Read Mokpwe Lukàrzɛ̀ 10 Bible Online

Lukàrzɛ̀ 10 - Mokpwe bible

Lukàrzɛ̀ 10

¹O mburzà nanù Rzàŋgò à mà hvɔ̀rzɔ̀ hvɛ mènì lìrzàmbà me hwà-òkòwèlì nà hwàhwàkɛ̀. À mà hwa òma hwàhwàkɛ̀, hwàhwàkɛ̀, ò lì ɛ̀ndɛ ò wòrzò, ò màmbòwà nà hwèki e ma mɔ̀ à mà hwiye ema à hwɛnì lì ɛ̀ndɛ.

²Yerzù à mà hwa òhweyà nanù ema, “È hvaya è ŋyàayì jɔ̀ɔ̀-jɔ̀ɔ̀, ndi hwarzàŋgà mbòtà hwa rzà kòkì. È kanɛ̀ nanù ema è mòhwɛ̀nèlì wà hvaya, à òme hwàrzàŋgèlì hwa mbòtà ò hvaya.

³È ɛ̀ndɛ̀ ndì, e hwiyè nanù ema, nà e òmà ndi nàa mɛ̀lɛ̀ŋgù ò ìtììtènì ja njùhwɛ̀.

⁴Nà òmà e ɛ̀ndɛ, è rzì ɛ̀ndɛnɛ tɔ̀ ekpa ya wòlì, tɔ̀ lì hvɛhvɛ lìkpà nà hwètàmbì. È rzì tɛ̀mɛ̀ ò njìya ò lì kɔ̀mɔ̀ mòtò.

⁵È kpèèlì tɛ tɔ̀ ima ndawò, inyɔ e kɔ̀mè nanù ema, ‘Ɛ̀yɔ̀lɛ̀ e hwɛ nà inyɔ.’

⁶È hwèlì tɛ ema, ò hwèlì mòtò wà ɛ̀yɔ̀lɛ̀ ò èŋge ndawò, èŋge ɛ̀yɔ̀lɛ̀ e hwɛ nà mɔ̀. O rzà ènje hvɛ tɛ tɔ̀ mòtò, èŋge ɛ̀yɔ̀lɛ̀ ye è tìmbeyà.

⁷Ndawò tɛ e kpèèlì, è lìyà aŋga. È rzì ànjiya aŋga. È lèè, e nyò tɔ̀ mamɛ ema hwa e ŋgbèlì, èhwanja è mògbèèlì à àŋgàmɛ̀nɛ̀yi lì lùwà mòrzàhwèlì mò eni. Inyɔ è rzà awa ndawò tɛ e kpèeyà.

⁸Tɔ̀ ima mbòwà ema e kpèelì, rzi hwe karzɛ̀, e le tɔ̀ ima mòlelì ema hwe è ŋgbelì.

⁹È wɔ̀wìrzɛ̀ hwà-òkèlì. È hwa òhweyà hvɛ nanù ema, ‘Lìkànèyà là ama Lohwɛ̀ lì ma è kòmbɛ̀nɛ̀.’

¹⁰Ndi è mbòwà è rza è kàrzɛ̀ tɛ, ya ɛ̀ndɛ ò màhvani ma njìyà mà arzɛ e òhwe nanù ema,

¹¹‘Tɔ̀ irzɔ̀hwɛ̀ ja anyu ema jò ò hwèlì ò rze yà màtàŋgà ma arzu, ì ma è hvùhvùhweyà è jɔ. Ndi e hwiyè ema lìkànèyà là ama Lohwɛ̀ lì ma è kòmbɛ̀nɛ̀.’

¹²Nà è òhweyà ndi e jɔ̀kɛ̀ nanù ema, ò wùnyà wò hwèkàyìrzèlèlì, Lohwɛ̀ à ò uŋmɛ̀lɛ̀ ììlì ò hwatò hwa Rzòdòmì lì aka inyɔ.

