Read Mokpwe Makòrzì 10 Bible Online

Makòrzì 10 - Mokpwe bible

Makòrzì 10

¹Yerzù à mà anjiya èŋgè èkì rzìi à akeyà ò erzòòkà yà Jùdeyà rzìi à akeyà ò mòrzò mò Jɔdànì. Ŋgìndì yà hwatò è mà hwɛ lì mò jèeyà nàa ɛ̀ɛ̀mɛ̀ yà eni è mà hwɛ, à mà hwa òkòlɛ̀.

²Lòŋgò là Ihvalìrzàyì hwa mà jà ò lì mò kèkirzɛ̀. Hwa mò ijòwa nanù ema, “Ò jò òhweyà, è mbenda è arzu è ŋgbelì mòjòmɛ̀ wònjà nanù ema à hvayè jòjìyɛ̀ wà eni e?”

³Yerzù rzìi à hwa alàhwɛ̀ nanù ema, “Mamɛ ema è mbenda yà ama Mòrzè è òhwa e?”

⁴Rzìi hwa mò alàhwɛ̀ nanù ema, “È mbenda yà ama Mòrzè è ŋgbelì wònjà ema mòjòmɛ̀ a ŋgbe jòjìyɛ̀ wà eni kààtì ò lì uŋmɛ̀lɛ̀ nanù ema lìhwa lì ma kùwa rzìi a mò hvayà.”

⁵Yerzù rzìi a hwa alàhwɛ̀ hvɛ nanù ema, “Mòrzè à mà è tìleya ndi ene mbenda èhwanja mèèmà me anyu me èèti.

⁶Ndi ò hwewòtelì e hvònda ema Lohwɛ̀ a mà weke hwatò, ama weka ndi è munyanà nà e mòlanà.”

⁷“Ndèŋgànɛ̀lɛ̀, ene ŋgàna ɔ̀ndeŋgàtɛ̀ ŋmanà wa munyanà a hwɛ̀mɛ̀ rzàŋgɛ na nyàŋgɛ rzìi à uŋma jòjìyɛ̀ wa eni rzìi hwahwàkɛ hwa alàtànɛ̀ ò lì hwɛ mòtò mɔ̀kɔ.

⁸Hwa mà jà rzɔ ndi mòtò mɔ̀kɔ hwa rza enje hvɛ hwahwàkɛ.

⁹O èŋgànɛ̀lɛ̀ rzɔ mamɛ ema Lohwɛ̀ a làti mòtò wà hwènàmà a rzi keka lì e wùùlɛ̀.”

¹⁰È hvònda ema hwa mà timbe ò ndawò, hwà-òkòwèlì hwa ama Yerzù hwa mò ijòwa lì hvòmɛ̀nɛ̀ èŋge eyà ema a mà òhwe.

¹¹Yerzù rzìi a hwa alàhwɛ̀ nanù ema, “Tɔ̀ ima mòtò ema à hvayì jòjìyɛ̀ wà èni ò lìhwa, rzìi a hwàà òhvɛhvɛ mòlanà, òma à gbèyi mòrzònje ò ndawò yà lìhwa.

¹²Rzìi jòjìyɛ̀ a hwɛmi hvɛ tɛ mòjòmɛ̀ wà eni, rzìi a hwààhwà òhvɛhvɛ munyanà, a undi è mbenda yà mòrzònje ò ndawò yà lìhwa.”

¹³Hwatò hwa mà hwɛ lì jànà hwàanà ò ma Yerzù nanù ema a hwa hwàkɛ lìya la eni rzìi a hwa nàmìrzɛ̀. Ndi hwà-òkòwèlì hwa eni hwà mà lòmeya hwaŋga hwatò.

¹⁴Ndi nà òmà Yerzù a mà ɛnɛ èŋge eyà nanù, e mà mò tàtirzɛ rzìi a òhweyà hwà-òkòwèlì hwa eni nanù ema, “È hwɛ̀mɛ̀ hwàànà hwarzàlì hwa jè nà imba, è rzi hwa kekà, èhwanja ini nyayi ja hwatò ndi hwa hwɛnì Lìkànèyà la ama Lohwɛ̀.

¹⁵Nà è òhweyà è jɔ̀kɛ̀ nanù ema, tɔ̀ ima mɔ̀ ema à rza ìmànɛ̀lɛ̀ Lìkànèyà là ama Lohwɛ̀ nàa ŋmanà mòrzàlì, à rza lì kpèeyà.”

¹⁶Yerzù rzìi à rzaŋga hwaŋga hwàna, rzìi à hwa hwàkɛ lìya là eni ò mèyòhvò mè awu mɔ̀kɛ-mɔ̀kɛ, rzìi à hwa nàmìrzɛ̀.

