Read Mokpwe Lukàrzɛ̀ 17 Bible Online

Lukàrzɛ̀ 17 - Mokpwe bible

Lukàrzɛ̀ 17

¹Yerzù à mà òhweyà hwà-òkòwèlì hwa eni nanù ema, “Hweyà ema hwe gbeyà hwatò hwa gbeyà wòhwe hwe hwɛnì lì hwa jèeyà. Ndi èwòma è ò hwɛ nà òŋgò ema à hwe jànà!

²O mà lɔ̀wu ndi ema, ene nyayi yà mòtò, è kakahwè ndi lìŋyàyi lì ndɛnɛ ò lìwɔ, rzìi hwa mò indirzɛ ò ŋmanjà. Lì akà ema à èmìrzɛ̀ hwanù hwanà hwàrzàlì ò lì gbeyà wòhwe.

³È aŋgòwè. “Ŋmànyàŋgò wà aŋgɔ̀ à gbèyi tɛ wòhwe, ò mò òhweyà ema à tòni. À ayèmbɛ tɛ wòhwe wò eni rzìi a àyèŋgòwɛ̀, ò mò làkìrzɛ.

⁴À ò tònanì tɛ lìrzàmba la ŋgèlì ò wùnyà, rzìi a ò jèeya hvɛ lìzàmba la ŋgèlì ò lì ò atɛ̀kɛ̀ nanù èma, ‘Nà ma àyèŋgòwɛ̀,’ ò àŋgàmɛ̀nɛ̀ lì mò làkìrzɛ.”

⁵I àpɔ̀rzìtòlò rzi jò òhweyà è Rzàŋgò nanù ema, “O jò ètirzɛ màlòkɛ̀ ma arzu.”

⁶È Rzàŋgò à mà hwa alàhwɛ̀ nanù ema, “È òhvì tɛ lìlòkɛ̀ lì tu nàa ŋmanà hvɔ̀ŋgɔ̀ wà wòrzaŋgò, è kànèyà wònò wùuŋgu nanù ema, ‘Wuŋguhweyà anù, ò tɛ̀mɛ̀ ò ŋmanjà.’ Wòŋgò gbèe wò è hweyànà.”

⁷“È hwèlì tɛ ema mɔ̀kɔ wà ànyu à òhvi mògbèèlì ema à ɛ̀ndi ò wàŋgà ò lì tiyà mòònda, tɔ̀ lì ɔ̀ŋgeyà mɛ̀ɛ̀lɛ̀ŋgù. Òŋgò mògbèèlì à tìmbi tɛ ò ndawò, mamɛ ò mò òhweyà e? Ò mò òhweyà nanù ema, ‘jà anù ò lìya anù ò le.’

⁸Ŋgà ò mò òhweyà ndi nanù ema, ‘O nò ihvɛlɛlɛ mòlelì mò ami, ò nò akɛlɛlɛ è mɔ̀. O nò tɛmeya ò tòŋgòŋgò natɛ̀ɛ na kulɛ̀ lì làa ndèŋgàna ò wà hvɛ ò e làa.’

⁹È lòkɛ̀yi ema ònò mòtò à tànɛyi lì eka òŋgò mògbèèlì wà èni ò mamɛ ya arzɛ ema a mò gbèelì e?

¹⁰O èŋgànɛ̀lɛ̀ inyɔ hvɛ rzɔ e ma kulɛ tɛ lì gbeyà, nanù mɛnɛ ndi e hwɛnì lì hwɛ nà inyɔ. È mà kulɛ̀ tɛ lì gbeyà hweyà hwe àrzɛ, nà òmà hwe àrzàɛhwɛlɛ, e òhwa ndi nanù ema, ‘Ì hwèlì ndi hwàgbèèlì mɛnɛ. Ì mà gbeyà ndi èwòlò ya arzu ema ì hwɛnì lì gbeyà.’”

¹¹Nà òmà Yerzù à mà hwɛ lì ɛ̀ndɛ ò Jèrurzalɛ̀mù, à mà akeyà ò ŋmèyò mò ma hwɛ è njìya yà èkòmè ya Rzàmarìyà nà Gàlìlì.

