Read Mokpwe Matiyò 21 Bible Online

Matiyò 21 - Mokpwe bible

Matiyò 21

¹Nà òma Yerzù na hwà-òkòwèlì hwa eni hwà mà kòmbɛ̀nɛ̀ e mbòwà ndɛnɛ ya Jèrurzalɛ̀mù, hwà mà uka e mbòwà ya Bɛ̀thvegi ò e hvàko ya Njàhwɛ̀. Yerzù rzi a òma Hwà-òkòwèlì hwa eni hwahwàkɛ ò lì ɛndɛ ò wòrzò,

²rzìi a hwa òhweyà nanù ema, “È ɛ̀ndɛ ò mbòwà ema e hwèlì ò wòrzò wò anyu. È ùŋmanɛlɛ jàkarzì ema i tiŋgɛhwɛyi aŋga ema i òhvi nà è ŋguma yà eni ò tòŋgòŋgò e ji rzòlòhwe, e nò jàneyà e jɔ.

³È hwèlì tɛ ema mòtò à è ijò tɛ tɔ̀ eyà, e mò òhweyà ema, Rzàŋgò[12] à ji tukanelì. Oŋgò mòtò a ji òma lìwòkimɛnɛ.”

⁴Ene eyà e ma gbèyɛ̀nɛ nanù, ò lì òndìrzɛ̀ e mbɔrzi ema Lohwɛ̀ à mà òme lì akeyà na e mòòhwèlì wà èlìŋgɛ̀ nanù ema,

⁵“Ohweyà hwatò hwa Rzàyɔ̀nì nanù ema, Wà à ɔ̀ŋgɔ, è kìŋgɛ yà aŋgɔ̀ yè è jèeyà! À arzìhwìrzɛ̀yi, à lìyàyi ò ŋmanyu yà jàkarzì, ŋguma jàkarzì jà mòme.”

⁶Ò èŋgànɛ̀lɛ̀ rzɔ, hwaŋga Hwà-òkòwèlì hwa mà ɛ̀ndɛ rzi hwa gbeyà ndi nà òma Yerzù à mà hwa kànèyà ò lì gbeyà.

⁷Hwàŋga hwà-òkòwèlì hwahwàkɛ hwa mà jàneyà Yerzù iŋgi jàkarzì nà è ŋguma yà eni, hwa mà wòwa mààtù mà awu rzìi hwa mà tààlɛ̀ ò ŋmanyu iŋgi jàkarzì rzìi Yerzù à jà agba ò ŋmanyu.

⁸Ŋgindi ndɛnɛ yà hwatò è mà tààlɛ̀ mààtù mà awu ò njiya. Hwahvɛhvɛ hwa mà kɛ hwɛ̀kɔ̀kɔ̀ hwe màyi rzi hwa tààlɛ̀ ò njiya.

⁹È ŋgìndì ema è mà hwɛ lì ɛ̀ndɛ ò wòrzò wà ama Yerzù, nà è yɔ̀ ema è mà hwɛ lì mò nɔ̀ŋgɔ ò mburzà, hwa mà hwɛ lì tɛ̀ɛ̀ nanù ema, “Hòrzana, nà jèka hvɛ ì hwɛ nà è Ŋmanà wà è nyɔ̀ŋgɔ̀nì yà ama Dàhwitì. Mònàmɛ̀ mò hwèlì nà òŋgò ema à jelì ò lìnà là ama è Rzàŋgò. Hòrzana,[13] jèka ì hwɛ nà Lohwà ema mɔ̀ ndi à kàrzamì lì aka hwa arzɛ!”

¹⁰Nà òma Yerzù à mà kpèeyà ò tenì yà è mbòwà ndɛnɛ yà Jèrurzalɛ̀mù, è mbòwà yà arzɛ è mà nyìŋga ndi jèmì-jèmì, natɛ̀ɛ hwatò hwa mà wòteyà lì ijòwa nanù ema, “Njɛnɛ hvɛ ò nò e?”

¹¹Eŋge ŋgìndì e hwa alàhwɛ̀ nanù ema, “Yerzù ònò, è Mòòhwèlì wà èlìŋgɛ̀ ema a uwɛ̀lɛ̀lɛ̀yi ò e mbòwà yà Nàrzarɛ̀tì ò èkòmè ya Galìlì.”

