Read Mokpwe Lukàrzɛ̀ 21 Bible Online

Lukàrzɛ̀ 21 - Mokpwe bible

Lukàrzɛ̀ 21

¹Yerzù à ma ɔ̀ŋgɔ rzìi a ɛnɛ nà òmà hwèwàŋgì hwe hwatò, hwa ika ìkahvà ja awu ò tenì yà ìwòŋgò ja màahweyà.

²À mà ɛ̀nɛ hvɛ, mòlìrza mò mòkurze mò mòlanà, ema mɔ̀ hvɛ mò ma ika kahvà ihwàkɛ.

³À mà hwa òhweyà nanù ema, “Nà è jɔ̀kɛ̀, ò nò mòlìrza mòlanà wa mòkurze, à ŋgbelì lì akà hwanɛ̀yi hwa àrzɛ.

⁴Wòlì ema hwanù hwatò hwa ikaa, wò hwèlì ndi wòlì ema wò hveti. Ndi mònò mòkurze mò mòlanà, ò mòlìrzà mò eni mò àrzɛ, à ŋgbelì mamɛ ya eni ya àrzɛ ema a òhvì ema à mà hwɛnɛ lì gbeyàna ò lì àwòŋgòwànɛ̀ mɔ̀ ŋmìti.”

⁵Lòŋgò la hwà-òkòwèlì hwa ama Yerzù, hwa mà hwɛ lì òhwà nà lì eka mòlòŋgà mò è Ndawò yà Lohwà na òma hwà mà e òŋgàne nà màŋyàyi ma gòòlù, ndeŋgàna hwà mà e rzeeya ndi na màahweyà ma awu ema hwa mà ŋgbe Lohwɛ̀. Yerzù rzìi a òhwa nanù ema,

⁶“O ò ja wùnyà ema màmɛ ya arzɛ̀ ema ya ɛnɛ̀ anù nàŋgɛ̀, ò rzà ò lìiya tɔ̀ lìŋyàyi tɔ̀ lɔ̀kɔ ò ŋmanyu yà lìnɛ̀yi. Marzɛ-marzɛ ma ò rzùùlɛ̀hwɛ ò rze yà mɔ̀nyɛ̀.”

⁷Hwa mà mò ijòwa nanù ema, “Ìi Mòòkòlèlì, ima hvònda hwenè hweyà hwe àrzɛ hwe ò gbèyɛ̀nɛ e? Mamɛ e ò hwɛ̀ɛ hwèmbànèlì hwe uŋmɛ̀lɛ̀ ema è hvònda e ma uka, ema hwenè hweyà hwe ò gbèyɛ̀nɛ e?”

⁸Yerzù rzìi a hwa alàhwɛ̀ nanù ema, “È aŋgòwà, hwa rzì èmirzɛ, èhwanja rzayì-rzayì ja hwatò hwa ò jà lì gbeyàna lìinà la amì lì òhwà ema, ìmba ndi nà hwèlì è Mɔ̀ ema à Ɔ̀kirzɛ̀hwɛ̀yi. Wɔ̀ hwa òhwa ema lìrzukù lì ma jà. Ndi e rzì hwa òŋgama.

⁹È wòtelì tɛ lì hweyà ì njùma nà mèhvùŋgu, è rzì òka wɔ̀ŋgɔ̀, hwenè hweyà hwe hwɛnì lì lòma lì gbèyɛ̀nɛ, ndi hwe rza uŋmɛ̀lɛ̀ ema lìrzukù la rze lì ma uka.”

¹⁰Yerzù à mà hwatɛ hvɛ ò lì hwa òhweyà nanù ema, “Hwèkòmè, nà hwèkòmè hwe ò àna njùma. Màkànèyà nà màkànèyà mɔ̀ hvɛ mò ò ateŋgɛ̀nɛ̀.

¹¹O ò hwɛ mònyìŋgìrzɛ̀nɛ̀ mò ndɛnɛ̀ è rze ya mɔ̀nyɛ̀ ya àrzɛ. Njàwò ndɛnɛ̀, nà nyàmbɛ ja wòhwe rzayì-rzayì, èki tɛ. Hweyà ema hwe òkìrzɛ̀nɛ wɔ̀ŋgɔ̀ nà hwèmbànèlì hwe ndɛnɛ̀ ema hwe uhweyà ò ŋmanyu.

