Read Mokpwe Matiyò 26 Bible Online

Matiyò 26 - Mokpwe bible

Matiyò 26

¹Nà òmà Yerzù à mà kulɛ̀ lì òhwa hwenè hweyà rzìi a òhweyà hwà-òkòwèlì hweni nanù ema,

²“È hwi nanù ema ò mèenyà mehwakɛ ema me hwèlì ò wòrzò, òma è ndèma yà lì Akà Ɔnɛyi e ma uka. O wòŋgò wùnyà ndi è Ŋmanà wà è Mòtò wà Hwènàmà a ò akɛlɛhwɛ ò màà mà hwatò ema hwa mò wòmeya ò mbarza.”

³O eŋge hvònda, Ipìlìrzì ndɛnɛ na hwatimbèlì hwa èkòmè hwa mà arzàŋganɛ ò è ndawò ya ama Kàyìhvàrzì, e Pìlìrzì ema e karzami.

⁴Aŋga ndi hwà mà hwɛ ò lì weka ŋmanò mò lì ŋgbaŋgɛ Yerzù ò jututa na ò lì mò òŋwa.

⁵Hwà mà kaka nanù ema, “I rza hwɛni lì gbeyà nanù ò wùnyà wò e ndèma èhwanja hwatò hwa ò jana lùwànje.”

⁶Yerzù à mà hwɛ ò ndawò yà ama Rzìmɔ̀nì mòtò ema à mà hwɛ à mà ɔ̀kìrzɛ̀ è nyàmbɛ yà mɔ̀lɔ̀ŋgɔ ò mbòwà yà Bɛ̀tanì.

⁷È hvònda ema Yerzù à mà hwɛ lì làa, mòlanà mɔ̀kɔ rzìi à mò jèeyà nà kòhwà yà lìyɔ̀kì là hvɛ̀ɛ̀hvɛ̀, lìyɔ̀kì ema lì andahwa wòlì rzayì-rzayì à mò kòmeya è lɔ̀ là arzɛ ò mòhvò mò eni.

⁸Nà òma Hwà-òkòwèlì hwa eni hwa mà ɛnɛ nanù rzìi hwa tàtà, rzìi hwa ijòwa nanù ema, “Mamɛ è hwèlì lìtiŋga là ene mbɔ̀lɔ̀nì e?

⁹Ò mà lìni lìyɔ̀kì lì àhwirzɛ̀hwɛ̀ mòrzurzèlì mò jɔ̀kɛ̀ rzìi iŋgi kahvà ì ŋgbàahwa mèlìrza mè hwatò.”

¹⁰Yerzù à mà hwiya mamɛ ema hwa mà hwɛ lì òhwa, rzìi à hwa ijòwa nanù ema, “Mamɛ ndeŋgatɛ è tàkìrzɛ̀ ònò mòlanà e? À nò gbèèlì ndi eyà yà gbamù.

¹¹È ò òhva mèlìrza mè hwatò nà inyɔ ì hvònda jà arzɛ ndì è rza ò nò òhva imba ì hvònda jà arzɛ.

¹²Mɔ̀ à nò kòmi ndi lìnì lìyɔ̀ki ò mòhvò mò ami ò lì nò wòŋgirzɛnɛ hwèlàmèlì hwe ami.

¹³Nà è òhweyà nà è jɔ̀kɛ̀ nanù ema, tɔ̀ ima èki ema mònò Ŋmɛ̀ndì mò Gbamù mò òhwàhwa ò rze yà arzɛ, hwa ò òhwa enè eyà ema ònò mòlanà à gbèyi, ò lì mò ɔ̀ŋgɛ̀lɛ̀.”