¹²Ò mburza hvònda, Yerzù à mà ɛndɛ lì kpèeyà ò è Ndawò yà Lohwà. À mà hvaya hwaŋga hwatò hwa arzɛ ema hwa mà hwɛ lì anda nà lì àhwirzɛ̀ inyòŋga ja awu aŋga. À mà nòŋgòlɛ̀ itèhwèlì ja è wɔ̀ ema hwa mà hwɛ lì kènjirzɛ̀ ìkahvà, nà ì mbòkò jà è wɔ̀ ema hwa mà hwɛ lì àhwirzɛ̀ imbèŋgà.

¹³À mà hwa òhweyà nanù ema, “È tìlahwì ema, Lohwà a òhwi nanù ema, ‘È ndawò ya ami e ò hwɛ̀lɛ̀hwɛ̀ ndi e ndawò ya màkanɛ̀.’ Ndi inyɔ ye e timbirzɛ ndi ‘Èki ema hwayihwɛ hwa utàmà.’”

¹⁴Hwàŋga hwatò ema hwà mà ɔ̀kirzɛ̀ e nyàmbɛ ya ndima na mbòkò hwà mà mò jèeyà ò tenì ya e Ndawò yà Lohwà ya màkanɛ̀, ndèŋgànɛ̀lɛ̀ à mà hwa wɔ̀wìrzɛ̀.

¹⁵Ndi na òma Ipìlìrzì ndɛnɛ na Hwà-òkòlèlì hwa mbenda hwà mà ɛnɛ hwenè hweyà hwe mànyakà ema Yerzù à mà hwɛ lì gbeyà, ndèŋgànɛ̀lɛ̀ hvɛ merzeya ema hwàna hwarzàlì hwà mà hwɛ lì tɛ nanù ema, “Jèèka i hwɛ na è Ŋmanà wà e nyɔ̀ŋgɔ̀nì ya ama Dàhwitì,” hwà mà tàta rzayi-rzayi.

¹⁶Hwanù hwàkànèlì rzi hwa ijòwa Yerzù nanù ema, “Rzeke ò hwèya mamɛ ema hwanù hwàna hwa òhwa e?” Yerzù rzi a hwa alàhwɛ̀ nanù ema, “Ɛ̀ɛ na hweyi. Inyɔ e rzi laŋgi na òma e tìlahwì ò kààtì ya Lohwà nanù ema, ‘A ma wòmba hwàna na ŋmɛ̀ɛŋgɛ ò lì mò ŋgba jeka ja gbamù e?’”

¹⁷Yerzù à mà hwa lìya ò Jèrurzalɛ̀mù rzi a ɛ̀ndɛ ò lì naŋga ò mbòwà ya Bɛ̀tanì.

¹⁸O ekpa ya arzɛ ya wònɛyi wùnyà, na òma Yerzù à mà hwɛ lì tìmba ò Jèrurzalɛ̀mù, e njàwò e ma mò lɛ̀mbɛ.

¹⁹Nà òma à mà hwɛ lì ɛndɛ, rzìi a ɛnɛ gbèe ema wò ma hwɛ̀lɛ̀hwɛ̀ hvigi ò tòŋgòŋgò ya njiya, à mà ɛ̀ndɛ aŋga. Ndi a rzi ùŋmanɛlɛ tɔ̀ ehvùma yɔ̀kɔ aŋga, lì aka tɛ hwèyalì mɛnɛ. Yerzù rzìi a òhwirzɛnɛ wòŋgò gbèe nanù ema, “O rza ò ŋya hvɛ tɔ̀ ehvùma” ò lìwòkimɛnɛ wòŋgò gbèe rzìi wò rzɔnjɔ.

²⁰Nà òma Hwà-òkòwèlì hwa eni hwà mà ɛnɛ ene eyà, hwà mà jeja. Rzi hwa ijòwa ŋgelì hvɔ̀kɔ nanù ema, “Nɛ wònò gbèe wò akɛlɛ lì rzɔ̀njɔ nanù e?”

