Read Mokpwe Matiyò 23 Bible Online

Matiyò 23 - Mokpwe bible

Matiyò 23

¹Yerzù rzìi a òhweyà e ŋgìndì na Hwà-òkòwèlì hwa eni nanù ema,

²“Hwà-òkòlèlì hwa è mbenda nà Ihvàlìrzàyì wɔ̀ ndi hwa ŋgbààhwi e wònja ò lì hwɛ hwàtìkòwèlì hwa e mbenda ya ama Mòrzè.

³O èŋgànɛ̀lɛ̀ rzɔ e hwɛnì lì hwa hweyàna, na ò lì gbeyà hweyà hwe arzɛ ema hwa e òhweyà ò lì gbeyà. Ndi e rzìi gbeyà mamɛ ema wɔ̀ hwa gbeyà. Èhwanja wɔ̀ hwa rza gbeyà mamɛ ema hwa òhwa.

⁴Wɔ̀ hwa ihwalɛ hwatò miyuna ò mburza ema me lìti, ndi wɔ̀ hwa rza uŋmɛ̀lɛ̀ tɔ̀ nyìrzɛ̀ tɔ̀ hvɔ̀kɔ ò lì òma tɔ̀ jɔ̀nɔ jɔ̀kɔ, ò lì hwa òŋgòwànà lì hwanɛ meŋge miyuna.

⁵Tɔ̀ mamɛ ya arzɛ ema hwa gbeyà, hwa e gbeyà ndi nanù ema hwatò hwa hwà ɛnɛ. Hwa gbeyà hwanà hwewòŋgò ema hwa tìla mòtìla mò Eyà ya Lohwà ò tenì rzi hwa hwe kaka ò mbɔ̀mbɔ̀ na ò mèyɔ̀yɔ̀ mè awu. Hwa gbeyà ŋmàamba mò èluhwe ema mà wàwà rzi hwà mà wɔ̀tɔ̀ ò ŋmanyu ya meŋgòmbe me awu.

⁶Hwa lìŋgàni lì lìya ò hwèki hwe hwèluhwe ò hwèki hwe ndèma. Nà lì lìya hvɛ ò mbòkò ja hwèluhwe ò ndawò ja màkanɛ̀.

⁷Hwa lìŋgàni hvɛ ema hwatò hwa hwà kɔ̀mɔ̀nè na èluhwe ò hwelùwa na ò lì hwa hwɛlɛ ema, ‘Mòòkòlèlì.’

⁸Ndi inyɔ e rzi keka lì emeyà nanù ema hwatò hwe hwɛlɛ ‘Mòòkòlèlì,’ èhwanja inyɔ hwa arzɛ e yahwì ndèŋgànɛ̀lɛ̀ hvɛ e òhvi ndi Mòòkòlèlì mɔ̀kɔ.

⁹È rzi keka hvɛ tɔ̀ lì hwɛlɛ tɔ̀ ima mòtò anù rze ya mɔ̀nyɛ̀ ‘Tatɛ̀,’ èhwanja e òhvi Tatɛ̀ wà anyu mɔ̀kɔ ema a hwèlì ò ŋmanyu yà lohwà.

¹⁰È rza hwɛnì hvɛ lì imanɛlɛ ema hwa e hwɛlɛ ‘Mòtìmbèlì,’ èhwanja e hwɛnì Mòtimbelì mɔ̀kɔ, è Mɔ̀ ema à Ɔ̀kirzɛ̀hwɛ̀yi.

¹¹È mɔ̀ ema a hwèlì è mòndɛnɛ wà anyu, mɔ̀ ndi à hwɛni lì hwɛ nàa e mògbèèlì wa anyu.

¹²Tɔ̀ ima mòtò ema à akàrzɛ̀yi Lohwɛ̀ a mò rzìirzɛ. Tɔ̀ ima mòtò hvɛ ema a arzìhwìrzɛ Lohwɛ̀ a mò kàrzɛ.”