¹⁴Rzìi Jùdàrzì Ìrzìkalìyɔ̀tɛ̀ ema à mà hwɛ mɔ̀kɔ wa lìyòmɛ̀ la hwà-òkòwèlì na hwahwàkɛ hwa ama Yerzù, à mà ɛ̀ndɛ lì ùŋmanɛlɛ Ipìlìrzì ndɛnɛ,

¹⁵rzìi a hwa ijòwa nanù ema, “È hwèlì tɛ ema nà e àkɛ̀lɛ̀lɛ̀yì tɛ Yerzù ò lì mò ŋgbaŋgɛ, mamɛ e tànɛyi lì nò ŋgbà e?” Rzìi hwa mò tɛ̀tìrzɛ̀ rzayiyàwò ja hwɛ̀ɛkɛ̀ hwe rzilìwa.

¹⁶Lìwòteya eŋge hvònda ndi Jùdàrzì a mà wòteya lì arza ŋmanò ò lì hwa akɛ̀lɛ̀lɛ̀ Yerzù.

¹⁷O wùnyà wò wòrzò wò e Ndema yà Èhvòòtò ema e rza hwɛnɛyi Èhwindi Hwà-òkòwèlì hwa ama Yerzù rzìi hwa jà lì mò ijòwa nanù èma, “One ò arza nanù ema jò ò rzèkeya hwèlèèlì hwe è Ndèma yà lì Akà Ɔnɛ̀yi e?”

¹⁸Yerzù rzìi a hwa omà ò mà mòtò mɔ̀kɔ ò mbòwà ema hwa mò òhweyà nanù ema e Mòòkòlelì a òhwi nanù ema, “È hvònda yà ami e ma uka. O ndawò ya aŋgɔ̀ ndi imba na hwà-òkòwèlì hwa ami jò ò leeya mòlelì mò e Ndemà yà lì Akà Ɔnɛyi.”

¹⁹Hwà-òkòwèlì hwà mà gbeyà na òmà Yerzù a mà hwa òhweyà, rzìi hwa rzèkeya hwèlèèlì hwe è Ndèma yà lì Akà Ɔ̀nɛyi.

²⁰Nà òma e ŋgòmbe ya lohwà e ma uke, Yerzù na lìyòme la eni la hwà-òkòwèlì na hwahwakɛ hwa lìya ò hweleelì.

²¹Nà òmà hwa mà hwɛ lì laa, Yerzù rzìi a hwa òhweyà nanù ema, “Nà e òhweyà na e jɔ̀kɛ̀ nanù ema, mɔ̀kɔ wa anyu a ò nò akɛlɛlɛ ò màà mà hwàkɔ̀yèlì hwa ami.”

²²Hwà-òkòwèlì hwa ama Yerzù hwà mà tuwa mèèmà rzìi hwa wòteyà lì mò ijòwa mɔ̀kɛ-mɔ̀kɛ nanù ema, “Ìi Rzàŋgò na lòkɛ̀ nanù ema rzeketɛ imba ndi ò òhwàna e?”

²³Yerzù rzìi à hwa alàhwɛ̀ nanù ema, “Mɔ̀kɔ wà anyu ema à tɔ̀tɔ ehvòòtò yà eni ò mɔ̀njɔ nà imba à ò nò àhwirzɛ̀.

²⁴È Ŋmanà wà è Mòtò wà Hwènàmà à hwɛnì lì ŋwa nà òma è kààtì yà Lohwà è òhwi, è ò hwɛ màwɔ̀ŋgɔ̀ nà òŋgò mòtò ema à ò nò ahwìrzɛ. È mà lɔ̀wu ema òŋgò mòtò à rzìi ŋyahwe hvɛ tɔ̀.”

²⁵Jùdàrzì è mɔ̀ ema à mà hwɛnɛ lì mò àhwirzɛ̀ mɔ̀ hvɛ rzìi à mò ijòwa nanù ema, “Ìi Mòòkòlèlì, imba e?” Yerzù rzìi à mò tìmbìrzɛ̀lɛ̀ nanù ema, “Nà òma ò òhwi.”

