Read Mokpwe Lukàrzɛ̀ 1 Bible Online

Lukàrzɛ̀ 1 - Mokpwe bible

Lukàrzɛ̀ 1

¹Ìi Tìyòhvilɔ̀rzì: Mòtò wà èluhwe, rzayì-rzayì ja hwatò hwa mà lìya ò lì tìla mɔ̀nɔ̀ŋgèlì mò hweyà ema hwe ma gbeyɛ̀nɛ ò ìtììtènì ja àrzu.

²Wɔ̀ hwa mà tìla ndi ŋgàna hvɔ̀kɔ, nà òmà irzɔ imà hweyàne hwaŋga hwatò, ema hwà mà ɛnɛ hwenè hweyà nà mìirzɔ̀ ma awu ò hwèwòtelì ndèŋgàna wɔ̀ hwa mà hwɛ ndi lì òhwà Eyà ya Lohwà.

³O èŋgànɛ̀lɛ̀ rzɔ, ìmba hvɛ nà wòwì hvònda ò lì nɔkìrzɛ̀ hwenè hweyà hwe arzɛ natɛ̀ɛ nà ò hwèwòtelì, nà ɛni nanù ema, ò lɔ̀wu ema ìmba hvɛ na wòwè hvònda ò lì ò tìleya hwenè hweyà, yɔ̀kɔ ò mburzà yà ɛnɛ̀yi.

⁴Ènè eyà e ò gbeyà ò hwiyà è jɔ̀kɛ̀ yà hweyà ema ò mà òkòlɛ̀hwɛ.

⁵È hvònda ema Hɛ̀rɔ̀dì à mà hwɛ è kiŋgɛ̀ yà Jùdeyà, ò mà hwɛ mòtò mɔ̀kɔ ema à ma hwɛ̀lɛ̀hwɛ̀ Rzàkàriyà. Rzàkàriyà à mà hwɛ ndì pìlìrzì ema è ma uhwɛlɛlɛ ò lìhwende la ama Àbijà. Lìinà la ama jòjìyɛ̀ wà èni lì mà hwɛ ndi Èlìrzabɛ̀tì. Mɔ̀ hvɛ à mà uhwɛlɛlɛ ndi ò lìtumba la ama Arɔ̀nì.

⁶Lòŋgɛ là ama Rzàkàriyà nà Èlìrzabɛ̀tì lì mà hwɛ gbamù ò wòrzò wò ama Lohwɛ̀. Wɔ̀ hwa mà ika imbenda ja ama e Rzàŋgò ndèŋgàna wɔ̀ hwa mà gbeyà mamɛ ema è ma lɔ̀wu.

⁷Ndi hwa rzi hwɛnɛ̀ tɔ̀ hwanà èhwanja Èlìrzabɛ̀tì à mà hwɛ ndi yòmbà, ndèŋgànɛ̀lɛ̀ wɔ̀ hwa mà hwɛ ndi hwatò ema hwà mà rzɔ mòkèka rzayì-rzayì.

⁸È hvònda ema è Pìlìrzì yà lìhwende la ama Rzàkàriyà e mà ùke yà èwòlò, wùnyà wɔ̀kɔ mɔ̀ Rzàkàriyà a mà ɛ̀ndɛ lì gbeyà èwòlò ya è pìlìrzì ò Ndawò yà Lohwà.

⁹Mɔ̀ ndì à ma hvɔ̀rzɔ̀wɔ̀, nà òmà hwa mà òke mɛ̀rzɔ̀rzɔ̀nì ò lì kpeyà ò Ndawò yà Lohwà ò lì gbèeyà e Rzàŋgò, ò lì rzɛ̀lɛ̀ itùwà nà òmà Ipìlìrzì ì mà hwɛ lì gbeyà.

¹⁰Nà òmà a mà hwɛ lì rzɛlɛ̀ itùwà, è ŋgìndì yà hwatò ya àrzɛ, è mà hwɛ ò èwòkà, ò lì kanɛ̀.

¹¹Nà òmà Rzàkàriyà a mà hwɛ ò lì rzɛlɛ̀ itùwà rzìi, è aŋgèlì yà ama e Rzàŋgò e mò wurzeyà, è mò tɛmeya ò èhvàrzù ya eni ya lìya la mòmɛ̀, ò tòŋgòŋgò yà ètàwò yà màkanɛ̀ ema a mà hwɛ lì rzɛlɛ itùwà.

