Read Mokpwe Lukàrzɛ̀ 14 Bible Online

Lukàrzɛ̀ 14 - Mokpwe bible

Lukàrzɛ̀ 14

¹Wùnya wɔ̀kɔ wò lì Arzìyòlɛ̀, Yerzù à mà ɛ̀ndɛ lì leeya ò ndawò yà Hvàlìrzàyì mɔ̀kɔ wà wòlìtò. È hvònda ema a mà ùke aŋga, hwatò hwa mà hwɛ lì mò ɔŋgɔ̀ lòŋgòlòŋgò.

²Mòtò mɔ̀kɔ à mà hwɛ aŋga ema à ma ònda hwehvimba ò nyò.

³Yerzù rzìi a ijòwa hwà-òkòlèlì hwa mbenda nà Ihvàlìrzàyì ema hwà mà hwɛ aŋga nanù ema, “È hvòmɛ̀nɛ̀ ò lì wɔ̀wìrzɛ̀ mòtò ò Wùnya wò lì Arzìyòlɛ̀ ŋgà ò rzà hvòmɛ̀nɛ̀ e?”

⁴Tɔ̀ mòtò à rzi mò alàhwɛ̀. Yerzù rzìi a lɛ̀mbɛ òŋgò mòtò ema a mò ònda e nyò hwehvimba lìya la eni, a mò wɔ̀wìrzɛ̀, a mò òma ò ndawò.

⁵Yerzù rzìi a hwa ijòwa nanù ema, “Ima mɔ̀ wà ànyu ema è ŋmanà wà èni, tɔ̀ è nyàkà yà èni e undì tɛ ò èhvɔ̀ndi ò Wùnya wò lì Arzìyòlɛ̀ rzìi a rzì ɛ̀ndɛ lì è ulɛ̀ ŋgèlì hvɔ̀kɔ e?”

⁶Ndi hwa rzi òhvè hvɛ tɔ̀ eyà ò lì òhwà.

⁷Nà òmà Yerzù a mà ɛ̀nɛ hwatò ema hwà mà yòhwɛhwɛ ò èki ya hwèlèèlì, nà òma hwa mà kpèeyà, hwa wòteya lì hvɔ̀rzɔ̀ ìmbòkò ja hwèki hwe hwèluhwe, rzìi a hwa kpɛ̀ɛyà mònò ŋmàna nanù ema,

⁸“Ò yòhwɛhwɛyi tɛ ndèma yà lìhwa, ò rzì kèka lì aneya iŋgi mbòkò ema ì rzèkahwɛlɛyi hwatò hwa hwèluhwe, èhwanja e tànɛyi lì hwɛ ema hwa yòwɛyi mɔ̀kɔ à òhvi èluhwe lì ò akà.

⁹È mɔ̀ ema à e yòhwɛ inyɔ hwa arzɛ à jà lì e ò òhweyà nanù ema, ‘Ŋgbàà ònò mòtò ène mbòkò.’ Nàŋgɛ rzɔ ò mà ò ma tìmba ndi lì lìya nà irzɔ̀nì ò mbòkò ema è rza hwɛnɛ̀yi èluhwe.

¹⁰O èŋgànɛ̀lɛ̀ ò yòhwɛhwɛyi tɛ ène nyayi yà èki, wòwa mbòkò ema è rza hwɛnɛ̀yi èluhwe. Aŋgà ndi è mòhwɛnɛ wà ndèma, à ò eni tɛ, à ò òhweyà nanù ema, ‘Ìi ŋmàyi! Tɛmɛ ò àgbè ò lìyà ò mbòkò yà èluhwe.’ Aŋgà ndi ò hwɛnɛ̀yi èluhwe ò ìtììtènì yà hwaŋga ema hwa yòhwɛhwɛyi ò ndèma.

¹¹O èŋgànɛ̀lɛ̀ e hwiye ema, tɔ̀ ima mòtò ema à akàrzɛ mɔ̀ ŋmìti Lohwɛ̀ à mò rzìhwìrzɛ̀. Òŋgò hvɛ ema à arzìhwìrzɛ̀ mɔ̀ ŋmìti, Lohwɛ̀ à mò kàrzɛ̀.”

