Read Mokpwe Matiyò 3 Bible Online

Matiyò 3 - Mokpwe bible

Matiyò 3

¹O mburza hvònda, Yòwanìrzɛ̀ è Mòlùhwìrzèlì à mà jà ò mòrzanjɛ̀ mò è mbòwà yà Jùdèyà rzìi à wòteyà lì òhwa Eyà yà Lohwà. Rzìi mɔ̀ à òhwèyà hwatò nanù ema,

²“È rzɔnjɛ̀lɛ̀ hwègbèèlì hwe anyu hwe wòhwe, èhwanja lìkànèyà là ama Lohwɛ̀ lì mà kòmbɛ̀nɛ̀.”

³Yòwanìrzɛ̀ ndi à hwèlì è mòtò ema è mòòhwèlì wà èlìŋgɛ̀ Àyìrzayà à mà hwɛ lì òhwa è hvònda ema à mà òhwe nanù ema, “Njàmbɛ̀ è mà uhwɛ̀lɛ̀lɛ ò mòrzanjɛ̀ ema è mà hwɛ lì òhwa nanù ema, ‘È tɛ̀nɛ̀nɛ̀ ìnjìya jà hwèyàkèlì hwe eni.’”

⁴Liwɔ̀ti là ama Yòwanìrzɛ̀ lì mà gbèya hwàna ndi nà màjùmbù mà nyàmà ema è hwɛ̀lɛ̀hwɛ̀ Kàmɛ̀lì. È ŋgòlì yà eni hvɛ ema gbèya hwàna nà mèyòwò mè è nyàmà yà waŋga. Mòlèlì mò eni mò mà hwɛ ndi mègbambèmbè nà wòò.

⁵Hwatò hwa mà uhwɛ̀lɛ̀lɛ ò mbòwà ndɛ̀ɛ̀ndɛ̀ yà Jèrurzalɛ̀mù, nà ò màhvɛhvɛ màmbòwà mà erzòòkà yà arzɛ yà Jùdèyà, nà ò hwèhvɛhvɛ hwèkòmè ema hwe mà kòmbɛ̀nɛ̀ mòhvèhvè mò mòrzò mò Jɔdànì ò lì jèeyà Yòwanìrzɛ̀.

⁶Nà òma hwaŋga hwatò hwa mà purzɛ̀lɛ̀ wòhwe wò awu, rzìi Yòwanìrzɛ̀ à hwa lùhwìrzɛ̀ ò mòrzò mò Jɔdànì.

⁷Nà òma Yòwanìrzɛ̀ à mà ɛnɛ rzayì-rzayì ja Hvàlìrzàyì nà Rzàdùrzì hwa jà ema à hwa lùhwìrzɛ̀, rzìi à hwa òhwèyà nanù ema, “Inyɔ hvèyi! Njɛnɛ à è kòkòhwɛ̀lɛ̀yi nanù ema è hwaŋgè è kɔ̀kìrzɛ̀ yà ama Lohwɛ̀ ema è jà e?

⁸Inyɔ è ɛndɛ è gbèèye hwèyà ema hwe uŋmɛ̀lɛ̀ nanù ema è mà rzɔnjɛ̀lɛ̀ wòhwe wò anyu.

⁹È rzi ɔ̀ŋgɛlɛ hvɛ̀ èma è tànɛyi lì hwaŋga hwèkɔ̀kìrzèlì hwe ama Lohwɛ̀ ò lì àwòhwànɛ̀lɛ̀ inyɔ hwiti nanù ema, è hwèlì ndi hwàànà hwa ama Abràhamù. Ndi nà è òhwèyà ema Lohwɛ̀ à tanɛ̀yi lì gbèya na manù màŋyàyi ò lì mà gbèya ema mà hwɛ hwàànà hwa ama Abràhamù.

¹⁰Naŋgɛ yòòndò è mà màà lì naŋga ò mèyaŋga mè màyi. O èŋgànɛ̀lɛ̀ tɔ̀ ima gbèe ema wò rza ŋyàayi hwehvùma hwe gbamù, wò hwɛnì lì kɛ̀ɛ̀hwɛ̀ lì hvimbahwa ò mùnya.

¹¹Imba nà è lùhwìrzɛ̀ nà malìhwa ò lì uŋmɛ̀lɛ̀ nanù ema è mà ayèŋgòwɛ̀ ò wòhwe wò anyu. Ndi òhvɛhvɛ mòtò à hwèlì à jà ema à nò akàyi. Ema imba nà rza ukɛ hvɛ tɔ̀ mòtò ema à tanɛ lì hwànɛ hwètàmbì hwe eni. Mɔ̀ à è lùhwìrzɛ̀ ndi nà Èlìŋgɛ̀ yà Wòtani nà mùùnya.

¹²Ɛ̀rzɛ̀ŋgbɛ̀nì ema è hwèlì ò lìya là eni, ò lì rzɛ̀ŋgbɛnɛ hwèyàrzà ò hvɔ̀ŋgɔ̀ ema ì hwèlì ò kɛ̀lɛ. À kulɛ tɛ lì rzɛ̀ŋgbɛ, à rzàŋgà ì hvɔ̀ŋgɔ̀ jà gbamù, à ji ùtà. Rzìi à rzàŋgà hvɛ hwèyàrzà, à hwe rzòwà ò mùnya ema mò rza lìma.”

¹³Naŋgɛ Yerzù à mà uhwɛ̀lɛ̀lɛ ò erzòòkà ya Galìli à ɛndɛ òma Yòwanìrzɛ̀ ò mòrzò mò Jɔdànì aŋga nanù à mò lùhwìrzɛ̀.

¹⁴Ndì Yòwanìrzɛ̀ à mà keka lì mò gbèya nanù ema à eŋgòwe ŋmèma mò eni, rzìi à mò òhwèyà nanù ema, “Nà òma è hwèlì ndi nanù ema ò wà ndi ò hwɛnì lì nò lùhwìrzɛ̀, mamɛ ndeŋgatɛ ò nò jèeya ema nò lùhwìrzɛ̀ e?”

¹⁵Yerzù rzìi à mò tìmbirzɛ̀lɛ̀lɛ̀ nanù ema, “Inyɛ̀ è hwɛ nanù ò naŋgɛ. Ò lɔ̀wu ema ì gbèèye ene eyà naŋgɛ nà òma Lohwɛ̀ arza.” Yòwanìrzɛ̀ rzi à emèyà ò lì mò lùhwìrzɛ̀.

¹⁶Ò wòtɛmɛ̀tɛmɛ̀ nà òmà Yerzù à mà lùhwìrzɛ̀hwɛ̀, rzìi à anjiya ò tenì yà màlìhwa. Ò lìŋgi lìrzàkò mɛ̀nɛ̀ è ŋmanyu yà lohwà è mà lìhvòwèyà, Yerzù rzìi mɔ̀ à ɛnɛ Èlìŋgɛ̀ yà ama Lohwɛ̀ è uhwɛ̀lɛ̀lɛ̀yi ò ŋmanyu yà lohwà rzìi è rzìhwa nàa mbeŋga è mò tɛ̀mɛ̀ ò mòhvò.

¹⁷Lìlò lì mà òhwa ò ŋmanyu yà lohwà nanù ema, “È Ŋmanà wà ami wà ndìŋgɛ yà màlìŋgò ònò, à nò òkirzɛ imba mɔ̀nyɛ̀ŋgì.”