²⁶Nà òmà Yerzù na hwà-òkòwèlì hwa eni hwà mà hwɛ lì làa Yerzù rzìi a wòwà ehvòòtò, a ŋgba Lohwɛ̀ jeka, à è kahwa à è ŋgba hwà-òkòwèlì hwa eni rzìi a òhwa nanù ema, “È wòwè e lèè e nyò ya ami ene.”

²⁷Rzìi à wòwà hvɛ lìwònde, à ŋgbà Lohwɛ̀ jèka rzìi à hwa ŋgba è lɔ̀ à hwa òhweyà nanù ema, “Inyɔ hwa arzɛ è nyɔ.”

²⁸Yerzù rzìi à hwa òhweyà nanù ema, “Màyìjà mà ami manù ema mà kòmèlì ò mèyòhvò mè rzayì-rzayì ja hwatò. Manù màyija mà hwèlì ndi màyija mà hweyi hvènya, nanù ema Lohwɛ̀ à hwa làkìrzɛ̀ wòhwe wò awu.

²⁹Nà è òhweyà nanù ema, nà rza ò nyɔ hvɛ hwene hwènyɔ̀ɔ̀nì tɔ̀ wùnyà, natɛ̀ɛ wùùnya ema nà ò hwe nyɔ̀ɔ hvɛ hwe hvènya nà inyɔ ò lìkànèyà là ama Tatɛ̀ wà ami.”

³⁰Hwà mà emba rzɔ mɔ̀rzɔ̀kɔ̀ mò jeka rzìi hwa ɛ̀ndɛ ò mòòlì mò Njàhwɛ̀.

³¹Nà òma hwà mà uke ò ŋmanyu ya mòòlì, Yerzù rzìi a òhweyà hwà-òkòwèlì hwa eni nanù ema, “O wònò wuu mɛnɛ, inyɔ hwa arzɛ e ò hwaŋga ò lì nò lìya. È ò hwaŋga èhwanja ò mamɛ ema e ò nò gbèyɛ̀nɛ. È tìlahwì ò kààtì ya Lohwà nanù ema, ‘Nà ò òŋwa e mɔɔŋgelì wa mɛ̀lɛ̀ŋgù ndèŋgànà mɛ̀ɛlɛ̀ŋgù me arzɛ me ò wuhweyà.

³²O mburza lì hvùmùlɛhwɛ la ami ò kpelì, na ò ɛndɛ ò wòrzò wò anyu ò lì kpèeyà ò mbòwa ya Galìlì ema e ò nò ùŋmànɛ̀lɛ̀.’”

³³Nà òma Yerzù à mà kulɛ̀ lì òhwa nanù, Pètrò rzìi à mà alàhwɛ̀ nanù ema, “Tɔ̀ è hwɛ ndi ema hwanɛ̀yi hwa arzɛ hwa ò rzɔ̀rzì imba nà rza tànɛyi nà ò rzɔ̀rzɔ̀.”

³⁴Yerzù rzìi à òhweyà Pètrò nànù ema, “Ìi Pètrò, nà è jɔ̀kɛ̀ wònò wùu mɛnɛ ndèŋgànà è mòmɛ̀ wà wuhwà à è tòŋga ò nò rzɔ̀rzɔ̀ ŋgelì iyàwò.”

³⁵Pètrò rzìi à alàhwɛ̀ nanù ema, “Tɔ̀ è hwɛ ndi nanù ema nà hwɛni lì ŋwa nà ò wà nà rza tanɛ lì ò rzɔ̀rzɔ̀.” Hwanɛ̀yi Hwà-òkòwèlì hwa arzɛ wɔ̀ hvɛ hwa mà òhwa ndi nanù mɛnɛ.

³⁶O mburza nanù Yerzù na Hwà-òkòwèlì hwa eni hwà mà ɛndɛ ò èki ema e ma hwɛ̀lɛ̀hwɛ̀ Gɛtrzɛmani. Nà òma hwà mà uke aŋga, Yerzù rzìi a hwa òhweyà nanù ema, “È lìya anù na tòmba ɔ̀nɛyi wate ò lì kanɛ̀.”