¹²Nà òmà Rzàkàriyà a mà ɛnɛ è aŋgèlì à mà tàmà, rzìi wɔ̀ɔŋgɔ̀ wò mò lɛ̀mbɛ̀.

¹³Ndì è aŋgèlì è mà mò òhweyà nanù ema, “Ìi Rzàkàriyà, ò rzì òka wɔ̀ŋgɔ̀, Lohwɛ̀ à mà hwèya lì kanɛ̀ la aŋgɔ̀. Jòjìyɛ̀ wà aŋgɔ̀ Èlìrzabɛ̀tì a ò ŋya ŋmanà. O ò mò kpɛ̀ ndi lìinà Yòwanìrzɛ̀.

¹⁴A ò jàneyà mɔ̀nyɛ̀ŋgì. Rzayì-rzayì ja hwatò hvɛ, hwa òkà mɔ̀nyɛ̀ŋgì ò hwèŋyàyèlì hwe eni.

¹⁵È ò hwɛ ndi nanù, èhwanja ò nò ŋmanà a ò hwɛnɛ èluhwe ndɛnɛ̀ ò wòrzò wò amà Rzàŋgò. A rza ò nyɔ mimba ema mà èèti tɔ̀ hwelandì. Lìwòteya ò hwèŋyàyèlì hwe eni, a ò òndìrzɛ̀hwɛ̀ nà Èlìŋgɛ̀ yà Wòtani.

¹⁶A ò tìmbirzɛ mèèmà me rzayì-rzayì ja wònyà Irzàyɛ̀lì ò ma Rzàŋgò, ema a hwèlì Lòohwà la awu.

¹⁷A ò hvùŋgàna ò wòrzò ndèŋgàna è Rzàŋgò e ò jà. A ò hwɛnɛ hvɛ e ŋginyà nà èlìŋgɛ̀ ŋgàna hvɔ̀kɔ nàa Èlàyijà è mòòhwèlì wà èlìŋgɛ̀ wà kòhwaa a mà hwɛnɛ. A ò rzèeya mèèmà me irzàŋgo nà hwàna hwa awu. Hwatò ema hwa hwɛnì maniya nà Lohwɛ̀, wɔ̀ hvɛ à hwa tikòwà ò lì jà ò lìhwiyè nà hwàtanèlì ò wòrzò wò ama Lohwɛ̀. A ò rzèkeya hwatò ò hwèjèelì hwe ama Rzàŋgò.”

¹⁸Rzàkàriyà rzìi a ijòwa è aŋgèlì nanù ema, “Nɛ na tànɛyì lì hwiyà ema hwenè hweyà ema òhwì hwe ò gbèyɛ̀nɛ̀ e? Nà hwèlì ndi mòlùnì wà mòtò, jòjìyɛ̀ wa amì mɔ̀ hvɛ à mà rzɔ mòkèka.”

¹⁹È aŋgèlì è mà mò alàhwɛ̀ nanù ema, “Ìmba ndi nà hwèlì Gàbìleyà, e rzùhwɛlɛ ema e gbèeyà Lohwɛ̀. Mɔ̀ ndi à nò òmi ò lì ò hwilɛ̀ ene eyà ya gbamù.

²⁰Nàŋgɛ, tɔ̀ nɛ ò rzà lòkɛ̀ ene eyà ema na ò jànelì, ò kpa mbùke, natɛ̀ɛ èŋge hvònda ema hwenè hweyà hwe àrzɛ ema na ò òhwèlì hwe ò gbèyɛ̀nɛ. Hweyà hwe àrzɛ hwe ò òndìrzɛ̀hwɛ è hvònda è ukì tɛ.”

²¹Ène hvònda ya àrzɛ hwatò hwa mà hwɛ lì ambɛ̀lɛ̀ Rzàkàriyà ò èwòkà. Rzìi hwa tàmeya hwììndèlèlì hwe eni ò Ndawò yà Lohwà.

²²È hvònda a mà wurze, à rzi tanɛ̀ lì hwa òhwìrzɛ̀nɛ̀, rzìi hwa ayèmbɛ nanù ema à enì ndi jɛ̀nɛ̀ni ò Ndawò yà Lohwà, nà òmà a rzi tanɛ lì òhwà, à mà hwa uŋmɛ̀lɛ̀ ndi hwèmɛ̀nɛ̀nì nà màà mà eni.

