Read Mokpwe Makòrzì 1 Bible Online

Makòrzì 1 - Mokpwe bible

Makòrzì 1

¹Hwewòtelì hwe Ŋmɛ̀ndì mò Gbamù lì hvòmɛ̀nɛ̀ Yerzù Krirztò, è Ŋmanà wà ama Lohwɛ̀.

²Nà òma è tìlàhwì ò kààtì yà ama è mòòhwèlì wà èlìŋgɛ̀ Àyìrzayà nanù ema, “Lohwɛ̀ à òhwi nanù ema, ‘Nà ò òma mèèrzènjà mè ami ò wòrzò ò lì ò rzèkeyà è njiya.’ Mòrzeya mò mà hweyàhwà ò mòrzanjɛ̀ nanù ema, È rzèkeyà hwèjèelì hwe ama è Rzàŋgò,

³‘È tɛ̀nɛ̀nɛ̀ injìya jà hweyàkèlì hwe eni.’”

⁴Yòwanìrzɛ̀ à mà jà ò mòrzanjɛ̀ lì lùhwìrzɛ̀ hwatò, nà lì hwa òhweyà Eyà yà Lohwà nanù ema, “È rzɔ̀njɛlɛ hwègbèèlì hwe anyu hwe wòhwe, è lùhwìrzɛ̀hwɛ̀. Aŋga nanù Lohwɛ̀ à è làkìrzɛ̀ wòhwe wò anyu.”

⁵Hwatò hwa mà uhwɛlɛlɛ ò erzòòkà yà arzɛ yà Jùdeyà, nà ò mbòwà ndɛ̀ɛ̀ndɛ̀ yà Jèrurzalɛ̀mù, hwa mà wurza lì mò òkànèyà. Nà òma hwaŋga hwatò hwa mà purzɛ̀lɛ̀ wòhwe wò awu, rzìi Yòwanìrzɛ̀ à hwa lùhwìrzɛ̀ ò mòrzò mò Jɔdànì.

⁶Liwɔ̀ti là ama Yòwanìrzɛ̀ lì mà gbèyahwana ndi nà majùmbu mà nyàmà ema è hwɛ̀lɛ̀hwɛ̀ Kamɛ̀lì. È ŋgòlì yà eni hvɛ ema gbèyahwana ndi nà meyòwò mè nyàmà yà waŋga. Mòleli mò eni mò mà hwɛ ndi mègbambembe nà wòò.

⁷È njàmbɛ yà eni è mà hwɛ ndi nanù ema, “O ò jà mɔ̀kɔ ò mburzà yà ami ema à nò akayi. È mà tɔ̀ mèèrzìŋgà mè eni mè hwètambi, imba nà rza ukì tɔ̀ mòtò ò lì ujama lì mè wulùwà.

⁸Imba nà è lùhwìrzɛ̀ nà malìhwa, ndi mɔ̀ à ò è lùhwìrzɛ̀ ndi nà Èlìŋgɛ̀ yà Wòtani.”

⁹Èŋge hvònda Yerzù mɔ̀ à mà uhwɛlɛlɛ ndi ò mbòwà yà Nàrzàrɛ̀tì ò erzòòkà yà Galìlì, rzìi à lùhwìrzɛ̀hwɛ̀ nà Yòwanìrzɛ̀ è Mòlùhwìrzèlì, ò mòrzò mò Jɔdànì.

¹⁰Ò wòtɛmɛ̀tɛmɛ̀ nà òmà Yerzù à mà lùhwìrzɛ̀hwɛ̀, rzìi à anjiyà ò tenì yà màlìhwa, à mà ɛnɛ lòòhwà lì lìhvòhwèlì. Rziì Èlìŋgɛ̀ yà Wòtani è mà uhwɛlɛlɛ ò ŋmanyu nàa mbèŋga è mò rzihweyà ò mòhvò mò èni.

