Read Mokpwe Matiyò 7 Bible Online

Matiyò 7 - Mokpwe bible

Matiyò 7

¹“È rzi kàyìrzɛ̀ hwahvɛhvɛ hwatò, aŋga nanù Lohwɛ̀ à rza ò è kàyìrzɛ̀ inyɔ̀hvɛ.

²Nà òma è kàyìrzɛ̀ mòtò, nanù mɛnɛ hvɛ ndi Lohwɛ̀ à è kàyìrzɛ̀. Ndèŋgana, lìmɛni ema è gbeyànà ò lì kàyìrzɛ̀ hwahvɛhvɛ hwatò, lɔ̀hvɛ mɛnɛ ndi Lohwɛ̀ à gbeyànà lì è kàyìrzɛ̀.

³Mamɛ ndèŋgatɛ̀, ò ɛnɛ̀ è ŋmanà jùma lìmùki ema lì hwèlì ò lìrzɔ là ama ŋmànyɔ̀ŋgɔ̀ wà aŋgɔ̀, ema ò rza tànɛ̀yi lì ɛnɛ̀ ètumba ema è hwèlì ò lìrzɔ̀ là aŋgɔ̀ e?

⁴Nɛ ò tànɛyi lì òhweyà ŋmanyɔ̀ŋgɔ̀ wà aŋgɔ̀ nanù ema inyɛ̀ nà ò ulɛ̀ è ŋmanà jùma lìmòki ò lìrzɔ̀ là aŋgɔ̀, ema ò wà ò òhvi ètùmba ò lìrzɔ̀ là aŋgɔ̀ e?

⁵Ò wà mòtò wà mèhvìlì! Lòma lì ulɛ̀ ètùmba ema yò ò hwèlì ò lìrzɔ̀ là aŋgɔ̀, aŋgà nanù ò tànɛ̀yi lì ɛnɛ̀ gbamù, è ŋmanà jùma lìmòki ema à hwèlì ò lìrzɔ̀ la ama ŋmànyɔ̀ŋgɔ̀ wà aŋgɔ̀.

⁶O rzi wòwà hwèèmà hwe ama Lohwɛ̀ rzi ò ji ŋgbà iŋgba, èhwanja jò ò àyiŋgòwɛ̀lɛ̀lɛ̀ lì ò urzuweyà. O rzi hvimbeya hvɛ iŋgòwa ŋmɛ̀ɛ̀ŋgu mò aŋgɔ̀, èhwanja i jì làalà nà matàŋga mà awu.”

⁷“Ijòwa Lohwɛ̀, à ò ŋgbà. Ò arze, Lohwɛ̀ à gbeyà ò è ɛnɛ, ò kumbe lìyòhva, Lohwɛ̀ ò è lìhvòweya è lɔ̀.

⁸Èhwanja tɔ̀ njɛnɛ ema à ijòwi Lohwɛ̀, à è lùwà, tɔ̀ njɛnɛ hvɛ ema à arza yòma à è ɛnɛ̀. È mɔ̀ hvɛ ema à kùmbi lìyòhva, Lohwɛ̀ à mò lìhvòweyà è lɔ̀.

⁹Ima rzàŋgò ema è ŋmanà à mò arzanì tɛ ehvòòtò, rzìi à mò ŋgbà ndi lìŋyàyi e?

¹⁰Tɔ̀ à mò arzanì tɛ nyàmà yà malìhwa, rzìi à mò ŋgbà ndi ŋgbààhwà e?

¹¹Hwatò hwa wòhwe nàa inyɔ è ŋgbà tɛ hwàànà hwa anyu hwema hwe gbamù, ŋgèlì iti nà Tatɛ̀ wà ànyu ema à hwèlì ò ŋmanyu yà Lohwà. Nɛ à rzà ŋgbà màhwèyà mà gbamù ò hwatò ema hwa mò ijòwi e?

¹²O èŋgànɛ̀lɛ̀ rzɔ, ò gbèeyà hwahvɛhvɛ hwatò nà òma ò àrza nanù ema wɔ̀ hvɛ hwa ò gbèeyà. Nanù ndi è mbenda yà ama Lohwɛ̀ nà hwà-òhwèlì hwa hwèlìŋgɛ̀ yò òkòlɛ nà è jɔ̀kɛ̀.”

¹³Yerzù rzìi à hwatɛ hvɛ lì òhwa nanù ema, “È kpèeyà ndi lì akeyà lìyòhva ema lì ihvi. Èhwanja lìyòhva ema lì teyami lì lìyɛnɛ ndì ò ehvɔ̀ndi yà mùnya, rzìi è njiya yà eni hvɛ è teyami. Ndèŋganɛlɛ hwatò hvɛ ema hwa akeeya aŋga, hwa kòki.

¹⁴Ndi lìyòhva là è njiya yà lòŋgɛ là gbìndèyà lì ihvi. Ndèŋgànɛ̀lɛ̀ è njiya hvɛ ema è lìyɛ̀lɛ̀nɛ̀ aŋga yà ambi lì akeeya. Ŋgurzu ja hwatò mɛnɛ ndi jà akeeya aŋga.

