Read Mokpwe Lukàrzɛ̀ 12 Bible Online

Lukàrzɛ̀ 12 - Mokpwe bible

Lukàrzɛ̀ 12

¹O mburzà hvònda ŋgìndì yà hwatò è mà arzàŋgànɛ natɛ̀ɛ, ò rzi hwɛ tɔ̀ ehvòlò. Aŋgà ndi Yerzù à wòteyà lì hwa òhwànà lì wòtàneyà hwà-òkòwèlì hwe eni nanù ema, “È aŋgòhweyà mehvìlì me Ihvalìrzàyì ema me hwèlì ndi nàa èhwindi ema e hvùhvà.

²O rzà ènje tɔ̀ eyà ema e utami ema e rza ò jà lì wurzà. O rzà ènje hvɛ tɔ̀ eyà ema è hwandahwi ema è rza ò hwiyàhwà.

³O èŋgànɛ̀lɛ̀ tɔ̀ mamɛ ema ò wa ò òhwi ò jìtìtì e hweyàhwà ò mòte, ndèŋgànɛ̀lɛ̀ tɔ̀ mamɛ hvɛ ema e òhwàhwi hwerzarza ò ìlùkù e òhwàhwa ò mòtè.

⁴“Wònyamòwè kòkò nà è òhweyà nà è jɔ̀kɛ̀ ema è rza òka hwatò hwa hwènàmà ema hwa òŋwà è nyàmà nyò wɔ̀ŋgɔ̀, ndi ò mburzà nanù, hwa rza tanɛ̀yi lì gbeyà ehvɛhvɛ eyà.

⁵Ndi inyɛ na è òhweyà njɛnɛ e hwɛnì lì òkà wɔ̀ŋgɔ̀. È mòtò ema ya àŋgàmɛ̀nɛ̀yi lì òka wɔ̀ŋgɔ̀, a hwèlì ndì e mɔ̀ ema a e kɛɛ̀ni tɛ muulù, a hwɛnì hvɛ ŋginyà ò lì è àŋgba ò èhvɔ̀ndi ya mùnya ema mò rza lìma. Ò jɔ̀kɛ̀ nà è òhweyà ndi nanù ema mɔ̀ ndì ya àŋgàmɛ̀nɛ̀yi lì òkà wɔ̀ŋgɔ̀.

⁶Rzèke e hwèlì jɔ̀kɛ̀ ema mèndiyɛ̀ndiyɛ meta me àndàhwà ndi kahvà ihwàkɛ mɛnɛ e? Ndi Lohwɛ̀ à rza hvòŋgì tɔ̀ mɔ̀kɔ.

⁷Lohwɛ̀ a hwi mɔ̀rzɔ̀ŋgi mò mahvumbu ma mèyòhvò me anyu. O èŋgànɛ̀lɛ̀ rzɔ e rza òka tɔ̀ wɔ̀ŋgɔ̀ èhwanja inyɔ e hwɛni wòlìtò rzayi-rzayi ò ma Lohwɛ̀ lì akayi mèndiyɛ̀ndiyɛ.

⁸“Nà è òhweyà è jɔ̀kɛ̀ ema, tɔ̀ njɛnɛ ema à nò tɛ̀mèlì mbòŋgi ò màrzò ma hwatò, imba hvɛ è Ŋmanà wà è Mòtò wà Hwènàmà nà mò tɛ̀meyà mbòŋgì, ò màrzò ma i aŋgèlì ja ama Lohwɛ̀.

⁹Tɔ̀ njɛnɛ hvɛ ema à nò rzɔ̀rzi ò màrzò ma hwatò, ìmba hvɛ nà mò rzɔ̀rzɔ̀ ò màrzò ma i aŋgèlì, ja ama Lohwɛ̀.

¹⁰Tɔ̀ ima mòtò ema à òhwi eyà ya wòhwe lì teŋgɛ̀nɛ̀ è Ŋmanà wà è Mòtò wà Hwènàmà, à ò làkìrzɛ̀hwɛ̀. Ndi è mɔ̀ ema à òhwi eyà ya wòhwe lì teŋgɛ̀nɛ̀ Èlìŋgɛ̀ yà Wòtani à rza làkìrzɛ̀hwɛ̀.

¹¹È rzɔ̀mɔ̀nɛ̀hwɛ tɛ ò ndawò ja màkanɛ̀, ò màrzò ma hwàtìmbèlì hwa mbòwà, nà hwàkànèlì hwa kàrzàmi, ò lì è kàyìrzɛ̀, è rzì àtàkirzɛ nɛ e kaya tɔ̀ mamɛ ema e hwɛnì lì òhwà.

