Read Mokpwe Makòrzì 6 Bible Online

Makòrzì 6 - Mokpwe bible

Makòrzì 6

¹Yerzù à mà ànjiya aŋga òma rzìi a timba ò mbòwà yà èni nà Hwà-òkòwèlì hwe eni.

²È hvònda ema Wùùnyà wò lì Arzìyòlɛ̀ wò mà ùke, rzìi à wòteya lì òkòlɛ ò ndawò ya màkanɛ̀ ya wònyà Yudà. Hwatò rzayì-rzayì ema hwa mà hwèya hwè-òkòlèlì hwe eni hwa mà ònda nà hwetamirzelì. Rzìi hwa ijòwa nanù ema, “One ònò mòtò a hvɔɔti hwenè hweyà e? Ima nyayi ya lìhwiyè lìnì ema lì mò ŋgbàahwi e? A gbeyàna hvɛ hweyà hwe mànyakà.

³Rzèke ònò mòtò à hwèlì ndi kaminda e? Rzeke e ŋmanà wà mà Màlìyɛ̀ ònò e? Rzeke wònyànyàŋgò hwa eni hwa hwèlì ndi Jèmìrzì, Jòrzɛ̀hvù, Jùdà na Rzìmɔ̀nì, e? Rzeke ì ndòmɛ ja eni ì hwèlì ò mbòwà na irzɔ e?” Rzìi hwa mò tatana.

⁴Yerzù rzìi a tìmbìrzɛ̀lɛ̀ nanù ema, “Mòòhwèlì wà èlìŋgɛ̀ à rza ŋgbààhwà èluhwe ò Mbòwà yà eni, nà ò lìhwènde la eni, nà ò lìtumba la eni.”

⁵A rzìi tanɛ̀ lì gbeyà mànyakà aŋga, ndi lòŋgò la hwatò hwà mà ɔ̀kirzɛ̀ ndi à mà hwa hwàkɛ màa rzìi a hwa wɔ̀wìrzɛ̀.

⁶Yerzù a mà ònda nà hwètàmirzelì èhwanja hwanù hwatò hwa rzi hwɛnɛ lì lòkɛ̀. Yerzù rzìi a ɛ̀ndɛ ò màmbòwà ma rzàlì ema ma mà hwɛ lì kòmbɛ̀nɛ̀ aŋga ò lì òkòlɛ̀ hwatò.

⁷À mà hwɛlɛ lìyòmɛ̀ la Hwà-òkòwèlì hwa eni nà hwàhwàkɛ̀ a hwa rzàŋgà rzìi a hwa òma hwàhwàkɛ̀, hwàhwàkɛ̀. A hwa ŋgba hvɛ wònjà ya lì hvayà hwèlìŋgɛ̀ hwe wòhwe.

⁸Yerzù à mà hwa kòkòwɛ̀lɛ̀ nanù ema, “Nà òmà e ɛ̀ndɛ nanù, è rzi wòwà tɔ̀ yòmà, lì aka tɛ mètìmbò me anyu, è rzìi wòwà tɔ̀ mòlelì, tɔ̀ ekpa, e rzi rzòŋgɛ̀ hvɛ tɔ̀ wòlì ò màrzùkù ma anyu ma hwèrzanjà ema e tìŋgɛ̀.

⁹È wɔ̀tè hwètàmbì hwe mèrzìŋgà ndi e rzì wòwà mɔ̀hvɛhvɛ mòŋgòmbè.”

¹⁰A ma òhwa hvɛ nanù ema, “Tɔ̀ ima ndawò hvɛ ema e kpèèlì, e lìyà e hwɛ aŋga natɛ̀ɛ e ànjìyà ò eŋge èki.

¹¹È ɛndì tɛ mbòwà ema e rza e kàrzɛ̀ na lì e òkànèyà è ànjiye aŋga, e hvùhvùhwè irzɔ̀hwɛ̀ ja anyu ja màtàŋgà nàa mbòŋgi lì uŋmɛ̀lɛ̀ nanù ema wòhwe wò awu wò hwa ɔ̀ŋgɔ ndi wɔ̀ ò hwètìmbèlì hwe anyu.”

¹²Hwa mà ɛ̀ndɛ rzìi hwa òhwa Eyà ya Lohwà nanù ema, “Hwatò hwa ayèŋgòwɛ̀ ò wòhwe wò awu.”