¹¹Lìlò lì uwɛ̀lɛ̀lɛ̀ ò ŋmanyu yà lohwà rzìi lì òhwa nanù ema, “O wà ndì ò hwèlì è Ŋmanà wà amì wà ndìŋgɛ yà màlìŋgò, nà òki mɔ̀nyɛ̀ŋgì nà ò wà rzayì-rzayì.”

¹²Lìwòkimɛnɛ Èlìŋgɛ̀ yà Wòtani è tìmba Yerzù ò mòrzanjɛ̀.

¹³Yerzù à mà lìya ò mòrzanjɛ̀ menìmenì mè mènya, à mà kèkirzɛhwɛ nà Mòkarzɛ̀. À mà hwɛ aŋga nà inyàmà ja arzɛ ja waŋga. I aŋgèlì jà ama Lohwɛ̀ ì mà jà lì mò òŋgòwànà.

¹⁴O mburzà hvònda Yòwanìrzɛ̀ à mà aŋgɛ̀hwɛ̀ ò hwèwòwà. Ò mburzà hvònda ema Yòwanìrzɛ̀ à mà aŋgɛ̀hwɛ̀ ò hwèwòwà, Yerzù rziì à ɛ̀ndɛ ò erzòòkà yà Galìlì, rzìi à òhweyà hwatò Ŋmɛ̀ndì mò Gbamù mò ama Lohwɛ̀, à hwa òhweyà nanù ema,

¹⁵“È hvònda è mà uka, Lìkànèyà là ama Lohwɛ̀ lì mà kòmbɛ̀nɛ̀. È rzɔnjɛ̀lɛ̀ hwègbèèlì hwe anyu hwe wòhwe, è lòkɛ̀ Ŋmɛ̀ndì mò Gbamù mò amà Lohwɛ̀.”

¹⁶Nà òmà Yerzù à mà hwɛ lì ɛndeya ò rzààwà yà yùlu yà Galìlì, rzìi à ɛnɛ Rzìmɔ̀nì nà ŋmanyàŋgò wà eni Àndèlè, hwa kòmà è mbunja ò yùlu èhwanja hwa mà hwɛ ndi hwatò hwa mòrzòmbò.

¹⁷Yerzù rzìi à hwa òhweyà nanù ema, “È jèe è nò nɔ̀ŋge. Nà òma inyɔ è lɛ̀mbɛ inyàmà jà màlihwa naŋgɛ, nà è òkòlɛ nɛ inyɔ è tanɛyi lì rzèkeya mèèmà mè hwatò ò lì nò òŋgama.”

¹⁸O wòtɛmɛ̀tɛmɛ̀ wɔ̀ hwa mà rzɔnjɛ̀lɛ̀ imbunja jà awu rzi hwa òŋgamà Yerzù.

¹⁹Nà òma hwa mà ɛ̀ndɛ ŋmanà hvòkà yɔ̀ndɔ̀, à mà ɛnɛ hwàanà hwa ama Rzɛ̀bɛ̀dì, Yòwanìrzɛ̀ nà ŋmanyàŋgò wà eni Jèmìrzì, ò tenì yà wɔ̀lɔ̀, hwa rzɛ̀ŋgɛ̀nɛ̀ ìmbunja ja awu.

²⁰Nà òmà à mà hwa ɛnɛ, à mà hwa hwɛlɛ. Hwa mà hwɛmɛ è rzàŋgò yà awu Rzɛ̀bɛ̀dì nà hwàgbèèlì ò wɔ̀lɔ̀, rzìi hwa nɔ̀ŋgɔ̀ Yerzù.

²¹Yerzù nà hwà-òkòwèlì hwa eni hwa ànìyɛ hwa mà ɛndɛ ò mbòwà yà Kàpɛ̀nàwɔ̀mì. À mà kpèeyà ò ndawò yà màkanɛ̀ yà wònyà Yudà ò Wùnya wò lì Arzìyòlɛ, rzìi à wòteyà lì òkòlɛ̀.

