Read Mokpwe Makòrzì 5 Bible Online

Makòrzì 5 - Mokpwe bible

Makòrzì 5

¹Yerzù nà hwà-òkòwèlì hwa eni, hwa mà uka ò ɛnɛyi èhvarzù ya yùlu ya màlìhwa, ò erzòòkà ya Gɛ̀ràrzɛ̀nì.

²Nà òmà Yerzù a mà anjiye ò wɔ̀lɔ̀, mòtò mɔ̀kɔ ema èlìŋgɛ̀ ya wòhwe è mà hwɛ lì tàkìrzɛ̀, à mà uhweyà ò mòònda mò rzɔ̀ŋgɔ̀, a jàa lì mò ùŋmanɛlɛ.

³Ò nò mòtò à mà hwɛ ndi lì lìya ò mòònda mò rzɔ̀ŋgɔ̀, ndèŋgànɛ̀lɛ̀ tɔ̀ mòtò tɔ̀ mɔ̀kɔ a rzi tànɛyi lì mò kaka mèyɔ̀lì tɔ̀ ŋgɔ̀kɔ̀hwì.

⁴Ònò mòtò à mà nyàmɛ̀lɛ lì kakahwa la màa nà ŋmeende nà ì ŋgɔ̀kɔ̀hwì, ndi ì hvònda ja arzɛ à mà hwɛ lì tuma iŋgi ŋgɔ̀kɔ̀hwì. À mà imbama rzayì-rzayì ema tɔ̀ mòtò a rzi tanɛ lì mò kakà ò rze.

⁵À mà arzɔ̀rzɛ̀lɛ̀ ndi ò meyònda me rzɔ̀ŋgɔ̀ nà ò meyòlì ŋmerze nà wuu, à mà hwɛ lì tɛ merzeya nà lì awènìrzɛ nà mànyàyi.

⁶Nà òmà a mà ɛnɛ Yerzù ò hvòkà, ama hwaŋga, a mò rzùmeya màwɔ̀ŋgɔ̀ŋgɔ̀ ò wòrzò wò eni.

⁷À mà tɛ nà lìlò lì karzami nanù ema, “O wa Yerzù, è Ŋmanà wà ama Lohwà lì Kàrzami mamɛ ì òhvanɛ e? Nà ò rzòzòmeya ò lìna la ama Lohwɛ̀ ò rza nò kɔ̀kìrzɛ̀.”

⁸A ma òhwa ndi ene Èya èhwanja, Yerzù à mà hwɛ à mà màa lì òhweyà èlìŋgɛ̀ ya wòhwe nanù ema, “O wa èlìŋgɛ̀ ya wòhwe ò mò anjiye ò nyò ya eni!”

⁹Yerzù rzìi a mò ìjòwa nanù ema, “O hwɛ̀lɛ̀hwɛ̀ ndi njɛnɛ̀ e?” Oŋgò mòtò rzìi a mò alàhwɛ̀ nanù ema,

¹⁰“Nà hwɛ̀lɛ̀hwɛ̀ ndi lìnyɛyi èhwanja ì kòki ò ene nyò.” Rzi òŋgò mòtò a rzòrzòmeya Yerzù ŋgèlì rzayì-rzayì ama, à rzi òma hwèlìŋgɛ̀ hwe wòhwe ò èŋge erzòòkà.

¹¹O ma hwɛ gbakà wò ŋgòwa ema wò ma hwɛ lì leeya ò tòŋgòŋgò ya mòòlì ema mò ma kòmbɛ̀nɛ̀ aŋga òma.

¹²Hwèŋge hwèlìŋgɛ̀ hwe wòhwe rzìi hwe rzòrzòmeya Yerzù nanù ema, “O jò òme, ì ɛ̀ndɛ ì kpèeyà iŋgi ŋgòwa.”

¹³Yerzù à mà ŋgba hwèŋge hwèlìŋgɛ̀ hwe wòhwè wònjà ò lì kpèeyà iŋgi ŋgòwa, rzì hwe anjiya òŋgò mòtò o nyo, hwe ɛ̀ndɛ lì kpèeyà iŋgi ŋgòwa ema ì ma hwɛ Èya ya hwekòlì hwehwàkɛ. Rzìi iŋgi ŋgòwa ì hwaŋga ò lì rzihwa mòŋgò mòòlì natɛ̀ɛ, ì unda ò tenì ya yùlu ya malìhwa èma mà ma hwɛ ò rze ya mòŋgò mòòlì, rzi iŋgi ŋgòwa ì kùwa lì inda.

¹⁴Hwàŋga hwatò ema hwà mà hwɛ lì ɔ̀ŋgeyà iŋgi ŋgòwa hwa mà hwaŋga lì ɛ̀ndɛ lì òhweyà hwatò hwa è mbòwà nà è wɔ̀ hwa tòŋgòŋgò mamɛ e ma gbèyɛ̀nɛ̀. Hwàŋga hwatò hwa mà wurza ò lì ɛ̀ndɛ lì ɔ̀ŋgɔ mamɛ e gbèyɛ̀nɛ̀yi.