¹²Èhwanja èŋge hvònda Èlìŋgɛ̀ yà Wòtani yò òhweyà mamɛ ò hwɛnì lì òhwà.”

¹³Munyànà mɔ̀kɔ ema à ma hwɛ ò ìtììtènì yà èŋge ŋgìndì rzìi a òhweyà Yerzù nanù ema, “Mòòkòlèlì kòkò, òhweyà ŋmanyàŋgò wà amì, ema a kàhwè erzàŋgò ema e rzàŋgò hwà arzu a mà jò lìiya.”

¹⁴Yerzù rzìi a mò alàhwɛ̀ nanù ema, “Ìi ŋmàyi, njɛnɛ à nò ŋgbèlì èŋgè wònjà ò lì kàyìrzɛ̀ nà lì è kàhweyà erzàŋgò ya anyu na ŋmanyàŋgò wà aŋgɔ̀ e?”

¹⁵Yerzù rzìi a hwa òhweyà hwa àrzɛ̀ nanù ema, “È aŋgòwè! È rzì ika mèèmà me anyu ò èrzàŋgò jɔ̀ɔjɔ̀ɔ èhwanja rzèkɛtɛ èrzàŋgò ya rzayì-rzayì ema mòtò a hwɛnì ndi e mò ŋgbà lòŋgɛ.”

¹⁶À mà hwa kpɛ̀ɛyà hvɛ mònò ŋmàna nanù ema, “O mà hwɛ èhwàŋgì ya mòtò mɔ̀kɔ, ema, e ma hwɛnɛ wàŋga. Èŋge wàŋga è mà ŋya e wùrzìrzɛ mbòtà yà gbamù rzayii.

¹⁷Èŋge èhwàŋgì ya mòtò rzìi ya à òhwa ò ŋmèma mò eni nanù èma, ‘Nà rza òhvi èki ema na tànɛyi lì ùta è rzaa ya àrzɛ yà amì. Mamɛ na tànɛyi lì gbeyà e?’

¹⁸À mà àwòhwànɛ̀lɛ̀ ŋmìti nanù ema, ‘Nànù ndi na gbeyà nàŋgɛ. Nà hwɛnì lì bùulɛ mayɛ̀ɛhvɛ ma amì ma arzɛ. Nà òŋgà mahvɛhvɛ ema mà òlò. Aŋgà ndi na ùta ìmbòtà ja amì ja arzɛ nà lìnɛ̀yi lìrzàŋgò.

¹⁹Aŋgà ndi na òhwalɛnɛ̀ imba mbiti nanù ema, nà arzàŋgɛ̀lɛ̀ hwèèmà hwe mala hwe gbamù, na ò gbeyàna ò ŋma nà ŋma. Nà arzɛ̀kɛ̀lɛ̀ naŋgɛ, nà làa, nà nyɔ, rzìi na òkà hvɛ lòŋgɛ la amì.’

²⁰Lohwɛ̀ rzìi a mò òhwàna nanù ema, ‘Yòma, yòma ndɔ̀ki yà mòtò! O wònò wuu mɛnɛ, nà hwɛnì lì ò kɛɛ̀nɛ̀ muulù mò aŋgɔ. Njɛnɛ rzɔ a ò hwɛnɛ̀ ene èrzàŋgò ya àrzɛ ema wa àwutɛ̀lɛ̀ e?’

²¹Nànù ndi e hwɛnì lì hwɛ nà tɔ̀ njɛnɛ ema àwutɛ̀lɛ̀ mònàmɛ̀ ndi à rza nàmɛ̀ ò wòrzò wò ama Lohwɛ̀.”

²²Yerzù à mà òhweyà hwà-òkòwèlì hwa eni nanù ema, “O èŋgànɛ̀lɛ̀ rzɔ, nà è òhweyà nanù ema è rza atàkìrzɛ̀ mòŋgɛ ma anyu. O lì àrza mamɛ e hwɛnì lì làa, tɔ̀ mamɛ ema e hwɛnì lì wɔ̀tɔ̀.”

²³Lòŋgɛ lì akayi mòlelì. È nyò yɔ hvɛ ya akayi mààtù.