¹³Yerzù rzìi a òhwa nanù ema “Mòjema na inyɔ̀ Hwà-òkòlèlì hwa mbenda na inyɔ Ihvàlìrzàyì, e hwèlì ndi hwatò hwa mòlàŋgà! Inyɔ e umbana hwatò lìyòhva là lìkànèyà là ŋmanyu yà Lohwà aŋga nanù hwatò hwa rza kpeya. Tɔ̀ inyɔ hwiti e rza ò kpèeyà. È rza tànɛyi hvɛ lì hwɛmɛ tɔ̀ hwaŋga hwatò ema hwa hwèlì hwa keka lì kpèeyà ò lì kpèeyà.[15]

¹⁵Mòjèmà na inyɔ Hwà-òkòlèlì hwa mbenda na inyɔ Hvàlìrzàyì, e hwèlì ndi hwatò hwa mèhvìlì! È lìŋgòwa ò èkòmè yɔ̀kɔ tɛ na enɛyi aŋga nanù e lùwa mòtò mɔ̀kɔ ema a tànɛyi lì e lata. Ndi mɔ̀ à e lati tɛ, inyɔ e mò hvaŋga nyayi ema mɔ̀ à hwɛni lì luwa kɔ̀kìrzɛ̀ ya ŋgelì ihwàkɛ ya mùùnya ema mò rza lìma lì aka tɔ̀ inyɔ.

¹⁶“Mòjèmà na inyɔ hwatò hwa ndima, ndi inyɔ e timba hwahvɛhvɛ hwatò. Inyɔ e òkòlɛ nanù ema, ‘Mòtò a atɛyi tɛ ò lìna la e Ndawò yà Lohwà, nanù òma la àtɛ̀yì la eni lì rza òhvi wòlìtò, ndi à àtɛ̀yì tɛ ò lìna la hwema hwe gòòlù ema hwe hwèlì ò tenì ya e Ndawò yà Lohwà nanù òma a hwɛni lì gbeyà eyà ema mɔ̀ àtɛ̀lɛ̀lɛ̀yì.’

¹⁷Inyɔ ndima ja hwèèti! Mamɛ e hwèlì wòlìtò lì aka e? È gòòlù ŋga e Ndawò yà Lohwà ema yɔ ndi e gbeyà e gòòlù yòòma ema e hwɛ wòtani ò wòrzò wò ama Lohwɛ̀ e?

¹⁸Inyɔ e òkòlɛ hvɛ nanù ema, ‘È hwèlì tɛ ema mòtò a àtɛ̀yì ò lìnà la ètàwò yà màkanɛ̀, eŋge ŋgàna e rza enje tɔ̀ eyà. Ndi tɔ̀ njɛnɛ ema a àtɛ̀yì ò lìnà là màhwèyà ema mà hwèlì ò ètàwò yà màkanɛ̀, nanù òma a hwɛni ndi lì gbeyà eyà ema mɔ̀ àtɛ̀lɛ̀lɛ̀yì.’

¹⁹Inyɔ hwatò hwa ndima! Ima yɔ e hwèlì wòlìtò, jàhwèyà ŋga ètàwò yà màkanɛ̀ ema yɔ ndi e gbeyà iŋgi jàhwèyà yòòmà ema e hwɛ Wòtani, ò wòrzò wò ama Lohwɛ̀ e?

²⁰O èŋgànɛ̀lɛ̀ rzɔ, tɔ̀ njɛnɛ ema a atɛ̀yi ò lìna la ètàwò yà màkanɛ̀, a atɛyi ndi ò lìnà la ètàwò yà màkanɛ̀ nà ò tɔ̀ ima jàhwèyà ima i hwèlì ò ŋmanyu yà eni.

²¹Tɔ̀ njɛnɛ hvɛ ema a atɛ̀yi ò lìnà là è Ndawò yà Lohwà, òma à atɛyi ndi ò lìnà là è Ndawò yà Lohwà nà ò lìnà là ama Lohwɛ̀ ema mɔ̀ ndi à lìya ò tenì yà eŋge è Ndawò.