¹³“Lìkunde lì ndɛnɛ̀ lì hwèlì lì e àmbɛ̀lɛ̀, inyɔ hwatò wa Kòràrzinì! Lìkunde lì ndɛnɛ̀ hvɛ nà hwatò hwa Bɛ̀trzàyìdà! Mànyakà ema Lohwɛ̀ a mà gbèye ò mbòwà yà anyu, ma mà gbèyɛnɛ tɛ ndì ò mbòwà yà Tàyi nà Rzidònì, hwaŋga hwatò ema hwà mà liya ò rze rzìi hwa wɔtɔ̀ màatù ma màyɛ̀ɛhwɛ̀, hwa akòmɛ hvɛ lìwù ò nyò ja awù ò lì uŋmɛ̀lɛ̀ nanù ema hwa mà ayèŋgòwɛ̀ ò wòhwe wò awu.

¹⁴O wùnyà wò hwèkàyìrzèlèlì, ɛ̀kɔ̀kìrzɛ̀ ema hwatò hwa Tàyi nà Rzidònì hwa ò lùwà e hwɛ̀nɛ̀ rzìhwɛ lì akà è hwe anyu.

¹⁵Inyɔ hvɛ hwatò hwa Kàpɛ̀nàwɔ̀mì, è ɔ̀ŋgɛ̀lɛ̀ nanù ema, e ma uka ò ŋmanyu ya Lohwà, ndi è hwɛnì lì rzìhwirzɛhwɛ ò tenì yà mùnya.”

¹⁶Yerzù rzìi a òhweyà Hwà-òkòwèlì hwa eni nanù ema, “Tɔ̀ ì ma mòtò ema à è hweyàni, ò ma ìmba ndi à hweyànì. Tɔ̀ njɛnɛ hvɛ ema à è rzɔ̀rzì, ò ma ìmba ndi à rzɔ̀rzi. Tɔ̀ ima mɔ̀ hvɛ ema à nò rzɔ̀rzi, ò ma à rzɔ̀rzi ndi òŋgò ema à nò òmi.”

¹⁷Mènì Lìrzàmba me hwà-òkòwèlì nà hwàhwàkɛ̀ ema Yerzù a mà òme hwa mà mò tìmbeya. Hwa mà mò òhweyà nà mɔ̀nyɛ̀ŋgì nanù ema, “Rzàŋgò e! Tɔ̀ hwèlìŋgɛ̀ hwe wòhwe hwe mà jò arzìrzɛ̀ nà òmà imà tuhwe lìinà la aŋgɔ̀.”

¹⁸Yerzù rzìi a hwa òhweyà nanù ema, “Nà mà ɛ̀nɛ nà òmà Mòkarzɛ̀ a mà unde nàa lìŋmɛ̀tì-ŋmɛ̀tì ò ŋmanyu yà Lohwà.

¹⁹È hwiyè ema! Nà è ŋgbelì è wònjà ò lì làalàna maàhwa, nà mawòhwɛ̀ ma mèhvèndò nà lì akà ì ŋginyà ja amà Mòkarzɛ̀ ja arzɛ e rzì hwɛ lì hwènà.

²⁰Ndi tɔ̀ nanù e rzì kèka lì òkà mɔ̀nyɛ̀ŋgì èhwanja hwèlìŋgɛ̀ hwe wòhwe hwe è hweyànà ndì e òkè mɔ̀nyɛ̀ŋgì ema mìinà ma anyu ma tìlahwì ò ŋmanyu ya Lohwà.”

²¹O èŋge hvònda, Èlìŋgɛ̀ yà Wòtani e mà lìŋgìrzɛ Yerzù rzayì-rzayì, rzìi a òhwa nanù ema, “Ìi Tatɛ̀, Rzàŋgò wà ŋmanyu yà lohwà nà è rze yà mɔ̀nyɛ̀, nà ò ekì ehwànja ò ùŋmɛlɛ jùma hwanà hweyà ema ò mà wunane hwàŋgà ema hwa òhvi mahwiye nà hwaŋga hwatò ema hwa rzɔ̀ŋgìtɛ̀nɛ̀. Ɛ̀ɛ Ìi Tatɛ̀, nanù ndi ò mà àrze òma è gbeyɛ̀nɛ̀.”

²²“Tatɛ̀ wà ami a nò ŋgbelì hweyà hwe arzɛ ò màa mà ami. Tɔ̀ mòtò à rza hwi njɛnɛ è ŋmanà à hweli lì aka tɛ Lohwɛ̀ e Tatɛ̀. O rza enje hvɛ tɔ̀ mòtò ema a hwi njɛnɛ e Tatɛ̀ yɔ hvɛ e hwèlì lì aka tɛ e ŋmanà na tɔ̀ ima mòtò ema e ŋmanà a ò lìŋgànɛ ò lì mò uŋmɛ̀lɛ̀.”

