Read Mokpwe Lukàrzɛ̀ 18 Bible Online

Lukàrzɛ̀ 18 - Mokpwe bible

Lukàrzɛ̀ 18

¹Yerzù rzìi a kpɛ̀ɛya hwà-òkòwèlì hwa eni ŋmàna àma hwa hwɛ ndi ò màkanɛ̀ ihvònda ja àrzɛ. Hwa rzì kèka lì tùulɛ̀ mèèmà.

²À mà hwa òhweyà nanù ema, “O mà hwɛ mòkàyìrzèlì mɔ̀kɔ wà mbenda ò mbòwà hvɔ̀kɔ. À rzi òkè Lohwɛ̀ wɔ̀ŋgɔ̀, ndèŋgànɛ̀lɛ̀ hvɛ à rzi ŋgbe hwatò èluhwe.

³O mà hwɛ hvɛ mòkurze mò mòlanà mɔ̀kɔ, ò èŋge mbòwà. Òŋgò mòlanà à mà jèeya òŋgò mòkàyìrzèlì wà mbenda ŋgɛ̀lɛ̀ŋgɛ̀lɛ̀ ò lì mò atɛ̀kɛ̀. À mà mò òhweyà nanù ema, ‘Nà òhvì ŋmàŋgò nà mòtò mɔ̀kɔ, ò jò kàyìrzɛ nà rzùhwe.’

⁴O hwèwòtelì òŋgò mòkàyìrzèlì wà mbenda, à rzìi imànɛ̀lɛ̀. O lìrzukù, à mà òhwanɛ̀lɛ mɔ̀ ŋmìti nanù ema, ‘Tɔ̀ nɛ na rzà ŋgbà Lohwɛ̀ èluhwe, ndèŋgàna na rzà òka hwatò wɔ̀ŋgɔ̀,

⁵ndi nɛ tɛ mònò mòkurze mò mòlanà mò nò kàyìrzɛ rzayì-rzayì, nà àŋgàmɛ̀nɛ̀yi lì kàyìrzɛ̀ mònò ŋmàŋgò ema a rzùhwe. Aŋgà nanù, à rza ò nò jèeya hvɛ ò lì nò tàkirzɛ.’”

⁶Yerzù rzìi a òhweyà hwà-òkòwèlì hwa eni nanù ema, “È òkànèyà mamɛ è mòkàyìrzèlì wà mbenda wà wòhwe ema à rza hwiyɛ Lohwɛ̀ mamɛ a òhwa.

⁷Rzèke Lohwɛ̀ hvɛ à ò rzùulɛ̀ hwatò hwa eni ema a hvɔ̀rzì e? Hwàŋga hwatò ema hwa mò èyeyàa ŋmerze nà wuu, a ò lìya ema a rza hwa alàhwɛ̀ e?

⁸Nà è òhweyà nanù ema, Lohwɛ̀ à òŋgòwànà hwatò wa eni kàrzì-kàrzì. Ndi è lòkɛ̀ nanù ema è Ŋmanà wà è Mòtò wà Hwènàmà à jelì tɛ, à ùŋmànɛ̀lɛ̀ lìlòkɛ̀ ò rze e?”

⁹Yerzù à mà òhwa mòhvɛhvɛ ŋmàna lì hvòmɛ̀nɛ̀ hwatò ema hwa àyɛ̀nɛ̀ hwìti nàa hwatò ema hwà rzàŋgi, rzìi hwa àyɛ̀nɛ̀ hwanɛ̀ hwatò nàa hwatò hwa ŋgundu. À mà òhwa nanù ema,

¹⁰“Hwatò hwàhwàkɛ̀ hwa mà ɛ̀ndɛ ò Ndawò yà Lohwà ò lì kànɛ̀. Mɔ̀kɔ à mà hwɛ ndi hvàlìrzàyì. Ɔ̀nɛ̀yi hvɛ à mà hwɛ ndi è mòrzàŋgèlì wà è njàŋge yà lìkànèyà.

¹¹“È Hvàlìrzàyì è ma tɛ̀mɛ̀ ò ŋmanyu rzìi e kànɛ ò ŋmèma mò eni nanù ema, ‘Ìi Lohwɛ̀ nà rzòmì, èhwanja nà rza enje nàa hwanɛ̀yi hwatò ema hwa hvùmànà hwatò hweemà, hwa lɔ̀kɔ̀ hwanɛ̀yi, è wɔ̀ hwa mòrzònje ò màhwa. Nà ò rzòmì èhwanja nà rza ènje nàa ò nò mòrzàŋgèlì wà è njàŋge yà lìkànèyà.

¹²Nà lìya mòkìyà njàwò ŋgèlì ihwàkɛ ò menya lìrzàmba. Ndèŋgàna, nà ò ŋgbà lòŋgò lɔ̀kɔ la tɔ̀ ima lìyòmɛ̀ ema na lu.’