²²Hwatò ema hwa mà hwɛ lì mò òkànèyà, hwa mà tàmeyà hwèyòkòlèlì hwe eni èhwanja a mà òkòlɛ̀nɛ̀ nà lìkànèyà, à rzi hwɛ lì òkòlɛ̀ nàa Hwà-òkòlèlì hwa mbenda.

²³Mòtò mɔ̀kɔ ema à mà hwɛ̀nɛ̀ èlìŋgɛ̀ yà wòhwe a kpèeyà ò eŋge ndawò yà màkanɛ̀ rzìi à tɛ̀ɛ̀ nanù ema,

²⁴“Jìyeyi! Ìi Yerzù wà Nàrzàrɛ̀tì, mamɛ ò jò àrzàna e? Ò jelì ndi lì jò hvàŋga e? Nà hwi njɛnɛ ò hwèlì, ò hwèlì ndi è mɔ̀ ema Lohwɛ̀ à òmi, ema à Tàni.”

²⁵Yerzù à mà kànèyà èŋge èlìŋgɛ̀ yà wòhwe nanù ema, “Andama! Ò mò wurze ò nyò.”

²⁶Èŋge èlìŋgɛ̀ yà wòhwe è rzòkòmɛ̀lɛ̀ òŋgò mòtò nà ŋginyà è tɛɛ rzìi è ànjiya ò nyò yà eni.

²⁷Hwatò hwa arzɛ hwa mà tàmeya enè eyà rzayì-rzayì, rzìi hwa ijòwànɛ mɔ̀kɔ nà ɔnɛ̀yi nanù ema, “Ima tumba eyà ène! Hwèyòkòlelì hwe hvènya hwe ene e? Ònò mòtò à hwɛnì ŋginyà ò lì kànja hwèlìŋgɛ̀ hwe wòhwe natɛ̀ɛ hwe mò hweyànà!”

²⁸Ŋmɛ̀ndì mò ama Yerzù, mò mà eyàlɛ̀nɛ̀ erzòòkà yà arzɛ yà Gàlìlì.

²⁹Lìwòkimɛnɛ nà òmà hwa mà anjiye ò è ndawò yà Yudà yà màkanɛ̀, Yerzù, Jèmìrzì, nà Yòwanìrzɛ̀ hwa mà ɛ̀ndɛ ò ndawò yà àma Rzìmɔ̀nì nà Àndèlè.

³⁰È nyàŋgò yà lìhwa yà àma Rzìmɔ̀nì è mà hwɛ nà lìyèti ò lìnɔ̀ŋgɔ̀. Nà òmà Yerzù à mà ùke aŋga, à mà òhwahwɛlɛ lì hvòmɛ̀nɛ̀ jòòkì ja ama òŋgò mòlanà.

³¹Yerzù rziì à ɛ̀ndɛ ò mà òŋgò mòlanà, à mò lɛ̀mbɛ̀ lìya. À mò òŋgòwànà ò lì tɛ̀mɛ̀. Liŋgi lìyètì lì mà wɔ̀wɔ̀ rzìi òŋgò mòlanà à hwa kàrzɛ̀.

³²O èŋge ŋgòmbe nà òmà èlohwàlohwà è mà rzìhwe, hwatò hwa mà jàneyà Yerzù hwaŋga hwatò ema hwa mà ɔ̀kìrzɛ̀ nà hwaŋga ema hwa mà òhva hwèlìŋgɛ̀ hwe wòhwe.

³³Hwatò hwa arzɛ hwa èŋge mbòwà hwa mà arzàŋganɛ ò èwòkà yà è ndawò yà àma Rzìmɔ̀nì.

³⁴Yerzù à mà wɔ̀wìrzɛ̀ rzayì-rzayì jà hwatò ema hwa mà ɔ̀kìrzɛ̀ nyayi nà nyayi jà nyàmbɛ. À mà hvaya hvɛ hwèlìŋgɛ̀ hwe wòhwe ò inyò jà hwatò. À rzì ŋgbe hwèlìŋgɛ̀ hwe wòhwe ehvòlò ema hwe tɔ̀wu, èhwanja hwe mà hwiya njɛnɛ Yerzù à hwèlì.

