Read Mokpwe Makòrzì 15 Bible Online

Makòrzì 15 - Mokpwe bible

Makòrzì 15

¹O ekpaarzɛ ya wùnyà, Ipìlìrzì ndɛ̀nɛ, hwàmbaki hwa Irzàyɛ̀lì, hwà-òkòlèlì hwa mbenda nà hwatò hwa ndawò yà hwèkàyìrzèlì hwe kàrzàmì hwa mà hwɛnɛ hwèlìyelì. Hwà mà kaka Yerzù, hwa mò ɛ̀ndɛnɛ, rzìi hwa mò akɛlɛlɛ Pìlatò.

²Pìlatò rzìi à mò ijòwa nanù ema, “Ò wà ndi ò hwèlì è kiŋgɛ̀ yà hwatò hwa Yudà e?” Yerzù rzìi à mò tìmbìrzɛ̀lɛ̀lɛ̀ nanù ema, “Nà òma òhwi.”

³Ipìlìrzì ndɛnɛ ì mà mò gbeyà mènìtò.

⁴Pìlatò rzìi à mò ijòwa hvɛ nanù ema, “Ò rza hwɛnì eyà yà lì òhwa e? Ò wà hwìti òkànèyà hwenè hweyà hwe àrzɛ ema hwa ò rzamba.”

⁵Ndi Yerzù à rzìi tìmbìrzɛ̀lɛ̀ tɔ̀ eyà. Ènè eyà è mà tàmìrzɛ̀ Pìlatò.

⁶È mà hwɛ ndi nàa ɛ̀ɛ̀mɛ̀ ò Ndèma yà awu Yà lì Akà Ɔnɛyi, Pìlatò à mà yɔ̀kɔ lì hwa rzòlòhweyà mòtò wà hwèwòwà mɔ̀kɔ nà òma hwatò hwa mà arze, ò èŋge hvònda.

⁷Ò èŋge hvònda, mòtò mɔ̀kɔ ema à mà hwɛ̀lɛ̀hwɛ̀ Bàrabàrzì, à mà hwɛ ò hwèwòwà. À mà hwɛ ò hwèwòwà nà hwahvɛhvɛ hwatò ema hwà mà hvùŋguhwa lìkànèyà là Ròmànì.

⁸È ŋgìndì yà hwatò è mà jà lì òhweyà Pìlatò ema à hwa gbèeyà nà òmà a mà yɔ̀kɔ lì hwa gbèeyà.

⁹Pìlatò rzìi a hwa ijòwa nanù ema, “È àrzà ema nà è rzòlòhweyà è kiŋgɛ̀ yà wònyà Yudà e?”

¹⁰À mà hwiya àma Ipìlìrzì ndɛnɛ ì ma nòneyà Yerzù ɔ̀ndeŋgàtɛ̀ à mà hwa ijòwa mene mììjòwèlì.

¹¹Ndi Ipìlìrzì ndɛnɛ̀ ì mà hwɛ ndi lì umbɛlɛlɛ èŋge ŋgìndì lì òhweyà Pìlatò nanù ema a hwa ulɛlɛ ndi Bàrabàrzì ò hwèwòwà.

¹²Pìlatò rzìi a hwa ijòwa hvɛ nanù ema, “Mamɛ e arza ema na gbeyànè e mɔ̀ ema inyɔ e hwɛlɛ e kiŋgɛ̀ yà wònyà Yudà e?”

¹³Rzìi hwa tɛ ò ŋmanyu nanù ema, “O mò wòmeya ò mbarza!”

¹⁴Pìlatò rzìi a hwa ijòwa nanù ema, “Mamɛ ndèŋgàtɛ̀ e? Ima eyà ya wòhwe a gbèyi e?” Ndi hwa mà làmbòwà ndi ò ŋmanyu nanù ema, “O mò wòmeya ò mbarza!”

¹⁵Nà òmà Pìlatò, a mà àrze lì ujìrzɛ̀ hwaŋga hwatò à hwa rzòlòhweyà Bàrabàrzì. À mà ŋgba hwaànèlì hwa njùma è wònjà ema hwa gbiyɛ̀ Yerzù rzìi hwa mò wòmeya ò mbarza.

