Read Mokpwe Makòrzì 9 Bible Online

Makòrzì 9 - Mokpwe bible

Makòrzì 9

¹Yerzù à mà hwa òhweyà nanù ema, “Nà è òhweyà è jɔ̀kɛ̀, lòŋgò la anyu è rza ò ɛnɛ è kpelì ema è rza ɛnɛ Lìkànèyà là ama Lohwɛ̀ nà òmà lì jà nà ŋginyà.”

²O mburzà mèènyà mòtòhwa, Yerzù à mà ɛ̀ndɛ nà Pètrò, Jèmìrzì nà Yòwanìrzɛ̀ rzìi a hwa tìmba ò lì agba ò ŋmanyu yà hvàko ema è kàrzamì. Hwà mà hwɛ aŋga wɔ̀ hwìti. Yerzù à mà ayèŋgòwɛ̀ ò wòrzò wò awu.

³È mbɔ̀ti yà èni è mà tìmba ndì mbɔ̀mi yà ŋmàye mò rzɛ̀ŋgɛ-rzɛ̀ŋgɛ lì aka nà lìmɛ̀nì. È ma tana lì aka wòtani wò jòwa ja kɛlɛndɛndɛ, ema tɔ̀ mòtò wa anù rze a rza tanɛ lì rzàŋgirzɛ.

⁴Hwà-òkòwèlì hwa ama Yerzù rzìi hwa ɛnɛ Èlàyijà nà Mòrzè hwa wurzi, rzìi hwa òhwìrzɛ̀nɛ̀ Yerzù.

⁵Pètrò rzìi a òhweyà Yerzù nanù ema, “Ìi Mòòkòlèlì ò lɔ̀wu nà òmà ì hwèlì anù, inyɛ jò òŋge màwòndò màyàwò, lɔ̀kɔ lì hwɛ è là aŋgɔ̀, lìnɛ̀yi hvɛ lì hwɛ è là ama Mòrzè, lìnɛyi hvɛ lì hwɛ è là ama Èlàyijà.”

⁶Pètrò a rzi hwiyè mamɛ à mà hwɛ lì òhwà èhwanja mɔ̀ na wònyanyàŋgò wa eni hwà mà lɛmbeya mòkambiya.

⁷Lìwòkìmɛnɛ lìmbàkì lì mà hwa lìŋga rzìi hwa hweyà lìlò lì òhwà ò tenì yà lìmbàkì nanù ema, “È Ŋmanà wa ami wa ndiŋgɛ ya màlìŋgò ònò e mò hweyàne.”

⁸Lìwòkìmɛnɛ nà òmà hwa mà hvɛ̀ŋgɛ mìrzɔ̀ ma awu, hwa rzi ɛnɛ̀ òhvɛhvɛ mòtò aŋga na wɔ̀, lì akà tɛ Yerzù mɛnɛ.

⁹Nà òmà hwa mà hwɛ lì rzìhwa ò èŋge hvàko, Yerzù rzìi a hwa kànèyà nɔkè-nɔkè, nanù ema, “È rzi kèka lì òhweyà tɔ̀ mòtò mamɛ̀ ema è ɛni natɛ̀ɛ nà è hvònda ema è Ŋmanà wà è Mòtò wà Hwènàmà à ò hvùmùwɛ̀.”

¹⁰Hwàŋga hwà-òkòwèlì hwa mà ika hwèŋge hweyà ò mèèmà me awu, hwà mà wòteya lì àyijòwànɛ̀ mɔ̀kɔ nà ɔnɛyi nanù ema, “Mamɛ hwenè Hwèhvùmùwèlì hwe hwèlì e?”

¹¹Rzìi hwa ijòwa Yerzù nanù ema, “Mamɛ ndèŋgàtɛ̀ hwà-òkòlèlì hwa mbenda hwa òhwa nanù ema Èlàyijà à hwɛnì lì jà hvɔ̀ni, ndèŋgàna è Mɔ̀ ema à Ɔ̀kirzɛ̀hwɛ̀yi e?”

¹²Yerzù rzìi a hwa tìmbìrzɛ̀lɛ̀lɛ̀ nanù ema, “Nà è jɔ̀kɛ̀, Èlàyijà a hwɛnì lì lòma lì jà ò lì rzɛ̀ŋgɛ̀nɛ̀ hweyà hwe àrzɛ. Mamɛ ndèŋgàtɛ̀ e tìlahwì ò Kaàti ya ama Lohwɛ̀ nanù ema è Ŋmanà wà è Mòtò wà Hwènàmà à hwɛnì lì taka rzayì-rzayì, rzìi hwa mò ndinda e?