²³È hvònda ema Rzàkàriyà a mà kulɛ èwòlò ya eni ò Ndawò yà Lohwà à mà tìmba ò ndawò yà èni.

²⁴O mburzà hvònda jòjìyɛ̀ wà èni Èlìrzabɛ̀tì, à mà lìta lemì; à ma àwutɛ̀ ò ndawò, natɛ̀ɛ ŋgbɛ̀ndɛ̀ ita.

²⁵Rzìi à òhwa nanù ema, “Nàŋgɛ nanù, Rzàŋgò à nò gbèèlì gbàmù. A nò òkelì ììlì, a ulɛ̀ ìrzɔnì ja amì ò hwatò wa amì.”

²⁶O ŋgbɛ̀ndɛ̀ mòtòhwa ema Èlìrzabɛ̀tì a mà hwɛ nà lèèmì, Lohwɛ̀ à mà òma è aŋgèlì Gàbìleyà ò mbòwà ema e ma hwɛ̀lɛ̀hwɛ̀ Nàrzàrɛ̀tì, ò èkòmè ya Galìlì.

²⁷O lì ùŋma mɔ̀ɔ̀mbɔ̀ mò ŋmanà ŋgɔ̀ndɔ̀ mɔ̀kɔ ema mò ma hwɛ̀lɛ̀hwɛ̀ Màlìyɛ̀, ema à ma wàndàhwà nà mùnyanà mɔ̀kɔ Jòrzɛ̀hvù. Jòrzɛ̀hvù ema à ma uhwɛlɛlɛ ndi ò lìhwende la ama Kiŋgɛ Dàhwitì.

²⁸È aŋgèlì è mà wurzeya Màlìyɛ̀, rzìi e mò òhweyà nanù ema, “Ɛ̀yɔ̀lɛ̀ e hwɛ nà ò wa! Lohwɛ̀ à ò uŋmɛ̀lɛ̀ ììlì ja eni ja tòwòtòwò. Tatà Lohwɛ̀ a hwèlì nà ò wa.”

²⁹Mònò ŋmɛ̀ndì mò mà tàkirzɛ Màlìyɛ̀ rzayì-rzayì. Rzìi à atàkìrzɛ ò ŋmèma mò eni, ò lì hwiyà jànda ja inì ikɔ̀mi.

³⁰È aŋgèlì rzìi e mò òhweyà nanù ema, “Ìi Màlìyɛ̀ ò rzì òka wɔ̀ŋgɔ̀ Lohwɛ̀ à ò uŋmɛ̀lɛ̀ ììlì ja eni.

³¹O nò òkànèyà tɛ, ò hwɛnì lì lìta lèmì o ò ŋya ŋmanà wà mùnyanà. O ò mò kpɛ̀ɛ ndi lìinà Yerzù.

³²Oŋgò Ŋmanà a ò hwɛ ndi yumɛ̀ ya mùnyanà. A ò hwɛ̀lɛ̀hwɛ̀ ndi è Ŋmanà wà ama Lohwɛ̀ lì Kàrzami. Tatà Lohwɛ̀ à ò mò ŋgbà è kònda yà Lìkànèyà la ama è mbamba yà eni Dàhwitì.

³³A ò kàneya lìtumba la ama Jèkɔ̀bù, natɛ̀ɛ nà ò mòlìkɛ̀, ò èŋgànɛ̀lɛ̀, lìkànèyà la eni lì rzà ò hwɛnɛ lìrzukù.”

³⁴Màlìyɛ̀ rzìi a ijòwa è aŋgèlì nanù ema, “Nà hwèlì ndi mɔ̀ɔ̀mbɔ̀ mò ŋmanà ŋgɔ̀ndɔ̀, nɛ na tànɛyi lì ŋya ŋmanà e?”

³⁵È aŋgèlì è mà mò alàhwɛ̀ nanù ema, “Èlìŋgɛ̀ yà Wòtani e ò rzìhweyà, ndèŋgàna è ŋginyà yà ama Lohwɛ̀ lì karzamì è ò hwandà. O eŋgànɛ̀lɛ̀, òŋgò Ŋmanà wà wòtani ema o ò ŋya, a ò hwɛ̀lɛ̀hwɛ̀ ndi è Ŋmanà wà ama Lohwɛ̀.

