Read Mokpwe Lukàrzɛ̀ 20 Bible Online

Lukàrzɛ̀ 20 - Mokpwe bible

Lukàrzɛ̀ 20

¹Wùnya wɔ̀kɔ, Yerzù a mà hwɛ lì òkòlɛ̀ hwatò ò Ndawò yà Lohwà na lì òhwa Ŋmɛ̀ndì mò Gbamù, Ipìlìrzì ndɛnɛ, nà hwà-òkòlèlì hwa mbenda, nà hwàmbaki hwa mbòwa wɔ̀ hvɛ hwa mà mò jèeyà.

²Rzìi hwa mò ijòwa nanù ema, “O jò òhweyà ima ŋginyà ò òhvi ò lì gbeyà hwenè hweyà hwe àrzɛ e? Njɛnɛ à ò ŋgbèlì è wònjà ò lì hwe gbeyà e?”

³Yerzù à mà hwa timbirzɛlɛlɛ nanù ema, “Ìmba hvɛ nà è ijòwa menè mìijòwelì. È nò òhweyà,

⁴òne è ŋginyà yà ama Yòwanìrzɛ̀ e mà uhwɛlɛlɛ ema à mà gbeyàne lì lùhwìrzɛ̀ e? È ma uhwɛlɛlɛ ndi ò ma Lohwɛ̀ ŋgà ò hwatò hwa hwènàmà e?”

⁵Hwàŋga hwatò rzìi hwa wòteya lì àwòhwànɛ̀lɛ̀ mɔ̀kɔ nà ɔ̀nɛ̀yi nanù ema, “Jò òhwì tɛ nanù ema, ‘O ma Lohwɛ̀,’ nanù òma mɔ̀ hvɛ à mà jò ijòwa nanù ema, ‘Mamɛ ndeŋgàtɛ è rzi lòkɛ̀ Yòwanìrzɛ̀ e?’

⁶Jò òhwi tɛ nanù ema, ‘O hwatò hwa hwènàmà,’ ène ŋgìndì ya àrzɛ è jò àŋgbà mànyayi. Èhwanja hwa hwi nanù ema Yòwanìrzɛ̀ à mà hwɛ ndi mòòhwèlì wà èlìŋgɛ̀”

⁷Hwa mà mò alàhwɛ̀ rzɔ nanù ema, “Ì rza hwi èki ema è ŋginyà yà èni e ma uhweyà.”

⁸Yerzù rzìi a hwa òhweyà nanù ema, “Tɔ̀ ìmba hvɛ nà rza tanɛ̀yi lì è òhweyà òne è ŋginyà yà ami e uwɛ̀lɛ̀lɛ̀yi.”

⁹Yerzù rzìi a kpɛ̀ɛya hwatò mònò ŋmàna nanù ema, “Munyanà mɔ̀kɔ à ma òhva hvàya yà hwehvùma hwe lì nyukana hwènyɔ̀ɔ̀nì, à mà ŋgba hwatò èŋge hvàya lì è gbeyà aŋga nanù hwa kahwa e mbòtà. À mà ɛ̀ndɛ yɔ̀ndɔ̀ ema e ma mò kùwàna hvòkà hvònda.

¹⁰È hvònda yà lì rzàŋgà è mbòtà e mà ùke, rzìi a òma mògbèèlì wà èni mɔ̀kɔ ò ma hwaŋga hwatò ema a mà ake èŋge wàŋgà, ema hwa mò òmeya lòŋgò la eni la mbòtà. Ndi hwaŋga hwàgbèèlì hwa mà mò ànana, rzìi hwa mò tìmbirzɛ màa matò.

¹¹Rzìi à òma òhvɛhvɛ mògbèèlì, hwa mà mò anana mɔ̀ hvɛ, hwa mò rzambòlɛ̀, hwa mò tìmbirzɛ màa matò.

¹²A mà tìmba lì òmà hvɛ è mògbèèlì ema e ma ùkirzɛ̀ hwàyàwò. Mɔ̀ hvɛ hwa mò ànànà. Hwa mò hwènìrzɛ̀, rzìi hwa mò hvìmba ò èwòkà.