¹³Hwa mà hvaya rzayì-rzayì ja hwèlìŋgɛ̀ hwe wòhwe, rzìi hwa nyàlɛ hvɛ rzayì-rzayì ja hwatò hwà mà ɔ̀kirzɛ̀ lìyɔ̀ki la Njàhwɛ̀ rzi hwa hwà wɔ̀wìrzɛ̀.

¹⁴È mòkànèlì Hɛ̀rɔ̀dì a mà hweyà hwenè hweyà ema Yerzù ama hwɛ lì gbeyà. Èhwanja hweyà hwe gbamù Yerzù à mà hwɛ lì gbeyà, hwe ma gbeyà a mà hwìyɛ̀nɛ̀ hwèkì hwe àrzɛ. Lòŋgò la hwatò hwa mà hwɛ ndi lì òhwa nanù ema, “Yòwanìrzɛ̀ è Mòlùhwìrzèlì ndi à mà hvùmùwɛ̀ ò kpelì, ɔ̀ndeŋgàtɛ̀ a òhvi ŋginyà ya lì gbeyà manù mànyàkà mà arzɛ.”

¹⁵Hwanɛ̀yi hwa mà òhwa nanù ema, “A hwèlì ndi Èlàyijà.” Ndi hwanɛ̀ti hwà mà òhwa nanù ema, “A hwèlì ndi Mòòhwèlì wà Èlìŋgɛ̀, nàa Mòòhwèlì mɔ̀kɔ wà kòhwaa.”

¹⁶Ndi nà òmà e Mòkànèlì Hɛ̀rɔ̀dì a mà hweye nanù, rzìi a òhwa nanù ema, “A hwèlì ndì Yòwanìrzɛ̀ e Mòlùhwìrzèlì ema nà mà gbee ema hwà mà rzènjòwè mòhvò. À ma hvùmùwà.”

¹⁷Hɛ̀rɔ̀dì à ma òhwa nanù èhwanja, a mà hwɛ à mà ŋgba lìlò nanù ema hwa ŋgbaŋgɛ̀ Yòwanìrzɛ̀ e Mùlùhwìrzèlì. Hwa mà mò lɛ̀mbɛ, hwa mò kaka rzìi hwa mò ika ò hwèwòwà. À mà gbeyà ndi nanù èhwanja à mà hwàà Hɛ̀ròdìyàrzì è jòjìyɛ̀ ya ama ŋmanyàŋgò wà èni Hvìlìpì.

¹⁸Yòwanìrzɛ̀ à mà hwɛ̀ lì òhweyà Kìŋgɛ Hɛ̀rɔ̀dì hvònda tɛ nanù ema, “È mbenda e òhwi nanù ema, ò rza hwɛnì wònjà lì hwaà è jòjìyɛ̀ ya ama ŋmanyàŋgò wà aŋgɔ̀.”

¹⁹Ènè eyà e mà gbeyà Hɛ̀ròdìyàrzì à mà òmbɛlɛlɛ Yòwanìrzɛ̀ hwètàtò ò ŋmèma mò eni. O èŋgànɛ̀lɛ̀ à mà keka lì mò òŋwà, ndi Hɛ̀rɔ̀dì ama gbeyà ema a rzi tanɛ lì mò òŋwa.

²⁰Hɛ̀rɔ̀dì à mà òka Yòwanìrzɛ̀ wɔ̀ŋgɔ̀. A ma hwiya hvɛ nanù ema Yòwanìrzɛ̀ à mà hwɛ ndì mòtò wà gbamù, à mà ònda nà wòtani. O èŋgànɛ̀lɛ̀ Hɛ̀rɔ̀dì à mà hwɛ lì mò àŋgòhweyà aŋga nanù eyà ya wòhwe e rza mò gbèyɛ̀nɛ̀. À mà lìŋgàna lì mò òkànèyà, tɔ̀ nɛ tɔ̀ ima lìrzakò ema à mò òkanelì, èŋge eyà e ma mò tàkirzɛ ò ŋmèma rzayì-rzayì.

²¹Ò lìrzukù, Hɛ̀ròdìyàrzì à mà lùwa e njiya ema ama arze. Wòŋgò wùnyà ndi wò ma hwɛ e ndèma ya lì ɔ̀ŋgɛ̀lɛ̀ hwèŋyàyèlì hwe ama Hɛ̀rɔ̀dì. À ma yòhwɛ hwatò hwa ndɛnɛ hwa Gɔ̀mɛ̀ndì na hwàkànèlì hwa ndɛnɛ hwa hwàànà njùma, na hwèwàŋgì hwe erzòòkà ya Galìlì.