²¹Yerzù à mà hwa alàhwɛ̀ nanù ema, “Nà e òhweyà ndi e jɔ̀kɛ̀, e òhvi tɛ lì lòkɛ̀ rzi e rzi tame, inyɔ hvɛ e tànɛyi lì gbeyà mamɛ ema na gbeyànì wònò gbee. Rzeke hvɛ tɔ̀ ene mɛnɛ, e tànɛyi hvɛ lì òhweyà ene hvàko nanù ema, ‘Anjiya anu òma, ò ɛndɛ ò ahvimbɛ ò wà witi ò tenì ya ŋmànja’ e gbèyɛ̀nɛ nanù.

²²È òhvi tɛ lì lòkɛ̀ nanù ema, tɔ̀ mamɛ ema e ijòwani Lohwɛ̀ ò màkanɛ̀ ye e lùwa. Nànù òma e ijòwi tɛ ye e luwa.”

²³Yerzù à mà kpèeyà ò tenì ya e Ndawò yà Lohwà rzìi a òkòlɛ hwatò. Nà òma mɔ̀ à mà hwɛ lì òkòlɛ̀, Ipilìrzi ndɛnɛ na hwàmbaki hwa hwatò rzi hwa mò jèeyà, hwa mò ijòwa nanù ema, “Ima lìkànèyà ò hwɛni ò lì gbeyà hwenè hweyà e? Ndèŋgànɛ̀lɛ̀ hvɛ njɛnɛ a ò ŋgbelì lìni lìkànèyà e?”

²⁴Yerzù rzi a hwa alàhwɛ̀ nanù ema, “Imba hvɛ na e ijòwa miijòwelì mèyɔ̀kɔ. È nò alàhwɛ̀ tɛ, na e òhweyà ima lìkànèyà ema na òhvi ò lì gbeyàna hwenè hweyà.

²⁵One è wònjà ya lì lùhwìrzɛ̀ la ama Yòwanìrzɛ̀ e Mòlùhwìrzèlì, lì ma uhwɛlɛlɛ e? È ma uhwɛlɛlɛ ndi ò ma Lohwɛ̀, ŋga ò hwatò hwa hwènàmà e?” Hwà mà àwòhwànɛ̀lɛ̀ eŋge mbɔrzi wɔ̀ na wɔ̀, rzi hwa òhwa ema, i òhwi tɛ nanù ema “È wònja ya eni e uwɛ̀lɛ̀lɛ̀yi ndi ò ma Lohwɛ̀, a jò ijòwa nanù ema, ‘O mamɛ ndeŋgatɛ e rzi lòkɛ̀ Yòwanìrzɛ̀ e Mòlùhwìrzèlì e?’

²⁶Ndi i òhwi tɛ nanù ema, ‘È wònja ya eni e uwɛ̀lɛ̀lɛ̀yi ndi ò hwatò hwa hwènàmà,’ nanù òma ene ŋgindi ya hwatò e jò gbeyàna wòhwe, èhwanja wɔ̀ hwa arzɛ hwa hwi ema Yòwanìrzɛ̀ à mà hwɛ ndi Mòòhwèlì wà èlìŋgɛ̀.”

²⁷Ene ŋgàna e ma gbeyà wɔ̀ hwà mà alàhwɛ̀ Yerzù nanù ema, “Irzɔ i rza hwi.” Yerzù rzì a hwa òhweyà nanù ema, “O èŋgànɛ̀lɛ̀ rzɔ tɔ̀ imba hvɛ na rza e òhweyà è wònjà ema na òhvi ò lì gbeyàna hwenè hweyà.”

²⁸Yerzù à mà ijòwa hvɛ ipìlìrzi ndɛnɛ na hwàmbaki hwa mbòwa nanù ema, “Nɛ inyɔ e lutanelì mònò ŋmàna e? O ma hwɛ mùnyanà mɔ̀kɔ ema à mà ŋya hwàna hwa wunyanà hwahwàkɛ. A ma ɛ̀ndɛ ò ma e ŋmanà wa mùnyanà wa wòrzò, rzi a mò òhweyà nanù ema, ‘È ŋmanà wa ami wa mùnyanà kòkò, ɛ̀ndɛ ò gbèèye èwòlò yawònò ò hvaya.’