¹²Nà òmà Yerzù a mà kpèeyà ŋmanà mbòwà mɔ̀kɔ, à mà ùŋmanɛlɛ lìyòmɛ̀ la hwatò ema hwà mà ɔ̀kirzɛ̀ è nyàmbɛ yà mɔ̀lɔ̀ŋgɔ. Hwa mà tɛ̀mɛ̀ hvòhvò.

¹³Hwàŋga hwatò hwa mà mò hwɛlɛ nà lìlò lì kàrzàmi nanù ema, “Ìi Yerzù Rzàŋgò kòkò, ò jò òkeya ììlì!”

¹⁴Nà òmà Yerzù a mà hwà ɛnɛ rzìi a hwa òhweyà nanù ema, “È ɛ̀ndɛ̀ ya awuŋmɛ̀lɛ̀ Ipìlìrzì.” Nà òmà hwa mà hwɛ lì ɛ̀ndɛ, rzìi, ìnyò ja awu ì rzàŋgà.

¹⁵Mɔ̀kɔ wà àwu à mà ayèmbɛ ema à mà wurzeyà. Rzìi à tìmbà, a eka Lohwɛ̀ nà lìlò lì kàrzàmi.

¹⁶Ònò mòtò à mà kpèeyà Yerzù ò màtàŋgà, ò lì mò eka. À mà hwɛ ndi mòtò wà Rzàmarìyà.

¹⁷Yerzù rzìi a ijòwa nanù ema, “Rzèke nà rzàŋgirzɛ lìyòmɛ̀ la hwatò e? One lìnɛ̀yi lùùwa lì hwèlì e?

¹⁸Tɔ̀ mɔ̀kɔ wà àwu à rza tìmbì ò lì eka Lohwɛ̀, lì akà tɛ ònò mòjilì ŋmìti e?”

¹⁹Yerzù rzìi a mò òhweyà nanù ema, “Tɛmɛ ò ɛ̀ndɛ̀. Lìlòkɛ̀ lì aŋgɔ̀ lì ò tùnìrzɛ̀yi.”

²⁰Wùnya wɔ̀kɔ lòŋgò la Hvàlìrzàyì, hwa mà ijòwa Yerzù nanù ema, “Ima hvònda ema Lìkànèyà là ama Lohwɛ̀ lì jà e?” Yerzù à mà hwa alàhwɛ̀ nanù ema, “Lìkànèyà la ama Lohwɛ̀ lì rzà ɛnɛhwɛ nà mìirzɔ̀.

²¹Tɔ̀ eyà ema hwatò hwa tànɛyi lì òhwà nanù ema, ‘Ɔ̀ŋgɔ! Lɔ lìinì’ tɔ̀ɔ ‘Lɔ lìnɛ̀yi aŋga.’ Jàyɛ̀, Lìkànèyà là ama Lohwɛ̀ lì hwèlì ò ìtììtènì jà ànyu.”

²²Yerzù rzìi a òhweyà hwà-òkòwèlì hwa eni hvɛ nanù ema, “È hvònda è hwèlì e jà ema jò ò lìŋgànà lì ɛnɛ tɔ̀ wùnyà wɔ̀kɔ ema è Ŋmanà wà è Mòtò wà Hwènàmà a jò àwuŋmɛ̀lɛ mɔ̀ ŋmìti, ndi è rza wò ɛnɛ.

²³Hwatò hwa èŋge hvònda hwa è òhweyà nanù ema, ‘Mɔ̀ ònò’ tɔ̀ɔ ‘Mɔ̀ ɔ̀nɛ̀yi.’ Ndi è rzi hwa òŋgama.

²⁴Wùùnyà ema è Ŋmanà wà è Mòtò wà Hwènàmà a ò jɛ̀ɛ̀, wò ò hwɛ ndi nàa lìŋmɛ̀tì-ŋmɛ̀tì lì ò ŋmɛ̀tɛ̀lɛ̀ njuka hvɔ̀kɔ yà è ŋmanyu ya Lohwà nà ènɛ̀yi.

²⁵Ndi tɔ̀ nanù, mɔ̀ à lòma lì tàka rzayì-rzayì. À hwɛnì hvɛ lì rzɔ̀rzɔ̀wɔ̀ nà ène nyɔ̀ŋgɔ̀nì ya àrzɛ.