²²Tɔ̀ ima mòtò hvɛ ema a atɛyi ò lìnà là è ŋmanyu yà lohwà, òma mɔ̀ hvɛ à àtɛ̀yì ndi ò lìnà là lìkànèyà là ama Lohwɛ̀ nà ò lìnà là ama Lohwɛ̀ e ma a lìyayi ò lìŋgi lìkànèyà.

²³“Mòjèmà na inyɔ, Hwà-òkòlèlì hwa mbenda, na inyɔ Hvàlìrzàyì. Inyɔ hwatò hwa mèhvìlì! Inyɔ e ŋgbà Lohwɛ̀ lìyòmɛ̀ lɔ̀kɔ la hwema hwe lìyambò hwe hvɛ̀ɛ̀hvɛ̀ nàa mìinitì, dilì, na kòmini.[16] Ndi e rza òhvi nyìrzɛ̀ ya lì gbeyà hweyà ema e mbenda e òhwa nanù ema e gbèèye. È rza enje jɔ̀kɛ̀ na Lohwà, e rza òhvi mèèmà me ììlì ndèŋgànɛ̀lɛ̀ e rza lòkɛ̀ Lohwɛ̀. È kanɛ̀ ò lì gbeyà hwene hweyà hwe arzɛ e rzi hwɛ lì lìya hwenɛyi.

²⁴Inyɔ hwatò hwa ndima, ndi e timba hwahvɛhvɛ hwatò. È òŋgama hweyà rzayi-rzayi ema hwe rza òhvɛ wòlìtò. Inyɔ e ulɛ e ŋmana mbindò ò malìhwà mà anyu ma lì nyɔ ndi e lìya ŋmiŋgò mò ndɛnɛ ema mò hwèlì ò tenì.

²⁵“Mòjèmà na inyɔ Hwà-òkòlèlì hwa mbenda, nà Ihvàlìrzàyì, inyɔ hwatò hwa mèhvìlì! È rzàŋgirzɛ i mburzà ja mawònde na hwewòki, ndi i tenì ja awu jò òndi ndi na hwèèmà ema inyɔ e ma hvùmàne hwatò nà njɔ̀ŋgu.

²⁶Inyɔ Ihvàlìrzàyì ja ndima! È lòme lì rzàŋgirzɛ e tenì ya mawònde na hwewòki ndèŋgànà i mburzà i rzàŋgirzɛhwɛ.

²⁷“Mòjèmà na inyɔ, Hwà-òkòlèlì hwa è mbenda nà Ihvàlìrzàyì, inyɔ hwatò hwa mèhvìlì! È hwèlì ndi nàa melìma me rzɔ̀ŋgɔ̀ ema me nyàlirzɛ̀hwɛ̀yi lìyɔ̀kì ema lì tana. Meŋge melìma me rzɔ̀ŋgɔ̀ me ɛneya melòŋga ò èwòka, ndi meŋge melìma, me òndi ndi na hwèerze na hwèembè ema hwà mà rzɔ̀mbɛ ò tenì.

²⁸Inyɔ hvɛ e hwèlì ndi nanù mɛnɛ. O èwòka, hwatò hwa e ɛnɛ ndi hwatò hwa wòtani ndi ò tenì ya anyu, e òndi ndi na mèhvìlì na wòhwe.”

²⁹“Mòjèmà na inyɔ, Hwà-òkòlèlì hwa mbenda nà Ihvàlìrzàyì, inyɔ hwatò hwa mèhvìlì! È òŋgeya hwà-òhwèlì hwa hwèlìŋgɛ̀ melìma ndèŋgànɛ̀lɛ̀ hvɛ e rzeeya i rzɔ̀ŋgɔ̀ ja hwatò ema hwa tɛmi ehve-ehve.