¹³È mòhwɛnɛ wà wàŋgà à mà lùtèyà hvòò rzìi a òhwa nanù ema, ‘Mamɛ na tànɛyi lì gbeyà nàŋgɛ e? Nà hwɛnì ndi lì òmà è ŋmanà wà amì wà mùnyanà ema na lìŋgànì rzayì-rzayì. Yɛ̀kɛtɛ hwa tànɛyi lì mò ŋgbà èluhwe.’

¹⁴È hvònda ema hwaŋga hwàgbèèlì hwa mà ɛnɛ òŋgò ŋmanà, rzìi hwa òhwanɛ̀lɛ wɔ̀ hwìti nanù ema, ‘È wònja yɔ ène. Ì mò òŋwe òma ì ma lìyana erzàŋgò ya eni.’

¹⁵Hwa mà mò wurzana ò èŋge wàŋgà, rzìi hwa mò òŋwà.” Yerzù rzìi a hwa ijòwa nanù ema, “Mamɛ è mòhwɛnelì wa wàŋgà a tànɛyi lì gbeyàna hwaŋga hwàgbèèlì hwa wàŋgà e?

¹⁶Òŋgò mòtò à hwɛnì lì ɛ̀ndɛ̀ lì òŋwa hwaŋga hwàgbèèlì, rzìi a ŋgbà hwahvɛhvɛ hwagbèèlì èŋge wàŋgà.” È hvònda hwaŋga hwatò hwa mà hweye nanù, rzìi hwa òhwa nanù ema, “Ène tumba eyà ee rza tànɛyi lì gbèyɛnɛ.”

¹⁷Yerzù à ma hwa ɔ̀ŋgɔ lòŋgòlòŋgò, rzìi a hwa ijòwa nanù ema, “Nɛ inyɔ e rzɔ̀ŋgìtɛ̀nɛ̀, eyà ya Lohwà na òma e tìlahwì nanù ema, ‘Lìŋyayì ema hwà-òŋgèlì hwa mà ndinde, lɔ ndi lì ma tìmbɛ̀ɛ lìŋyàyi la wòlìtò.’

¹⁸Tɔ̀ ima mɔ̀ ema à undi ò ŋmanyu yà lìnì lìŋyàyi, à kùwà lì hwɛndeyà. Tɔ̀ njɛnɛ hvɛ ema lìnì lìŋyàyi lì undelì, lì hwɛnì lì mò nyɔ̀kɔ a tìmba rzɔ̀hwɛ.”

¹⁹Hwà-òkòlèlì hwà mbenda nà Ipìlìrzì ndɛnɛ̀ hwa mà àrza nɛ hwa mò lɛ̀mbeyà aŋga mɛnɛ, èhwanja hwa mà hwiya ema wɔ̀ ndi à kpɛɛlì mònò ŋmàna, ndi hwa mà òka è ŋgìndì wɔ̀ŋgɔ̀.

²⁰Hwà-òkòlèlì hwà mbenda nà Ìpìlìrzì ndɛnɛ̀ hwà mà hwɛ lì arza ŋmanò mò jɔ̀kɛ̀ ò lì ŋgbaŋgɛ Yerzù. Hwa mà hvɔ̀rzɔ̀ hwatò, hwa hwà tàŋgeyà, ema hwa mò nɔ̀ŋge ò mburzà. Hwàŋga hwatò hwà mà hwɛnɛ lì ahwàŋgɛ̀lɛ̀ nanù ema hwa mò nɔ̀ŋgɔ̀nɔ̀ ndi ŋmèma mɔ̀kɔ. Hwà mà gbeyà ndi nanù, aŋga nanù, òma hwà mà mò lɛ̀mbɛnɛ njɔ̀mì. Èŋge hvònda rzɔ òma hwà mà mò akɛlɛlɛ e Gɔhwina ya Ròmànì ema mɔ̀ ndi à kànèyà.

²¹Hwàŋga hwàrzɔ̀yèlì rzìi hwa òhweyà Yerzù nanù ema, “Ìi mòòkòlèlì ì hwi nanù ema màmɛ ya àrzɛ ema ò òhwa nà lì òkòlɛ̀ e hvòmɛ̀nɛ̀yi. Ndèŋgànɛ̀lɛ̀ ò wà ò rza uŋmɛ̀lɛ̀ ndandò. Ò wà ò òkòlɛ̀ hwatò hweyà hwe Lohwɛ̀ ema hwe hvòmɛ̀nɛ̀.

