Read Mokpwe Lukàrzɛ̀ 16 Bible Online

Lukàrzɛ̀ 16 - Mokpwe bible

Lukàrzɛ̀ 16

¹Yerzù rzìi a òhweyà hwà-òkòwèlì hwa eni hvɛ nanù ema, “O mà hwɛ èhwàŋgì ya mòtò mɔ̀kɔ ema e ma òhva mògbèèlì mɔ̀kɔ ema à ma hwɛ lì kànèyà erzàŋgò ya eni. Hwatò hwa mà ɛ̀ndɛnɛ mìinda ò ma rzàŋgɛ̀ wà èni wà èwòlò ema òŋgò mògbèèlì à hvaŋga ì kahvà ja eni.

²Rzàŋgɛ wà èni wà èwòlò, rzìi a mò hwɛlɛ, rzìi a mò ijòwa nanù ema, ‘Mamɛ enè ema na ò hweyànà nanù e? O nò kɔ̀keyà kɔ̀yi-kɔ̀yi nɛ ò gbeyànà lìrzàŋgò la amì. Ò rza tanɛ̀ lì kànèyà erzàŋgò ya amì hvɛ.’

³Òŋgò mògbèèlì rzìi a akònɛ hvɛ mɔ̀ ŋmìti nanù ema, ‘Nà gbeyà rzɔ ndi nɛ e? Nàŋgɛ ema rzàŋgò wà amì arza lì nò ulɛ̀ ò èwòlò e? Nà rza òhvi tɔ̀ màyìmbì ma lì gbeyà hwèwòlò ema hwe èèti. Nà òkà hvɛ ìrzɔnì ò lì ɔmbɔ̀.

⁴Nà hwi mamɛ na tanɛ̀yi lì gbeyà naŋgɛ̀. O lì arza nanù ema nà mà ulɛhwɛ tɛ enè èwòlò, hwatò hwa nò kàrzɛ̀ ò màndawò ma awu.’

⁵“Òŋgò mògbèèlì rzìi a hwɛlɛ hwatò hwa màyɛmɛ ma ama rzàŋgò wà èni wà èwòlò mɔ̀kɛ-mɔ̀kɛ. È hvònda è mòtò wà wòrzò a mà jèe, à mà mò ijòwa nanù ema, ‘Mamɛ rzàŋgò wà amì wà èwòlò a ò èta e?’

⁶Òŋgò mòtò à mà mò alàhwɛ̀ nanù ema, ‘Hwègbe wàmbì hwe kòhwà ja màwujà mà Njàhwɛ̀.’ È mògbèèlì rzìi a mò òhweyà nanù ema, ‘Lìya ò rze, è kaàtì yà aŋgɔ̀ yà màyɛmɛ ènè. Tìla kàrzì ò ma hwègbe hwenì hwe kòhwà.’

⁷Òŋgò mògbèèlì rzìi a ijòwa è mɔ̀ ema à ma ùkirzɛ̀ hwahwàkɛ nanù ema, ‘Mamɛ ò wà hvɛ ò ètàhwa e?’ À mà mò alàhwɛ̀ nanù ema, ‘Hwègbe hweyàwò hwe mèkùtà me mbàrzì.’ Rzìi à mò òhweyà mɔ̀ hvɛ nanù ema, ‘È kaàtì yà aŋgɔ̀ yà màyɛmɛ ènè, ò tìle òma hwègbe hwehwàkɛ hwe mekuta me mbàrzì.’

⁸Èŋge èhwàŋgì ya mòtò e mà hweye nanù, rzìi a eka òŋgò mògbèèlì wà èni wà wòhwe a òhwa nanù ema, ‘À gbeyànì lìhwiyè la gbamù.’” Yerzù rzìi a òhwa hvɛ nanù ema, “Nànù ndi hwatò ema hwa òŋgama hweyà hwe ène rze, hwa gbeyànà mahwiye ma awu, ò lì ɔ̀njɔ hwanɛ̀yi hwatò, ò lì gbeyà hweyà hwe awu lì akà è wɔ̀ ema hwa òŋgama ŋmàye mò ama Lohwɛ̀.”

⁹Yerzù rzìi a hwa òhweyà nanù ema, “Nà è òhweyà ema è gbeyànè mònàmɛ̀ mò anyu mò ène rze, ò lì làtana hweyòrza hwe anyu. Èhwanja lìrzàkò mòŋgò mònàmɛ̀ mò kùwa, e kàrzɛ̀hwɛ̀ nàa hwàyɛ̀ni ò èkòmè ya mòlìkɛ̀.