³⁷Yerzù à mà wòwa Pètrò nà hwàànà hwa wunyanà hwa ama Rzɛ̀bɛ̀dì hwahwàkɛ. A ma ònda ndùtù na mòtaka ò ŋmèma.

³⁸Yerzù rzìi a hwa òhweyà nanù ema, “Ŋmemà mò ami mò òndi na ndùtù ema e tànɛyi lì nò òŋwa. È lìya anù è lìya ò ehvɛ̀nyɛ̀ nà imba.”

³⁹Yerzù à mà tòmba ŋmanà hvòkà teŋyi, rzìi à ahvimbɛ nà lùùŋgà ò rze, rzìi à kanɛ̀ nanù ema, “Ìi Tatà wà ami, è hwèlì tɛ ema è tànɛyi tɛ lì gbèyɛ̀nɛ, ò nò ulɛ̀ ò tenì yà mònò mòtàkà. Ndi tɔ̀ nanù gbeyà ndi mamɛ è ò lɔ̀ɔ̀nì ndi rzeketɛ nà òma imba nà àrzeyà.”

⁴⁰Nà òma à kùlɛ̀ lì kanɛ̀, rzìi à tìmbeya hwaŋga Hwà-òkòwèlì hwa eni hwààyɛ̀. À hwa ùŋmanɛlɛ ema hwa lìmelì ndi ò ijɔ, rzìi à ijòwa Pètrò nànù ema, “È rza tanɛ tɔ̀ lì nò àyinjɛ̀lɛ̀nɛ̀ tɔ̀ awa hvɔ̀kɔ e?

⁴¹Lìya èhvɛnyɛ, kanɛ̀ aŋga nanù Lohwɛ̀ a rza emeyà ema màkèkìrzɛ̀nɛ̀ mò ò jèeya. Ŋmèma mò lìŋgàni, ndi e nyàmà ya nyò e ɔ̀tɔ̀.”

⁴²Yerzù a tìmba hvɛ ò lì kanɛ̀ rzìi a òhwa nanù ema, “Ìi Tatà wa ami, e hwèlì tɛ ema ò rza tanɛ lì nò wòwàna mònò muna mò mòtàkà ema na rzi mò hwanɛ inyɛ lì emeyà lì aŋgɔ̀ lì gbèyɛ̀nɛ.”

⁴³A ma tìmba hvɛ rzìi a ùŋma hwaŋga hwà-òkòwèlì hwa eni hwa lìmelì ndi ò ijɔ, èhwanja hwà mà òhva ijɔ ò mìirzɔ̀ ma awu rzayi-rzayi.

⁴⁴Yerzù à mà hwɛmɛ hvɛ hwaŋga hwà-òkòwèlì hwa eni hwaayɛ, rzìi a tìmba hvɛ ò màkanɛ̀ e ŋgelì ema e ma ùkirzɛ̀ iyàwò, rzi a òhwa mòlemilemi mò mbɔrzi ò màkanɛ̀.

⁴⁵Rzìi à jèeyà hvɛ Hwà-òkòwèlì hwa eni hwaayɛ a hwa òhweyà nanù ema, “È lìmelì ndi ò ijɔ nanù mɛnɛ na lì Arzìyòlɛ̀ e? È ɔ̀ŋgɔ tɛ! È hvònda ene ema è Ŋmanà wà è Mòtò wà Hwènàmà a ò ŋgbààhwà ò màà mà hwatò hwa wòhwe.

⁴⁶È tɛ̀mɛ̀ je ɛ̀ndɛ. È ɔ̀ŋgɔ tɛ, e mòtò ema à mà màa lì nò àhwirzɛ̀ mɔ̀ ò nò a jà.”