¹³Nà è òhweyà nanù ema, Èlàyijà à mà lòma lì jà rzìi hwa mò gbeyànì mamɛ̀ ya arzɛ ema hwà mà lìŋganè ò lì mò gbeyànà. Hwenè hweyà hwe mà òndìrzɛ̀ mamɛ ya arzɛ ema e ma tìlahwà lì mò hvòmɛ̀nɛ̀.”

¹⁴È hvònda hwa mà jèe lì ùŋmanɛ̀lɛ hwanɛ̀yi hwà-òkòwèlì rzìi hwa tàneyà ŋgìndì ndɛ̀nɛ̀ è hwa tòŋgì. Hwà-òkòlèlì hwa mbenda hwa mà hwɛ ò hvènda nà wɔ̀.

¹⁵Nà òmà hwaŋga hwatò hwa arzɛ hwà mà ɛnɛ Yerzù, hwa mà tàmà rzayì-rzayì rzìi hwa hwaŋga lì ɛ̀ndɛ lì mò kɔmɔ̀.

¹⁶Yerzù rzìi a ijòwa hwà-òkòwèlì hwa eni nanù ema, “Mamɛ e hwèlì lìtìŋga la anyu la hvèndà e?”

¹⁷Mòtò mɔ̀kɔ wà èŋge ŋgìndì rzì à alàhwɛ̀ nanù ema, “Ìi Mòòkòlèlì kòkò nà ò jànèlì e ŋmanà wà ami wà mùnyanà ema a òhvi èlìŋgɛ̀ yà wòhwe ò nyò yà eni, ema e mò gbeyà ema à rza òhwa.

¹⁸Èŋge èlìŋgɛ̀ è mò hvɔ̀ɔ̀tì tɛ, e mò hvimbà ò rze, rzì ìhvùlù ì mò wurzà ò wàna yà èni. À rziyà marzòŋga mà eni rzìi à embàmà. Ndi nà òhwèlì hwà-òkòwèlì hwa aŋgɔ̀ nanù ema hwa hvayè ene èlìŋgɛ̀, ndi è hwa àyìimbɛ̀nɛ̀yi.”

¹⁹Yerzù rzìi a hwa alàhwɛ̀ nanù ema, “Bɔ̀ɔ! Inyɔ ene nyɔ̀ŋgɔ̀nì yà wòhwe ema è rza hwɛ̀nɛ̀yi lìlòkɛ̀, nà hwɛ nà inyɔ natɛ̀ɛ nà rzìtii e? Nà è ajùlɛ̀nɛ̀ hvɛ natɛ̀ɛ nà ima hvònda e? È nò jàneyà òŋgò ŋmanà.”

²⁰Hwa mà jàneya Yerzù òŋgò ŋmanà. Nà òmà èŋge èlìŋgɛ̀ ya wòhwe e mà ɛnɛ Yerzù, rzìi e lɛ̀mbɛ òŋgò ŋmanà e mò hvimba ò rze, e wòteya lì mò iŋgòlɛ e rze ya arzɛ rzìi e hvulu e wòteya lì mò wurza ò wàna.

²¹Yerzù rzìi a ijòwa òŋgò ŋmanà wà mùnyanà rzàŋgò wà èni nanù ema, “Ima hvòkà yà hvònda ema mɔ̀ à mà take nanù e?” Rzìi à mò alàhwɛ̀ nanù ema, “Lìwòteyà a mà hwɛ jùma ŋmanà.

²²Hvònda tɛ èŋge èlìŋgɛ̀ è mò hvimba ò mùnya nà ò màlìhwa, ò lì mò òŋwa. O tànɛyi tɛ lì gbeyà eyà, ò jò òkeya ììlì, ò jò òŋgòwane.”

²³Yerzù rzìi a mò timbìrzɛ̀lɛ̀lɛ̀ nanù ema, “O ma nà tànɛyi tɛ lì gbeyà eyà e? Mòtò a òhvi tɛ lìlòkɛ̀, tɔ̀ ima eyà e tànɛyi lì gbèyɛ̀nɛ.”

²⁴Lìwòkìmɛnɛ e rzàŋgò ya ama òŋgò ŋmanà wa mùnyanà e mà òhwa na lìlò lì kàrzàmi nanù ema, “Nà lòkɛ̀yì, ò nò òŋgòwane lìlòkɛ̀ la ami ema lì rza òndɛ.”

