Read Mokpwe Lukàrzɛ̀ 15 Bible Online

Lukàrzɛ̀ 15 - Mokpwe bible

Lukàrzɛ̀ 15

¹Wùnya wɔ̀kɔ, hwàrzàŋgèlì hwa è njàŋge yà lìkànèyà, nà hwahvɛhvɛ hwatò hwa wòhwe hwa mà ja ò ma Yerzù ò lì mò òkànèyà.

²Ihvàlìrzàyì nà hwà-òkòlèlì wa mbenda hwa mà wòteya lì àyiŋgòwɛ̀ nanù ema, “È ɔŋgɔ̀ tɛ, ònò mòtò à ɛndɛ̀ nà hwatò hwa wòhwe natɛ̀ɛ nà lì làalɛnɛ̀ nà wɔ̀.”

³Yerzù rzìi a hwa kpɛ̀ɛyà ŋmàna nanù ema,

⁴“È hwèlì tɛ ema mɔ̀kɔ wà ànyu à òhvì ègbe yɔ̀kɔ yà mɛ̀lɛ̀ŋgù, rzìi à wɔ̀lɛ̀nɛ̀ mɔ̀lɛ̀ŋgù mɔ̀kɔ, rzèke à lìyà mènɛ̀yi menìlùùwà nà lùùwà mè mɛ̀lɛ̀ŋgù ò mòòndà, ò lì ɛ̀ndɛ lì àrza èŋge èhvòwà yà mɔ̀lɛ̀ŋgù ema è wɔ̀ natɛ̀ɛ à è lùwà e?

⁵À mò lu tɛ à òkà mɔ̀nyɛ̀ŋgì natɛ̀ɛ, à mò hwanɛ̀ rzìi a mò agbɛlɛ ò mààtà ma eni.

⁶Òŋgò mòtò à ukì tɛ ò ndawò yà èni, à hwɛlɛ ìmbunda nà hwatò ema hwa lìyàa lì mò kòmbɛ̀nɛ̀. À hwa òhweyà nanù ema, ‘È nò òkane mɔ̀nyɛ̀ŋgì, èhwanja nà lu ehvòwà ya ami ya mɔ̀lɛ̀ŋgù ema e ma wɔ̀.’”

⁷Yerzù rzìi à hwàtɛ hvɛ lì òhwà nanù ema, “O ò hwɛ mɔ̀nyɛ̀ŋgì mò ndɛnɛ̀, ò ŋmanyu yà lohwà, ehwànja mòtò mɔ̀kɔ wà wòhwe à tìkòhwi hwɛ̀ɛ̀mɛ̀ hwe eni a timbi nà Lohwɛ̀. Òŋgò à akayi mènìlùùwà nà lùùwà mè hwatò ema hwa hwèlì ehve-ehve. Wɔ̀ hwa rza tànɛ̀yi hvɛ lì àyèŋgòwɛ̀.

⁸“È hwèlì tɛ ema mòlanà à òhvi lìyòmɛ̀ la kahvà ò lìya, rzìi kahvà hvɔ̀kɔ e wɔ̀ ò tenì ya ndawò yà èni, rzèkɛ òŋgò mòlanà à hwɛnì lì hvàalɛ etùlù, rzìi a wòteya hvɛ lì tutà è ndawò, ò lì ɔ̀ŋgɔ kɔ̀yi-kɔ̀yi natɛ̀ɛ à lùwà èŋge kahvà e?

⁹Òŋgò mòlanà à lu tɛ, èŋge kahvà ya ahvɔ̀kɛ, à hwɛnì lì hwɛlɛ ìmbunda, nà hwaŋga hwatò ema hwa lìyà lì mò kòmbɛ̀nɛ̀. À hwa òhweyà nanù ema, ‘È nò òkane mɔ̀nyɛ̀ŋgì ehwànja nà lu èŋge kahvà ya amì ema e ma wɔ̀.’

¹⁰Nà è òhweyà ema, nà i aŋgèlì ja ama Lohwɛ̀ ò ŋmanyu, ja òka mɔ̀nyɛ̀ŋgì lì hvòmɛ̀nɛ̀ mòtò mɔ̀kɔ wà wòhwe ema a ayèŋgòwɛ̀ ò wòhwe wa eni ò lì tìmba ò ma Lohwɛ̀.”