²⁶Nà òmà e mà gbèyɛnɛ èŋge hvònda yà ama Nòwà, nanù ndi e ò hwɛ̀ɛ hvɛ ò wùnyà ema è Ŋmanà wà è Mòtò wà Hwènàmà a ò jɛ̀ɛ̀.

²⁷O èŋge hvònda yà ama Nòwà, hwatò hwa mà hwɛ lì làa melelì nà lì nyɔ mìimbà, wùnyànà hwa mà hwɛ lì hwàa hwalanà. Hwalanà hvɛ hwa mà ŋgbàahwa ò mahwà, natɛ̀ɛ nà wùùnya Nòwà a mà kpèeyà ò wɔ̀lɔ̀ wò ndɛnɛ̀. È mbuwà e yɔ rzìi è tɔ̀ndɛ̀ e ɔ̀ndɔ̀ rzìi hwaŋga hwatò hwa arzɛ hwa kuwa lì indà.

²⁸Nànù mɛnɛ ndi e mà hwɛ hvɛ nà è hvònda yà àma Lɔtì. Hwatò hwa mà hwɛ lì làa melelì, na lì nyɔ mimba, na ò ndàndɛ̀, lì ònà è mbòtà, nà lì òŋgà mandawò.

²⁹O wòŋgò wùnyà mɛnɛ ema Lɔtì a mà ànjiye ò mbòwà yà Rzòdòmì, rzìi mùùnya nà màŋyàyi ma hwèkaàndò mò uhwɛlɛlɛ ò ŋmanyu yà Lohwà, nàa mbuwà. Hwe kùwa lì òŋwà hwaŋga hwatò hwa àrzɛ.

³⁰Nànù mɛnɛ ndi e ò hwɛ̀ɛ ò wòŋgò wùnyà ema è Ŋmanà wà è Mòtò wà Hwènàmà a ò ɛnɛ̀hwɛ.

³¹“O wòŋgò wùnyà è mòtò ema à ò hwɛ̀ɛ ò ŋmanyu yà lìkaàndò, ema erzàŋgò ya eni e ò hwɛ̀ɛ ò tenì yà ndawò, à rza ò rzìhwa ò lì wòwà tɔ̀ yòmà. È mòtò hvɛ ema a ò hwɛ ò wàŋgà, à rza ò tìmba ò ndawò.

³²È ɔŋgɛ̀lɛ̀ mamɛ e ma gbèyɛnɛ nà jòjìyɛ̀ wà àma Lɔtì.

³³Tɔ̀ ima mòtò ema à arza ò lì kòmbɛ̀ lòŋgɛ là eni, à lì wɔ̀lɛ̀nɛ̀. È mɔ̀ hvɛ ema à wɔ̀lɛ̀nɛ̀ lòŋgɛ la eni, à lì kòmbɛ̀.

³⁴Nà è òhweyà ema, hwatò hwàhwàkɛ̀ hwa ò nàŋgà ò lìnɔ̀ŋgɔ̀ lɔ̀kɔ, mɔ̀kɔ à ò wòwàhwà, ndi ɔ̀nɛ̀yi à ò lììyà.

³⁵Hwalanà hwàhwàkɛ̀ hwa ò hwɛ lì rzikà ìhvɔ̀ŋgɔ̀ ja mbàrzì, mɔ̀kɔ à ò wòwàhwa, ɔnɛ̀yi à ò lììyà.”

³⁶[Hwatò hwàhwàkɛ̀ hvɛ hwa ò hwɛ ò wàŋgà, mɔ̀kɔ à ò wòwàhwà, ndi ɔ̀nɛ̀yi à ò lììyà.]

³⁷Hwà-òkòwèlì hwa ama Yerzù rzìi hwa mò ijòwa nanù ema, “Ìi Rzàŋgò, òne hwenè hweyà hwɛ àrzɛ hwe ò gbèyɛ̀nɛ e?” Yerzù rzìi à hwa alàhwɛ̀ nanù ema, “Tɔ̀ ima èki è hwèlì èèmbè, aŋga ndi jòŋgò jà mbeyà jà arzàŋgànɛ.”