Read Mokpwe Matiyò 4 Bible Online

Matiyò 4 - Mokpwe bible

Matiyò 4

¹O mburza hvònda, Yerzù à mà tìmbahwa nà Èlìŋgɛ̀ ò lì kèkirzɛhwɛ̀ nà Mòkarzɛ̀ ò mòrzanjɛ̀.

²Yerzù à mà lìya mòkìyà njàwò ò tenì yà mènìmènì mè mèenyà. Ò mburzà eŋge hvònda à mà hwèyà njàwò.

³Mòkarzɛ̀ rzìi à mà mò jèeyà, rzìi à mò òhwèyà nanù ema, “Ò hwèlì tɛ è Ŋmanà wà ama Lohwɛ̀, kànèyà manù màŋyàyi mà timbe, hwèhvòòtò.”

⁴Ndi Yerzù à mà mò alàhwɛ̀ nanù ema, “È tìlàhwì ò è kààtì yà Lohwà nanù ema, ‘Rzèketɛ èhvòòtò mɛnɛ ndi mòtò à làa ò lì hwɛ lòŋgɛ. Ndi tɔ̀ ima mbɔrzi ema Lohwɛ̀ à òhwi yɔ̀ ndi è gbèya è mòtò wà hwènàmà à hwɛ lòŋgɛ.’”

⁵Mòkarzɛ̀ rzìi à mò tìmbà à mò ɛ̀ndɛnɛ ò mbòwà ya wòtani yà Jèrurzalɛ̀mù. Rzìi à mò tɛ̀mɛ̀nɛ ò ŋmanyu yà è njòŋgò yà è Ndawò yà Lohwà.

⁶Rzìi à mò òhwèyà nanù ema, “Ò hwèlì tɛ è Ŋmanà wà munyanà wà ama Lohwɛ̀, hvanja ò rze. Èhwanja è tìlahwì ò kààtì yà Lohwà nanù ema, ‘Lohwɛ̀ à ò kànèyà ì aŋgèlì jà eni ò lì ò nyàŋgà, iŋgi aŋgèlì ì ò hwànɛ ò ŋmanyu aŋga nanù ò rza àyɛ̀rzɛ̀ lìtàŋgà là aŋgɔ̀ ò lìŋyàyi.’”

⁷Yerzù à mò àlàhwɛ̀ nanù ema, “Ndi è tìlahwì ò Kààtì yà Lohwà hvɛ nanù ema, ‘Ò rza kèkirzɛ̀ Rzàŋgò Lòohwà là aŋgɔ̀.’”

⁸Mòkarzɛ̀ rzìi à tìmba Yerzù hvɛ, rzìi wɔ̀ hwahwàkɛ hwa tɛ̀mɛ̀ ò ŋmanyu yà è hvàko ema è mà karzama rzayì-rzayì. Mòkarzɛ̀ rzìi à mà uŋmɛ̀lɛ̀ hwèkòmè hwe è rze yà arzɛ nà mònàmɛ̀ mò awu mò arzɛ ema mò hwèlì ò tenì.

⁹Mòkarzɛ̀ rzi à òhwèyà Yerzù nanù ema, “Ò nò rzùmelì tɛ màwɔ̀ŋgɔ̀ŋgɔ̀ ò rze rzìi ò nò ŋgbà èluhwe, nà ò ŋgbà hwene hwema hwe arzɛ.”

¹⁰Yerzù à mà mò alàhwɛ̀ nanù ema, “Mòkarzɛ̀! Ò nò anjiiya anù. È tìlahwì ò Kààtì yà Lohwà nanù ema, ‘Kanɛ̀ ndi Rzàŋgò Lòohwà là aŋgɔ̀, nà lì mò gbèèyà mɔ̀ ŋmìti mɛnɛ. Ndèŋgànɛ̀lɛ̀ ò mò gbèèyà ndi mɔ̀ mɛnɛ.’”

¹¹O èŋgànɛ̀lɛ̀ Mòkarzɛ̀ à mà hwɛmɛ Yerzù rzìi à ɛndɛ è yà eni. Aŋga ndi i aŋgèlì ì mà jè lì òŋgòwàna Yerzù.

¹²Ò eŋge hvònda Yòwanìrzɛ̀ è Mòlùhwìrzèlì à mà aŋgɛhwɛ ò hwèwòwà. Nà òma Yerzù à mà hweye nanù, rzìi a timba ò erzòòkà yà Galìlì.

¹³Yerzù à mà hwɛmɛ è mbòwà yà Nàrzarɛ̀tì, rzi à ɛ̀ndɛ lì lìya ò mbòwà yà Kàpɛ̀nàwɔ̀mì. Ene mbòwà è mà hwɛ ndi ò tòŋgòŋgò yà yùlu yà Galìlì ò erzòòkà ya Rzɛ̀bulɔ̀nì nà Nàhvìtàlì.

¹⁴Yerzù à mà ɛndɛ ò Kàpɛ̀nàwɔ̀mì ò lì òndìrzɛ̀ hwèyà ema è mòòhwèlì wà èlìŋgɛ̀ Àyìrzayà, à mà òhwe nanù ema,

¹⁵“Hwèrzòòkà hwe Rzɛ̀bulɔ̀nì nà Nàhvìtàlì, ema è ɛ̀ndɛ ò ŋmànja, ò enɛyi èhvàrzù yà mòrzò mò Jɔdànì, Galìlì ò èhvàrzù yà hwatò ema hwa rza enje wònyà Yudà.