²⁵Ŋgindi ndɛnɛ è mà hwɛ lì hwaŋga ò lì jà lì arzàŋganɛ aŋga. Nà òmà Yerzù a mà ɛnɛ è ŋgìndì e hwaŋga lì jà ò èŋge èki, à mà lòmeya èŋge èlìŋgɛ̀ ya wòhwe nanù ema, “O wa èlìŋgɛ̀ ya hwètòòtò nà mbùke na ò kànèlì nanù ema ò mò wurze, ò rzìi mò kpèeyà hvɛ ò nyò.”

²⁶Èŋgè èlìŋgɛ̀ e ma tɛɛ nà ŋginyà, e mò rzòkòmɛlɛ̀ nà ŋginyà rzìi e wurzà. Oŋgò ŋmanà a mà ɛnɛya ndi nàa èèmbè ò marzò mà hwatò. Lòŋgò la hwatò hwa mà òhwa nanù ema, “A ma ŋwa.”

²⁷Yerzù rzìi a mò lɛ̀mbɛ nà lìya la eni, a mò tɛmirzɛ, rzìi òŋgò ŋmanà a tɛ̀mɛ̀ ò ŋmanyu.

²⁸Yerzù a mà kpèeyà ò ndawò. Hwà-òkòwèlì hwa eni rzìi hwa mò ijòwa ò jututa nanù ema, “Mamɛ ndèŋgàtɛ̀ ì rza tàneyà lì hvayà èŋgè èlìŋgɛ̀ ya wòhwe e?”

²⁹Yerzù rzìi à hwa òhweyà nanù ema, “Màkanɛ̀ mɛnɛ ndi ma tànɛyi lì hvayà ene tumba èlìŋgɛ̀ rzeketɛ ehvɛhvɛ eyà.”

³⁰Yerzù na hwà-òkòwèlì hwa eni hwà mà anjiya èŋge èki rzìi hwa akeyà ò erzòòkà ya Galìlì. Yerzù a rzi arze nanù ema tɔ̀ mòtò a hwiyè èki ema a hwèlì.

³¹Èhwanja à mà hwɛ lì òkòlɛ hwà-òkòwèlì hwa eni nanù ema, “È Ŋmanà wà è Mòtò wà Hwènàmà à hweni lì ŋgbààhwà ò hwatò hwa hwènàmà, wɔ̀ hwa mò òŋwa. O mburzà ya menya meyawò, a hvùmùwà ò lòŋgɛ.”

³²Ndi Hwà-òkòwèlì hwa eni hwa rzìi rzɔ̀ŋgìtɛ̀nɛ̀ mamɛ èma a mà òhwe rzìi hwa òka wɔ̀ɔŋgɔ̀ ò lì mò ijòwà.

³³Yerzù nà hwà-òkòwèlì hwa eni hwa mà uke ò mbòwà ya Kàpɛ̀nàwɔ̀mì. Nà òmà hwa mà ùke rzi hwa kpèeyà ndawò hvɔ̀kɔ, Yerzù rzìi a hwa ijòwa nanù ema, “Mamɛ ndèŋgàtɛ̀ è hwɛ̀ɛyayi ò hvenda ò njìya e?”

³⁴Hwa rzi mò alàhwɛ̀ èhwanja hwa mà hwɛ ndi ò hvenda yà njɛnɛ à hwèlì è mò ndɛnɛ ò ìtììtènì jà awu.

³⁵Yerzù rzìi a lìya ò rzè rzìi a hwɛlɛ lìyòmɛ̀ la eni la hwà-òkòwèlì na hwa hwàkɛ rzìi a hwa òhweyà nanù ema, “Tɔ̀ njɛnɛ ema à àrza lì hwɛ è mòndɛnɛ mɔ̀ ndi à àŋgàmɛ̀nɛ̀yi lì hwɛ è wà lìrzukù, rzìi a hwɛ hvɛ è mògbèèlì wà hwa arzɛ.”

³⁶Yerzù rzìi a wòwa jùma ŋmanà, rzìi à mò tɛ̀mìrzɛ̀ ò ìtììtènì ja awu, à mò rzɛ̀hwɛ̀ rzìi a hwa òhweyà nanù ema,

³⁷“Tɔ̀ njɛnɛ ema à kàrzɛ̀yi ene nyayi ya ŋmanà ò lìnà la amì ò ma imba ndi à kàrzɛ̀yi ndèŋgana tɔ̀ njɛnɛ ema a nò kàrzɛ̀yi à rza nò kàrzɛ̀yi ndi ìmba mɛnɛ, a kàrzɛ̀yi hvɛ è mɔ̀ ema à nò òmì.”

