɛ̀hvù à mà imòwe wòŋgò wu, rzi à wòwà è ŋmanà nà nyàŋgɛ hwa wòteyà lì ɛ̀ndɛ ò Ìjiptò.

¹⁵Hwa mà lìya aŋga natɛ̀ɛ Hɛ̀rɔ̀dì à ŋwa. Hwenè hwe arzɛ hwe mà gbèyɛ̀nɛ ò lì òndìrzɛ̀ è mbɔrzi ema Tatɛ̀ à mà òme è mòòhwèlì wà èlìŋgɛ̀ ò lì òhwa nanù ema, “Ò Ìjiptò ndi nà hwɛlɛ è ŋmanà wà ami.”

¹⁶Hɛ̀rɔ̀dì à mà ayèmbɛ̀ nanù ema hwàlaŋga rzòmbe hwa mò ɔ̀ɔ̀nji, à mà tàtà rzayì-rzayì. Rzìi à òma hwàànèlì hwa eni hwa njùma, ò Bɛ̀tlɛ̀hɛmù nà ò hwèrzòòkà hwe arzɛ ema hwe mà kòmbɛ̀nɛ̀, è mà hwa òŋwe hwànà hwa wunyanà hwa arzɛ ema hwa hwèlì meya mèhwàkɛ lì ɔ̀ndɔ̀. À mà gbèya ndi nanù, ò lì ɔ̀lɛ̀nɛ̀ è hvònda ema hwàlaŋga rzòmbe hwa mà mò òhwèyà ema hwa mà lòmà lì ɛnɛ è rzòmbe ema è mà uŋmɛ̀lɛ̀ hwèŋyàyèlì hwe ama Yerzù.

¹⁷Ene eyà è mà gbèyɛ̀nɛ ò lì òndìrzɛ̀ mamɛ Lohwɛ̀ à mà òhwèyà è mòòhwèlì wà hwèlìŋgɛ Jèrìmayà. Jèrìmayà à mà òhwa nanù ema,

¹⁸“Hwatò hwa mà hwèyà lìlò nà lùwà lìndɛ̀nɛ̀, lì mà uhweya ò Ràmà, nà òma Ràchɛ̀lì à mà hwɛ lì eyà hwànà hwa eni. Hwa mà mò arzàrzɛ̀, ndi à rzi emèyà lì hwɛmɛ lùwà, èhwanja hwàna hwa eni, hwa mà màa lì ŋwa.”

¹⁹O mburzà kpelì yà ama Hɛ̀rɔ̀dì, è aŋgèlì yà ama Lohwɛ̀ è mà wùrzèyà Jòrzɛ̀hvù ò ndɔ̀tɔ̀ è hvònda ema à è hwèlì ò Ìjiptò. È aŋgèlì è mò òhwèyà nanù ema,

²⁰“Imòwa, ò wòwè è ŋmanà nà nyàŋgɛ, è tìmbè ò èkòmè yà Irzàyɛ̀lì, èhwanja Hɛ̀rɔ̀dì nà hwaŋga ema hwa mà arza lì òŋwà è ŋmanà hwa mà màà lì ŋwa.”

²¹Jòrzɛ̀hvù à mà hwèye nanù, rzi à wòwà è ŋmanà nà nyàŋgɛ, rzi hwa tìmba ò Èkòmè yà Irzàyɛ̀lì.

²²Ndi è hvònda ema Jòrzɛ̀hvù à mà hwèya nanù ema Akɛ̀làwùrzì ndi à mà tìmbɛ̀ ò kònda yà lìkànèyà là ama rzaŋgɛ̀ Kiŋgɛ̀ Hɛ̀rɔ̀dì ò erzòòkà yà Jùdèyà, à mà òka wɔ̀ŋgɔ̀ ò lì tìmba aŋga. È aŋgèlì yà ama Lohwɛ̀ è mà mò wurzeya hvɛ ò ndɔ̀tɔ̀, ò lì mò kòkòhwɛ̀lɛ̀. Eŋge eyà è mà mò gbèya ema à ɛ̀ndɛ ndi è yà eni ò erzòòkà yà Galìlì.

²³À ɛ̀ndɛ̀ rzi à lìya ò mbòwà ndɛnɛ ema è mà hwɛ̀lɛ̀hwɛ̀ Nàrzàrɛ̀tì. Ene è mà gbèyɛ̀nɛ ndi ò lì òndìrzɛ̀ mamɛ Lohwɛ̀ à mà òhwèyà hwà-òhwèlì hwa hwèlìŋgɛ̀ lì hvòmɛ̀nɛ̀ Yerzù nanù ema, “À ò hwìyɛ̀nɛ ndi nàa mòtò wà Nàrzàrɛ̀tì.”