¹⁶Hwaànelì hwa njùma rzìi hwa tìmba Yerzù lì mò ɛ̀ndɛnɛ ò èwòka yà ama è mòkanelì rzìi hwa rzaŋga hwahvɛhvɛ hwaànèlì hwa njùma aŋga.

¹⁷Hwa mà mò wɔ̀tìrzɛ̀ mòŋgòmbè mò teyàa ema mò mà ayèkɛnɛ̀ mòŋgòmbè mò kìŋgɛ̀. Rzìi hwa òŋgà èkòòtò yà kìŋgɛ̀, hwa mò wɔ̀tìrzɛ̀ è yɔ̀ ò mòhvò mò eni.

¹⁸Rzìi hwa wòteya lì mò kùwa nà lì mò kɔmɔ nanù ema, “Ìi kiŋgɛ̀ wà wònyà Yudà. Èluhwe è hwɛ nà ò wà!”

¹⁹Hvònda nà hvònda tɛ hwa mà mò hvahva èèyè ò mòhvò, rzìi hwa mò rzɔ̀yeya hweyɔlì. Hwa mà mò, rzùmeya màwɔ̀ŋgɔ̀ŋgɔ̀ ò rze lì mò kùwa.

²⁰È hvònda hwa mà kulɛ lì mò kùwa, hwa ulɛ mòŋgò mòŋgòmbè ò nyò yà èni rzìi hwa mò wɔ̀tìrzɛ̀ lìhwàtù la eni. Rzìi hwa mò wòwa ò lì ɛ̀ndɛ lì mò wòmeyà ò mbarza.

²¹È hvònda hwa mà hwɛ lì ɛ̀ndɛ, hwa mà ùŋmanɛ̀lɛ mòtò mɔ̀kɔ à ma uhwɛlɛlɛ ò mbòwà ya Rzilìni, hwa mà mò hwɛlɛ ndi Rzìmɔ̀nì. Rzìmɔ̀nì à mà hwɛ ndi è rzàŋgò yà ama Àlɛ̀rzanda na Lùhvɔ̀rzì. Rzìmɔ̀nì à mà hwɛ lì aka ò lì kpèeyà ò mbòwà, rzìi hwa mò lɛ̀mbɛ, hwa mò kànèyà ò lì hwanɛ̀ è mbàrza yà ama Yerzù.

²²Hwa mà jànà Yerzù ò èki ema e hwɛ̀lɛ̀hwɛ̀ Gòlgotà, ema jànda i hwèlì ndi ema, “Èki ya Hwekeke hwe Mèyòhvò.”

²³Àŋga ndì hwà mà ŋgbè Yerzù hwènyɔ̀ɔ̀nì ema hwà mà hvùŋguwàne na gbèe ema hwà mà hwɛlɛ màyi ema a nyɔ̀ ndi à rzi nyɔ̀.

²⁴Rzìi hwa wòmeyà Yerzù ò mbarza. Hwà mà òka mèrzɔ̀ɔ̀nì ò lì hwàa è mbɔ̀ti ya eni, aŋga nanù wɔ̀ hwa ò ɛnɛ̀ e mɔ̀ ema a ò lùwà e la eni lòŋgò la lìŋgi lìwɔtì.

²⁵Hwa mà mò wòmeya ò mbarza lùuwà la ŋgɛ̀ŋgi la èlèlè.

²⁶Eyà hwa mà tìlè ò mbarza ò ŋmanyu tènyi lì aka mòhvò mò eni lì uŋmɛ̀lɛ̀ mamɛ ndèŋgàtɛ̀ à mà wòmàwɛ̀lɛ̀hwɛ̀ ò mbarza è mà hwɛ ndi nanù ema, “È kìŋgɛ yà Yudà.”