³⁶O hwiyè ema ŋmanyàŋgò wà aŋgɔ̀ wà lìtumba Èlìrzabɛ̀tì ema à ma hwɛ̀lɛ̀hwɛ̀ yòmbà, mɔ̀ hvɛ nàŋgɛ ò mòlùnì mò eni à lìti lèmì la ŋgbɛ̀ndɛ̀ mòtòhwa.

³⁷È hwèlì ndi nanù, èhwanja tɔ̀ eyà e rzà àmbì nà Lohwɛ̀.”

³⁸Màlìyɛ̀ à mà mò alàhwɛ̀ nanù ema, “Nà hwèlì ndi è mògbèèlì wà ama e Rzàŋgò. Inyɛ̀ e nò gbèyɛnɛ nà òmà ò òhwì.” Rzìi è aŋgèlì e ɛ̀ndɛ̀, e mò lìyà.

³⁹O hwèŋge hwèyu, Màlìyɛ̀ à mà wòŋgìrzɛ̀nɛ̀ kàrzì-kàrzì, rzìi a àgba ò mbòwà hvɔ̀kɔ yà mòòlì ò èkòmè ya Jùdeyà.

⁴⁰A mà ùke aŋga, rzìi a kpèeyà ò ndawò yà ma Rzàkàriyà, a kɔ̀mɔ̀ Èlìrzabɛ̀tì.

⁴¹Nà òmà Èlìrzabɛ̀tì a mà hweye ìikɔ̀mi ja ama Màlìyɛ̀, ŋmɛ̀ɛŋgɛ mò ŋmanà ema mò mà hwɛ ò èwònì ya lùùŋgà la ama Èlìrzabɛ̀tì mò mà anyìŋgìrzɛ̀nɛ̀. Èlìrzabɛ̀tì à mà ònda nà Èlìŋgɛ̀ yà Wòtani.

⁴²Èlìrzabɛ̀tì rzìi a òhweyà Màlìyɛ̀ nà lìlò lì karzami nanù ema, “Ò nàmìrzɛ̀hwɛ̀yi ò ìtììtènì yà wònyà hwalanà hwa arzɛ, mònàmɛ̀ hvɛ nà è ŋmanà ema o ò ŋya.

⁴³Mamɛ ndeŋgàtɛ nà ŋgbàahwì èluhwe nanù e? Nɛ è nyàŋgò yà ama e Rzàŋgò e hwɛnì lì nò jèeya e?

⁴⁴Nà òmà iikɔ̀mi ja aŋgɔ̀ ì nò kpèelì ò màtò, ŋmɛ̀ɛŋgɛ mò anyìŋgìrzɛ̀nɛ̀ ò èwònì ya amì nà mɔ̀nyɛ̀ŋgì.

⁴⁵Lohwɛ̀ a ò nàmìrzɛ̀, èhwanja ò lòkɛ̀yi nanù ema, eyà ema e Rzàŋgò e mà ò òhweyà e ò gbèyɛ̀nɛ.”

⁴⁶Màlìyɛ̀ à mà òhwa nanù ema, “Nà hwèlì nà ekà è Rzàŋgò nà mèèmà mò amì mò àrzɛ,

⁴⁷èlìŋgɛ̀ ya amì hvɛ e òkani Lohwɛ̀ mɔ̀nyɛ̀ŋgì. Mɔ̀ ema à hwèlì è mɔ̀kɔ̀tèlì wà amì.

⁴⁸Èhwanja mɔ̀ à embi lì arzìhwìrzɛ la è mògbèèlì wà èni. O èŋgànɛ̀lɛ̀ lì wòteya naŋgɛ, inyɔ̀ŋgɔ̀nì ja arzɛ jò òhwa ndi ema nà hwèlì ndi è mòlanà ema Lohwɛ̀ a nàmìrzɛ̀.

⁴⁹Lohwà la Màyɛ̀kɛ̀ à nò gbèèlì eyà ndɛnɛ̀. Mɔ̀ à hwèlì wòtani.

⁵⁰Ììlì ja eni jò ò hwɛ ndi ò ŋmanyu yà nyɔ̀ŋgɔ̀nì hvɔ̀kɔ nà ènɛ̀yi nyɔ̀ŋgɔ̀nì, nà ò ŋmanyu yà tɔ̀ njɛnɛ ema à mò ŋgbelì èluhwe.

⁵¹À gbèyi hweyà hwè ndɛnɛ̀ nà lìya la eni. A wùùlɛ̀ hvɛ màlùtèyà ma hwatò ema hwa ayèkirzɛ̀ ò mèèmà me awu.