¹⁵“È aŋgòhweya hwà-òhwèlì hwa hwèlìŋgɛ̀ hwa mòlàŋgà. Wɔ̀ hwa ɛnɛ ndi ŋmɛɛ nàa mɛ̀lɛ̀ŋgù, ndi ò tenì yà mèèmà mè awu hwa hwèlì wòhwe nàa njuwɛ.

¹⁶È hwa hwiiyà ndi ò hwègbèèlì hwe awu. È rza tanɛ lì hvata lìlanjò ò tenì yà waŋga yà njenje. Tɔ̀ ehvùma yà nyɔ̀hvinyà ò waŋga yà njenje.

¹⁷Gbèe ema wò lukùmèlì wò ŋya hwehvùma hwe gbamù. Ndi gbee ema wò ùùhwì wò ŋya ndi hwehvùma hwe wòhwe.

¹⁸Gbèe ema wò lukùmèlì wò rza tànɛyi lì ŋya ehvùma yà wòhwe. Ndèŋgana hvɛ gbee ema wò ùùhwì wò rza tànɛyi lì ŋya ehvùma yà gbamù.

¹⁹Tɔ̀ ima gbee è mà wò rza ŋyaayi ehvùma yà gbamù, è mòhwɛnɛ wà hvaya à hwɛnì ndi lì wò kɛɛ rzìi à wò aŋgba ò mùnya.

²⁰O èŋgànɛ̀lɛ̀ ò hwiye hwà-òhwèlì hwa hwèlìŋgɛ̀ hwa mòlàŋgà ò hweyà ema hwa gbeyà.”

²¹“Rzekɛtɛ tɔ̀ ima mɔ̀ ema à ò nò hwɛlɛ nanù ema, ‘Ìi Rzàŋgò, Rzàŋgò’ ndi à kpèeyà ò lìkànèyà là ŋmanyu. Ndi è mòtò mɛnɛ ema à gbèyi lì emeyà là ama Tatɛ̀ wà ami ema à hwèlì ò ŋmanyu yà lohwà, mɔ̀ ndi à ò kpèeyà ò Likànèyà là ama Lohwɛ̀.

²²O wòŋgò wùnyà wò hwèkàyìrzèlì rzayì-rzayì ja hwatò hwa ò nò jèeyà lì òhwà nanù ema, ‘Rzàŋgò, Rzàŋgò rzeke irzɔ i mà hwɛ lì òhweyà hwatò hweyà ema Lohwɛ̀ à mà jò òmane ema i hwa òhweyà nanù ema hwe ò gbèyɛ̀nɛ̀. Rzeke i mà gbeyàna lìinà la aŋgɔ̀ ò lì hvaya hwèlìŋgɛ̀ hwe wòhwe ò hwatò, na lì gbeyà hvɛ rzayi-rzayi ja hweyà hwe mànyakà e?’

²³Rzìi nà hwa òhweyà nanù ema, ‘Imba nà rza è hwi. È nò anjiya anù, inyɔ ema è gbeyà wòhwe!’”

²⁴“O èŋgànɛ̀lɛ̀ tɔ̀ ima mòtò ema à hweyi hwene hwèyòhwèlì hwe ami, rzìi à gbeyà mamɛ ema hwe òhwa, à hwèlì ndi nàa è mòtò wà gbaŋgò ema à òŋgi è ndawò yà eni ò ŋmanyu yà èwòmà yà lìŋyàyi.

²⁵O mburza hvònda è mbuwà ndɛnɛ è mà yɔɔ, meyòrzò mè mà hvùhva, è mbɛ̀hvɛ̀nì hvɛ è mà akeyà èŋge èki ema è ndawò è mà tɛmeya, ndi èŋge ndawò è rzi rzuuwe, èhwanja, è mà òŋgahwa ò ŋmanyu yà ewòmà yà lìŋyàyi.

²⁶Ndi tɔ̀ ima mòtò ema à hweyi hwène hweyòhwèlì hwe ami, rzìi à rzi gbèye mamɛ ema hwe òhwa, à hwèlì ndi nàa èèti yà mòtò ema à òŋgi è ndawò yà eni ò ŋmanyu yà nyàŋga.

²⁷O mburza hvònda è mbuwà ndɛnɛ è mà yɔɔ, meyòrzò mè mà hvuhva, è mbɛ̀hvɛ̀nì hvɛ è mà akeyà eŋge èki ema è ndawò è mà tɛmeya. Èŋge ndawò è mà rzùùwa è wuhweyà.”

²⁸Nà òma Yerzù à mà kulɛ ò lì òhwa hwenè hweyà è ŋgìndì ema è mà mò òkànèyà è mà tàmeyà hwèyòkòlèlì hwe eni,

²⁹èhwanja à mà òkòlɛ̀nɛ̀ nà lìkànèyà. A rzi hwɛ lì òkòlɛ̀ nàa Hwà-òkòlèlì hwa mbenda.