²⁴È ɔŋgɔ̀ tɛ̀ ìkàkà ja wòmbe ì rzà gbeyà mbòta tɔ̀ rzàà, ì rzà òhvi hvɛ tɔ̀ èki ema ja ùta lì gbeyà la awu. Ndi Lohwɛ̀ à ji lìrzɛ̀. È rza hwi nanù ema è òhvì wòlìtò lì akà hwènɔ̀nì e?

²⁵Njɛnɛ wa anyu ema ò lì atàkìrzɛ̀ la eni, a tànɛyi lì hwata ehvòwa ya eyu ò lòŋgɛ la eni e?

²⁶È rza tanɛ̀ tɛ lì gbeyà ŋmanà eyà nàa enè nanù, mamɛ ndeŋgàtɛ è atàkìrzɛ̀ ò lì hvòmɛ̀nɛ̀ hwehvɛhvɛ hweyà e?

²⁷“È ɔ̀ŋgɔ tɛ na òma i mbònji ja waŋga jò òŋga. I mbònji jɔ̀ i rza gbeyà èwòlò tɔ̀ lì àkɔ̀lìrzɛ̀ hvɛ mààtù me awu. Ndi nà è òhweyà nà è jɔ̀kɛ̀ nanù ema, tɔ̀ Kìŋgɛ Rzòlòmɔ̀nì ò tenì yà mònàmɛ̀ mò eni, à rzi wɔ̀tè tɔ̀ lìwɔtì tɔ̀ lɔ̀kɔ ema lì ma lɔ̀ɔ, lì uka tɔ̀ lìnyèŋge tɔ̀ lɔ̀kɔ la mbònji.

²⁸Lohwɛ̀ à wɔ̀tìrzɛ̀ tɛ hwèwùle hwe lìkòmbà la wàŋgà ema hwe hwèlì anù yàwònò rzìi ŋmɛ̀lɛ̀ hwe àŋgbahwa ò mùnya. Mɔ̀ a rza tànɛyi lì è wɔ̀tìrzɛ̀ lì akà hwèwùle e? Mamɛ ndeŋgàtɛ màlòkɛ̀ ma anyù ma utu e?

²⁹“O èŋgànɛ̀lɛ̀, è rzì òka lì ikà mèèmà me anyu ò mamɛ ema e làa, tɔ̀ lì nyɔ. Hwenè hweyà hwe rzìi e tàkìrzɛ̀.

³⁰Hwenè hweyà ndi è mòtò wà ène rze a arza lì òhva. Ndi Tatɛ̀ wà ànyu a hwi ema e endèli hwenè hwèmà hwe arzɛ.

³¹È lòmè lì àrza hwema hwe lìkànèyà la ama Lohwɛ̀, aŋga ndi Lohwɛ̀ a e ŋgba hwenɛyi hwe arzɛ.

³²“Wònya hwa ami kòkò, è rza òka wɔ̀ŋgɔ̀. Rzàŋgò wà ànyu a lìŋgànì ò lì è ŋgbà è ŋginyà yà lìkànèyà.

³³È àhwìrzɛ̀ hwerzàŋgò hwe anyu, e ŋgbè mèlìrza me hwatò iŋgi kahvà. È àrze makpà ma kahvà ema mà rza hvɔ̀hvɔ̀. È ika màwùtà ma anyu èki utami ema e hwèlì ò ŋmanyu yà lohwà, èki ema tɔ̀ eyà e rzà gbèyɛnɛ, ema tɔ̀ hwàyihwɛ̀ hwa rzà mò ihwa, tɔ̀ lìrziyɛ̀yi lì rzà tanɛ̀ lì ma làa.

³⁴Ŋmemà mò mòtò mò hwèlì ndi èki ema lùùtà lì eni lì hwèlì.

³⁵“È akpàtɛ, hwerzànjà hwe anyu ò màlùhwe, e hvààlɛ̀ hvɛ hwètùlù hwe anyu,

³⁶nàa hwakutu ema hwa ambɛlɛlɛ e rzàŋgò ya awu, ema à mà ɛ̀ndɛ ò ndèma yà lìhwa ema à jelì tɛ, rzìi a kùmba lìyòhva, hwa mò lìhvòweyà è lɔ ŋgèlì hvɔ̀kɔ.

³⁷Mònàmɛ̀ nà hwaŋga hwàgbèèlì ema rzàŋgò hwà àwu wa èwòlò a ò jà lì ùŋma hwa hwèlì lì mò ambɛ̀lɛ̀lɛ̀. Nà è òhweyà è jɔ̀kɛ̀ ema à gbeyà hwa lìya, rzìi a hwa akɛlɛlɛ mòlelì.