²³Yerzù à mà ayèŋgòwɛ̀lɛ̀lɛ̀ hwà-òkòwèlì hwa eni, nàa wùndɛ̀ rzìi a hwa òhweyà nanù ema, “Mònàmɛ̀ nà hwaŋga hwatò ema hwa ɛnɛ̀yi mamɛ inyɔ hvɛ ya ɛnì!

²⁴Nà è òhweyà nà è jɔ̀kɛ̀ nanù ema, rzayì-rzayì ja hwà-òkòwèlì hwa hwèlìŋgɛ̀, nà ìkiŋgɛ̀, hwa mà hwɛnɛ e nyɔ̀ŋgi ò lì ɛnɛ̀ hwenè hweyà ema inyɔ e ɛnì, nà ò lì hwèya hwenè hweyà hwe àrzɛ ema inyɔ e hweyi, ndi wɔ̀ hwa rzi ɛnɛ ndèŋgàna hwa rzi hweye.”

²⁵Mòòkòlèlì mɔ̀kɔ wà mbenda à mà ɛ̀ndeya Yerzù ò lì mò kèkìrzɛ̀, rzìi a mò ijòwa nanù ema, “Ìi Mòòkòlèlì, mamɛ na tànɛyi lì gbeyà ò lì lùwa lòŋgɛ la gbìndèyà e?”

²⁶Yerzù rzìi a mò alàhwɛ̀ nanù ema, “Nɛ e tìlahwì ò kààtì yà mbenda, mamɛ ò làŋgì ò tenì e?”

²⁷Òŋgò mòòkòlèlì wà mbenda rzìi a mò alàhwɛ̀ nanù ema, “Ò àŋgàmɛ̀nɛ̀yi lì lìŋgàna e Rzàŋgò Lòohwà la aŋgɔ̀ nà ŋmèma mò aŋgɔ̀ mò àrzɛ, nà èlìŋgɛ̀ ya aŋgɔ̀ ya àrzɛ̀, nà è ŋginyà yà aŋgɔ̀ ya àrzɛ, nà lìlòkɛ̀ la aŋgɔ̀ la àrzɛ. Rzìi ò lìŋgàne hvɛ̀ ŋmànyàŋgò wa aŋgɔ̀ nà òmà ò alìŋgànɛ ò wa hwìti.”

²⁸Yerzù rzìi a mò alàhwɛ̀ nanù ema, “Ò alàhwɛ̀ gbamù. O gbèyi tɛ nanù ò lùwà lòŋgɛ la mòtɛ.”

²⁹Ndi òŋgò mòòkòlèlì wà mbenda à mà àrza lì arzùŋgɛ̀, rzìi a ijòwa nanù ema, “Njɛnɛ à hwèlì ŋmanyàŋgò wa ami e?”

³⁰Yerzù rzìi a mò alàhwɛ̀ nà ŋmàna nanù ema, “O mà hwɛ mùnyanà mɔ̀kɔ hwà Irzàyɛ̀lì ema à ma uhwɛlɛlɛ ò Jèrurzalɛ̀mù, rzìi à mà hwɛ lì ɔ̀ndɔ̀ ò Jèrìkò. Nà òmà à mà hwɛ ò yɔ̀ndɔ̀ ya eni rzìi, hwèkɛ̀nɛ̀ŋgɛ̀ hwe mò lɛ̀mbɛ, hwe mò wòwàna hwèèmà hweni hwe àrzɛ ema à mà òhve. Hwa mò agba lìwòrzì natɛ̀ɛ a hvɛ lì ŋwa. Aŋgà ndi hwa mà mò rzɔ̀njɛlɛ, ò tòŋgòŋgò yà njìya.

³¹Pìlìrzì hvɔ̀kɔ yɔ hvɛ è mà ɔ̀ndeyà èŋge njìya mɛnɛ, rzìi e ùŋma òŋgò mùnyanà, a akeyà ehvɛhvɛ èhvàrzù ya njiya, a ɛ̀ndɛ e ya eni.

