Read Mokpwe Makòrzì 13 Bible Online

Makòrzì 13 - Mokpwe bible

Makòrzì 13

¹Nà òmà Yerzù a mà ànjiye ò Ndawò ya Lohwà mòòkòwèlì wa eni mɔ̀kɔ à mà mò òhweyà nanù ema, “Ìi Mòòkòlèlì ɔ̀ŋgɔ tɛ, màŋyàyi nà hweyòŋgelì hwe è Ndawò yà Lohwà hwe lɔ̀wu, rzayì-rzayì.”

²Yerzù rzìi a mò alàhwɛ̀ nanù emà, “È ɛnɛ enè nyayi ya hweyòŋgelì hwe hveti e? Tɔ̀ lìŋyàyi tɔ̀ lɔ̀kɔ lì rzà ò lììya ò ŋmanyu yà lìnɛyi, mò ò wùhweyà ma arzɛ.”

³Yerzù a mà ɛ̀ndɛ lì lìya ò mòòlì mò Njàhwɛ̀. Mòŋgò mòòlì mò ma hwɛ ndi lì ɔŋgɔ̀ e Ndawò yà Lohwà. Aŋga ndi Pètrò, Jèmìrzì, Yòwanìrzɛ̀ na Àndèlè hwà mà ùŋma Yerzù rzìi hwa mò ijòwa ò wùndɛ nanù ema,

⁴“O jò òhweyà, ima hvònda hwenè hweyà hwe ò gbeyɛ̀nɛ̀ e? O jò òhweyà hwe embànèlì hwe uŋmɛ̀lɛ̀ ema e hvònda e ma uka ema hwenè hweyà hwe ò gbeyɛ̀nɛ.”

⁵Yerzù rzìi a hwa òhweyà nanù ema, “È aŋgòwa nanù ema tɔ̀ mòtò à rzì è lùkɛlɛ.

⁶Hwatò rzayì-rzayì hwa ja ò lìna là ami lì òhwa nanù ema, ‘Ìmba ndi nà hwèlì è Mɔ̀ ema à Ɔ̀kirzɛ̀hwɛ̀yi.’ Hwa ò lùkɛlɛ hwatò rzayì-rzayì.

⁷È hwèyì tɛ ema injùmà ja ànà, tɔ̀ e hweyi tɛ ŋgànèlì ja njùma è rzì tumeya mèèmà. Hwenè hweyà hwe hwɛnì lì gbeyɛ̀nɛ ndi hwe rza uŋmɛ̀lɛ̀ nanù ema lìrzukù lì ma uka.

⁸Hwèkòmè hwe teŋgɛ̀nɛ̀ hwèkòmè ò lì ana njùma, màkànèyà hvɛ ma teŋgɛ̀nɛ̀ màkànèyà. O hwɛ menyìŋgìrzɛ̀nɛ̀ ò hwèki rzayì-rzayì. È njàwò hvɛ è hwɛ. Hwenè hweyà hwe ò hwɛ ndi nàa mòrziyò mò lìyalì mò wòrzò.

⁹Hwenè hweyà hwe wòtelì tɛ lì gbèyɛ̀nɛ, è hwɛnì lì aŋgòwa. Èhwanja hwa hwɛnì lì è ŋgbàŋgɛ rzìi hwa è àkɛ̀lɛ̀lɛ ò màà mà hwàkàyìrzèlì hwa meyàŋgò. Hwa è gbiyɛ hvònjì ò ndawò ja màkanɛ̀ ja wònyà Yudà. O nyòla ya ami è tɛ̀mɛ̀ ò màrzò ma hwàkànèlì na ìkiŋgɛ̀ ò hwèkàyìrzèlì. Hwenè hweyà hwe ò gbèèyɛnɛ aŋga nanù òma e ma hwa òhweyà Ŋmɛ̀ndì mò Gbamù mò òma Lohwɛ̀.

¹⁰Hwa lòma lì òhwa Ŋmɛ̀ndì mò Gbamù ò hwèkòmè hwe àrzɛ. Ndèŋgana lìrzukù lì e ja.

¹¹Hwa è ŋgbàŋgɛ tɛ rzìi hwa e jànà ò hwèkàyìrzèlì, è rzìi atàkìrzɛ̀ ò mamɛ ema e hwɛ̀nì lì òhwa. È òhwe ndi mamɛ ye e ŋgbààhwì èŋge hvònda, èhwanja rzèketɛ inyɔ ndi è òhwa èhwanja mamɛ e òhwa e uwɛ̀lɛ̀lɛ̀yi ndi ò Èlìŋgɛ̀ yà Wòtani.