⁵²À ulɛyi hwàkànèlì ò kònda ja awu ja màkànèyà, rzìi à kàrzɛ̀yi hvɛ è wɔ̀ ema hwa arzihwirzɛ.

⁵³À ujìrzɛ̀yi è wɔ̀ hwa njàwò nà hwema hwe gbamù. Ndi à tìmbìrzɛ̀ hvɛ hwatò ema hwa òhvi rzayì-rzayì nà màà ma ŋgundu.

⁵⁴À òndìrzɛ̀yi lìkàkɛ̀nɛ̀ la eni ema a mà ŋgbe irzàŋgo ja arzu ja kòhwa. Rzìi à òŋgòwani hvɛ hwàkutu hwa eni, hwatò hwa Irzàyɛ̀lì.

⁵⁵À mà ɔ̀ŋgɛlɛ ò lì uŋmɛ̀lɛ̀ Abràhamù ììlì ja eni nà è nyɔ̀ŋgɔ̀nì yà èni ya àrzɛ natɛ̀ɛ nà ò mòlìkɛ̀.”

⁵⁶O mburzà yà nanù, Màlìyɛ̀ à mà lìyà nà Èlìrzabɛ̀tì ŋgbɛ̀ndɛ̀ iyàwò, rzìi a tìmba ò ndawò yà èni.

⁵⁷È hvònda yà lìyalì la ama Èlìrzabɛ̀tì e mà ùke, à mà ŋya ŋmanà wà mùnyanà.

⁵⁸Hwatò ema hwà mà hwɛ lì lìya lì mò kòmbɛ̀nɛ̀, nà lìtumba la eni hwa mà hwèya ema Rzàŋgò à mò uŋmɛ̀lɛ̀yi ììlì ndɛnɛ̀, wɔ̀ hvɛ hwa mà lìŋgà.

⁵⁹Menya Wàmbì me mà ùke, ò lì endà è ŋmanà, hwa mà lùteya ndì ò lì mò kpɛɛ lìinà la ama rzàŋgò wà èni Rzàkàriyà.

⁶⁰Ndi nyàŋgɛ à mà òhwa nanù ema, “Jàyɛ̀! À hwɛ̀lɛ̀hwɛ̀ ndi Yòwanìrzɛ̀.”

⁶¹Rzìi hwa òhweyà nyàŋgɛ nanù ema, “O rzà ènje tɔ̀ mòtò tɔ̀ mɔ̀kɔ ò lìtumba lì aŋgɔ̀ ema à hwɛ̀lɛ̀hwɛ̀ lìŋgi lìnà.”

⁶²Àŋga ndi hwà mà uŋmɛ̀lɛ̀ rzàŋgɛ Rzàkàriyà hwemɛ̀nɛ̀nì nà màà mà awu lì àrza lì hwiyà ima lìnà a kpɛ̀ɛ è ŋmanà.

⁶³À mà gbeyà hwemɛ̀nɛ̀nì nà màà ma eni ema hwa mò ŋgbè tahvèlì. Rzìi à tìla nanù ema, “Lìinà la eni lì hwèlì ndi Yòwanìrzɛ̀.” Nà òmà hwatò hwa mà ɛ̀nɛ mamɛ a mà tìle, hwa mà tàmà.

⁶⁴O wòtɛmɛ̀tɛmɛ̀ jɛ̀ɛ̀mɛ̀ ja eni ì mà wuluweya, rzìi a wòteya lì òhwà, nà lì ekà Lohwɛ̀.

⁶⁵È wɔ̀ ema hwà mà ɛ̀nɛ enè eyà, hwa mà lɛ̀mbeya mòkambiya. Rzìi hwa wòteya lì ɛ̀ndɛnɛ è njambɛ̀ ò màmbòwà ma arzɛ ma meyòlì ma èkòmè ya Jùdeyà.

⁶⁶Hwatò hwa àrzɛ ema hwà mà hwèya hwenè hweyà ema hwe ma gbèyɛnɛ, hwa mà hwe uta ò mèèmà me awu. Rzìi hwa a àyijòwànɛ̀ nanù ema, “Ima nyayi mòtò ò nò ŋmanà a ò hwɛ̀ɛ e?” Hwa mà hwɛ lì ijòwa nanù, èhwanja hwa mà hwiya nanù ema Lohwɛ̀ à hwèlì nà è ŋmanà.