³²Mòtò mɔ̀kɔ wà lìtumba la ama Lɛ̀hvì è mògbèèlì wà è Ndawò yà Lohwà, mɔ̀ hvɛ à mà jà rzì a ɛnɛ ònò mòtò, mɔ̀ hvɛ à mà akeyà ehvɛhvɛ èhvàrzù ya njiya, a ɛ̀ndɛ è ya eni.

³³Mòtò mɔ̀kɔ wà Rzàmarìyà mɔ̀ hvɛ rzìi a akeyà èŋge njìya (Hwatò hwa Rzàmarìyà nà hwatò hwa Irzàyɛ̀lì hwa rza ahweyànɛlɛ). À mà ùkè aŋga, rzi a ɛ̀nɛ òŋgò mòtò, à mà jeja, rzìi a mò òkeya ììlì.

³⁴À mà ɛ̀ndɛ lì ùŋmanɛlɛ òŋgò mòtò. Rzìi à mò ika màyi ò hwèhwènà hwe eni, à hwe kaka. À mà mò àgbɛlɛ ò jàkarzì ja eni, rzìi à mò ɛ̀ndɛnɛ ò ndawò yà hwàyɛ̀ni. Rzìi à mò àŋgòhweyà aŋgà.

³⁵O ekà ya elele à mà wòwa hwekòlì hweta rzìi a hwe ŋgba è mòhwɛnɛ wà ndawò rzi a mò òhweyà nanù ema, ‘Wòwa nanù, ò nò ɔŋgeya ò nò mòtò. Tɔ̀ mamɛ ya arzɛ e ma ò hvaŋgà, ò nò òhweyà nà ò taŋgeyà è yɔ, ò hwètìmbelì hwe amì.’”

³⁶Yerzù rzìi a ijòwa è mòòkòlèlì wà mbenda nanù ema, “O hwanù hwatò hwaayɛ̀, njɛnɛ à ma ùŋmanɛlɛ òŋgò mòtò ema hwekɛ̀nɛ̀ŋgɛ̀ hwe mà ànane, njɛnɛ ò lutelì ema à hwèlì nàa mbunda yà ama ònò mòtò e?”

³⁷Òŋgò mòòkòlèlì wà mbenda rzìi a mò alàhwɛ̀ nanù ema, “Òŋgò ema à mà mò òkeya ììlì.” Yerzù rzìi a mò kòkòwɛ̀lɛ̀ nanù ema, “Ò wà hvɛ ɛ̀ndɛ, ò gbèyè nanù mɛnɛ.”

³⁸Yerzù nà hwà-òkòwèlì hwa eni hwa mà hwɛ ò yɔ̀ndɔ̀, rzìi hwa uka mbòwà hvɔ̀kɔ. Mòlanà mɔ̀kɔ ema à ma hwɛ̀lɛ̀hwɛ̀ Màta, à mà mò kpɛɛlɛ nàa ŋmɛ̀ni ò ndawò yà èni.

³⁹Màta à mà hwɛnɛ ŋmanyàŋgò wà èni mɔ̀kɔ ema à ma hwɛ̀lɛ̀hwɛ̀ Màlìyɛ̀. Màlìyɛ̀ rzìi a lìiya Yerzù ò tòŋgòŋgò yà èni lì òkànèyà hwèyòkòlèlì hwe eni.

⁴⁰Màta à mà arzarzòwɛ èhwanja mɔ̀ ŋmìti ndi à mà hwɛ lì gbeyà èwòlò ya ndawò. Màta rzìi a ɛ̀ndɛ lì ùŋmanɛlɛ Yerzù, rzi a mò òhweyà nanù ema, “Ìi Rzàŋgò, ɔ̀ŋgɔ tɛ nà òmà ŋmanyàŋgò wà amì à nò kìnyɛlɛlɛ èwòlò ya ndawò ya àrzɛ̀? O mò òhweyà ema a jè a nò òŋgòwane.”

⁴¹Yerzù rzìi a mò alàhwɛ̀ nanù ema, “Ìì Màta, ìi Màta, mamɛ ò akayìrzɛ̀lɛ̀lɛ nà lì atàkìrzɛ̀ lì teŋgɛ̀nɛ̀ hweyà rzayì-rzayì e?

⁴²Nà ò òhweyà ema eyà yɔ̀kɔ mɛnɛ yɔ ndi ya arzàhwa. Màlìyɛ̀ ndi à e hvɔ̀rzì, ema tɔ̀ mòtò à rza tanɛ lì mò wòwànà.”