¹²Ndèŋgàna hwenè hweyà hwe àrzɛ hwe e hwiya lì gbèyɛnɛ, hwa è ŋgbaŋgɛ̀, rzìi hwa è takìrzɛ̀. Hwa è ɛ̀ndɛ̀nɛ̀ ò ndawò ja màkanɛ̀, hwa e kàyìrzɛ rzìi hwa e aŋgɛ̀ ò hwèwòwà. Hwa è jàna ò màrzò ma ìkiŋgɛ̀ nà hwàkànèlì ò nyòla ami.

¹³Ène hvònda rzɔ ɔ̀ndi e hwɛnɛ ehvòlò ò lì òhwà hweyà hwe arzɛ e rzɔ̀ŋgìtɛ̀nɛ̀yi lì nò hvòmɛ̀nɛ̀.

¹⁴È ètìrzɛ̀ mèèmà me anyu ema, è rza òka lì ahvahvɛ ò lì arzùŋgɛ̀ inyɔ hwìti.

¹⁵Nà è ŋgbà mamɛ ema ya òhwa, na mahwiye ò lì hwe òhwa, ema tɔ̀ hwakɔ̀èlì hwa anyu hwa rza ò tànɛyi lì è ɛkɛ̀, nà lì rzɔ̀rzɔ mamɛ ema e ò hwɛ̀ɛ.

¹⁶Irzàŋgo, nà inyàŋgò ja anyu, wònyanyàŋgò hwa anyu, nà hwèyòrzà hwe anyu, hwa hwɛnì lì è nìna, nà lì è òŋwa lòŋgò la anyu.

¹⁷Inyɔ hwa àrzɛ e ò rzìŋgɛ̀hwɛ ò nyòla lìinà la amì.

¹⁸È rza ò wɔ̀lɛnɛ tɔ̀ rzòhwe hvɔ̀kɔ ò mèyòhvò me anyu.

¹⁹È kakè mèèmà me anyu aŋga nanù e arzùŋgɛ̀ inyɔ hwìti.”

²⁰Yerzù rzìi a òhweyà Hwà-òkòwèlì hwa eni nanù ema, “È hvònda ema e ò ɛnɛ ìrzònja ì tòŋgi è mbòwà yà Jèrurzalɛ̀mù, aŋga ndi e hwiya nanù ema mòkònà mò ma kòmbɛ̀nɛ̀.

²¹È hwa Jùdeyà, hwa ò hwaŋga lì ɛndɛ lì utàmà ò hvàko. È wɔ̀ ema hwa hwèlì ò èŋge mbòwà wɔ̀ hvɛ hwa àŋgàmɛ̀nɛ̀yi lì hwaŋga ò lì anjiya ò èŋge mbòwà. Hwàŋga hvɛ ema hwa hwèlì ò hwehvɛhvɛ hwèkòmè, hwa rzì kèka lì jà ò lì kpèeyà ò e mbòwà ya Jèrurzalɛ̀mù.

²²Meenya me hwekɔkirzelì me ene. O ene hvònda ndi hweyà hwe arzɛ ema hwe ma tìlahwa hwe ò gbèyɛ̀nɛ.

²³È ò hwɛ wòhwe ò mèŋge mèenyà nà hwaŋga hwalanà ema hwa lìti meemì. Nà ì nyàŋgò ema ì nyɔ̀ŋgìrzɛ̀ ŋmɛ̀ɛŋgɛ me hwanà. O ò hwɛ hvɛ wòhwe nà mètàkà rzayì-rzayì ò rze lì hvòmɛ̀nɛ̀ hwanù hwatò.

²⁴Hwàŋga hwatò hwa ŋwa ò njùma. Hwa lɛ̀mbɛ lòŋgò là hwaŋga hwatò nàa hwàkutu, rzìi hwa hwà ɛ̀ndɛ̀nɛ̀ ò hwehvɛhvɛ hwèkòmè. Hwàŋga hwatò ema hwa rza enje wònyà Yudà hwa ò nyɔ̀kɔ̀ Jèrurzalɛ̀mù nà matàŋgà mà awu, natɛ̀ɛ è hvònda ema Lohwɛ̀ à mà ika, è uka ò lìrzùkù.”