²²Ò jò òhweyà tɛ, e hwèlì gbamù nanù ema irzɔ ì taŋgeya Kàyìrzà e mòkànèlì hwa Ròmànì è njàŋge yà lìkànèyà e?”

²³Yerzù à mà ayèmbɛ meyànò me awu, rzìi a hwa òhweyà nanù ema,

²⁴“È nò uŋmɛ̀lɛ̀ kahvà ya ɛ̀ɛkɛ̀. Wòrzò nà lìinà la ama njɛnɛ lì hwèlì aŋga e?” Hwa mà mò alàhwɛ̀ nanù ema, “Wòrzò na lìinà là ama Kàyìrzà è mòkànèlì.”

²⁵Aŋgà ndi Yerzù à hwà òhweyà hvɛ nanù ema, “È ŋgbè Kàyìrzà mamɛ e hwèlì è ya eni. È ŋgbè hvɛ Lohwɛ̀ è yɔ ema e hwèlì e ya eni.”

²⁶È mbɔrzi ema Yerzù à mà òhwe, è ma gbeyà hwa rzi tanɛ̀ lì mò rzɔ̀ɔ njɔ̀mì ò màrzò ma hwatò. Hwa mà tàmeya hwè àlàhwèlì hwe eni, rzìi hwa kìnà.

²⁷Lòŋgò la Rzadurzi hwa mà jà òma Yerzù. Ì Rzadurzi ì lòkɛ̀ nanù ema ò rzà ènje Hwèhvùmùwèlì.

²⁸Hwà mà mò ijòwa nanù ema, “Ìi Mòòkòlèlì, è mbenda yà ama Mòrzè e òhwa nanù ema, ‘Munyanà a ŋwelì tɛ rzìi a lìya mòkurze, e rzì hwɛ ema hwa nyayi hwanà, ŋmanyàŋgò wà eni wa luuŋgà lɔ̀kɔ̀ a àŋgàmɛ̀nɛ̀yi lì mò rzàŋgòwa, ò lì ŋyayeyà ŋmanyàŋgò wà èni ema à ma tòmba kpelì hwanà.’

²⁹O mà hwɛ lìtumba lɔ̀kɔ ema lì ma òhva hwanà hwa wunyanà lìrzàmba. È wà wòrzò à mà hwaà mòlanà, rzìi a ŋwa e rzì hwɛ lì nyayi tɔ̀ ŋmanà.

³⁰Ènɔ̀ŋgɔ̀nì rzìi e mò hwaà, mɔ̀ hvɛ rzìi a ŋwa e rzi hwɛ lì nyayi ŋmanà.

³¹È mɔ̀ ema à ma ùkirzɛ̀ Hwàyàwò mɔ̀ hvɛ rzìi a mò hwaà. Mɔ̀ hvɛ rzìi a ŋwa. Nànù mɛnɛ ndi e mà gbèyɛnɛ natɛ̀ɛ nà è mɔ̀ ema à ma ùkirzɛ̀ lìrzàmba. Mòŋgò mòkurze mò rzi ŋyayeyà tɔ̀ mɔ̀kɔ wà àwu ŋmanà.

³²O lìrzukù mòŋgò mòkurze mɔ̀ hvɛ rzìi mò ŋwa.

³³O Hwèhvùmùwèlì òŋgò mòlanà à ò hwɛ ndi è wà mà njɛnɛ e? Nà òma lìrzàmba la àrzɛ lì mà mò hwaà e?”

³⁴Yerzù à mà hwa alàhwɛ̀ nanù ema, “Hwatò hwa ène nyɔ̀ŋgɔ̀nì hwa hwàà, ndèŋgànɛ̀lɛ̀ hwa aŋgbàànɛ hvɛ ò màhwa.

³⁵Ndi hwaŋga hwatò ema hwa ò tànɛyi lì hwɛ ò hwe hvùmùwèlì, na ò lì kpèeyà ò lòŋgɛ lì hvènya hwa rza ò hwaà.