¹²Hwatò hwa ò ŋgba wònyanyàŋgò hwa awu ò màà mà hwahvɛhvɛ hwatò ò lì hwa òŋwa. Irzàŋgo hvɛ ì gbeyànà hwàànà hwa awu nanù mɛnɛ, hwàànà hwa teŋgɛ̀nɛ̀ irzàŋgo nà inyàŋgò ja awù ò lì arza nanù ema hwà òŋwahwe.

¹³Hwatò hwa àrzɛ hwa ò e kɔ̀ ò nyòla lìinà la ami. Ndi hwatò ema hwa ò nò kakana mèèmà natɛ̀ɛ nà ò lìrzukù hwa ò rzùŋgàhwà.”

¹⁴“È ò ɛnɛ nà òma eyà ya mà-ɔ̀ŋgɔ̀ ema e ò jànà erzàmbò ò wòrzò wò ama Lohwɛ̀ e ò hwɛ ò èki ema e rza aŋgàmɛnɛ lì hwɛ.” (Inyɔ ema e laŋga hwenè hweyà e hwe rzɔ̀ŋgìtɛ̀nɛ̀ kɔ̀yi-kɔ̀yi). “È ɛni tɛ nanù, hwatò ema hwa hwèlì ò Jùdeyà hwa hwaŋga lì ɛ̀ndɛ̀ lì utàmà ò ŋmanyu ja meeyòlì.

¹⁵Tɔ̀ è mòtò ema a hwèlì ò ŋmanyu yà lìkaàndò la eni la ndawò à rzi rzìhwa ò rze ò lì kpeyà èŋge ndawò lì wòwà yòma.

¹⁶Tɔ̀ mòtò ema a hwèlì ò hvaya à rzà tìmba lì wòwà e kòtì ya eni.

¹⁷È ò hwɛ wòhwe nà hwàalanà ema hwa lìti meemì nà hwaŋga ema hwa nyɔ̀ŋgìrzɛ̀ɛ èŋge hvònda.

¹⁸È kànɛ nanù ema hwenè hweyà hwe rzì gbèyɛnɛ ò e hvònda yà ehvùhva ema yùlulì e àŋgayi.

¹⁹Èhwanja è ndùtù èma è ò hwɛ ò mèŋge mèenyà, e ò hwɛ ndi èŋge ema e rzi gbèyɛnɛ tɔ̀ wùnyà wɔ̀kɔ lì wòteya Lohwɛ̀ à è wèkeyà ene rze natɛ̀ɛ nà naŋgɛ. Ène tumba yà eyà e rza ò gbèyɛnɛ hvɛ tɔ̀ wùnyà.

²⁰Rzàŋgò à ma màa lì utùlɛ̀ meŋgɛ mèenyà me ndùtù e rzi hwɛ tɛ nanù òma tɔ̀ mòtò tɔ̀ mɔ̀kɔ a rza ò rzùŋgàhwa. Ndi ò nyòla hwaŋga hwatò ema mɔ̀ à hvɔ̀rzì à ma utùlɛ̀ mèŋge mèenyà.

²¹O èŋge hvònda mòtò à òhwèlì tɛ nanù ema, ‘Ɔ̀ŋgɔ̀, è Mɔ̀ à Ɔ̀kirzɛ̀hwɛ̀yi mɔ̀ ònò’ tɔ̀ ‘Ɔ̀ŋgɔ, mɔ̀ ɔnɛyi,’ ò rzi mò lòkɛ̀.

²²Rzayì-rzayì ja hwatò hwa ò ja, tɔ̀ ima mɔ̀ à ò kɔ hweyà nanù ema mɔ̀ ndi à hwèlì è Mɔ̀ ema à Ɔ̀kirzɛ̀hwɛ̀yi. Rzìi hwà-òhwèlì hwa hwèlìŋgɛ̀ hwa mèlàŋgà wɔ̀ hvɛ hwa ò wurza. Hwa ò gbeyà hweyà hwe mànyaka na lì uŋmɛ̀lɛ̀ hwèèmbànèlì hwe nyàyì na nyàyì. Hwa ò gbeyà nanù ò lì arza nanù ema hwa lùkɛlɛ hwaŋga ema Lohwɛ̀ à mà lòme lì hvɔ̀rzɔ̀, hwa lù tɛ hvèyò yà lì hwa lùkɛ̀lɛ.