¹³“Ndi è mòrzàŋgèlì wà è njàŋge yà lìkànèyà à mà tɛ̀mɛ̀ hvòhvò. À rzi tanɛ̀ hvɛ tɔ̀ lì kàrzɛ mìirzɔ̀ ma eni ò lì ɔŋgɔ̀ lìwòhwɛ̀ la ŋmanyu. À mà ika màà mà eni ò màhwembe ma eni rzìi a kànɛ̀ nanù ema, ‘Ìi Lohwɛ̀ ò nò òkeya ììlì. Nà hwèlì ndi mòtò wà wòhwe.’”

¹⁴Yerzù rzìi a òhwa hvɛ nanù ema, “Nà è òhweyà ema, ònò mòtò à mà tìmba ò ndawò yà èni rzìi a tɛ̀mɛ̀ ehve-ehve nà Lohwɛ̀, lì aka òŋgò Hvàlìrzàyì. Tɔ̀ njɛnɛ ema a akàrzɛ mɔ̀ ŋmìti, à rzìhwìrzɛ̀hwɛ̀. È mɔ̀ hvɛ ema arzihwirzɛ, a kàrzɛ̀hwɛ̀.”

¹⁵Lòŋgò la hwatò hwa mà jàneya Yerzù hwaanà hwa awu hwàrzàlì, ema a hwa hwàkɛ màà mà eni, ò lì hwa nàmìrzɛ̀. Ndi hwà-òkòwèlì hwa eni hwa mà ɛ̀nɛ nanù, rzìi hwa hwà lòmeyà.

¹⁶Ndi Yerzù à mà hwɛlɛ hwaŋga hwanà, rzìi a òhwa nanù ema, “È hwɛ̀mɛ̀ hwaanà hwàrzàlì hwa jèe nà ìmba. È rza hwa keka. Èhwanja inì nyayi ja hwatò jɔ ndi ì hwɛnì Lìkànèyà la ama Lohwɛ̀.

¹⁷Nà è òhweyà è jɔ̀kɛ̀ nanù ema, tɔ̀ ima mɔ̀ ema à rza ìmànɛ̀lɛ̀ lìkànèyà la ama Lohwɛ̀ nàa ŋmanà mòrzàlì a rza lì kpèeyà.”

¹⁸Mòkànèlì mɔ̀kɔ à mà ijòwa Yerzù nanù ema, “Ìì mòòkòlèlì wà gbamù, mamɛ na tànɛyi lì gbeyà ò lì lùwa lòŋgɛ ema lì rza kùwa e?”

¹⁹Yerzù rzìi a mò ijòwa nanù ema, “Mamɛ ndeŋgàtɛ ò nò hwɛlɛ mòòkòlèlì wà gbamù e? O rza ènje tɔ̀ mòtò tɔ̀ mɔ̀kɔ ema à hwèlì gbamù, lì akà tɛ Lohwɛ̀ ŋmìti.”

²⁰Ò wa ò hwi e mbenda ema è òhwi nanù ema, “Ò rzì gbeyà mòrzònje mò lìhwa, ò rzì òŋwa mòtò, ò rzì ihwa, ò rzì tɛ̀mɛ̀ mbòŋgi yà mòlàŋgà, ŋgbà rzɔ̀ŋgɛ, nà nyɔ̀ŋgɛ èluhwe.”

²¹Òŋgò mòkànèlì rzìi a òhwa nanù ema, “Mòòkòlèlì nà mà gbeyàna inì mbenda lìwòteya è hvònda ema na mà hwɛ jùma ŋmanà.”

²²Yerzù à mà hweye nanù, rzìi a mò òhweyà nanù ema, “O lìyelì eyà yɔ̀kɔ ema ò àŋgàmɛ̀nɛ̀ lì gbeyà. Ahwirzɛ erzàŋgò ya aŋgɔ̀ ya arzɛ, ò kahweyà mèlìrza me hwatò wòŋgò wòlì. O gbèyi tɛ nanù ò lùwà mònàmɛ̀ ò ŋmanyu ya Lohwà. O mburzà nanù, ò jèe ò nò òŋgame”

²³Nà òma è mòkànèlì a mà hweye nanù, è ndùtù e mà mò lɛ̀mbɛ èhwanja à mà hwɛ ndi èhwàŋgì ya mòtò.

²⁴Yerzù à mà ɛ̀nɛ nà òmà òŋgò mòtò a mà tìmbe rzɔ̀luu, rzìi a òhwa nanù ema, “È ambi rzayii ema hwèwàŋgì hwe hwatò hwe kpèeyà ò Lìkànèyà là ama Lohwɛ̀.

²⁵O rzà àmbànì Kàmɛ̀lì, ò lì akeyà lìhvɔ̀ndi la ndɔ̀ndɔ̀kì, ndi hwa ambani hwèwàŋgì hwe hwatò, ò lì kpèeyà ò Lìkànèyà là ama Lohwɛ̀.”

²⁶Hwàŋga hwatò ema hwà mà hwèya ène mbɔrzi, rzìi hwa mò ijòwa nanù ema, “È hwèlì tɛ nanù, njɛnɛ rzɔ a ò kàrzòhwɛ e?”

²⁷Yerzù à mà hwa timbirzɛlɛlɛ nanù ema, “Mamɛ ema e ambani è mòtò wà hwènàmà, e rzà àmbanì Lohwɛ̀ ò lì e gbeyà.”