³⁸Tɔ̀ a jà ndi ò kɔ̀rzi ya wu, tɔ̀ ò ekpaàrzɛ rzi a hwa ùŋmànɛlɛ ema hwà mà wòŋgirzɛnɛ mònàmɛ̀ mò hwɛ na hwaŋga hwàgbèèlì.

³⁹È hwiyè ema, è mòhwɛnɛ wà ndawò à mà hwiya tɛ lìrzàkò ema è ŋmìhwɛ̀ a ò jà, ò ma mɔ̀ àmbɛlɛlɛ wuu wò arzɛ ema hwa rzi mò gbaana e ndawò yà enì.

⁴⁰Inyɔ hvɛ è hwɛnì lì àwòŋgirzɛ̀nɛ̀ èhwànja è Ŋmanà wà è Mòtò wà Hwènàmà a ò jà ò lìrzàkò ema e rzà mò àhvìtɛ̀.”

⁴¹Pètrò rzìi a mò ijòwa nanù ema, “Ìi Rzàŋgò, irzɔ ndi ò kpɛɛlì mònò ŋmàna ŋgà ò mò kpɛɛlì ndi hwànɛ̀yi hwatò hwa arzɛ e?”

⁴²Rzàŋgò rzìi a alàhwɛ̀ nanù ema, “O èŋgànɛ̀lɛ̀ tɔ̀ ima mɔ̀ wa anyu à hwɛ ndi nàa mògbèèlì ema à òhvi lìhwiyè, rzìi a gbeyà mamɛ rzàŋgò wà enì wà èwòlò a òhwì ema a gbèyè. A hwèlì ndi è mògbèèlì ema rzàŋgò wa eni wa èwòlò a ŋgbèlì è wònjà lì kànèyà hwanɛ̀yi hwàgbèèlì, nà lì ɛnɛ nanù ema, tɔ̀ ima mɔ̀ wa awu a luwe e mò eni mòlelì na òma a hwɛnì lì lùwa.

⁴³Mònàmɛ̀ mò hwɛ nà òŋgò mògbèèlì ema rzàŋgɛ wà èni wà èwòlò a tìmbi tɛ, rzìi a mò ùŋma à gbeyà mamɛ a mà mò òhweyà ema a gbèyè.

⁴⁴Nà è òhweyà è jɔ̀kɛ̀ ema e rzàŋgò yà òŋgò mògbèèlì à lìyà erzàŋgò ya eni ya arzɛ ò màà mà eni ò lì e kànèyà.

⁴⁵“È hwèlì tɛ ema òŋgò mògbèèlì à hwèlì ndi e mògbèèlì wa wòhwe rzìi a òhwa ò ŋmèma mò eni nanù ema, ‘Rzàŋgò wà èni wa èwòlò a ò kùwa mbɔ̀ ò lì jà.’ Rzìi à wòteyà ndi lì tiyà hwanɛ̀yi hwàgbèèlì, hwa wùnyànà nà hwalanà ema hwa hwèlì ò rze ya eni, rzìi a à làa mòlelì, a nyɔ mimba rzi a wòmà.

⁴⁶Òŋgò mògbèèlì, rzàŋgò wà èni wa èwòlò à tìmbà ò wùnyà ema a rza mò àhvìtɛ̀, nà ò lìrzàkò ema a rzà hwiya. A mò hvaka ò ewòka rzi hwa mò ŋgba e kɔ̀kìrzɛ̀ ema e imbami na hwaŋga hwatò ema hwa hwèlì maniya.

⁴⁷Òŋgò mògbèèlì ema à hwi hwètɛ̀yìrzèlì hwe èwòlò ya ama e rzàŋgò ya eni ya èwòlò, rzìi à rzì àwòŋgìrzɛ̀nɛ̀, tɔ̀ à rzì òŋgàme hwèŋge hwèkàyìrzèlì, à gbiyɛ̀hwɛ̀ hvònji yà jɔ̀kɛ̀.

⁴⁸Ndi è mògbèèlì ema à rza hwiyɛ̀ hwètɛ̀yìrzèlì hwe èwòlò ya ama rzàŋgɛ wa èwòlò, rzìi a gbeyà lì tònà lì rzàlì à tiyàhwà ndi tèŋyi. Òŋgò ema a ŋgbàahwi rzayì-rzayì, à àrzàhwɛ̀nɛ̀ hvɛ rzayì-rzayì. Ò òŋgò hvɛ ema a ŋgbàahwi njòwà rzòwà, a arzahwɛnɛ hvɛ njòwà rzòwa.