⁴⁷Nà òma Yerzù à mà hwɛ lì òhwa, Jùdàrzì Ìrzìkalìyɔ̀tɛ̀ mɔ̀kɔ wa eni hwa Lìyòmɛ̀ là Hwà-òkòwèlì nà hwahwàkɛ, à mà jà nà è ŋgindi ndɛnɛ yà hwatò ema hwa mà òhva ì rzɔ̀lɔ̀, nà hweeye hwa mà òmahwa ndi nà Ipìlìrzì ndɛnɛ nà hwàmbaki hwa mbòwà.

⁴⁸È ŋmahwirzelì à mà hwɛ à mà màa lì hwa rzèkeya èmɛ̀nɛ̀nì nanù ema, “È mɔ̀ ema na arzàŋgànɛ̀lɛ̀ mɔ̀ òŋgò. È mò ŋgbaŋgɛ.”

⁴⁹Liwòkimɛnɛ, Jùdàrzì rzì a ɛndɛ ò ma Yerzù rzìi a òhwa nanù ema, “Ɛ̀yɔ̀lɛ̀ e hwɛ na ò wa Mòòkòlèlì,” a mò arzàŋgànɛ̀lɛ̀.

⁵⁰Yerzù rzìi a mò alàhwɛ̀ nanù ema, “Ìi ŋmàyi ɛ̀ndɛ ò wòrzò gbeyà mamɛ ò jɛlɛlɛ.” Hwaŋga hwatò rzìi hwa jà, hwà mà hvɔ̀ɔtɔ̀ Yerzù, rzìi hwa mò lɛmbɛ kɛlɛtɛ.

⁵¹Liwòkimɛnɛ, mɔ̀kɔ ema à mà hwɛ nà Yerzù à mà ɔ̀mɔ è rzɔ̀lɔ̀ yà eni à rzenjòwa lìtò là ama è mòkòmè wà ama è Pìlìrzì e karzami.

⁵²Yerzù rzìi à mò òhweyà nanù ema, “Timbirzɛ è rzɔ̀lɔ̀ yà aŋgɔ̀ ò ekpa yà rzɔ̀lɔ̀, tɔ̀ ima mɔ̀ ema à ana nà rzɔ̀lɔ̀, rzɔ̀lɔ̀ ndi hwa mà òŋwàna.

⁵³O rza hwi nanù ema, na tànɛyi lì hwɛlɛ e Tatɛ̀ wa ami ò lì nò òŋgòwànà, ndèŋgànɛ̀lɛ̀ ò lìwòkimɛnɛ a nò òmeya lì aka lìyòme la matutà mà aŋgèlì nà mà hwàkɛ e?

⁵⁴Ndi na gbe tɛ nanù, nɛ rzɔ na hweyòhwèlì hwe e kààtì ya Lohwà ema e òhwa nanù ema ene e ò gbèyɛ̀nɛ e òndìrzɛ̀hwɛ e?”

⁵⁵Yerzù rzìi a ijòwa eŋge ŋgindi nanù ema, “Nà hwèlì ndi ŋmìhwɛ̀ ema e jelì lì nò ŋgbaŋgɛ na hweeye na irzɔ̀lɔ̀ e? Mamɛ ndeŋgatɛ e rzi nò ŋgbaŋgɛ e hvònda ema nà mà hwɛ lì òkòlɛ̀ wùnyà tɛ ò e Ndawò yà Lohwà e?

⁵⁶Ndi hwenè hwe arzɛ hwe ma gbèyɛ̀nɛ ò lì òndìrzɛ̀ mamɛ ema hwà-òhwèlì hwa hwèlìŋgɛ hwà mà tile ò e kààtì ya Lohwà.” Rzìi Hwà-òkòwèlì hwa arzɛ hwà mà mò rzɔnjɛ̀lɛ̀ rzìi hwa hwàŋga.

⁵⁷Hwàŋga ema hwa mà ŋgbaŋgɛ Yerzù hwa mà mò ɛ̀ndɛnɛ ò è ndawò yà ama Kàyìhvàrzì è Pìlìrzì ema è kàrzamì. Aŋga ndi Hwà-òkòlèlì hwa mbenda nà hwàmbaki hwa mbòwà hwa mà arzàŋganɛ.