³⁸Yòwanìrzɛ̀ a òhweyà Yerzù nanù ema, “Mòòkòlèlì kòkò, rzeke je ɛni mòtò ema a hvayà hwèlìŋgɛ̀ hwe wòhwè ò lìna lì aŋgɔ̀. Ì mà mò òhweyà nanù ema a rzìi òka lì gbeyà nanù hvɛ èhwanja a rza enje nà irzɔ.”

³⁹Yerzù rzìi a hwa òhweyà nanù ema, “È rzì kèka lì mò òhweyà ema a hwɛmɛ. O rza ènje tɔ̀ mòtò ema à gbeyà hweyà hwe mànyàka ò lìna la ami rzìi ò mburzà hvònda a nò òhwìrzɛ̀nɛ̀ hvɛ hweyà hwe wòhwe.

⁴⁰Tɔ̀ njɛnɛ ema à rza jò teŋgɛ̀nɛ̀, nanù ò ma à hwèlì nà irzɔ

⁴¹Nà è òhweyà è jɔ̀kɛ̀ nanù ema tɔ̀ njɛnɛ ema à è ŋgbèlì tɔ̀ lìwònde la malìhwa ò lìinà la ami, èhwanja è hwèlì ndi è wɔ̀ hwa ama Krirztò a àŋgàmɛ̀nɛ̀yi lì lùwa mɔ̀rzɛ̀ŋgì.

⁴²“Tɔ̀ njɛnɛ ema à gbèyi ema mɔ̀kɔ wà hwanù hwàrzàlì ema ì nò lòkɛ̀yì ò lì gbeyà wòhwe, ò lɔ̀wu nanù ema òŋgò mòtò a kakahwè lìŋyàyi lì ndɛnɛ ò lìwɔ là eni, rzìi hwa mò indirzɛ ò ŋmanjà.

⁴³O èŋgànɛ̀lɛ̀ lìya là aŋgɔ̀ lì ò gbèyi tɛ nanù ema ò gbeyè wòhwe ò lì kɛ ò lì hvimbe. È hwèlì gbamù nà òhwa lì lùwa lòŋgɛ là gbìndèyà nà èhvàrzù yà aŋgɔ̀ yà nyò lì aka lì òhva màà màhwàkɛ rzìi ò undirzɛhwɛ ò ehvɔ̀ndi yà mùnya ema e rza lìma. [3]

⁴⁴

⁴⁵Ŋmèèndè mò aŋgɔ hvɛ mò ò gbèyi tɛ nanù ema ò gbèyè wòhwe, ò lɔ̀wu ema ò mò kɛ̀ ò mò hvimbe. È hwèlì gbamù nà ò wà lì lùwa lòŋgɛ là gbìndèyà nà èhvàrzù ya nyò yà aŋgɔ, lì aka ò wà lì òhva mèèndè mèhwàkɛ rzi hwa ò hvimba ò tenì ya ehvɔ̀ndi ya mùnya.[4]

⁴⁶

⁴⁷Lììrzɔ̀ là aŋgɔ hvɛ lì ò gbèyi tɛ nanù ema ò gbeye wòhwe, ò lì ulɛ, ò lì hvimbe, ò hwèlì gbamù ò wà ò lì kpèeyà ò Lìkànèyà là ama Lohwɛ̀ nà lìrzɔ̀ lɔ̀kɔ, lì akà lì òhvà mìrzɔ̀ màhwàkɛ rzìi ò aŋgbahwa ò ehvɔ̀ndi ya mùnya.

⁴⁸Aŋga èma, ‘Miiyurzu ema me, laa hwatò me rza ŋwa, ndèŋgàna mùùnya mò eni hvɛ mò rza lìma.’

⁴⁹“Mùùnya mò kpèeyà ò nyò ya ama tɔ̀ njɛnɛ, nà òmà ikpa ì kpèeyà ò mòlelì.

⁵⁰Ikpa ì lɔ̀wu, ndi ì wɔ̀lɛ̀nɛ̀yi tɛ wòtɛ̀wu wò eni, nɛ i tanɛ̀yi lì tɛ̀yirzɛhwɛ hvɛ e? Inyɔ e tɛ̀ ndi na ikpa, è ahwɛnɛnɛ hvɛ ɛ̀yɔ̀lɛ̀ mɔ̀kɔ nà ɔnɛyi.”