⁴⁹“Nà jelì ndi lì kɛkɛ mùnya ò rze, nà lìŋgàni hvɛ nanù ema mò mà wòteya lì tuwà.

⁵⁰Nà hwɛnì lì lùwa lì lùhwìrzɛ̀ la mòrziyò. Nà ma lì lùwa tɛ, òma nà mà lùwa lì wɔ̀wìrzɛ̀ la nyò.

⁵¹È ɔ̀ŋgɛlɛ ema nà jàni ndi ɛ̀yɔ̀lɛ̀ ò rze ya mɔ̀nyɛ̀ e? Jàyɛ̀, nà e òhweyà ema rzèkɛtɛ ɛ̀yɔ̀lɛ̀, nà jànì ndi lùwànje.

⁵²Lìwòteyà nàŋgɛ, nà ò wòrzò, ndawò yà hwatò hwata, e hwɛnì lì akahwanɛ. Hwàyàwò hwa teŋgɛ̀nɛ̀ hwàhwàkɛ̀, hwàhwàkɛ̀ hvɛ hwa teŋgɛ̀nɛ̀ Hwàyàwò.

⁵³O ò hwɛ mòhvùŋgu. Rzàŋgò è teŋgɛ̀nɛ̀ ŋmanà wà èni wà mùnyanà, è ŋmanà wà mùnyanà à ò teŋgɛ̀nɛ̀ rzàŋgɛ. Nyàŋgò è teŋgɛ̀nɛ̀ ŋmanà wà èni wà mòlanà, è ŋmanà wà mòlanà à ò teŋgɛ̀nɛ̀ nyàŋgɛ. È nyàŋgò yà lìhwa e ò tèŋgɛ̀nɛ̀ ŋmanà wà èni wà lìhwa, è ŋmana wà èni wà lìhwa à ò teŋgɛ̀nɛ̀ è nyàŋgò yà eni yà lìhwa.”

⁵⁴Yerzù à mà òhweyà è ŋgìndì nanù ema, “È ɛni tɛ lìmbàkì lì uwɛ̀lɛ̀lɛ̀yi mbɛ̀ŋgɛ̀, lìwòkìmɛnɛ è òhwà nanù ema, ‘È mbuwà è yɔ naŋgɛ,’ ndèŋgà e yɔ̀ɔ̀ nà è jɔ̀kɛ̀.

⁵⁵È ɛni hvɛ tɛ è mbɛ̀hvɛ̀nì e uwɛ̀lɛ̀lɛ̀yi mbɛ̀ŋgɛ̀ nà òmà e hvɛ̀hvɛ, è òhwà nanù ema, ‘Ndàalɛ̀ wò tùmbànà hvɛ yàwònò,’ ndèŋgà wò tùmbànà hvɛ nà è jɔ̀kɛ̀.

⁵⁶Yòma-yòma hwatò hwa mèhvìlì, è tànɛyi tɛ lì laŋgà wùùnya nanù, rzìi mamɛ ndeŋgàtɛ e rza tanɛ lì èmba hweyà ema hwe ò gbèyɛ̀nɛ ò wòrzò yàwònò e?

⁵⁷“Mamɛ ndeŋgàtɛ è rza tanɛ̀yi lì akàyìrzɛ inyɔ hwìti ema eyà ya gbamù enè ò lì gbeyà e?

⁵⁸Mòtò à ò ɛ̀ndɛ̀nɛ̀ tɛ ò hwèkàyìrzèlì, kèka natɛ̀ɛ ya arzèèlɛ inyɔ hwìti. È rza rzèèlì tɛ à ò ɛ̀ndɛ̀nɛ̀ ò ndawò yà hwèkàyìrzèlì, e ndawò yà hwèkàyìrzèlì yɔ hvɛ è ò akɛ̀lɛ̀lɛ̀ ìpòlìrzì rzi ipòlìrzì jɔ hvɛ jò ò aŋgɛ ò hwèwòwà.

⁵⁹Nà ò òhweyà ndi e jɔ̀kɛ̀ nanù ema ò rza tanɛ lì anjiya ò tenì ya hwèwòwà natɛ̀ɛ ò rzààhwà lìyɛmɛ la aŋgɔ̀ la arzɛ.”