²⁵“O ò hwɛ hwèmɛ̀nɛ̀nì ò ìgbe, ŋmɛ̀ɛlì nà ìrzòmbe. O ò hwɛ lìtàke lì ndɛnɛ̀ nà hwètamirzelì, ò hwèkòmè hwe àrzɛ hwe ène rze. Hwèhvùŋgùwèlì hwe hwèmùnɛ̀ nà hweèhwe hwe ŋmanjà hwe ò hwa òkirzɛ wɔ̀ŋgɔ̀.

²⁶Hwatò hwa ò ɔ̀tɔ̀ na wɔ̀ŋgɔ̀ nà òmà hwa ambɛ̀lɛ̀lɛ mamɛ e ò gbèyɛ̀nɛ e rze ya àrzɛ. Èhwanja ì ŋginyà ja ŋmanyu jò nyiŋgà ò hwèki hwe awu.

²⁷Aŋgà ndi hwa ɛnɛ e Ŋmanà wà è mòtò wà Hwènàmà na òma a jà ò tenì yà lìmbàkì na ŋginyà nà èluhwe ndɛnɛ̀.

²⁸È hvònda ema hwenè hweyà hwe àrzɛ hwe wòteyà lì gbèyɛnɛ, e ò tɛ̀mɛ̀ ndi ò lì ɔŋgɔ̀ ò ŋmanyu. Èhwanja e hvònda ya lì kɔ̀tɔ̀wɔ̀ la anyu lì ma kòmbɛ̀nɛ̀.”

²⁹Yerzù rzìi a hwa kpɛ̀ɛyà mònò ŋmàna nanù ema, “È injàneyà ekumbɛ̀ nà manɛyi màyi mà arzɛ.

³⁰È ɛni tɛ yɔ̀ ndì e kɛkɛ̀ hwèyalì, e hwiyè ema màyelì ma mà kòmbɛ̀nɛ̀.

³¹Ŋgana hvɔ̀kɔ, e ɛni hvɛ tɛ hwèŋgè hweyà hwe àrzɛ hwe gbèyɛ̀nɛ̀, e hwiyè ndi nanù ema, Lìkànèyà là ama Lohwɛ̀ lì ma kòmbɛ̀nɛ̀.

³²Nà è òhweyà na è jɔ̀kɛ̀ nanù ema, ène nyɔ̀ŋgɔ̀nì, è rza aka ema hwenè hweyà hwe àrzɛ hwe rza gbèyɛ̀nɛ.

³³È ŋmanyu yà lohwà nà è rze ya mɔ̀nyɛ̀ hwe ò jà lì akà, ndi jòòhwì ja amì ì hwɛ natɛ̀ɛ na ò gbìndèyà.

³⁴“È aŋgòwè nanù ema è rza hvàŋga e hvònda ya anyu rzayi-rzayi ò lì làa la mòlèlì na ò lì nyɔ la mimba. È rzì àkàyìrzɛ̀ hvɛ nà lìnì lòŋgɛ la nàŋgɛ. È gbeyi tɛ nanù, wòŋgò wùnyà wò è ùŋmanɛlɛ nàa ŋgùndèli.

³⁵Wòŋgò wùnyà wò ò jèeya ndi hwatò hwa àrzɛ, hwa ène rzè jègba.

³⁶È aŋgòhweyà ì hvònda ja arzɛ. È kanɛ̀ ema e hwɛnɛ è ŋginyà ema è ò karzòlɛ̀ hwenè hweyà ema hwe gbeyɛ̀nɛ̀, aŋga nanù e tanɛ lì tɛmeyà ò wòrzò wò è Ŋmanà wà è Mòtò wà Hwènàmà.”

³⁷O hwèŋge hwèyu, Yerzù à ma hwɛ lì òkòlɛ̀ ò Ndawò yà Lohwà. Ŋgòmbe tɛ à mà àgba ò lì yɛlɛ̀lɛ̀ ò mòòlì mò Njàhwɛ̀.

³⁸Hwatò hwa mà hwɛ lì arzàŋgànɛ ekpaàrzɛ ò Ndawò yà Lohwà, ò lì mò òkànèyà.