Read Mokpwe Lukàrzɛ̀ 2 Bible Online

Lukàrzɛ̀ 2 - Mokpwe bible

Lukàrzɛ̀ 2

¹O hwèŋge hwèyu, ema Àgurzitùrzì, Kayirzà yà Ròmànì à mà akɛlɛ e njàmbɛ̀, à ma hwatò hwa arzɛ ema hwa hwèlì ò rze yà lìkànèyà la eni, hwa ɛ̀ndɛ hwa tìle mìinà me awu.

²Iŋgi jaŋgì ndi ì ma hwɛ è jà wòrzò. Èŋge hvònda ɔ̀ndi Kpìlìnurzì a mà hwɛ è mòkànèlì hwà èkòmè ya Rzilìyà.

³O èŋgànɛ̀lɛ̀ mòtò tɛ à mà ɛ̀ndɛ ò mbòwà yà èni ò lì tìlìrzɛ lìinà la eni.

⁴Jòrzɛ̀hvù mɔ̀ hvɛ à mà uhwɛlɛlɛ̀ ò mbòwà yà Nàrzàrɛ̀tì yà Galìlì. À mà àgba ò Bɛtlɛ̀hɛmù, ò mbòwà yà ama kiŋgɛ̀ Dàhwitì, ò Jùdeyà. Mɔ̀ à mà ɛ̀ndɛ aŋga èhwanja à mà uhwɛlɛlɛ ndi ò lìhwende la ama kiŋgɛ̀ Dàhwitì.

⁵À mà ɛ̀ndɛ aŋga nà ehwàndà ya eni Màlìyɛ̀ ò lì tìlìrzɛ mìinà. Màlìyɛ̀ ema à ma rzììrzɛ̀.

⁶Nà òmà hwa mà hwɛ ò Bɛtlɛ̀hɛmù, mòrziyò mò lìyalì mò mà mò lɛ̀mbɛ.

⁷Màlìyɛ̀ rzìi a ŋya è ŋmanà wà mùnyanà. Mɔ̀ ndì à ma mò lìhvòhwa ewònì. À mà mò lìŋgɛ̀lɛ̀ ndi nà hwèhvàhve hwe mààtù. Rzìi à mò nàŋgɛlɛ ò èwòki ema hwèembè hwe mà leeyà. À mà gbeyà ndi nanù èhwanja, ò rzi hwɛ èhvòlò ò ndawò yà hwàyɛ̀ni.

⁸O mà hwɛ hwà-ɔ̀ŋgèlì hwa mbòlì wòŋgò wu, ò èŋge èrzòòkà ema imbòlì i ma lèeyà, ema hwà mà ɔŋgeya lìhwèmbà la awu la mbòlì.

⁹Lìwòkìmɛnɛ, è aŋgèlì yà ama Rzàŋgò è hwa wurzeyà, rzìi ŋmɛ̀ɛ̀nɛ̀nì mò ama Rzàŋgò mo hwa lìŋgà. Hwa mà tumeya nà mòkambiya.

¹⁰È aŋgèlì rzìi e hwa òhweyà nanù ema, “È rza òka wɔ̀ŋgɔ̀, nà è jànelì ndi Ŋmɛ̀ndì mò Gbamù ema mò jàneyà hwatò hwa arzɛ mɔ̀nyɛ̀ŋgì mò ndɛnɛ̀.

¹¹È hwiyè nanù ema yàwònò è Mòrzùŋgèlì wà ànyu, à ŋyààhwì ò mbòwà yà ama kiŋgɛ̀ Dàhwitì. Mɔ̀ ndi à Ɔ̀kirzɛ̀hwɛ̀yi nà Lohwɛ̀. Mɔ̀ ndì à hwèlì e Rzàŋgò.

¹²È embànèlì e hwèlì ndi è Ŋmanà ema e ùŋma à lìŋgɛ̀lɛ̀hwɛ̀yì nà hwèhvàhve hwe mààtù. À ò nàŋgɛlɛhwɛ ò èwòki ema hwèembe hwe lèeyà.”

¹³O wòtɛmɛ̀tɛmɛ̀, ò mà uhweyà mòndèŋge mò ndɛnɛ̀, mò aŋgèlì ò ŋmanyu ema mò ma wurza lì ùŋma èŋge aŋgèlì, rzìi hwa wòteya ò lì eka Lohwɛ̀ nanù ema,

¹⁴“Èluhwe e hwɛ nà Lohwɛ̀ lì Karzamì, ndèŋgàna ɛ̀yɔ̀lɛ̀ hvɛ e hwɛ nà hwatò ema mɔ̀ à ŋgbelì mòrzìmà ò rze!”