¹⁵È hvònda ema hwatò hwa mà jèe ò ma Yerzù rzìi hwa ɛnɛ òŋgò mòtò ema lìnyɛyi la hwèlìŋgɛ̀ hwe wòhwe hwe mà tàkìrzɛ̀, mɔ̀ ndì a lìyayi, nà lìwɔtì la gbamù, nà màlùtèyà ma gbamù. Hwa mà kpèeyà wɔ̀ŋgɔ̀.

¹⁶Hwàŋga hwatò ema hwà mà ɛnɛ mamɛ ya arzɛ ema e ma gbèyɛ̀nɛ̀, rzi hwa wòteyà lì òhweyà hwanɛ̀yi hwatò mamɛ ya arzɛ ema e ma gbèyɛ̀nɛ̀ nà òŋgò mòtò ema à mà òhva hwèlìŋgɛ̀ hwe wòhwe nà mamɛ hvɛ ema e ma gbèyɛ̀nɛ̀ nà ì ŋgòwa.

¹⁷Hwaŋga hwatò rzi hwa wòteya lì rzòrzòmeyà Yerzù ema a anjiye ò erzòòkà ya awu.

¹⁸Nà òmà Yerzù à mà hwɛ lì kpèeyà ò wɔ̀lɔ̀, òŋgò mòtò ema à mà wɔ̀wìrzɛ̀hwɛ ò hwèlìŋgɛ̀ hwe wòhwe rzìi a wòteyà lì mò rzòrzòmeyà ema à mò nɔŋge.

¹⁹Yerzù a rzì mò ŋgbè wònjà, ndi à mà mò òhweyà nanù ema, “Ɛndɛ ò timbe ò mbòwà ya aŋgɔ̀. O òhweyà hwatò hwa aŋgɔ̀ Èya ndɛnɛ ema è Rzàŋgò e ò gbèelì, nà nɛ a ò kòmelì ììlì ja eni.”

²⁰Oŋgò mòtò ama ɛ̀ndɛ rzi a wòteya lì òhwa ò erzòòkà ya Dìkapɔlìrzì hweyà hwe arzɛ ema Yerzù a mà mò gbèeyà. Hwatò hwa arzɛ hwa mà tàmà.

²¹È hvònda ema Yerzù à ma timbe lì kpèeyà ò wɔ̀lɔ̀ ò lì tìmba ò enɛyi èhvarzù ya yùlu, ŋgìndì ndɛnɛ è mà mò ambɛlɛlɛ aŋga.

²²Mòtìmbèlì mɔ̀kɔ wa è ndawò ya màkanɛ̀ yà wònyà Yudà ema à mà hwɛ̀lɛ̀hwɛ̀ Jàrìyɔ̀rzɛ̀, rzi a ja aŋga òma. A ɛnɛ Yerzù rzi a ɛ̀ndɛ a kpa ò mataŋgà mà eni.

²³A mò atɛkɛ nà ŋginyà nanù ema, “È ŋmanà ŋgɔ̀ndɔ̀ wa ami à hwèlì ndi ò mòhvèhvè mò kpelì, rzònì jà ò mò hwàkɛ màà mà aŋgɔ̀ a wɔ̀we, a hwɛ lòŋgɛ.”

²⁴Yerzù à mà wòteyà lì ɛ̀ndɛ nà òŋgò mòtìmbèlì ò ndawò ya ama òŋgò mòtìmbèlì.

²⁵Ŋgindi ndɛnɛ ya hwatò e ma hwɛ lì nɔ̀ŋgɔ nà lì àyììnɛ̀lɛ̀ Yerzù. O mà hwɛ mòlanà mɔ̀kɔ aŋga ema à mà ɔ̀kirzɛ̀ è nyàmbɛ yà hwalanà, lìyòmɛ̀ la meya nà mehwakɛ.

²⁶O nò mòlanà à mà hwɛ à mà ɛndeya rzayì-rzayì ja ŋgaŋga. À mà hvàŋga hvɛ wòlì wò eni wò arzɛ ema a mà òhve ndi mòrziyò mò eni mò mà hwɛ ndi lì ahwatɛ na lì ahwatɛ.

²⁷O nò mòlanà à mà lòma lì hweya hweyà hwe ama Yerzù, rzìi à àyìinɛ̀lɛ̀ è ŋgìndì a wurzeya Yerzù ò mburzà, a tɔ̀tɔ̀ lìya la eni ò mòŋgòmbè mò ama Yerzù.

²⁸À mà lùtèyà nanù ema, à tɔ̀ti tɛ lìya la eni ò mòŋgòmbè mò ama Yerzù à wɔ̀wɔ̀.

²⁹Nà òmà òŋgò molanà a mà tɔ̀te lìya la eni ò mòŋgòmbè mò ama Yerzù, ò lìwòkìmɛnɛ èŋge nyàmbɛ yà hwalanà è wɔ̀wɔ̀. À mà ayèmbɛ ŋmìti nanù ema a kàrzò ò mòtàkà mò eni.