¹²Yerzù rzìi a òhweyà òŋgò mòtò ema à ma mò yòhwɛ nanù ema, “Ò hwɛlìrzɛ tɛ ndèma, ò rzì yòhwɛ ndi ìmbunda ja aŋgɔ̀, wònyanyɔ̀ŋgɔ̀, lìtumba lì aŋgɔ̀ nà hwèwàŋgì ema ò hwi. Ò gbèyi tɛ nanù wɔ̀ hvɛ hwa hwɛnì tɛ ndèma, ò ma hwà mà ò yòhwɛ̀. O lì hwa lɛɛ wɔ̀ hvɛ.

¹³Ndi ò òŋgòlɛ tɛ ndèma, ò yòhwɛ ndi mèlìrza me hwatò, ìmbòkò, e hwa njɛmbu na ìndima ja hwatò.

¹⁴O gbèyi tɛ nanù, aŋga ndi Lohwɛ̀ a ò nàmìrzɛ̀, èhwanja hwaŋga hwatò hwa rzà tanɛ ò lì ò lɛ̀ɛ̀. È hvònda hwatò hwa gbamù hwa ò hvùmùwɛ, Lohwɛ̀ a ò rzaweyà.”

¹⁵Mòtò mɔ̀kɔ ema à mà lìya ò hwèleèlì nà Yerzù, a mà hweye ène mbɔrzi rzìi a òhweyà Yerzù nanù ema, “Mònàmɛ̀ mò ò hwɛ nà è wɔ̀ ema hwa ò lɛɛ mòlelì ò ndèma ò Lìkànèyà là ama Lohwɛ̀!”

¹⁶Yerzù rzìi a tìmbirzɛlɛlɛ nanù ema, “Mòtò mɔ̀kɔ, à mà òŋgòlɛ ndèma ndɛnɛ̀, rzìi a yòhwɛ lìmùtì là hwatò.

¹⁷È hvònda yà hwèleèlì e mà ùke, rzìi òŋgò mòtò, a òma mògbèèlì wa eni mɔ̀kɔ, ò ma hwaŋga hwatò a mà yòhwɛ nanù ema, ‘È jèe, è ndèma e ma wòŋgìrzɛ̀nɛ̀.’

¹⁸Wɔ̀ hwa àrzɛ, hwa mà wòteya ndi lì àhwàŋgɛ̀lɛ̀ mɔ̀kɔ nà ɔ̀nɛyi. È wà wòrzò à mà òhwa nanù ema, ‘Nà àndi etò, nà àrza lì ɛ̀ndɛ lì e ɔŋgɔ̀. Nà ò rzòrzòmelì nà rza ùkeya.’

¹⁹Ɔ̀nɛyi mɔ̀ hvɛ a òhwa nanù ema, ‘Nàŋgɛ̀ mɛnɛ ndi nà àndi mààhvà ma nyàkà mata, ò lì nò tììya è wàŋga. Nà àrza lì ɛ̀ndɛ lì ma kèkìrzɛ̀, rzònì na rza ùkeya.’

²⁰Ohvɛhvɛ mɔ̀ hvɛ rzìi a òhwa nanù ema, ‘Nàŋgɛ mɛnɛ ndi na hwààyi. O èŋgànɛ̀lɛ̀ rzɔ nà rza ò tànɛyi lì jà.’

²¹Òŋgò mògbèèlì à mà tìmba lì òhweyà è rzàŋgò yà èni yà èwòlò hwenè hweyà hwe àrzɛ. È rzàŋgò yà èni yà èwòlò, e ma tata rzayì-rzayì, rzìi a òma òŋgò mògbèèlì wa eni, a mò òhweyà nanù ema, ‘Ɛ̀ndɛ ɔ̀nɛ̀yi mèyòmbò karzi-karzi, nà ò màhvani ma arzɛ ma mbòwà, ò tìmbànè mèlìrzà me hwatò, nà ìmbòkò, nà ìndima, nà e hwaa njɛmbu.’

²²O rzì a ikòlɛnɛ, rzìi òŋgò mògbèèlì a tìmba lì òhweyà rzàŋgò wa èwòlò nanù ema, ‘Rzàŋgò ee! Nà ma gbeyà nà òmà ò òhwì, ndi èki ya hwèlìyelì e rzà òndì.’

²³Òŋgò rzàŋgɛ wà èni wà ndawò rzìi a mò òhweyà nanù ema, ‘Ɛ̀ndɛ ò meyòmbò me mbòwà mà arzɛ, nà ò njuka ja mànjiyɛ ma wàŋga mà arzɛ, ò yòhwɛ̀ tɔ̀ njɛnɛ ò ùŋma ema a jèe. Aŋgà nanù, òma è ndawò yà amì e ma òndà.