³⁶Èhwànja hwa ò hwɛ ndi nàa i aŋgèlì, ndèŋgànà hwa rza ò ŋwa hvɛ. Hwa hwèlì ndi hwàanà hwa ama Lohwɛ̀, èhwanja hwà mà hvùmùwà ò kpelì.

³⁷Tɔ̀ Mòrzè mɔ̀ hvɛ à mà uŋmɛ̀lɛ̀ nanù ema è wɔ̀ ema hwa mà ŋwɛ̀ɛ̀, hwa hvùmùwà. Èki ema Mòrzè à mà tìle ò Kààtì yà Lohwà ema ŋmanà èèyè à mà òŋwa mùnyà, à mà hwɛlɛ è Rzàŋgò nanù ema, Lòohwà là ama Abràhamù, Lòohwà là ama Irzàkì nà Lòohwà là ama Jèkɔ̀bù.

³⁸Lohwɛ̀ à rza ènje Lohwà là è wɔ̀ hwa ŋwelì? À hwèlì ndi Lohwà là è wɔ̀ hwa hwèlì lòŋgɛ. Ène ŋgàna è uŋmɛ̀lɛ̀ ndi nanù ema, nàa Lohwɛ̀, hwa arzɛ hwa hwèlì lòŋgɛ.”

³⁹Lòŋgò là hwà-òkòlèlì hwa è mbenda, hwa mà tìmbirzɛlɛlɛ nanù ema, “Mòòkòlèlì, mamɛ ema òhwi e hvòmɛ̀nɛ̀.”

⁴⁰Tɔ̀ mòtò à rzi tanɛ̀ lì mò ijòwà hvɛ mìijòwelì.

⁴¹Yerzù rzìi a hwa ijòwa nanù ema, “Nɛ e tànɛyi lì òhwahwa ema è Mɔ̀ ema à Ɔ̀kirzɛ̀hwɛ̀yi à uwɛ̀lɛ̀lɛ̀yi ndi ò mòtende mò ma kiŋgɛ̀ Dàhwitì e?

⁴²Rzeke Kiŋgɛ Dàhwitì, ŋmitɛ-ŋmitɛ, à òhwi ò tenì ya e kaàtì yà Mɛ̀rzɔ̀kɔ̀ nanù ema, ‘Rzàŋgò Lohwɛ̀ a òhwèlì Rzàŋgò wa ami nanù ema, Lìya ò èhvàrzù ya ami yà lìya là mòmɛ̀,

⁴³natɛ̀ɛ nà lìrzakò ema nà ò gbeyà ema ò làalè hwàkɔ̀yèlì hwa aŋgɔ̀ nà màtàŋgà mà aŋgɔ̀.’

⁴⁴Nà òma Kiŋgɛ Dàhwitì ŋmitɛ-ŋmitɛ à mà lòme lì mò hwɛlɛ Rzàŋgò, nɛ rzɔ è Mɔ̀ ema à Ɔ̀kirzɛ̀hwɛ̀yi a tànɛyi lì hwɛ e ŋmanà wà eni e?”

⁴⁵Nà òma hwatò hwa àrzɛ hwa mà mò òkànèyà, Yerzù rzìi a òhweyà hwà-òkòwèlì hwa eni nanù ema,

⁴⁶“È àŋgòhweyà hwà-òkòlèlì hwa mbenda. Hwa lìŋgàni lì anjàwòlɛ̀ nà meŋgòmbè me awu me wawi. Hwa lìŋgàna hvɛ lì kɔmɔ̀wɔ nà èluhwe, ò hwèlùwà. Hwa lìŋgàni hvɛ lì lìya ò hwèlìyelì hwe hwèluhwe ò hwèki hwe màkanɛ̀, nà hwèki hwe ndèma.

⁴⁷Hwanù hwatò hwa hvùmà èrzàŋgò ya mekurze. Hwa lìŋgàni hvɛ lì lukɛlɛ hwatò na màkanɛ̀ ema mà wawi. Iŋgi nyayi ja hwatò, hwa ò lùwà kɔ̀kìrzɛ̀ ndɛnɛ̀ nà Lohwɛ̀.”