²²O wòŋgò wùnyà e ŋmanà wa mòlanà wa ama Hɛ̀ròdìyàrzì à mà ja rzi a rzàà ŋgɔ̀mɔ̀. A ma lìŋgìrzɛ Hɛ̀rɔ̀dì nà hwàyɛ̀nì hwa eni. Àŋga ndi Hɛ̀rɔ̀dì a ijòwa òŋgò ŋmanà ŋgɔ̀ndɔ̀ nanù ema, “Mamɛ ò wa ò lìŋgàni nanù ema na ò gbèeyà e? Nà ò ŋgba tɔ̀ ima lìtumba la yomà ema ò arza.”

²³Ène eyà è ma gbeyà Hɛ̀rɔ̀dì à mà àtɛ̀ɛ̀ yòmbò ò lì òhwa nanù ema, “Nà àtɛ̀ɛ̀ ema tɔ̀ ima yòma ema ò arza nà ò ŋgbà e yɔ̀ɔ. Tɔ̀ e hwɛ ndi èhvàrzù ya lìkànèyà la ami, na ò ŋgbà e lɔ̀ɔ.”

²⁴Òŋgò ŋmanà ŋgɔ̀ndɔ̀ à mà ɛ̀ndɛ rzìi a ijòwa nyàŋgò wa eni nanù ema, “Mamɛ nà tanɛ̀yi lì mò ijòwa e?” Nyàŋgò wa eni rzìi a mò alàhwɛ̀ nanù ema, “Ò mò òhweyà a ò ŋgbè mòòhvò mò ama Yòwanìrzɛ̀ e Mòlùhwìrzèlì.”

²⁵Lìwòkìmɛnɛ òŋgò ŋmanà rzìi a ɛ̀ndɛ karzi-karzi òma Kìŋgɛ Hɛ̀rɔ̀dì rzìi a mò òhweyà nanù ema, “Ò nò ŋgbee mòòhvò mò ama Yòwanìrzɛ̀ è Mòlùhwìrzèlì ò tàndami nàŋgɛ.”

²⁶Kiŋgɛ Hɛ̀rɔ̀dì a mà wukumeya ò ŋmèma mò eni, ndi nà òmà mɔ̀ à mà lòme lì àtɛ̀ɛ̀ yòmbò, ò ìtììtènì yà hwàyɛ̀nì hwa eni, a rzi tanɛ̀ lì mò rzɔ̀rzɔ̀nɔ̀ mamɛ à ma arze.

²⁷Lìwòkìmɛnɛ à mà òmà ŋmanèlì mɔ̀kɔ wa njùma ò lì jànà mòòhvò mò ama Yòwanìrzɛ̀. Oŋgò ŋmanèlì wa njùma à mà ɛ̀ndɛ ò tenì ya hwèwòwà rzi a rzenjòwa mòòhvò mò ama Yòwanìrzɛ̀,

²⁸à mà jàna mòòhvò mò ama Yòwanìrzɛ̀ ò tandami rzìi a mò ŋgba òŋgò ŋmanà wa ŋgɔ̀ndɔ̀. Mɔ̀ hvɛ à mà ɛ̀ndɛ rzìi a mò ŋgba nyàŋgò wa eni.

²⁹Nà òmà hwà-òkòwèlì hwa ama Yòwanìrzɛ̀ hwà mà hweye nanù, rzìi hwa jà lì wòwa èèmbè ya eni, hwa e imeya.

³⁰I àpɔ̀rzìtòlò ema Yerzù à mà òme, ima tìmba lì mò ùŋma rzìi hwa mò òhweyà hweyà hwe arzɛ e ma hwà mà gbeye, na hweyà hwe arzɛ e ma hwa mò òkòlɛ̀.

³¹Rzayì-rzayì ja hwatò hwà mà jèeyà Yerzù na Hwà-òkòwèlì hwa eni, rzì hwa tìmba nyayi ema Yerzù na hwà-òkòwèlì hwa eni hwa rzi hwɛnɛ hvɛ tɔ̀ ehvòlò ya lì làa mòlelì. Yerzù rzi a òhweyà Hwà-òkòwèlì hwa eni nanù ema, “È je ì ɛ̀ndɛ èki ya ŋmɛ̀ɛ, ema e utami aŋga nanù ì arziyòlɛ̀.”

³²Hwa mà kpèeyà ò wɔ̀lɔ̀ rzi hwa ɛ̀ndɛ ò èki yà ŋmɛ̀ɛ.