⁵⁸Nà òma hwa mà wòwe Yerzù, Pètrò hvɛ à mà mò nɔ̀ŋgɔ ò mburzà ŋmanà hvòka natɛ̀ɛ hwa mà jà lì kòmbɛnɛ èwòka yà ama Kàyìhvàrzì. À mà kpèeyà rzìi à lìya nà hwà-ɔ̀ŋgèlì hwa è Ndawò yà Lohwà ò lì ɔ̀ŋgɔ nɛ mòŋgò ŋmaŋgò mò ama Yerzù mò kuweya.

⁵⁹Ipìlìrzì ndɛnɛ nà hwanɛyi hwèkàyìrzèlèlì hwa arzɛ hwà mà keka lì arza hwatò ema hwa hwà tɛmeya mbòŋgi ja mòlàŋgà lì hvòmɛ̀nɛ̀ Yerzù aŋga nanù a ò òŋwahwa.

⁶⁰Ndi hwa rzìi mò lùwane tɔ̀ njɔ̀mi tɔ̀ nɛ rzayì-rzayì ja hwatò hwà mà tɛ̀mɛ̀ mbòŋgi ja mòlàŋgà. O lìrzukù rzìi mbòŋgi ja mòlàŋgà ihwakɛ i wurza rzìi jò òhwa nanù ema,

⁶¹“Onò mòtò à mà òhwa nanù ema, ‘Mɔ̀ à tànɛyi lì wuulɛ ene Ndawò yà Lohwà rzìi à e òŋga hvɛ ò ìtììtènì ja mèenyà meyawò.’”

⁶²Nà òma e Pìlìrzì e karzami e ma hweye nanù, e tɛ̀mɛ̀ ò ŋmanyu rzìi a ijòwa Yerzù nanù ema, “O rza òhvi tɔ̀ eyà ya lì òhwa ò lì alàhwɛ̀ mamɛ ini mbòŋgi jò òhwa ò lì ò teŋgɛ̀nɛ̀ e?”

⁶³Ndi Yerzù à mà andama e ye eni ŋmɛɛ. È Pìlìrzì e karzami e ma mò òhweyà hvɛ nanù ema, “O lìinà la ama Lòohwà ema lì hwèlì lòŋgɛ, na ò kànèlì na yòmbò ema ò jò òhweyà ŋga ò wa ndi ò hwèlì è Mɔ̀ ema à Ɔ̀kirzɛ̀hwɛ̀yi, è Ŋmanà wà ama Lohwà e?”

⁶⁴Yerzù rzìi à mò tìmbìrzɛ̀lɛ̀lɛ̀ nanù ema, “Nà òma ò òhwi. Nà è jɔ̀kɛ̀ imba nà è òhweyà inyɔ hwa arzɛ ema, lì wòteyà naŋgɛ è ɛnɛ̀ è Ŋmanà wà è Mòtò wà Hwènàmà à lìya ò lìyà là mòmɛ̀ là ama Lohwɛ̀ lì karzami. È ɛnɛ̀ nɛ à ò lììya ò ŋmanyu yà mbàkì a rzìhwà ò rze yà mɔ̀nyɛ̀.”

⁶⁵Aŋga ndi e Pìlìrzì ema e karzami ya a nyààhwà mààtù ma eni ò lì uŋmɛ̀lɛ̀ nanù ema a tàti rzìi a òhweyà hwatò hwa e ndawò ya hwèkàyìrzèlèlì nanù ema, “A òhwi ndi ìrzìlàkò! Mamɛ ja àrzeyà hvɛ ehvɛhvɛ mbòŋgi e? Inyɔ hwa arzɛ e hweyi na òma a òhwàna ìrzìlàkò!”