¹¹Yerzù rzìi a òhwa nanù ema, “O mà hwɛ mùnyanà mɔ̀kɔ, ema à ma òhva hwàna hwa wùnyànà hwàhwàkɛ̀.

¹²Wùnya wɔ̀kɔ, ɛnɔ̀ŋgɔ̀nì rzìi e òhweyà rzàŋgɛ nanù ema, ‘Tatɛ̀ ò nò ŋgbè è la amì lòŋgò la erzàŋgò ema lì nò kànɛnɛyi.’ Rzàŋgɛ rzìi a hwa kahweyà erzàŋgò ya eni.

¹³O mburzà ŋgùrzù ja mènya, ɛnɔ̀ŋgɔ̀nì rzìi e àhwirzɛ̀ erzàŋgò ya eni ya àrzɛ. À ɛ̀ndɛ ò ehvɛhvɛ èkòmè ema e ma rzɔ̀lɛ̀nɛ̀ hvòò. Oŋgò ndi à mà kpèeyà mòlàakò nà lòŋgɛ la mɔ̀lɔ̀kìrzà a kùwa lì hvàŋga wòlì wa arzɛ ema a mò òhvè.

¹⁴È hvònda ema a mà kulɛ lì hvaŋgà wòlì wò eni wò àrzɛ, rzìi ò kpèeyà njàwò ndɛnɛ̀ ò èŋge èkòmè. Aŋgà ndi lìtàke lì à mò uŋmɛ̀lɛ ììlì.

¹⁵Òŋgò ŋmanà à ma ɛ̀ndɛ rzìi a ùŋma èhwàŋgì ya mòtò yɔ̀kɔ ya èŋge mbòwà rzìi a mò ɔmbɔ ŋmanà èwòlò. Èŋge èhwàŋgì ya mòtò rzìi e mò òma ò kɔtɔ̀ yà èni ò lì lìrzɛ ìŋgòwa ja eni.

¹⁶Òŋgò ŋmanà à mà ika ò ŋmèma mò eni nanù ema a hwɛnì lì làa mòŋgò mòlelì ema a wòŋgòwàna iŋgi ŋgòwà, ndi tɔ̀ mòtò à rzi mò ŋgbe tɔ̀ yòmà ya lì làa.”

¹⁷“È hvònda ema ò nò ŋmanà a mà àyeembɛ, aŋga ndi a à òhwanɛ̀lɛ̀ mɔ̀ ŋmìti nanù ema, ‘Ɔ̀ŋgɔ tɛ, nà òmà hwàgbèèlì hwà mà tatɛ̀ wɔ̀ hwa làa natɛ̀ɛ mò lìiya, ìmba hvɛ nà hwèlì anù nà ŋwaànà è njàwò!

¹⁸Nà ànjiya anù, nà ɛ̀ndɛ lì ùŋma rzàŋgò wa ami. Nà mò òhweyà nanù ema, tatà nà ò gbeyànì ò wa nà Lohwɛ̀ wòhwe.

¹⁹Nà rza ukì hvɛ tɔ̀ è mɔ̀ ema à hwɛ̀lɛ̀hwɛ̀ e ŋmanà wà aŋgɔ̀. Rzònì, ò nò wòwe nàa mògbèèlì wà aŋgɔ̀ mɔ̀kɔ.’”

²⁰“Òŋgò ŋmanà rzìi a anjiya, a tìmba, lì ùŋmà rzàŋgɛ̀. O hwètìmbelì hwe eni, na òma a mà kòmbɛ̀nɛ̀ ò lì ukà ò ndawò yà àma rzàŋgɛ. Rzàŋgɛ rzìi a mò ɛnɛ̀, a mò òkeyà ììlì. A ma hwaŋga lì ɛ̀ndɛ lì mò arzàŋgànɛ̀lɛ̀.