²⁸Pètrò à mà mò òhweyà nanù ema, “Ɔ̀ŋgɔ tɛ, irzɔ ì ma rzɔnjɛ̀lɛ̀ hwe àrzɛ ema ì ma hwɛnɛ, ò lì ò òŋgama.”

²⁹Yerzù à mà hwa alàhwɛ̀ nanù ema, “Nà e jɔ̀kɛ̀ nà è òhweyà ema, tɔ̀ ima mòtò ema à hwɛ̀mi è ndawò yà èni, jòjìyɛ̀ wà èni, wònyànyàŋgò wà eni, rzàŋgò wà èni, nà è nyàŋgò yà èni, tɔ̀ nà hwàna hwa eni, ò lì hvòmɛ̀nɛ̀ Lìkànèyà là ama Lohwɛ̀,

³⁰a ò lùwa mòrzawèlì rzayì-rzayì ò ène hvònda, à ò lùwa lòŋgɛ la gbìndèyà ò hvònda ema e ò jɛ̀ɛ̀.”

³¹Yerzù rzìi a wòwa lìyòmɛ̀ la eni la hwà-òkòwèlì nà hwàhwàkɛ̀ ò tòŋgòŋgò yà èni, rzìi a hwa òhweyà nanù ema, “È òkànèyà, ì hwɛnì lì àgba ò Jèrurzalɛ̀mù, hweyà hwe àrzɛ ema hwà-òhwèlì hwa hwèlìŋgɛ̀ hwà mà tìle lì hvòmɛ̀nɛ̀ è Ŋmanà wà è Mòtò wà Hwènàmà, hwe òndìrzɛ̀hwɛ̀.

³²Hwa mò ŋgba ò màa, ma hwatò ema hwa rza enje wònyà Yudà. Hwa mò kìkòwà, hwa mò hwɛnyɛ̀ nà lì mò rzɔ̀yeyà hvɛ hweyɔlì.

³³Hwa mò gbiyɛ̀ hvònjì, rzìi hwa mò òŋwà. Ndi ò mburzà menya meyawò, à hvùmùwà.”

³⁴Hwàŋga hwà-òkòwèlì, hwa rzi rzɔ̀ŋgìtɛ̀nɛ̀ mamɛ ya arzɛ ema a mà òhwe. Mònò ŋmàna mò mà hwa aka lìhwiyè. Hwa rzi hwiyè mamɛ a mà hwɛ lì òhwà.

³⁵Nà òmà Yerzù a mà kòmbɛ̀nɛ̀ è mbòwà yà Jèrìkò, ò mà hwɛ mòtò mɔ̀kɔ ema à ma hwɛ ndima. Òŋgò mòtò rzìi a lìya ò tòŋgòŋgò yà njìya, ò lì ɔmbɔ̀.

³⁶Òŋgò mòtò a mà hweye nà òmà è ŋgìndì yà hwatò ya aka, rzìi a hwa ijòwa ò lì hwiyà mamɛ e gbèyɛ̀nɛ.

³⁷Hwa mà mò alàhwɛ̀ nanù ema, “Yerzù wà Nàrzàrɛ̀tì mɔ̀ ndì à akaa.”

³⁸Òŋgò mòtò rzìi a tɛ nà lìlò lì kàrzàmi nanù ema, “Aà, Yerzù! È Ŋmanà wà è nyɔ̀ŋgɔ̀nì ya ama Dàhwitì, ò nò òkeya ììlì!”

³⁹Hwàŋga hwatò ema hwà mà hwɛ ò wòrzò wò èŋge ŋgìndì, rzìi hwa lòmeya èŋge ndima ema, a umbe è wàna yà eni. Ndi mɔ̀ à mà tɛ hvɛ lì akà lìmɛ̀nì nanù ema, “Ìi è Ŋmanà wà e nyɔ̀ŋgɔ̀nì ya ama Dàhwitì, ò nò òkeya ìmba ììlì!”

⁴⁰Yerzù rzìi a tɛ̀mɛ̀. A òhwa nanù ema, hwa mò jàneyà èŋge ndima. Nà òmà a mà kòmbɛ̀nɛ̀ Yerzù, Yerzù rzìi a mò ijòwa nanù ema,

⁴¹“Mamɛ ò àrza ema Nà ò gbèeyà e?” Rzìi à mò alàhwɛ̀ nanù ema, “Ìi Rzàŋgò nà àrzà lì ɛnɛ̀. O nò gbeye na ɛnɛ hvɛ.”

⁴²Yerzù rzìi a mò òhweyà nanù ema, “Ɛnɛ̀ nàŋgɛ! Lìlòkɛ̀ la aŋgɔ̀, lì ò wɔ̀wìrzɛ̀yi.”

⁴³Lìwòkìmɛ̀nɛ̀, òŋgò mòtò rzìi a wòteyà lì ɛnɛ̀. Rzìi à òŋgama Yerzù. A ŋgbà hvɛ Lohwɛ̀ jèka. Nà òmà è ŋgìndì yà àrzɛ e mà ɛnɛ nanù, è mà ŋgbà Lohwɛ̀ jeka.