¹⁰Mòtò ema a tànɛyi ò lì ɔ̀ŋgeyà hweyà hwè rzàlì, à tànɛyi hvɛ ò lì ɔ̀ŋgeyà hweyà hwè ndɛnɛ̀. Mòtò ema à rza tanɛ̀yi ò lì ɔ̀ŋgeyà hweyà hwè rzàlì, à rza ò tànɛyi hvɛ̀ tɔ̀ lì ɔ̀ŋgeyà hweyà hwe ndɛnɛ̀.

¹¹Ò wà ò rza tanɛ̀yi tɛ ò lì ɔ̀ŋgeyà mònàmɛ̀ mò ène rze gbamù, njɛnɛ rzɔ naŋgɛ à ò ŋgbà mònàmɛ̀ mò jɔ̀kɛ̀ e?

¹²Ò rzà tanɛ̀yi tɛ ò lì ɔ̀ŋgeyà wòlì wò àŋganì, njɛnɛ rzɔ à ò ŋgbà è wa aŋgɔ wòlì e?

¹³“O rzà ènje tɔ̀ mògbèèlì tɔ̀ mɔ̀kɔ ema à tànɛyi lì gbèeyà rzàŋgò ihwàkɛ ŋgèlì hvɔ̀kɔ. À hwɛnì lì kɔ̀ɔ̀ mɔ̀kɔ, rzìi à lìŋgàna ɔ̀nɛ̀yi. À ò gbèeyà mɔ̀kɔ na ŋmèma mò eni mò arzɛ, rzìi a ndinda ɔ̀nɛyi. Ò rza tanɛ̀ lì hwɛ è mògbèèlì wà àma Lohwɛ̀, rzìi ò hwɛ hvɛ è mògbèèlì wà màlì.”

¹⁴Ihvàlìrzàyì ì mà hweye hwenè hwèyòhwèlì hwe àrzɛ hwe ama Yerzù, rzìi hwa arzɔmbìyɛ̀ èhwanja hwa mà lìŋgàna màlì, rzayì-rzayì.

¹⁵Yerzù rzìi a hwa òhweyà nanù ema, “Inyɔ è a uŋmɛ̀lɛ̀ ò màrzò ma hwatò ema è rzàŋgi, ndi Lohwɛ̀ à hwi mamɛ ema e hwèlì ò mèèmà me anyu. Èŋge eyà ema hwatò hwa wò wòlìtò rzayì-rzayì, e hwèlì ndi nàa lòwa lì uŋgbàa ò wòrzò wò ama Lohwɛ̀.”

¹⁶Yerzù rzi a òhwa hvɛ nanù ema, “Hweyà ema hwe ma tìlahwa ò kààtì yà àma Lohwɛ̀, hwà-òhwèlì hwa hwèlìŋgɛ̀ wɔ̀ hvɛ hwà mà hwe òhwa ò è hvònda yà àma Yòwanìrzɛ̀ è Mòlùhwìrzèlì. Lìwòteya è hvònda yà àma Yòwanìrzɛ̀ natɛ̀ɛ nà nàŋgɛ, Ŋmɛ̀ndì mò Gbamù mò Lìkànèyà la ama Lohwɛ̀ mɔ̀ ndì mò òhwàhwàa. Tɔ̀ ima mòtò à kèkà ò lì àyìinɛ̀lɛ̀, ò lì kpèeyà ò tenì ya lìŋgi lìkànèyà.

¹⁷“Tɔ̀ nɛ è ŋmanyu ya Lohwà nà è rze hwe tànɛyi lì nyɔ̀ŋgɔ, ndi tɔ̀ ŋmanà èniminìmì ya mbenda yà àma Lohwɛ̀ è rza kpa.

¹⁸“Tɔ̀ ima mòtò ema à hvayì jòjìyɛ̀ wà èni ò lìhwa, rzìi a hwàà òhvɛhvɛ mòlanà, òma à gbèyi mòrzònje. Tɔ̀ imà mòtò hvɛ ema à hwààyi mòlanà ema à hvayahwì ò lìhwa, òma a gbèyi mòrzònje.

¹⁹“O mà hwɛ èhwàŋgì ya mòtò mɔ̀kɔ ema, e ma alìŋgɛ̀lɛ̀ hwerzànjà bɔbɔbɔ. À mà làa hvɛ mèlelì me ndɛmù wùnyà tɛ.

²⁰O ŋmèna-ŋmèna mò è kɔtɔ̀ yà èni ya ndawò, ò mà hwɛ mòlìrza mò mòtò ema mò ma hwɛ lì nàŋgeya ò ŋmèna-ŋmèna mò èŋge kɔtɔ̀, ema mò ma hwɛ̀lɛ̀hwɛ̀ Làrzàrɔ̀rzì, à mà ònda ìhveya è nyò ya eni ya àrzɛ.