¹⁷Nà òmà Yerzù à mà wòteyà lì ɛ̀ndɛ, mòtò mɔ̀kɔ à mà hwaŋga, à mò ùŋmanɛlɛ rzìi à mò rzùmeya màwɔ̀ŋgɔ̀ŋgɔ̀ ò wòrzò wò eni, rzi à mò ijòwa nanù ema, “Ìi Mòòkòlèlì wà gbamù mamɛ nà tànɛyi lì gbeyà ò lì lùwa lòŋgɛ là gbìndèyà e?”

¹⁸Yerzù rzìi à mò ijòwa nanù ema, “Ò mamɛ ndèŋgàtɛ̀ ò nò hwɛlɛ òma Mòòkòlèlì wà gbamù e? Ò rza enje tɔ̀ mòtò tɔ̀ mɔ̀kɔ wà gbamù. Lohwɛ̀ mɔ̀ mɛnɛ ndi à hwèlì gbamù.

¹⁹O hwi imbenda, ema jò òhwa nanù ema, ‘O rzi òŋwa mòtò, ò rzi gbeyà mòrzònje ò ndawò ya lìhwa, ò rzi ihwa, ò rzi tɛ̀mɛ̀ mbòŋgi yà mòlàŋgà, ò rzi ɔnjɔ hwatò, ò ŋgbe nyàŋgò wa aŋgɔ̀ nà rzàŋgò wà aŋgɔ̀ èluhwe.’”

²⁰Rzìi ò nò mòtò a mò alàhwɛ̀ nanù ema, “Ìi Mòòkòlèlì nà mà gbeyàna ini mbenda lì wòteya na mà hwɛ ŋmanà.”

²¹Yerzù rzìi a mò ɔ̀ŋgɔ nà ŋmèma mò ndiŋgɛ rzìi a òhwa nanù ema, “O lìyelì eyà yɔ̀kɔ ò lì gbeyà, ɛ̀ndɛ ò ahwìrzɛ hwèèmà hwe aŋgɔ̀ hwe arzɛ ema ò òhvi, ò wòwe wòŋgò wòlì ò ŋgbe mèlìrza me hwatò, ò gbèyi tɛ nanù, ò òhva mònàmɛ̀ ò ŋmanyu yà lohwà. Èŋge hvònda, ò je ò nò nɔ̀ŋge.”

²²È hvònda òŋgò mòtò ama hweye nanù, wòrzò wò eni wò mà kpa rzìi a tìmbana ŋmèma mò lìti, èhwanja à mà hwɛ ndi èhwàŋgì ya mòtò ndɛɛ̀ndɛ.

²³Yerzù rzìi a hvɛ̀ŋgeya hwà-òkòwèlì hwa eni mìirzɔ̀, a hwa òhweyà nanù ema, “È ɛni ema e ambani hwèwàŋgì ò lì kpèeyà ò Lìkànèyà là ama Lohwɛ̀.”

²⁴Ndi hwà-òkòwèlì hwà mà Yerzù hwa mà tameya è mbɔrzi ya eni, Yerzù rzìi a òhwa hvɛ nanù ema, “Ìi wònyànyàŋgò hwa ami, e ambi lì kpèeyà ò Lìkànèyà là ama Lohwɛ̀!

²⁵O hwèlì ndi eyà rzàlì nà èembè ndɛnɛ e hwèlì ndi nàa Kamɛlì ò lì akeyà ò ehvɔ̀ndi ya ndɔ̀ndɔ̀kì, lì aka na èhwàŋgì ya mòtò lì kpèeyà ò Lìkànèyà la ama Lohwɛ̀”

²⁶Hwà-òkòwèlì hwà mà Yerzù hwa mà hweye nanù hwa mà òhva hwètàmìrzèlì hwe ndɛnɛ̀, rzìi hwa òhwànɛlɛ mɔ̀kɔ nà ɔ̀nɛyi nanù ema, “Njɛnɛ̀ rzɔ̀ a ò tanɛ lì rzùŋgàhwa e?”

²⁷Yerzù a mà hwa ɔŋgɔ̀ kòò rzìi a òhwa nanù ema, “È hwèlì tɛ ò hwatò e rza tanɛ e gbèyɛnɛ. Ndi e hwèlì tɛ nà Lohwɛ̀, ò rza enje eyà e ambi.”

²⁸Pètrò rzìi a mò òhweyà nanù ema, “Wa ɔ̀ŋgɔ tɛ, ì ma hwɛmɛ hweyà hwe arzɛ ò lì òŋgama.”