²⁴Nà è òhweyà nà è jɔ̀kɛ̀ ema, tɔ̀ mòtò tɔ̀ mɔ̀kɔ hwà hwaŋga hwatò ema nà ma lòme lì yòhwɛ̀, hwà rza ò kèka tɔ̀ teŋyi ò ndèma ya ami.’”

²⁵Wùnya wɔ̀kɔ mòndèŋge mò ndɛnɛ mò mà hwɛ lì òŋgama Yerzù, rzìi a ayèŋgòwɛ̀, a hwa òhweyà nanù ema,

²⁶“Tɔ̀ ima mòtò ema à òhwi àma à àrza lì nò òŋgama, rzìi a lìŋgàna rzàŋgɛ nà nyàŋgɛ, jòjìyɛ̀ wa eni, nà hwàànà, nà wònyanyàŋgò wa eni, nà ìndòmɛ ja eni. Rzìi à lìŋgàna hvɛ lòŋgɛ la eni lì nò akà, à rza tanɛ̀yi lì hwɛ mòòkòwèlì wà amì.

²⁷Tɔ̀ njɛnɛ hvɛ ema a rza hwanɛ̀yi è mbarzà yà èni, ò lì nò oŋgàmà, à rza tanɛ̀, lì hwɛ è mòòkòwèlì wà amì.

²⁸“Ima mɔ̀ wà ànyu ema, à àrza lì òŋgà yòma ndawò ndɛnɛ̀, rzìi a rzì lòme lì lìya ò rze, ò lì kɔkɔ̀ wòlì wò arzɛ ema wò àrzàhwa ò wònò wòòŋgì. O lì hwiya ŋgà à ò tanɛ ò lì wò kulɛ̀, ŋgà a rza ò tanɛ̀yi lì wò kulɛ e?

²⁹Oŋgò mòtò, à kɔkì tɛ mɔ̀nɔ̀ŋgɔ rzìi à rzì tanɛ lì kulɛ̀ wòòŋgì, tɔ̀ njɛnɛ ema a ɛni mòŋgò mɔ̀nɔ̀ŋgɔ̀, à mò kìkòwà à òhwà

³⁰nanù ema, ‘Ò nò mòtò à wòtelì wòòŋgì ndì wò mò tààyèlì ò lì wò kulɛ̀.’

³¹“È hwèlì tɛ ema kiŋgɛ̀ è wurzanì tɛ lìtuta la lìyòmɛ̀ la hwèkòlì hwa eni hwe hwàànèlì hwa njùma, ò lì ɛ̀ndɛ lì ànana è hvɛhvɛ kiŋgɛ̀ ema yɔ hvɛ è òhvi lìtuta la mbàŋgɛ̀ yà hwèkòlì la hwàànèlì hwa njùma. À lòmà lì lìya ò rze, ò lì kɔkɔ̀ ŋgà à tanɛ̀yi lì ànana ènɛyi kiŋgɛ̀.

³²À rzà ò tànɛyi tɛ, à òmà hwèwàŋgì hwe èŋge mbòwà, ò lì ɛ̀ndɛ lì ùŋmanɛlɛ enɛ̀yi kiŋgɛ̀, ema è rzɔ̀lɛnɛyi hvòhvò, ò lì mò atɛ̀kɛ̀ ema hwa gbèyè ɛ̀yɔ̀lɛ̀.

³³Nànù ndi e hwɛnì lì hwɛ nà tɔ̀ njɛnɛ hvɛ ema à rza àrzà lì ulɛ hwèèmà hwe arzɛ ò mèèmà mò eni. Èŋge tumba mòtò e rza kànɛyi lì hwɛ è mòòkòwèlì wà amì.

³⁴“È hwiye ema ikpa ì lɔ̀wu, ndi ì wɔ̀lɛ̀nɛ̀ tɛ wòtɛ̀wu wò eni, nɛ hwa tanɛ̀yi lì gbeyà ema ì tɛ̀ɛ̀ hvɛ e?

³⁵Ì rza òhvì hvɛ tɔ̀ jànda. Èŋge tumba ikpa e rzòwàhwà ndi ò lùutù. È mòtò ema à hwɛnì màtò, inyɛ a rzɔ̀ŋgìtɛ̀nɛ̀ mamɛ ema na òhwì.”