³³Rzayì-rzayì jà hwatò hwa mà hwa ɛnɛ, nà òmà hwa mà hwɛ lì ɛ̀ndɛ, rzì hwa hwèmba ŋgèlì hvɔ̀kɔ. Hwaŋga hwatò hwa mà ùhwɛlɛlɛ ndi ò màmbòwà nà màmbòwà, rzìi hwa hwàŋgà nà mataŋga mà awu, rzìi hwa lòma lì uka èki ema Yerzù nà hwà-òkòwèlì hwa eni hwa mà hwɛ lì ɛ̀ndɛ̀.

³⁴È hvònda Yerzù à mà ùke aŋga à mà ùŋma ŋgìndì ndɛ̀nɛ̀ yà hwatò. À mà hwa òkeya ììlì rzayì-rzayì, èhwanja hwa mà hwɛ ndi nàa mɛ̀ɛ̀lɛ̀ŋgù ema mè rza òhvɛɛ mɔ̀ɔ̀ŋgèlì. Ò èŋgànɛ̀lɛ̀ à mà wòteya lì hwa òkòlɛ̀ hweyà rzayì-rzayì.

³⁵Nà òmà wùùnyà wò mà wòteyà lì àhva, rzìi hwà-òkòwèlì hwa mà Yerzù hwa mò jèeyà rzìi hwa mò òhweyà nanù ema, “Ène èki è utamì, è hvònda hvɛ è mà aka rzayì-rzayì

³⁶òhweyà hwanù hwatò hwa ɛ̀ndɛ ò màmbòwà ema mà hwèlì ò tòŋgòŋgò, aŋga nanù hwa arza yòmà ema hwa tànɛyi lì làa.”

³⁷Yerzù rzìi à hwa alàhwɛ̀ nanù ema, “Inyɔ hwìti e hwa ŋgbe yòma yà lì làa.” Hwa mà mò ijòwa nanù ema, “Ò arza ema ì wòwè mòrzahwèlì mò ŋgbɛ̀ndɛ wàmbi mò mòtò mɔ̀kɔ, [1]jà ande hwèhvòòtò ò lì hwa ŋgba ema hwa le e?”

³⁸Yerzù rzìi a hwa ijòwa nanù ema, “Hwèhvòòtò hweti è hwɛnì e? È ɛ̀ndɛ è ɔŋgɔ̀” hwa mà ɔ̀ŋgɔ rzìi hwa mò òhweyà nanù ema, “Hwèhvòòtò hweta nà nyàmà jà malìhwa ihwàkɛ.”

³⁹Yerzù rzìi à òhweyà hwà-òkòwèlì hwa eni ama, hwa lììlɛ̀ hwaŋga hwatò ŋgìndì, nà ŋgìndì ò hwèwùlè.

⁴⁰Hwà mà lìya ò rze, hwàna hwa ŋgìndì na hwàna hwa ŋgìndì, lòŋgò egbe yɔ̀kɛ, yɔ̀kɛ, lòŋgò menìmeta, menìmeta, me hwatò.

⁴¹Yerzù rzìi à wòwà hwèŋge hwèhvòòtò hwe atanɛ̀ nà iŋgi nyàmà jà malìhwa jà ahwakɛ rzìi à ɔ̀ŋgɔ ò ŋmanyu yà lohwà, à ŋgba Lohwɛ̀ jeka, rzìi à kahwa hwèŋge hwèhvòòtò, à hwe ŋgba Hwà-òkòwèlì hwa eni ema hwa kàhweyà èŋge ŋgìndì. À mà wòwa hvɛ inyàmà ja ahwàkɛ ja malìhwà rzìi a kahweyà hwaŋga hwatò hwa arzɛ.

⁴²Hwàŋga hwatò hwa arzɛ hwà mà làa natɛ̀ɛ hwà mà ujà.

⁴³Hwà-òkòwèlì hwa ama Yerzù hwa mà rzàŋgà lìyòmɛ̀ la ŋgàta na ihwàkɛ ja mbùmbù ja nyàmà na hwèhvòòtò.

⁴⁴Mɔ̀rzɔ̀ŋgi mò wunyànà ema mò mà làa, mò mà hwɛ hwekòlì hweta hwe hwatò.