²⁹Yerzù rzìi a alàhwɛ̀ nanù ema, “Nà è òhweyà ndi e jɔ̀kɛ̀, ema tɔ̀ njɛnɛ ema a hwɛmɛ e ndawò ya eni, wònyanyàŋgò hwa eni, ìndòmɛ ja eni, e nyàŋgò ya eni, e rzàŋgò ya eni, tɔ̀ hwàànà hwa eni, tɔ̀ erzàŋgò ya eni, ò nyòla ya ami nà ò gbàmù wò Ŋmɛ̀ndì mò Gbamù,

³⁰à ò lùwa lì aka nanù ò lìni lòŋgɛ la yawònò. Mɔ̀ à ò lùwa mawòŋgì, wònyanyàŋgò, ìndòmɛ, inyàŋgò, hwàànà, na erzàŋgò, egbe ya ŋgèlì. À ò tàkirzɛhwɛ hvɛ ò lìna la ami. O hvònda ema e ò jɛ̀ɛ̀ a ò lùwa hvɛ lòŋgɛ la gbìndèyà.

³¹Ndi rzayì-rzayì ja hwatò ema hwa hvùŋgani nàŋgɛ hwa ò lìiya ò mburzà. Rzayì-rzayì ja hwatò hvɛ ema hwa hwèlì ò mburzà nàŋgɛ, wɔ̀ ndi hwa ò hvùŋganɛ.”

³²Yerzù nà hwà-òkòwèlì hwa eni hwa mà agba ò Jèrurzalɛ̀mù mɔ̀ ndì à mà hvùŋgànà. Hwà-òkòwèlì hwa eni hwà mà tàmà rzayì-rzayì, ndi hwanɛ̀yi hwatò ema hwà mà hwa òŋgama hwa mà òhva wɔ̀ŋgɔ̀. Nà òmà hwa mà hwɛ lì ɛ̀ndɛ, Yerzù rzìi a wòwa hwà-òkòwèlì hwa eni ò tòŋgòŋgò hvɛ rzìi a hwa òhweyà mamɛ ema e hwɛnì lì mò gbèyɛ̀nɛ.

³³À mà hwa òhweyà nanù ema, “È hwiye nanù ema ja agba ndi ò Jèrurzalɛ̀mù, aŋga ndì è Ŋmanà wà è Mòtò wà Hwènàmà a hwɛnì lì ŋgbààhwà ò màà mà è Ipìlìrzì ndɛnɛ nà hwà-òkòlèlì hwa mbenda. Wɔ̀ hwa mò akɛlɛlɛ è mbàkò ya kpelì, rzìi hwa mò akɛlɛ ò màà mà hwatò ema hwa rza enje hwatò hwa Irzàyɛ̀lì.

³⁴Wɔ̀ wò ò mò kùwa nà lì mò rzɔ̀yeya hweyɔ̀lì ò nyò ya eni, hwa mò gbiyɛ hvònji rzìi hwa mò òŋwa. O mburzà mèenyà meyawò à ò hvùmùwà.”

³⁵O mburzà nanù Jèmìrzì nà Yòwanìrzɛ̀, hwàànà hwa wunyanà hwa ama Rzɛ̀bɛ̀dì hwa mà jèeyà Yerzù. Hwa mò òhweyà nanù ama, “Ìi Mòòkòlèlì ò hwèlì eyà ema ja arza nanù ema ò jò gbèeyà.”

³⁶Yerzù à mà hwa ijòwa ama, “Mamɛ e arza nanù ema nà e gbèeyà e?”

³⁷Hwà mà mò alàhwɛ̀ nanù ema, “Ja arza nanù ema ò lìyayi tɛ ò kònda ya aŋgɔ̀ ya lìkànèyà, ò Lìkànèyà là ama Lohwɛ̀, inyɛ mɔ̀kɔ wa arzu a lìyà ò lìyà la aŋgɔ̀ la mòme, ɔnɛyi hvɛ ò lìyà la ŋmalì.”

³⁸Yerzù rzìi a hwa alàhwɛ̀ nanù ema, “È rza hwi ò tɛ̀ɛ̀tɛ̀ɛ mamɛ e ijòwa. È tànɛyi lì àjùlɛ̀nɛ̀ mètàkà ema imba nà ò hwanɛ̀ e? È tànɛyi lì lùhwìrzɛ̀hwɛ̀ nà lì lùhwìrzɛ̀ la mètàkà ema nà ò luwɛ e?”

³⁹Hwà mà alàhwɛ̀ Yerzù hwa ma, ì tànɛyi. Yerzù rzìi a hwa timbirzɛlɛlɛ nanù ema, “È tanɛ lì hwanɛ̀ mètàkà ema nà hwanɛ̀yi, e ò lùwa lì lùhwìrzɛ̀ la mètàkà ema nà ò lùwa,

⁴⁰ndi nà rza òhvi è wònjà ò lì hvɔ̀rzɔ̀ njɛnɛ a hwɛnì lì lìyà ò lìya la ami la mòmɛ̀ tɔ̀ e lɔ la ŋmalì. Lohwɛ̀ ndi à ò ŋgbɛɛ hwèŋge hwèlìyelì, ò hwaŋga hwatò ema hwèŋge hwèki hwe rzèkahwɛlɛyi.”