²⁹Oŋgò ŋmanà à mà timbirzɛlɛlɛ e rzaŋgò ya eni nanù ema, ‘Nà rza ɛ̀ndɛ.’ Ndi ò mburzà hvònda à mà tikòwa mɔ̀ŋgɛ̀lɛ̀ ma eni rzi a ɛ̀ndɛ.

³⁰È rzaŋgò rzi a ɛ̀ndɛ hvɛ òma ònɛyi ŋmanà wa eni wa mùnyanà, a mò òhweyà mòlemilemi mò eyà. Oŋgò ŋmanà à mà alàhwɛ̀ rzaŋgɛ nanù ema, ‘Tatà na ɛ̀ndɛ.’ Ndi a rzi ɛ̀ndɛ e ya eni tɔ̀ èki.”

³¹Yerzù rzìi a ijòwa ipilìrzi ndɛnɛ nanù ema, “Ima mɔ̀ wa hwanù hwàna hwahwàkɛ à mà gbeyà mamɛ ema e rzaŋgò ya awu e ma arze e?” Hwà mà alàhwɛ̀ Yerzù nanù ema, “È ŋmanà wa wòrzò.” Yerzù rzìi a hwa òhweyà nanù ema, “Nà e òhweyà na e jɔ̀kɛ̀ ema, hwàrzàŋgèlì hwa e njàŋge yà lìkànèyà, na hwaŋga hwalanà hwa àkpàlà, hwa lòma lì kpèeyà ò lìkànèyà la ama Lohwɛ̀ ndèŋgànà inyɔ.

³²Nà òhwa ene eyà nanù èhwanja Yòwanìrzɛ̀ e Mòlùhwìrzèlì à mà jà, ò lì e uŋmɛ̀lɛ̀ e njiya ema e enyòhwɛnɛ, ndi inyɔ e rzi mò lòkɛ̀. Ndi hwarzaŋgelì hwa e njàŋge ya lìkànèyà na hwàalanà hwa àkpàlà hwà mà mò lòkɛ̀. Tɔ̀ na òma inyɔ e ma ɛnɛ ene eyà, inyɔ e rzi aŋgòwɛ ò wòhwe wò anyu ndèŋgànà e rzi mò lòkɛ̀.”

³³Yerzù rzìi a òhwa hvɛ nanù ema, “È òkànèyà hvɛ mòhvɛhvɛ ŋmàna. O ma hwɛ mòhwɛnɛ wa hvaya ema à mà rzarza e hvaya ya eni, rzi a òna mayi ma hwehvùma ema hwe nyukahwa ò lì gbeyà hwènyɔ̀ɔ̀nì. A ma kaka ŋgawò ò lì lìŋga eŋge hvaya ya arzɛ, à mà òŋga hvɛ lìyami ò lì mita hwehvùma ò lì wurzirzɛ hwènyɔ̀ɔ̀nì. A ma òŋga hvɛ lìwòndò la ndɛkì ema e ma karzama ò ŋmanyu ema aŋga ndi hwà-ɔ̀ŋgelì hwà mà lìya ò lì ɔŋgeya eŋge hvaya. A ma aka hwatò ema hwà mà hwɛnɛ lì kawa eŋge mbòtà na mɔ̀ ndèŋgànà a ɛ̀ndɛ ò ehvɛhvɛ èkòmè.

³⁴Nà òma e hvònda ya lì hvata hwehvùma e ma ùke, òŋgò mòhwɛnɛ wa hvaya rzi a òma hwakutu hwa eni ò hwaŋga hwàgbèelì hwa eŋge hvaya ò lì ɛ̀ndɛ lì mò wòhweya e la eni lòŋgò la hwehvùma.

³⁵Hwàŋga hwàgbèèlì hwa eŋge hvaya rzi hwa hvùma hwaŋga hwakutu. Hwa anana mɔ̀kɔ, hwa òŋwa òhvɛhvɛ, e mɔ̀ ema à mà ùkirzɛ̀ hwàyàwò à mà aŋgbahwa màŋyàyi natɛ̀ɛ a ŋwa.