³⁰Yerzù à mà èmba nanù ema ŋginyà e mò anji ò nyò. Lìwòkìmɛ̀nɛ̀ à mà ayèŋgòwɛ̀, rzìi a ijòwa e ŋgìndì nanù ema, “Njɛnɛ a tɔ̀ti mòŋgòmbè mò amì na lìya la eni e?”

³¹Hwà-òkòwèlì hwa eni rzìi hwa mò alàhwɛ̀ nanù ema, “Ò wa ò ɛnɛ e ŋgindi ya hwatò ema e ò tòŋgi, rzìi ò a ijòwa hvɛ ò ma njɛnɛ a nò tɔ̀ti e?”

³²Yerzù à mà wòteyà lì ɔ̀ŋgɔ e ŋgindi ya hwatò ò lì arza lì hwiya e mòtò ema a mò tɔ̀ti na lìya la eni ò mòŋgòmbè mò enì.

³³Oŋgò mòlanà à mà hwiya mamɛ e ma mò gbèyɛnɛ, rzi a kpèeyà Yerzù ò mataŋga na wɔ̀ɔŋgɔ̀, na mòkambiya rzi a mò òhweyà e jɔ̀kɛ̀ ya àrzɛ ya mamɛ e ma mò gbèyɛ̀nɛ.

³⁴Yerzù, rzìi a mò òhweyà nanù ema, “È ŋmanà wà amì wà mòlanà kòkò, lìlòkɛ̀ lì aŋgɔ̀ ndi lì ò wɔ̀wìrzɛ̀. O ɛ̀ndɛ na ɛ̀yɔ̀lɛ̀, ò kàrzò ò mètàkà me aŋgɔ̀ me arzɛ.”

³⁵Nà òmà Yerzù à mà hwɛ lì òhwa nanù, rzìi lòŋgò la hwatò hwà mà uhwɛlɛlɛ̀ ò ndawò yà ama Jàrìyɔ̀rzɛ̀. Hwa òhweyà Jàrìyɔ̀rzɛ̀ nanù ema, “È ŋmanà ŋgɔ̀ndɔ̀ wa aŋgɔ̀ à mà màà lì ŋwa. Mamɛ ndèŋgàtɛ̀ ò tàkìrzɛ̀ è Mòòkòlèlì ema a jèe hvɛ ò ndawò ya aŋgɔ̀ e?”

³⁶Yerzù à mà tinda mamɛ ya àrzɛ ema hwaŋga hwatò hwà mà òhwe, rzi a òhweyà òŋgò mòtìmbèlì nanù ema, “O rza òka tɔ̀ wɔ̀ŋgɔ̀! Ò hwɛnì ndi lì lòkɛ̀.”

³⁷Yerzù a rzi arze ema tɔ̀ mòtò a mò nɔ̀ŋge, lì aka tɛ, Pètrò, Jèmìrzì, na Yòwanìrzɛ̀, Jèmìrzì ŋmanyàŋgò wa eni.

³⁸Nà òmà hwà mà ùke ò ndawò ya ama Jàrìyɔ̀rzɛ̀, Yerzù à mà ɛnɛ lì anyɔ̀kɛ̀lɛ̀ na lùwa lì ndɛnɛ la lìnyɛyi là hwatò.

³⁹Rzìi àyinɛ̀lɛ̀ ò tenì ya ndawò a òhwa nanù ema, “Mamɛ ndèŋgàtɛ̀ e ndùndùmèlì e kòki nanù e? Mamɛ e eyeya e? Ò nò ŋmanà a rzi ŋwelì, a nàŋgayi ndi ijɔ.”

⁴⁰Ndì lìnyɛyi la hwatò hwà mà mò yɔ̀yèyà. A ma hwa wurzirzɛ wɔ̀ hwa arzɛ ò èwòka. Rzi a wòwa e rzàŋgò, na e nyàŋgò ya ama òŋgò ŋmanà, na Hwà-òkòwèlì hwa eni hwaayɛɛ̀ e ma à mà jane, hwa ɛ̀ndɛ ò èki ema e ŋmanà à mà hwɛ.

⁴¹À mà lɛ̀mbɛ lìya la ama òŋgò ŋmanà ŋgɔ̀ndɔ̀ rzìi a mò òhweyà nanù ema, “Talìta Kùmi.” (Ène ŋgàna e hweli ndì nanù ema, “Ŋmanà ŋgɔ̀ndɔ̀, na òhwèlì ema ò tɛ̀mɛ̀nɛ̀ ò ŋmanyu.”)

⁴²O wòtɛ̀mɛ̀tɛ̀mɛ̀ òŋgò ŋmanà rzìi a tɛ̀mɛ̀, a wòteya lì ɛ̀ndɛ èki ya arzɛ. (A ma hwɛ ndi lìyòmɛ̀ la meya na mehwakɛ.) È ŋgìndì yà hwatò ya arzɛ e ma jeja.

⁴³Yerzù à mà hwa kòkòwɛ̀lɛ̀ kɔ̀yi-kɔ̀yi ema hwa rzi keka lì gbeyà ema mòtò a hwiye mamɛ e gbèyɛ̀nɛ̀yi. A hwa òhweyà ama hwa mò ŋgbe yòma ya lì làa.