⁴⁵Lìwòkìmɛnɛ Yerzù à òhweyà hwà-òkòwèlì hwa eni ò lì kpèeyà ò wɔ̀lɔ̀, rzìi à hwa hvùŋgànìrzɛ̀ lì ɛ̀ndɛ ò wòrzò, ò mbòwà yà Bɛ̀trzàyìdà, ò ɛnɛyi èhvarzù yà yùlu yà malìhwa. Nà òmà hwà-òkòwèlì hwà mà hwɛ lì ɛ̀ndɛ, Yerzù rzìi à òhweyà è ŋgìndì ò lì tìmba ò màndawò ma awu.

⁴⁶Yerzù à mà apkanɛ̀ èŋge ŋgìndì, rzìi a àgba ò mòòlì ò lì kanɛ̀.

⁴⁷Lìrzakò la ŋgòmbe lì ma ùke, hwà-òkòwèlì hwa ama Yerzù hwà mà hwɛ ò tenì ya wɔ̀lɔ̀, ò ìtììtènì ja yùlu ya malìhwa Yerzù ŋmìti mɔ̀ ndì à mà hwɛ ò rzààwà.

⁴⁸À mà ɛnɛ nà òmà hwà-òkòwèlì hwa eni hwa tàkànà wɔ̀ɔ̀lɔ̀ èhwanja e mbɛ̀hvɛ̀nì e ma hwa teŋgɛ̀nɛ̀ ò wòrzò. Ò ekpààrzɛ ya wònɛyi wùnyà, Yerzù à mà ɛ̀ndɛ lì hwa ùŋmanɛlɛ. À ma ɛ̀ndɛnɛ màtaŋga ò ŋmanyu ya yùlu ya malìhwa. À mà àrza lì hwa aka.

⁴⁹Nà òmà hwa mà mò ɛnɛ à ɛ̀ndɛ̀nɛ̀ màtaŋga ò malìhwa hwà mà ɛnɛ ndi ema à hwèlì ndi mùù, rzìi hwa wòteyà lì tɛ̀ɛ̀.

⁵⁰Hwa mà tɛ ndi èhwanja nà òmà hwa mà mò ɛnɛ hwa mà lɛ̀mbɛya mòkambiya. Lìwòkìmɛnɛ rzìi a hwa òhweyà nanù ema, “È a etìrzɛnɛ! Imba! È rza òka wɔ̀ŋgɔ̀.”

⁵¹Nà òmà à mà kpèeyà ò tenì ya wɔ̀lɔ̀ lì hwa ùŋmanɛlɛ rzìi muulì mò wɔ̀tɔ̀meya. Hwà-òkòwèlì hwa arzɛ̀ hwà mà ònda na hwètàmirzelì.

⁵²Hwà-òkòwèlì hwà mà tàmà èhwanja, wɔ̀ hwa rzi rzɔ̀ŋgìtɛ̀nɛ̀ jànda ja mànyakà mà eyà ema Yerzù a lìrzɛyi hwèkòlì hwèta hwe hwatò. Hwà-òkòwèlì hwa eni hwa rzi tanɛ̀yi lì ayèmbɛ.

⁵³Hwà mà aka ɔ̀nɛyi ehvarzù ya eŋge yùlu rzìi hwa uka ò erzòòkà ya Gɛ̀nàrzàrɛ̀tì. Àŋga ndi hwà mà rzɛɛ wɔ̀lɔ̀ wò awu.

⁵⁴Nà òmà hwà mà rzihwe ò wɔ̀lɔ̀, hwatò hwà mà emba Yerzù.

⁵⁵Rzìi hwa uhweyà na lìhwaŋgi ò lì uka i njuka ja arzɛ ja èŋge erzòòkà, ò lì hwanɛ̀ hwà-òkèlì hwa arzɛ ò màkɔ̀kɔ̀, ò lì hwa ɛ̀ndɛnɛ ò hwèki hwe arzɛ ema hwà mà hweye ema Yerzù a hwèlì.

⁵⁶Tɔ̀ ima èki ema à mà ɛ̀ndɛ ò màmbòwà marzàlì, na màndɛnɛ na ò ihvaya ema hwatò hwa lìya. Hwatò hwà mà jànà hwà-òkèlì tɔ̀ ima njuka ema hwatò hwà mà arzàŋganɛ ò lì gbeyà è nyòŋga. Nà òmà hwà mà hwa jane hwa rzòrzòmeya Yerzù nanù ema a hwɛmɛ hwà-òkèlì hwa tɔ̀te màà mà awu ò lìrzukù la lìwɔti la eni. Tɔ̀ ima mòòkelì ema à mà tɔ̀tɔ̀ lìrzukù la lìwɔti la ama Yerzù à mà wɔ̀wɔ̀.