²¹À mà àmbɛlɛlɛ iŋgi mbùmbu ja mèlelì ema ì ma hwɛ lì ùnda ò hwèlèèlì hwe ama èŋge èhwàŋgì ya mòtò. Ì ŋgba hvɛ ì mà hwɛ lì jà ò lì tɛ̀mbɛ ìhveya ja eni aŋga.

²²“È hvònda ema mòŋgò mòlìrza mò mòtò mò mà ŋwe, i aŋgèlì ì mà mò wòwa, ì mò ɛ̀ndɛnɛ ò tòŋgòŋgò yà àma Abràhamù. Èŋge èhwàŋgì ya mòtò yɔ hvɛ rzìi e ŋwa, rzìi e imawɛ̀lɛ̀hwɛ̀.

²³Èŋge èhwàŋgì ya mòtò e mà ɛ̀ndɛ ò èkòme ya kpelì, ema e mà tàke nà èwiki. À mà kàrzɛ wòrzò wò eni, rzìi a ɛnɛ Abràhamù ɔnɛ̀yi hvòò nà Làrzàrɔ̀rzì hvɛ a lìya ò tòŋgòŋgò yà èni.

²⁴Èŋge èhwàŋgì ya mòtò rzìi e tɛɛ nanù èma, ‘Ìi tatà Abràhamù, ò nò òkeya ììlì. Oma Làrzàlɔ̀tì ema a tɔ̀tè wòrzò wò jɔ̀nɔ ja eni ò màlìhwa a nò tɔ̀lɛ è mɔ̀ ò jɛ̀ɛ̀mɛ̀ ja amì ò lì nò yɔlɛ̀, èhwanja nà hweyà wɔ̀ɔ̀kì rzayì-rzayì ò tènì yà mònò mùnya.’

²⁵Abràhamù à ma mò tìmbirzɛlɛlɛ nanù ema, ‘Ìì ŋmanà, ò ɔ̀ŋgɛ̀lɛ̀ nà òmà ò mà hwɛ ò rze, ò wà òmà òhva hwemà hwe àrzɛ hwe gbamù ò rze yà mɔ̀nyɛ̀. Ndi Làrzàrɔ̀rzì mɔ̀ à mà lùwa ndi hwema hwe wòhwe e? O nàŋgɛ mɔ̀ hvɛ à hwèlì ò lì wɔ̀wìrzɛ̀ la nyò anù. O wà ò hwèlì ò mòrziyò mòndɛnɛ̀.

²⁶Lì akà hvɛ tɛ nanù, ò hwèlì hwaŋga ndɛnɛ̀ ema è jò kàhwì ò wa nà irzɔ. Hwatò ema hwa hwèlì enè èhvàrzù, hwa rzà tanɛ̀ lì jà òŋgò. È wɔ̀ hvɛ ema hwa hwèlì èŋge èhvàrzù ya anyu, wɔ̀ hvɛ hwa rzà tanɛ̀yi lì jà enè èhvàrzù ya arzu.’

²⁷Èŋge èhwàŋgì ya mòtò rzìi e òhweyà Abràhamù nanù ema, ‘Ìi tatà, nà ò rzòrzòmelì òma Làrzàrɔ̀rzì ò ndawò yà ama rzàŋgò wà amì.

²⁸Nà òhvì wònyanyàŋgò wà amì hwata. Inyɛ̀ mɔ̀ à ɛ̀ndɛ̀ a hwa kòkòwɛ̀lɛ̀, aŋga nanù, wɔ̀ hvɛ hwa rzi ɛ̀ndɛ lì jà lì kpèeyà ò enè èki ya mòrziyò.’

²⁹Abràhamù rzìi a mò òhweyà nanù ema, ‘Wɔ̀ hwa òhvì hwetìlelì hwe ama Mòrzè nà hwetìlelì hwe hwà-òhwèlì hwa hwèlìŋgɛ̀. Ìnyɛ̀ hwa òkànèyà mamɛ ema e ma màa lì tìlahwa aŋga.’

³⁰Èŋge èhwàŋgì ya mòtò rzìi ya òhwa nanù ema, ‘Jàyɛ̀ tatà Abràhamù kòkò, mòtò à ànji tɛ anù, ò èkòmè ya kpelì, rzìi a ɛ̀ndɛ lì hwa òhweyà, òma hwà mà atikòwɛ ò wòhwe wa awu, lì tìmba ò ma Lohwɛ̀.’

³¹Abràhamù rzìi a mò òhweyà nanù ema, ‘Wɔ̀, hwa rzà hweyànì tɛ Mòrzè, nà hwanɛ̀yi hwà-òhwèlì hwa hwèlìŋgɛ̀, èŋge ŋgàna è hwèlì ndi ema hwa rzà tànɛyi lì lòkɛ̀ è mɔ̀ ema à ò hvùmùwɛ̀ ò èkòmè ya kpelì.’”