³⁰Inyɔ e lìŋgòwa rzii e a òhwa nanù ema, ‘Irzɔ i ma hwɛ tɛ e hvònda ya ama i mbamba ja arzu, òma i rzìi hwa late ò lì òŋwa hwà-òhwèlì hwa hwèlìŋgɛ̀.’

³¹O èŋgànɛ̀lɛ̀ rzɔ inyɔ e àwùlùhwɛ̀ inyɔ hwiti ema, inyɔ e hwèlì ndi e nyɔ̀ŋgɔ̀nì ya hwaŋga hwatò ema hwà mà òŋwa hwà-òhwèlì hwa hwèlìŋgɛ̀.

³²È ɛndɛ ò wòrzò e umbulɛ èwòlò ema i mbamba ja anyu i ma wòteyà!

³³Inyɔ manù màahwa! Yòma lìtumba la hvèyi! Nɛ e ɔ̀ŋgɛ̀lɛ̀yi ema e tànɛyi lì hwaŋga e kɔ̀kìrzɛ̀ ya èhvɔ̀ndì ya mùnya ema mò rza mòkòna e?

³⁴Ene ŋgàna e gbèyi na e òmeya hwà-òhwèlì hwa hwèlìŋgɛ̀, na hwatò hwa mahwiye, nà Hwà-òkòlèlì. Lòŋgò la hwanù hwatò, inyɔ e hwa òŋwa, hwanɛyi hvɛ e hwa wòmeya ò mbarza. Lòŋgò hvɛ e hwa gbiyɛ hvònji ò tenì ja mandawò ma anyu ma màkanɛ̀, na hwahvɛhvɛ, e hwa hvaya ò lì anjiya ò mambòwà na mambòwà.

³⁵Ò èŋgànɛ̀lɛ̀ rzɔ, inyɔ è ò hwanɛ̀ màyija mà hwatò hwa arzɛ ema hwa mà hwɛ ehve-ehve ema mà kòmèlì e rze ya arzɛ. Lìwòteyà ò e kpelì ya ama Abɛ̀lì ema à mà òŋwahwa ò ŋgundu natɛ̀ɛ nà ò è kpelì yà ama Rzàkàriyà, è ŋmanà wa mùnyanà wa ama Bɛ̀lɛ̀kàyìyà. Ema inyɔ e ma òŋwe ò ìtììtènì ja e Ndawò ya Lohwà na ètàwò yà màkanɛ̀.

³⁶Nà è òhweyà ndi e jɔ̀kɛ̀ nanù ema ene nyɔ̀ŋgɔ̀nì ndi è ò lùwɛ è kɔ̀kìrzɛ̀ ya iŋgi kpelì janyu ja arzɛ.”

³⁷“Bɔ̀ɔ! Inyɔ hwatò hwa Jèrurzalɛ̀mù, hwatò hwa Jèrurzalɛ̀mù! Inyɔ ema e ma òŋwa hwà-òhwèlì hwa hwèlìŋgɛ̀. Inyɔ ema e ma aŋgba hwaŋga hwatò ema hwà mà òmàhwɛlɛ màŋyàyi. È hwi ŋgelì iti ema nà mà kekɛ lì rzaŋga hwàna hwa anyu nàa wuhwa ema e gbiyama i ŋguma jà eni ò tenì ya mahvahve mà eni e? Ndi inyɔ e rza emeyà.

³⁸Oŋgò tɛ, Lohwɛ̀ a ò kìnyɛ̀lɛ̀ e ndawò ya aŋgɔ̀ ndeŋgànɛ̀lɛ̀, tɔ̀ mòtò a rza ò hwɛ ò tenì.

³⁹Ndi imba nà è òhweyà ema, inyɔ e rza nò ɛnɛ hvɛ, natɛ̀ɛ na e hvònda ema e ò òhwɛ nanù ema, ‘Mònàmɛ̀ na e mɔ̀ ema a jelì ò lìna la ama e Rzàŋgò.’”