⁴¹Lirzàkò ema lìnɛyi lìyòmɛ̀ la hwà-òkòwèlì hwa ama Yerzù hwà mà hweye nanù rzìi hwa tatana Jèmìrzì nà Yòwanìrzɛ̀ rzayì-rzayì.

⁴²Yerzù a mà hwa hwɛlɛ wɔ̀ hwa arzɛ ò lì mò kòmbɛ̀nɛ̀ rzìi a òhwa nanù ema, “È hwi ema hwaŋga ema hwa hwiyahwi nàa hwàkànèlì hwa ene rze, nà hwàmbaki hwa mbòwà, hwa gbeyàna ŋginyà ò lì kànèyà hwaŋga hwatò ema hwa hwèlì ò rze ya awu.

⁴³Ndi è rzà hwɛnì lì hwɛ nanù nà inyɔ̀. Tɔ̀ ima mɔ̀ wà anyu ema a arza lì hwɛ è mòndɛnɛ wa anyu, a hwɛnì ndi lì hwɛ è mògbèèlì wà anyu.

⁴⁴Tɔ̀ njɛnɛ wa anyu hvɛ ema a arza lì hwɛ è wa wòrzò, a àŋgàmɛ̀nɛ̀yi ndi lì hwɛ è mòkòme wà hwatò hwa arzɛ.

⁴⁵Èhwanja tɔ̀ è Ŋmanà wà è Mòtò wà Hwènàmà a rzi je ndi ema hwa mò gbèeyà. A jelì ndi ò lì hwɛ è mògbèèlì wa hwatò hwa arzɛ. Nà ò lì ŋgba lòŋgɛ la eni ò lì kɔ̀tɔ̀ rzayì-rzayì ja hwatò.”

⁴⁶Yerzù nà hwà-òkòwèlì hwa eni hwa mà uke ò mbòwà yà Jèrìkò. Ŋgindi ya hwatò è mà hwɛ lì hwa nɔ̀ŋgɔ. Nà òmà hwa mà kòmbɛ̀nɛ̀ lìrzukù la èŋge mbòwà, hwa mà ùŋma mòtò mɔ̀kɔ ema à mà hwɛ̀lɛ̀hwɛ̀ Bàtìmàyùrzì. Bàtìmàyùrzì à mà hwɛ ndi è ŋmanà wa mùnyanà wa ama Tìmàyèyùrzì, à mà hwɛ ndi ndima. À mà lìya ò tòŋgòŋgò ya njiya rzìi a ɔ̀mbɔ̀.

⁴⁷È hvònda ema a mà hweye nanù ema Yerzù wa Nàrzarɛ̀tì mɔ̀ ndi à aka, rzìi a wòteya lì tɛ nanù ema, “Ìi Yerzù è Ŋmanà wà mùnyanà wa lìhwende la ama Dàhwitì ò nò òkeya ììlì!”

⁴⁸Hwatò rzayì-rzayì hwa mà mò kànja, rzìi hwa mò òhweyà nanù ema a umbe e wàna ya eni! Ndi mɔ̀ à mà tɛ ndi ò ŋmanyu lì aka lìmɛni, nanù ema, “È Ŋmanà wa mùnyanà wà lìhwende la ama Dàhwitì, ò nò òkeya ììlì!”

⁴⁹Yerzù à mà tɛ̀mɛ̀ rzìi a òhwa nanù ema, “È nò hwɛlɛlɛ̀ e mɔ̀.” O èŋgànɛ̀lɛ̀ hwa mà mò hwɛlɛ, rzìi hwa mò òhweyà nanù ema, “O rza atàkìrzɛ̀ e nyò ya aŋgɔ̀! Tɛmɛ ò ŋmanyu mɔ̀ ònò a ò hwɛlɛ.”

⁵⁰Oŋgò mòtò à mà ulɛ è kòti ya eni a e rzɔ̀njɛlɛ ɔnɛyi, rzìi a tɛ̀mɛ̀ nà màkpàrzi, a ɛ̀ndɛ lì ùŋma Yerzù.

⁵¹Yerzù rzìi a mò ijòwa nanù ema, “Mamɛ rzɔ ò arza nanù ema nà ò gbèeyà e?” Oŋgò mòtò rzìi a òhwa nanù ema, “Nà arza lì ɛnɛ.”

⁵²Yerzù rzìi a mò òhweyà nanù ema, “Ɛndɛ, lìlòkɛ̀ la aŋgɔ lɔ ndi lì ò wɔ̀wìrzɛ̀yi.” Lìwòkìmɛ̀nɛ̀ a wòteyà lì ɛnɛ̀, rzìi a òŋgama Yerzù e njiya ya arzɛ.