⁶⁶Rzìi à hwa ijòwa nanù ema, “Mamɛ inyɔ hvɛ e ɔ̀ŋgɛ̀lɛ̀ e?” Wɔ̀ hvɛ hwa tìmbìrzɛ̀lɛ̀lɛ̀ nanù ema, “A tùu ŋmaŋgò ò èŋgànɛ̀lɛ̀ rzɔ, a kànɛ̀ lì ŋwa.”

⁶⁷Lòŋgò la hwatò rzìi hwa wòteyà lì mò rzɔ̀yeya hweyɔlì ò wòrzò wò eni, na lì mò tiyà. Lòŋgò hvɛ hwà mà hwɛ lì mò rzama màwumbɛ,

⁶⁸hwà mà hwɛ lì òhwa nanù ema, “O wa ema ò òhwa nanù ema ò hwèlì ndi è Mɔ̀ ema à Ɔ̀kirzɛ̀hwɛ̀yi, ò jò òhweyà e mòtò ema a ò hvahvi.”

⁶⁹Nà òma Pètrò à mà lìya aŋga èwòka, rzìi mògbèèlì mɔ̀kɔ wà ŋgɔ̀ndɔ̀ wà ama è pìlìrzì è kàrzamì è mò jèeyà, rzìi à mò òhweyà nanù ema, “Ò hwèlì ndi mɔ̀kɔ hwa hwaŋga hwatò ema hwa ɛ̀ndɛ̀lɛ̀nɛ̀ nà Yerzù òŋgò munyanà wà erzòòkà yà Galìlì”

⁷⁰Pètrò à mà rzɔ̀rzɔ̀ ò marzò mà wɔ̀ hwa arzɛ rzìi à òhwa nanù ema, “Nà rza hwi mamɛ inyɔ e òhwa hvɛ tɔ̀.”

⁷¹Aŋga ndi à anjiya aŋgà rzìi à ɛ̀ndɛ lì kòmbɛ̀nɛ̀ hwèkpèèlì hwe è kɔ̀tɔ̀ yà eŋge ewòka rzìi ò hvɛhvɛ mògbèèlì wà ŋgɔ̀ndɔ̀ à mò ɛnɛ rzìi à òhweyà hwatò ema hwa mà hwɛ aŋga nanù ema, “Onò mòtò à mà hwɛ nà Yerzù è mòtò wà è mbòwa yà Nàrzarɛ̀tì.”

⁷²Pètrò à mà rzɔ̀rzɔ̀ hvɛ rzìi à òhwa nanù ema, “Nà ààtɛ̀ ema nà rza hwi òŋgò mòtò.”

⁷³Ò ŋmanà hvòka hvònda hwaŋga hwa mà tɛ̀mɛ̀ aŋga hwa à gbèeyà Pètrò rzìi hwa òhwa nanù ema, “Ò kɔ̀ɔ̀ ndi hweyà hwe ŋgundu, ò jɔ̀kɛ̀ ò hwèlì ndi mɔ̀kɔ ema à mà nɔ̀ŋgɔ òŋgò mòtò. Èhwanja hweyòhwèlì hwe aŋgɔ̀ hwe ò wulu nanù ema ò uhwɛlɛlɛ ò erzòòkà yà Galìlì.”

⁷⁴Pètrò rzìi ààtɛ̀ nanù ema, “Nà rza hwi ònò mòtò. Inyɛ̀ Lohwɛ̀ à nò kɔ̀kìrzɛ̀ è hwèlì tɛ ema nà kɔ̀ɔ̀ ndi hweyà!” Liwòkimɛnɛ è mòme wà wuhwà rzìi à tòŋga.

⁷⁵Pètrò rzìi à ɔ̀ŋgɛ̀lɛ̀ jòòhwì ema Yerzù à mà mò òhweyà nanù ema, “Ndèŋgànà è mòme wà wuhwà à è tòŋga, ò nò rzɔ̀rzɔ̀ ŋgelì iyàwò nanù ema ò rza nò hwi.” À mà wurza ò èwòka rzìi à eyà ije-ije.