²³O èŋgànɛ̀lɛ e aŋgòwè. Nà è òhwèlì hwenè hweyà hwe àrzɛ ndèŋgànɛ̀lɛ̀ e hvònda è ò jà.

²⁴“Ndi ò mèŋge mèenyà e hvònda e ndùtù e ma aka tɛ ‘Igbe ì tìmbà jìtìtì, ŋmɛ̀ɛlì hvɛ mò rza uŋmɛ̀lɛ̀ ŋmàye mò eni,

²⁵ìrzòmbe ja ŋmanyu jò undà ò rze, ìŋginyà ja ŋmanyu ì nyiŋga ò hwèki hwe awu.’

²⁶O èŋge hvònda hwatò hwa ò ɛ̀nɛ̀ è Ŋmanà wà è Mòtò wà Hwènàmà a jà ò lìmbàkì nà ŋginyà ndɛnɛ̀ nà èluhwe.

²⁷Rzìi à òma i aŋgèlì ja eni ò màrzuku ma anìyɛ ma rze ya àrzɛ lì rzàŋga hwatò ema Lohwɛ̀ a hvɔ̀rzì, lì ànjiya njuka hvɔ̀kɔ yà rze lì ukà ènɛyi njuka yà rze.

²⁸“È wòwe èèmbanelì ya gbèe wò nyɔ̀hvinyà. Hwèkɔ̀kɔ hwe ma wòteya tɛ lì kɛkɛ hwèyalì hwèhvènyà, e hwiyè nanù ema ehvùhva e ma kòmbɛ̀nɛ̀.

²⁹Nànù mɛnɛ hvɛ e ɛnì tɛ hwenè hweyà hwe àrzɛ hwe gbèyɛnɛ, e hwiye nanù ema è Ŋmanà wà e Mòtò wà Hwènàmà a ja ŋmanà mbɔ ndeŋga à mà kòmbɛ̀nɛ̀.

³⁰Nà è òhweyà nà è jɔ̀kɛ̀ nanù ema ène nyɔ̀ŋgɔ̀nì è ò hwɛ lòŋgɛ nanù mɛnɛ è hvònda ema hwenè hweyà hwe àrzɛ hwe gbèyɛnɛ.

³¹È ŋmanyu yà lohwà nà è rze hwè kùwà ndi eyà ya ami e hwɛ ndi nanù mɛnɛ.

³²“Tɔ̀ mòtò à rza hwi tɔ̀ e hvònda ema hwenè hweyà hwe ò gbèyɛnɛ, tɔ̀ i aŋgèlì ema ì hwèlì ò ŋmanyù ya lohwà i rza hwi wòŋgò wùnyà, tɔ̀ è Ŋmanà a rza hwi. Tatɛ̀ mɛnɛ ndi à hwi è hvònda ema hwenè hweyà hwe ò gbèyɛnɛ.

³³È aŋgòwe, e wòŋgirzɛ̀nɛ̀ è rza hwi è hvònda wò ja.

³⁴Wò ò hwɛ ndi nàa mòhwɛnɛ wà ndawò a ɛ̀ndɛ tɛ yɔ̀ndɔ̀ a lìya hwàgbèèlì hwa eni. À ŋgbà mòtò tɛ è yà eni èwòlò, rzìi a òhweyà e mɔ̀ɔ̀ŋgèlì wà hwèkpeyànèlì hwe èwòka ema a gbè èwòlò ya eni gbamù.

³⁵O eŋgànɛ̀lɛ e aŋgòwa èhwanja è rza hwi e hvònda ema è rzàŋgò yà ndawò e ò tìmbɛ. À tànɛyi lì jà è ŋgòmbe, tɔ̀ ò kɔ̀rzi yà wuu tɔ̀ ò ekpaàrzɛ tɔ̀ ò e hvònda yà elele.

³⁶À ò wurzelì tɛ kulu jègba, à rza aŋgamɛ̀nɛ̀ lì ò ùŋma ò nàŋgayi.

³⁷O èŋgànɛ̀lɛ̀ rzeketɛ inyɔ mɛnɛ ndi nà òhweyà hwenè hweyà ndi nà òhweyà tɔ̀ ima mòtò nanù ema, ‘È aŋgòwè.’”