²⁷Hwa mà wòmeyà hvɛ hwàyihwɛ̀ hwàhwàkɛ̀ ò mbarza mɔ̀kɔ ò lìya là ŋmalì, ɔnɛ̀yi hvɛ ò lìya la mòmɛ la ama Yerzù.[6]

²⁸

²⁹Hwatò ema hwà mà akeyà ò tòŋgòŋgò ya eŋge èki, hwa mà hwɛ lì hvòkòmɛlɛ mèyòhvò me awu rzìi hwa a mò kikòwa nanù ema, “Aha! Ò mà òhwa òma ò wùùlɛ̀ e Ndawò yà Lohwà rzìi ò è òŋga ò ìtììtènì ja mèenyà meyawò. A arzùŋgɛ̀ ò wà witi, ò hwèlì tɛ e Ŋmanà wà ama Lohwɛ̀!

³⁰Arzùŋgɛ̀ ò wa hwìti ò rzihwe ò mbarza!”

³¹Nànù mɛnɛ hvɛ ndi, Ipìlìrzì ndɛnɛ̀ nà hwà-òkòlèlì hwa mbenda hwa mà hwɛ lì mò kùwa. Hwà mà hwɛ lì a òhwanɛ̀ wɔ̀ hwìti nanù ema, “À ma hwɛ lì rzùŋgà hwatò ndi nàŋgɛ à rza tànɛyi lì àwòŋgòwànɛ̀ tɔ̀ mɔ̀ ŋmìti.

³²È Mɔ̀ ema à òhwi nanù ema à Ɔ̀kirzɛ̀hwɛ̀yi, ema à hwèlì ndi è kiŋgɛ̀ ya wònyà Irzàyɛ̀lì à rzìhwe ò mbarza naŋgɛ aŋga nanù je ɛnɛ rzìi ì mò lòkɛ̀.” Hwàŋga hwàyihwɛ̀ ema hwa mà wòmàwɛlɛ̀hwɛ ò itòŋgòŋgò ja ama Yerzù wɔ̀ hvɛ hwa mà hwɛ̀ lì mò hwɛnyɛ.

³³O lìrzàkò la kɔ̀rzì ya ŋmèrze rzìi jììtìtì i lìŋga èki ya arzɛ natɛ̀ɛ lì uka ŋgɛ̀ŋgi iyàwò.

³⁴È hvònda ŋgɛŋgi iyàwò ima ùke rzìi Yerzù a tɛɛ nà lìlò lì kàrzàmi nanù ema, “Èlòyi, Èlòyi, lama Rzàbatani!” Jànda ja enè Èya ì hwèlì ndi nanù ema, “Ìi Lohwà la ami, ìi Lohwà la ami, mamɛ ndeŋgatɛ ò nò kìnyɛ̀lɛ̀ e?”

³⁵Lòŋgò la hwatò ema hwà mà tɛ̀mɛ̀ lì kòmbɛ̀nɛ̀ aŋga, nà òmà hwa mà hweye ène mbɔrzi rzìi hwa wòteya lì òhwa nanù ema, “È òkànèyà tɛ nà òmà mɔ̀ à hwɛlɛ ndi Èlàyijà ema a jèe a mò òŋgòwanè.”

³⁶Munyanà mɔ̀kɔ à mà hwaŋga, a ɛ̀ndɛ, a wòwa è kùcha a è lìŋgɛ̀lɛ̀ ò èèye, a e tɔ̀tɔ̀ ò tenì ya jɔ̀ŋgɔ̀ ja hwènyɔ̀ɔnì hwe kpanyi rzìi a agbɛlɛlɛ Yerzù ò wàna ema a nyɔ. Oŋgò mòtò rzìi a òhwa nanù ema, “È mò hwɛmɛ ŋmìti, ì ɔ̀ŋgɔ nà òmà Èlàyijà à ja lì mò rzìhwirzɛ.”

³⁷Yerzù à mà tɛ̀ɛ nà lìlò lì ndɛnɛ, rzìi a rzìyòwa mùùlù mò eni mò lìrzùkù.

³⁸Lìhwàtù ema lì ma kɛ̀ɛ̀hwɛ̀ ò lì kahwa e Ndawò yà Lohwà rzìi lì nyàhweyà hwèhvàrzù hwèhwàkɛ̀ lì wòteyà ò ŋmanyu natɛ̀ɛ nà ò rze.