¹⁶Hwatò ema hwa hwèlì ò jììtìtì, hwa ɛnɛ ŋmàye mòndɛnɛ̀; Hwatò ema hwa kòmbɛ̀nɛ̀ è kpelì hwa mà luwa li arzùŋgɛ̀.”

¹⁷Lìwòtèyà è hvònda ema Yerzù à mà ɛ̀ndɛ ò erzòòkà ya Galìlì, Yerzù à mà wòteyà lì òhwa Eyà yà Lohwà nanù ema, “È rzɔnjɛ̀lɛ̀ hwègbèèlì hwe anyu hwe wòhwe, èhwanja Likànèyà la ama Lohwɛ̀ lì ma kòmbɛ̀nɛ̀.”

¹⁸Wùnyà wɔ̀kɔ Yerzù à mà hwɛ lì ɛndeya ò rzààwà yà yùlu yà Galìlì. À mà ɛnɛ hwàna hwa wunyanà hwàhwàkɛ̀ hwa nyàŋgò hvɔ̀kɔ. Rzìmɔ̀nì ema à mà hwɛ̀lɛ̀hwɛ̀ Pètrò nà ŋmanyàŋgò wà eni Àndèlè. Hwa mà hwɛ lì kòmà imbunja ja awu ò yùlu yà malìhwa, èhwanja wɔ̀ hwa mà hwɛ ndi hwatò hwa mòrzòmbò.

¹⁹Yerzù rzìi à hwa òhwèyà nanù ema, “È jèe è nò nɔ̀ŋge. Nà òma inyɔ è lɛ̀mbɛ inyàmà ja màlihwa naŋgɛ, nà è òkòlɛ nɛ inyɔ è tanɛyi lì rzèkeya mèèmà mè hwatò ò lì nò òŋgama.”

²⁰O wòtɛmɛ̀tɛmɛ̀ wɔ̀ hwa mà rzɔnjɛ̀lɛ̀ imbunja ja awu rzi hwa òŋgamà Yerzù.

²¹Nà òma hwa mà rzùrzùhweya ò wòrzò, Yerzù rzi à ɛnɛ hvɛ hwahvɛhvɛ hwàna hwa wunyanà hwahwàkɛ, hwa nyàŋgò hvɔ̀kɔ Jèmìrzì nà ŋmanyàŋgò wà eni Yòwanìrzɛ̀. Hwa mà hwɛ ò tenì yà wɔ̀lɔ̀ wɔ̀kɔ nà è rzàŋgò yà awu Rzɛ̀bɛ̀dì hwa mà hwɛ lì rzɛ̀ŋgɛnɛ imbunja ja awu. Yerzù rzìi à hwɛlɛ hwaŋga hwàna hwa wunyanà hwàhwàkɛ̀ ema hwa mò nɔŋge.

²²Lìwòkìmɛnɛ hwa mà rzɔnjɛ̀lɛ̀ wɔ̀ɔ̀lɔ̀ wò awu nà è rzaŋgò yà awu, rzìi hwa nɔ̀ŋgɔ Yerzù.

²³Yerzù à mà lìŋgòwa màmbòwà mà arzɛ mè èkòmè ya Galìlì, ò lì òkòlɛ̀ eyà yà Lohwà ò màndawò mà awu mà màkanɛ̀, nà lì òhwa hvɛ Ŋmɛ̀ndì mò Gbamù mò Likànèyà là ama Lohwɛ̀. À mà hwɛ hvɛ lì wɔ̀wìrzɛ̀ hwatò hwa arzɛ ema hwa mà ɔ̀kìrzɛ̀ nà inyayi ja nyàmbɛ ema hwa mà ɔ̀kìrzɛ̀.

²⁴O èŋgànɛ̀lɛ̀ hwèyà ema Yerzù à mà hwɛ lì gbèya hwe mà hwèyàhwà ò erzòòkà yà arzɛ yà Rzìlèyà. Ene eyà è mà gbèya ema hwatò hwa mà hwɛ lì mò jànèyà hwà-òkèlì hwa arzɛ. Hwa mà hwɛ lì mò jàneyà hwatò ema hwa mà ɔ̀kìrzɛ̀ inyayi na nyayi ja nyàmbɛ na merziyò mè nyò. Hwatò ema hwa ma òhva hwèlìŋgɛ̀ hwe wòhwe, hwatò ema hwa ma hwɛ lì hvòkòwa, nà hwatò hwa è nyàmbɛ yà njɛmbu Yerzù à mà hwa wɔ̀wìrzɛ̀ wɔ̀ hwa arzɛ.

²⁵Eŋge eyà è mà gbèya è ŋgindi è mà òŋgama Yerzù. Hwatò hwa mà uhwɛ̀lɛ̀lɛ ò hwehvɛhvɛ hwèkòmè, ò Galìlì, erzòòkà yà lìyòmɛ̀ là Màmbòwà ema è hwɛ̀lɛ̀hwɛ̀ Dèkàpòlìrzì, Jèrurzalɛ̀mù, Jùdèyà nà èhvàrzù ema è hwèlì ò enɛyi èhvàrzù yà mòrzò mò Jɔdànì.