³⁵O ekpààrzɛ̀ è hvònda yà inyànyò, Yerzù à mà tɛ̀mɛ̀ rziì, à wurza ò ndawò, à ɛ̀ndɛ èki yà njuka yà ŋmɛ̀ɛ̀ ema à mà kanɛ̀.

³⁶Hwatò ema hwa mà hwɛ nà Rzìmɔ̀nì hwa mà ɛ̀ndɛ lì àrza Yerzù.

³⁷Hwa mà mò lùwè rzìi hwa mò òhweyà nà hwètamìrzelì nanù ema, “Hwatò hwa arzɛ hwa hwèlì hwa ò arza!”

³⁸Yerzù rzìi à hwa alàhwɛ̀ nanù ema, “Inyɛ̀ jà ɛ̀ndɛ o èhvɛhvɛ èki ò màmbòwà ema mà kòmbɛ̀nɛ̀yi, ò lì arza nanù ema nà òhwe hvɛ Ŋmɛ̀ndì mò Gbamù aŋga èhwanja mòŋgò Ŋmɛ̀ndì mò Gbamù ndi nà jɛlɛlɛ̀ ò rze.”

³⁹O èŋgànɛ̀lɛ̀ à mà ɛ̀ndɛ ò erzòòkà yà arzɛ yà Galìlì lì òhwa Ŋmɛ̀ndì mò Gbamù ò indawò jà màkanɛ̀ nà lì wùrzirzɛ̀ hvɛ hwèlìŋgɛ̀ hwe wòhwe ò hwatò.

⁴⁰Mòtò mɔ̀kɔ ema à mà òka è nyàmbɛ yà mɔ̀lɔ̀ŋgɔ à mà jèeyà Yerzù rzìi à mò rzùmeya màwɔ̀ŋgɔ̀ŋgɔ̀, à mò atɛ̀kɛ̀ nanù ema, “Ò lìŋganì tɛ ò nò tanìrzɛ̀.”

⁴¹Yerzù à mà òkeya òŋgò mòtò ììlì rzìi à enyòwa lìya là eni, à lì hwàkɛ òŋgò mòtò ò nyò yà eni, à òhwa nanù ema, “Nà lìŋgàni, rzàŋga!”

⁴²Lìwòkìmɛnɛ rzìi èŋge nyàmbɛ yà mɔ̀lɔ̀ŋgɔ è mò hwɛ̀mɛ̀ rzìi à wɔ̀wɔ̀.

⁴³Yerzù rzìi à mò òhweyà nanù ema à ɛ̀ndɛ, rzìi à mò kòkòwɛ̀lɛ̀ nɔ̀ke-nɔ̀ke nanù ema,

⁴⁴“Ò rzìi òhweyà tɔ̀ mòtò, mamɛ ema è ò gbèyɛ̀nɛ̀ ndì ɛ̀ndɛ wà àwuŋmɛ̀lɛ̀ è Pìlìrzì, à ò injàneyà. Rzìi ò ŋgbe màhwèyà nà òma è mbenda yà ama Mòrzè è mà òhwe, ò lì uŋmɛ̀lɛ̀ nanù ema ò mà rzàŋga nà lì ŋgba Lohwɛ̀ jèeka.”

⁴⁵Ndi ònò mòtò à mà ɛ̀ndɛ ò èki yà arzɛ ò lì òhwèyà hwatò mamɛ ema Yerzù à mà mò gbèeyà. O èŋgànɛ̀lɛ̀ è ŋgànèlì yà ama Yerzù è mà ɛ̀ndɛ ò èki yà arzɛ, ema Yerzù à rzi tanɛ̀ hvɛ lì kpèeyà e mbòwà ò mòte. Ndi Yerzù à mà hwɛ ndi lì lìya ò hwèki ema hwe rzi hwɛ̀ɛ hwatò rzayì-rzayì. Ndi tɔ̀ nanù hwatò hwa mà uhweyà hwèki hwe arzɛ ò lì jà lì mò ùŋma.