¹⁵O mburzà nanù rzìi, i aŋgèlì ì tìmba ò ŋmanyu yà Lohwà. Àŋga ndi hwà-ɔ̀ŋgèlì hwa mɛ̀lɛ̀ŋgù hwa òhwanɛ̀lɛ̀ mɔ̀kɔ nà ɔ̀nɛ̀yi nanù ema, “Inyɛ̀ je ɛ̀ndɛ ò Bɛtlɛ̀hɛmù, ò lì ɛnɛ̀ enè eyà ema e gbèyɛ̀nɛ, ema Lohwɛ̀ lì Karzamì a jò hwìlɛ̀yi.”

¹⁶Hwa mà ɛ̀ndɛ kàrzì-kàrzì, rzìi hwa lùwa èki ema Màlìyɛ̀ nà Jòrzɛ̀hvù hwa mà hwɛ. Rzìi hwa ɛnɛ è ŋmanà à ma nàŋgɛlɛhwɛ ò èwòki ema hwèembe hwe mà lèeyà.

¹⁷Hwa mà ɛ̀nɛ nanù rzìi, hwa wòteya lì òhwà èki ya arzɛ, mamɛ è aŋgèlì e mà hwa òhweyà lì hvòmɛ̀nɛ̀ ònò ŋmanà.

¹⁸Hwatò hwa arzɛ ema hwà mà hwèya nanù, hwa mà tàmà ò lì hweyà mamɛ hwà-ɔ̀ŋgèlì hwa mɛ̀lɛ̀ŋgù hwa mà hwa òhweyà.

¹⁹Ndi Màlìyɛ̀ à mà ùta hwenè hweyà hwe àrzɛ ò ŋmèma mò eni, rzìi a à hwe lùteyà.

²⁰Àŋga ndi hwaŋga hwà-ɔ̀ŋgèlì hwa mɛ̀lɛ̀ŋgù, hwa mà tìmbe rzìi hwa à kàrzɛ Lohwɛ̀ nà lì mò eka, èhwanja hweyà hwe àrzɛ ema hwa mà hweye rzìi hwa hwe ɛnɛ̀nɛ̀ hvɛ nà mììrzɔ̀ ma awu, nà òmà hwa mà òhwahwɛlɛ.

²¹Hwèyu wàmbì hwe ma ùke ema hwa mà hwɛnɛ lì endà è ŋmanà, hwa mà mò kpɛ̀ɛ ndi lìinà Yerzù. Linì lìnà lɔ̀ ndi è aŋgèlì e mà mò kpɛɛ ndèŋgàna nyàŋgɛ à e mò lìta.

²²Nàŋgɛ ema è hvònda ya ama Jòrzɛ̀hvù nà Màlìyɛ̀ yà lì tanìrzɛ̀hwɛ̀ e mà ùke, nà òmà è mbenda yà ama Mòrzè e mà òhwe, hwa mà tanìrzɛ̀hwɛ̀. Àŋga ndi hwa mà ɛ̀ndɛnɛ è Ŋmanà ò Jèrurzalɛ̀mù, ò lì mò ŋgbà Lohwɛ̀.

²³Hwa mà ɛ̀ndɛ aŋga nà òmà e tìlahwì, ò mbenda ya ama Lohwɛ̀ nanù ema, “Tɔ̀ ima ŋmanà wà mùnyanà ema a lìhvòhwi ewònì ya ama nyàŋgɛ hwa mò ŋgba ndi ò maà ma ama Lohwɛ̀.”

²⁴Wɔ̀ hwa mà ɛ̀ndɛ hvɛ ò lì ŋgba làhwèyà, nà ò lì òndìrzɛ̀ nà òmà è mbenda yà ama Lohwɛ̀ e òhwì nanù ema, “Mààhvà mà hweyòhve, tɔ̀ mènani me mbèŋgà mehwàkɛ.”

²⁵O èŋge hvònda, ò mà hwɛ mùnyanà ò Jèrurzalɛ̀mù, à ma hwɛ̀lɛ̀hwɛ̀ Rzimìyɔ̀nì. Ò nò mùnyanà à mà tɛ̀mɛ̀ ehve-ehve, nà lì òkà Lohwɛ̀ wɔ̀ŋgɔ̀. À mà ambɛlɛlɛ è hvònda ema Lohwɛ̀ à mà hwɛnɛ lì òŋgìrzɛ̀ hwatò hwa Irzàyɛ̀lì, Èlìŋgɛ̀ yà Wòtani e mà hwɛ nà mɔ̀.