³⁹Oŋgò ŋmànèlì wa njùma ema à ma tɛ̀mɛ̀ aŋga ò wòrzò wa ama Yerzù, à mà òkànèyà lùwa, rzìi a ɛnɛ hvɛ lì undɛ̀nɛ̀ la ama Yerzù, à mà òhwa nanù ema, “Nà e jɔ̀kɛ̀ ònò munyanà à mà hwɛ ndi è Ŋmanà wà ama Lohwɛ̀!”

⁴⁰Ò mà hwɛ hwalanà ema hwa mà tɛ̀mɛ̀ hvòka rzi hwa ɔ̀ŋgɔ mamɛ yà arzɛ ema è mà gbèyɛ̀nɛ̀. Hwanù hwalanà hwa mà hwɛ ndi Màlìyɛ̀ mà Màdàlènì, Rzàlòmɛ̀, Màlìyɛ̀ è nyàŋgò yà ama Jèmìrzì enɔ̀ŋgɔ̀ni yà ama Jòrzɛ̀hvù.

⁴¹Hwanù hwalanà hwa mà nɔ̀ŋgɔ nà lì òŋgòwànà Yerzù ò lìwòŋgò là eni ò mbòwà yà Galìlì. Rzayì-rzayì jà hwalanà hvɛ ema hwa mà nɔ̀ŋgɔ Yerzù ò Jèrurzalɛ̀mù, wɔ̀ hvɛ hwa mà hwɛ aŋga.

⁴²Wònò wùnyà wò mà hwɛ ndi wùnyà wò mòòŋgòlèlì (ène ŋgàna è hwèlì ndi ema wùùnya ndèŋgàna Wùnyà wò lì Arzìyòlɛ̀). Ò èŋgànɛ̀lɛ̀ rzɔ nà òmà ehwànà mòkò è mà rzihwe,

⁴³Jòrzɛ̀hvù ema à mà hwɛ ndi mòtò wà è mbòwà ya Àrìmàtìyà mòtò mɔ̀kɔ wà èluhwe wà è ndawò ya hwèkànelì, ema mɔ̀ hvɛ ŋmìti à ma hwɛ lì ambɛlɛlɛ e hvònda yà hwejèelì hwe Likànèyà la ama Lohwɛ̀, à mà ɛ̀ndɛ lì ùŋmanɛ̀lɛ Pìlatò gbeye-gbeye ò lì mò ijòwa èhwembè ya ama Yerzù.

⁴⁴Pìlatò à ma tàmà ò lì hwèya ema Yerzù à mà màa lì undɛ̀nɛ̀. À mà yòhwɛ òŋgò ŋmanèlì mò ndɛnɛ wà njùma rzìi a mò ijòwa ŋgà Yerzù à mà undɛ̀nɛ̀.

⁴⁵Nà òmà Pìlatò à mà hweyànè òŋgò ŋmanèlì wa njùma ema Yerzù à mà ŋwa, rzìi a ŋgba wònjà ema Jòrzɛ̀hvù a wòwe èhwèmbè ya ama Yerzù.

⁴⁶Jòrzɛ̀hvù rzìi à anda mbɔ̀mi yà lìhwàtù. À rzìhwìrzɛ̀ èŋge èèmbè yà ama Yerzù. À lìŋgɛ̀lɛ̀ èŋge èèmbè nà lìŋgi lìhwàtù, rzìi à naŋgɛlɛ èŋge èèmbè yà ama Yerzù ò tenì yà rzɔ̀ŋgɔ̀ ema è mà hvòmàhwà ò tenì yà lìŋyayì. À mà kulɛ̀ rzìi à iŋgòlɛ lìŋyayi lì ndɛ̀ɛ̀ndɛ̀ ò lì umba hwèkpèèlì hwe èŋge rzɔ̀ŋgɔ̀.

⁴⁷Màlìyɛ̀ mà Màdàlènì nà Màlìyɛ̀ è nyàŋgò ya ama Jorzɛ̀rzì hwà mà injàneyà rzi hwa ɛnɛ èki ema hwà mà imeya Yerzù.