²¹È ŋmanà rzìi a mò òhweyà nanù ema, ‘Tatà, nà ò gbeyànì ò wà nà Lohwɛ̀ wòhwe. Nà rza ukì hvɛ tɔ̀ è mɔ̀ ema a hwɛ̀lɛ̀hwɛ̀ è ŋmanà wà aŋgɔ̀ hvɛ.’

²²Rzàŋgɛ à mà hwɛlɛ hwàgbèèlì wa eni rzìi a hwa òhweyà nanù ema, ‘È ɛ̀ndɛ̀ lìhwaŋgi nà lì hvinjɛ̀lɛ̀, e jàne è mbɔ̀ti yà gbamù. È mò wɔ̀tìrzɛ. È mò rzòŋgɛ hvɛ jɔ̀ndɔ ò jɔ̀nɔ ja eni ja lìya. È mò wɔ̀tìrzɛ hvɛ hwètambì hwe gbamù ò màtàŋgà.

²³È ɛ̀ndɛ e jànè mònànì mò nyàkà. È òŋwe, ì gbèye ndèma, ja òkè mɔ̀nyɛ̀ŋgì.

²⁴Ònò ŋmanà wà amì à mà ŋwa rzìi à tìmbi hvɛ ò lòŋgɛ. À mà wɔ̀ɔ rzìi a wurzi hvɛ.’ Aŋgà ndi hwa mà wòteya lì rzòmbìrzɛ̀.”

²⁵“Hwenè hweyà hwe arzɛ hwe ma gbèyɛ̀nɛ nanù ema ŋmanyàŋgò wà mùulu à mà hwɛ ò wàŋga. O hwètìmbèlì hwe eni, nà òmà a mà kòmbɛ̀nɛ̀ è ndawò, rzìi a hweyà nɛ hwatò hwa emba na lì rza ò ndawò yà awu.

²⁶Aŋgà ndi a à hwɛlɛ mògbèèlì mɔ̀kɔ a mò ijòwa mamɛ e gbèyɛ̀nɛ.

²⁷È mògbèèlì rzìi a mò alàhwɛ̀ nanù ema, ‘Ŋmànyàŋgò wa aŋgɔ ndi à jèlì ɔ̀ndi rzɔ̀ŋgɛ a mò òŋwelì mònànì mò nyàkà èhwanja à mò ɛni hvɛ na hwèlìyelì hwe gbamù.’”

²⁸“Ŋmànyàŋgò wa eni wà mùulu a mà hweye nanù rzìi a tàtà. A rza arze ò lì kpèeyà ò ndawò. Rzàŋgɛ rzìi a wurzà ò lì mò atɛ̀kɛ̀ ema a kpèeyà ò ndawò.

²⁹Òŋgò ŋmanà à mà alàhwɛ̀ rzàŋgɛ nanù ema, ‘Ɔ̀ŋgɔ tɛ, menè mèenyà me àrzɛ ema na hwèlì nà ò gbèeyà, nà rzi ò tònàni. Ò rzi nò ŋgbèlì tɔ̀ ŋgùma ya mbòlì ema ìmba hvɛ na rzòmbìrzɛ̀ nà ìmbunda ja amì.

³⁰Ɔ̀ŋgɔ̀ tɛ, ò nò ŋmanà wà aŋgɔ̀ ema à tìmbi nanù, à mà kùwa lì hvaŋgà wòlì wò aŋgɔ̀ nà ì àkpàlà ja eni, rzìi ò wà ò mò òŋwelì mònànì mò nyàkà ò lì rzòmbirzɛ nà hwatò hwa àrzɛ.’

³¹Rzàŋgɛ à mà mò alàhwɛ̀ nanù ema, ‘Ìi ŋmanà wà amì e? O hwèlì anù nà ìmba ihvònda jà arzɛ. Èrzàŋgò ya amì ya àrzɛ e hwèlì ndi è ya aŋgɔ.

³²Ò jɔ̀kɛ̀! Ì hwɛnì lì rzòmbirzɛ nà lì òkà mɔ̀nyɛ̀ŋgì èhwànja ònò ŋmanyɔ̀ŋgɔ wà aŋgɔ̀ à mà ŋwa, rzìi a timbi hvɛ ò lòŋgɛ. À ma wɔ̀ rzìi a wurzi hvɛ.’”