²⁶Èlìŋgɛ̀ yà Wòtani e mà mò uŋmɛ̀lɛ̀ ema a rza ŋwa, natɛ̀ɛ a ɛnɛ̀ e mɔ̀ ema Lohwɛ̀ à Ɔ̀kirzɛ̀yì.

²⁷Èlìŋgɛ̀ yà Wòtani e ma kɔ̀mɛ̀lɛ̀ Rzimìyɔ̀nì rzìi a ɛ̀ndɛ ò Ndawò yà Lohwà. O lìŋgi lìrzakò mɛnɛ, ndi Jòrzɛ̀hvù nà Màlìyɛ̀, hwa mà kpeyaneya è ŋmanà Yerzù, nà òmà è mbenda e mà àrze.

²⁸Rzimìyɔ̀nì rzìi a wòwa è Ŋmanà a mò rzɛ̀hwɛ, rzìi a ekà Lohwɛ̀ nanù ema,

²⁹“Ìi Lohwɛ̀, emeyà ema imbà è Mògbèèlì wà aŋgɔ̀, na ɛ̀ndɛ̀ nàŋgɛ nà ɛ̀yɔ̀lɛ̀, nà òmà ò òndirzɛ̀ lìkàkɛ̀nɛ̀ lì aŋgɔ̀.

³⁰Èhwanja mììrzɔ̀ ma amì ma mà ɛnɛ è mòòŋgìrzèlì.

³¹Ema ò rzekelì nanù ema hwatò hwa arzɛ hwa ɛnɛ̀.

³²Ŋmàye mò eni mò ò gbeyà hwaŋga hwatò ema hwa rza enje wònyà Yudà hwa ò hwiyà, ndèŋgàna a ò jànà èluhwe ò hwatò hwa aŋgɔ̀ hwa Irzàyɛ̀lì.”

³³Jòrzɛ̀hvù nà Màlìyɛ̀ hwa mà tàmeya mamɛ ema e ma òhwàhwàa lì hvòmɛ̀nɛ̀ è ŋmanà.

³⁴Rzimìyɔ̀nì rzìi, a hwa nàmìrzɛ̀, a òhweyà, Màlìyɛ̀ è nyàŋgò yà e Ŋmanà nanù ema, “Ɔ̀ŋgɔ tɛ! Ò nò Ŋmanà e ɛnɛ nanù à òmahwi ndi nà Lohwɛ̀. À ò jàneya lòŋgò la hwatò hwèkàyìrzèlì, lòŋgò hvɛ hwèyòŋgìrzèlì, ò èkòmè ya Irzàyɛ̀lì. Ò nò Ŋmanà a ò hwɛ ndi nàa ɛ̀mɛ̀nɛ̀nì ya ama Lohwɛ̀ ema rzayì-rzayì ja hwatò hwa ò mò teŋgɛ̀nɛ̀.

³⁵O èŋge hvònda ndi hwègbèèlì hwe awu hwe uŋmɛ̀lɛ̀ màlùtèyà ma mèèmà me awu. Àŋga ndi è ndùtù e ò ùŋma ŋmèma mò aŋgɔ̀ nàa rzɔ̀lɔ̀.”

³⁶O mà hwɛ hvɛ mòòhwèlì wà èlìŋgɛ̀ wà mòlanà. Lìinà la eni lì mà hwɛ ndi Anà, è ŋmanà wà mà Hvanùhwɛ̀lì. Hvanùhwɛ̀lì wà lìtumba la ama Arzà. Anà à mà ùna kɔ̀kɔ̀tìì. À mà lìya nà mòjòmɛ̀ wà èni meya lìrzàmba.

³⁷À mà lìya mòkurze natɛ̀ɛ à mà uka mènì wàmbì me meya nà menì. A rzi hwɛ̀mɛ̀ è Ndawò yà Lohwà, nà màkanɛ̀, nà lì lìya njàwò ò màkanɛ̀ nà lì gbèeyà Lohwɛ̀ ŋmerze nà wu.

³⁸Nà òmà Jòrzɛ̀hvù nà Màlìyɛ̀ hwa mà jànè è ŋmanà ò Ndawò yà Lohwà, Anà hvɛ à mà hwɛ aŋga. O wòtɛmɛ̀tɛmɛ̀, rzìi a ŋgbà Lohwɛ̀ jèka, nà lì òhweyà hwatò hwa arzɛ lì hvòmɛ̀nɛ̀ òŋgò ŋmanà. Hwàŋga hwatò ndi hwa mà hwɛ lì ambɛ̀lɛ̀ è hvònda ema Lohwɛ̀ a oŋgìrzɛ̀ è mbòwà yà Jèrurzalɛ̀mù.