³⁶È mòhwɛnɛ wa hvaya rzi a hwa òmeya hwahvɛhvɛ hwàkutu hwa eni. Mɔ̀rzɔ̀ŋgì mò ma aka tɔ̀ e mò wòrzò. Ndi hwaŋga hwàgbèèlì hwa eŋge hvaya, hwa tìmba ndi lì hwa gbeyàna mamɛ ya arzɛ ema wɔ̀ hwà mà gbeyàne e wɔ̀ hwa wòrzò.

³⁷O lìrzukù, rzi e mò hwɛnɛ wa e hvaya a hwa òmeya ndi e ŋmanà wa eni wa mùnyanà. A òhwahwɛlɛ mɔ̀ ŋmìti nanù ema, ‘Ò jɔ̀kɛ̀ ònò nanù hwa hwɛni lì mò ŋgba èluhwe.’

³⁸Ndi na òma hwaŋga hwàgbèèlì hwa eŋge hvaya, hwà mà ɛnɛ eŋge mberza ya ama òŋgò mò hwɛnɛ wa hvaya ndi à jà, hwa òhwanɛ̀lɛ mɔ̀kɔ nà ɔ̀nɛyi nanù ema, ‘Onò ndi à rzaŋgòwa rzaŋgɛ. È je anù i mò òŋwe aŋga nanù ò ma i ma kùwàna ene erzaŋgò ya arzɛ.’

³⁹O èŋgànɛ̀lɛ̀ rzɔ hwà mà mò hvùma, hwa mò wurzana ò tenì ya eŋge hvaya, rzi hwa mò òŋwa.”

⁴⁰Yerzù rzìi a ijòwa iŋgi pìlìrzì ndɛnɛ na hwàmbaki hwa mbòwa nanù ema, “È ɔ̀ŋgɔ tɛ! Nàŋgɛ rzɔ e mòhwɛnɛ wa hvaya a jelì tɛ, mamɛ a gbeyàna hwaŋga hwatò ema hwà mà ɔŋgeya eŋge hvaya e?”

⁴¹Hwà mà alàhwɛ̀ Yerzù nanù ema, “À ò òŋwa hwaŋga hwatò hwa wòhwe. Rzi a ika hwahvɛhvɛ hwatò ò lì ɔŋgeya eŋge hvaya, ema hwa ò mò ŋgbɛ e la eni lòŋgò la mbòtà ò lìrzakò la lì hvata la hwehvùma.”

⁴²Yerzù rzi a hwa òhweyà nanù ema, “È rzi laŋgi ò èki ema Èya ya Lohwà e òhwa nanù ema, ‘Lìnyayi ema hwà-òŋgèlì hwà mà hvake na yòma ya ŋgundu, lì ɔ̀ndi lì ma timbɛ lìŋyàyi ema lì endàhwàwɛlɛ. È Rzàŋgò ndi à mà gbeyà ene eyà. Ndèŋgànɛ̀lɛ̀ e hwèlì mànyakà ò mirzɔ̀ ma arzu.’

⁴³Yerzù a hwatɛ hvɛ ò lì òhwa nanù ema, ‘Ene ŋgàna e gbèyi imba na e òhweyà ema, hwa ò e wòwàna hwehvòlò hwe anyu ema inyɔ e òhvi nàa hwatò hwa lìkànèyà là ama Lohwɛ̀, rzìi hweŋge hwehvòlò hwe ò ŋgbààhwà hwatò ema hwa ò gbeyɛ mamɛ ema Lohwɛ̀ a arza.’”[14]

⁴⁴

⁴⁵Nà òma Ipìlìrzì ndɛnɛ na Ihvàlìrzàyì i ma hweye mene meyàna ema Yerzù à mà kpɛ, hwà mà ayèmbɛ nanù ema wɔ̀ ndi à mà hwɛ lì kpɛ̀ɛyà mene meyàna.

⁴⁶Wɔ̀ rzìi, hwa wòteya lì arza ŋmanò mò lì mò lɛmbɛ. Ndi wɔ̀ hwà mà òka wɔ̀ŋgɔ̀ ò lì gbeyà nanù èhwanja wɔ̀ hwà mà ayèmbɛ nanù ema eŋge ŋgìndì e ma ɛnɛ ndi Yerzù nàa Mòòhwèlì wà èlìŋgɛ̀.