⁶⁷Rzìi Yòwanìrzɛ̀, rzàŋgò wà èni, Rzàkàriyà à mà ònda nà Èlìŋgɛ̀ yà Wòtani, rzìi a wòteya lì òhwà hweyà nanù ema,

⁶⁸“Jèka ì hwɛ nà è Rzàŋgò, Lohwà la hwatò hwa Irzàyɛ̀lì. Jèka ì hwɛ nà Lohwɛ̀ èhwanja mɔ̀ à jelì ò lì òŋgòwànà hwatò wa eni, nà lì hwa rzùŋgà.

⁶⁹À è ò kòkìrzɛ̀lɛ̀lɛ̀ mòtò mɔ̀kɔ wà ŋginyà, ò ndawò yà àma è mògbèèlì wà èni Dàhwitì, mɔ̀ ndì à hwèlì è mɔ̀ ema a e ò e rzùŋgà.

⁷⁰Nà òmà a mà òhwe nà è kòhwa, à mà òma Hwà-òhwèlì hwa eni hwa Hwèlìŋgɛ̀ hwa wòtani ò lì òhwa nanù ema,

⁷¹Mɔ̀ à jò òŋgirzɛ ò màà ma hwàkɔ̀yèlì hwa arzu, nà hwàŋgà hwatò hvɛ ema hwa jò kɔ̀wu.

⁷²Lohwɛ̀ à mà uŋmɛ̀lɛ̀ irzàŋgo ja arzu ììlì ema a mà hwa kàkɛ̀nɛ̀. Nànu hvɛ ndi à ɔ̀ŋgɛlɛ è hweyì yà eni yà wòtani,

⁷³hweyi ema a mà aàtɛ nà e mbamba ya àrzu Abràhamù.

⁷⁴Mɔ̀ à mà òhwa àma, à jò kɔ̀tɔ̀ ò màà ma hwàkɔ̀yèlì hwa arzu, ndèŋgàna jò ò mò gbèeyà e rzì hwɛ lì òkà wɔ̀ŋgɔ̀.

⁷⁵Èŋge hvònda jò ò mò gbèeyà nà mèèmà me arzu ema me tani, nà lì tɛ̀mɛ̀ hvɛ ehve-ehve ò wòrzò wò eni, ò hwèyu hwe àrzɛ hwe lòŋgɛ la arzu.

⁷⁶Ndi ò wa e ŋmanà wà amì, o ò hwɛ̀lɛ̀hwɛ̀ ndi Mòòhwèlì wà Èlìŋgɛ̀ wà ama Lohwɛ̀ lì karzamì. O ò ɛ̀ndɛ ò wòrzò wò ama è Rzàŋgò, ò lì rzèeyà è njìya ema è Rzàŋgò e akeyà.

⁷⁷O ò gbeyà hwatò hwa aŋgɔ̀ ò lì hwiyà ema, Lohwɛ̀ ama hwa òŋgìrzɛ̀ èhwanja à mà làkìrzɛ̀ wòhwe wò awu.

⁷⁸Ènè eyà yò ò gbèyɛ̀nɛ̀ èhwanja, Lohwɛ̀ a mà jò uŋmɛ̀lɛ̀ ììlì nà ŋmèma mò eni mò gbamù. Inì ììlì ì hwèlì ndi nàa mòrzɔnji-rzɔnji mò igbèyi ema mò uhwɛlɛlɛ ò ŋmanyu yà Lohwà, ema mò jò jàneya lì òŋgìrzɛ̀.

⁷⁹Mònò mòrzɔnji-rzɔnji mò igbèyi, mò ò uŋmɛ̀lɛ̀ hwaŋga hwatò ema hwa hwèlì ò jìtìtì, nà è wɔ̀ hvɛ ema hwa kòmbɛ̀nɛ̀ è kpelì, ŋmàye. Ndèŋgàna irzɔ jò ò lùwa lìhwiyè ema lì jò uŋmɛ̀lɛ̀ è njiya ema e jànà lòŋgɛ la ɛ̀yɔ̀lɛ̀.”

⁸⁰Yòwanìrzɛ̀ à mà òŋgà, Èlìŋgɛ̀ ya ama Lohwɛ̀ e mà mò ŋgba màyìmbì. À mà lìya ò mòrzànjɛ̀, natɛ̀ɛ nà è hvònda ema a mà wòteya lì òhweyà hwatò hwa Irzàyɛ̀lì Eyà ya Lohwà ò mòte.