³⁹È hvònda ema Jòrzɛ̀hvù nà Màlìyɛ̀ hwa mà kulɛ lì gbeyà hweyà hwe àrzɛ nà òmà è mbenda ya ama Lohwɛ̀ e mà òhwe, hwa mà tìmbà ò mbòwà yà awù yà Nàrzàrɛ̀tì, ò èkòmè yà Galìlì.

⁴⁰Ò èŋge hvònda, è ŋmanà hvɛ̀ à mà hwɛ lì òŋgà. À mà òŋgà nà màyìmbì. Lìhwiye la eni hvɛ lì mà hwɛ lì òŋgà. Ììlì ja ama Lohwɛ̀ ì mà hwɛ nà mɔ̀.

⁴¹Ŋma tɛ è rzàŋgò nà è nyàŋgò ya ama Yerzù hwa mà ɛ̀ndɛ ò Jèrurzalɛ̀mù, ò Ndema yà lì Akà Ɔnɛ̀yi.

⁴²È hvònda ema Yerzù a mà ùke lìyòmɛ̀ la meya nà mehwàkɛ, hwa mà ɛ̀ndɛ ò èŋge Ndema yà lì Akà Ɔnɛ̀yi nà òmà ɛ̀ɛ̀mɛ̀ ya awu e mà òhwe.

⁴³È hvònda è ndemà e mà kuwe, rzàŋgɛ nà nyàŋgɛ hwa mà hwɛ lì tìmba ò mbòwà yà àwu. Yerzù à mà lììya ò mburzà ò Jèrurzalɛ̀mù, e rzi hwɛ rzàŋgɛ nà nyàŋgɛ lì hwiyà.

⁴⁴Nà òmà hwa mà hwɛ lì ɛ̀ndɛ yɔ̀ndɔ̀ ya lì wòteya èèlèlè natɛ̀ɛ nà è ŋgòmbe, wɔ̀ hwà mà ɔ̀ŋgɛ̀lɛ̀ ema e Ŋmanà à mà hwɛ ò tenì ya mòŋgò mòndèŋge ema mò ma hwɛ lì tìmba. Rzìi hwa wòteya ò lì mò àrza. Àŋga ndi hwa mà wòteyà lì mò ijòlɛ̀lɛ̀ ò màtumba nà hwatò ema hwa mà ahwiyanɛ.

⁴⁵Nà òmà hwa rzi mò ɛnɛ̀, rzìi hwa tìmba ò Jèrurzalɛ̀mù ò lì mò àrza.

⁴⁶O mèènyà meyawò hwa mà mò ùŋma ò Ndawò yà Lohwà. À mà lìya nà hwà-òkòlèlì, rzìi a hwa òkànèyà nà lì hwa ijòwà mììjòwelì.

⁴⁷Hwa arzɛ ema hwà mà hwèya hweyà ema Yerzù a mà òhwe, hwa mà tàmeya lìhwiyè nà hwè-alàhwèlì hwe eni.

⁴⁸Nà òmà rzàŋgɛ nà nyàŋgɛ hwa mà mò ɛ̀nɛ hwa mà jeja. Nyàŋgɛ rzìi a mò ijòwa nanù ema, “Ìi Ŋmanà, mamɛ ndeŋgàtɛ ò jò gbeyànì nanù e? Ɔ̀ŋgɔ tɛ! Rzɔ̀ŋgɛ nà ìmba jòò àrzi ije-ije jɔ̀ ɔtɔ̀wù.”

⁴⁹Yerzù rzìi à hwa alàhwɛ̀ nanù ema, “Mamɛ e nò àrzana e? È rza hwi ema nà hwɛnì ndi lì hwɛ ò ndawò ya ama Rzàŋgò wà ami e?”

⁵⁰Ndi hwa rzi hvɔ̀ŋgɛ̀ mamɛ a mà hwa òhweyà.

⁵¹Aŋgà ndi Yerzù a ɛ̀ndɛ nà rzàŋgɛ nà nyàŋgɛ, rzìi hwa tìmba ò Nàrzàrɛ̀tì. À mà hwa hweyàna. Nyàŋgɛ à mà ùta hwenè hweyà hwe àrzɛ ò ŋmèma mò eni.

⁵²Nà òmà Yerzù a mà hwɛ lì òŋgà, à mà òŋgàna lìhwiyè nà ò hwèhwɛ̀ɛ̀lì. Jèka ja ama Lohwɛ̀ nà hwatò ì mà hwɛ nà mɔ̀.