Read Mokpwe Lukàrzɛ̀ 22 Bible Online

Lukàrzɛ̀ 22 - Mokpwe bible

Lukàrzɛ̀ 22

¹Èŋgè hvònda yà è ndèma yà ehvòòtò ema e rzi hwɛnɛ ehwindi e mà kòmbɛ̀nɛ̀. Èŋge ndèma è mà hwɛ̀lɛ̀hwɛ̀ ndi lì Akà Ɔnɛ̀yi.

²È Pìlìrzì ndɛnɛ nà hwà-òkòlèlì hwa mbenda, hwà mà òka hwatò wɔ̀ŋgɔ̀. Ndi hwa mà hwɛ lì àrza ŋmanò mò lì òŋwà Yerzù ò jùtuta.

³Mòkarzɛ̀ à mà kpèeyà mòòkòwèlì mɔ̀kɔ wà ama Yerzù ema à ma hwɛ̀lɛ̀hwɛ̀ Jùdàrzì. Lìnɛ̀yi lìna la eni hvɛ lì mà hwɛ ndi Ìrzìkalìyɔ̀tɛ̀. Jùdàrzì à ma hwɛ ndi mɔ̀kɔ wà lìyòmɛ̀ la hwà-òkòwèlì nà hwàhwàkɛ̀ hwa ama Yerzù.

⁴Jùdàrzì rzii a ɛ̀ndɛ lì ùŋmanɛlɛ Ipìlìrzì ndɛ̀nɛ, nà hwàkànèlì hwa è Ndawò yà Lohwà rzi a hwa òhweyà, nɛ mɔ̀ à tànɛyì lì hwa àhwìrzɛ̀lɛ̀lɛ̀ Yerzù.

⁵Hwa mà òka mɔ̀nyɛ̀ŋgì hwa àrzɛ hwà mà imanɛlɛ. Rzìi hwa òhweyà Jùdàrzì ema hwa mò taŋgeyà.

⁶Jùdàrzì à mà emeyà. Rzìi à wòteya lì àrza ŋmanò mò lì hwa àhwirzɛ̀lɛ̀lɛ̀ Yerzù, e rzì hwɛ hwatò lì hwiyà.

⁷Nàŋgɛ nà òmà wòŋgò wùnyà wò è Ndemà yà Èhvòòtò ema e rza hwɛ̀nɛ̀ èhwindi e mà ùke, ema iŋguma ja mɛ̀lɛ̀ŋgù ì mà hwɛnɛ lì òŋwàhwà ò hwèleèlì hwe lì Akà Ɔnɛ̀yi.

⁸Yerzù rzìi a òma Pètrò nà Yòwanìrzɛ̀, a hwa òhweyà nanù ema, “È ɛ̀ndɛ̀ e rzɛ̀ŋgɛ̀nɛ̀ hwèlèèlì hwe lì Akà Ɔnɛ̀yi.”

⁹Hwa mà mò ijòwa nanù ema, “One ò àrza nanù ema ì hwe rzɛ̀ŋgɛ̀nɛ̀ e?”

¹⁰Rzìi à hwa alàhwɛ̀ nanù ema, “È ɔŋgɔ̀ tɛ! Nà òmà e kpèeyà ò èŋge mbòwà, mòtò à è taneyà ema a hwànɛ ìtɛ̀ŋgɛ̀ ja malìhwa. È mò òŋgàme tɔ̀ ima ndawò ema a kpèeyà.

¹¹È òhweyà è mòhwɛnɛ wà ndawò nanù ema, ‘È mòòkòlèlì hwà àrzu à ma jò ijòwe, òne è tùu ya hwàyɛ̀ni è hwèlì, ema à leeyà hwèlèèlì hwe lì Akà Ɔnɛ̀yi nà hwà-òkòwèlì hwa eni e?’

¹²À è uŋmɛ̀lɛ̀ tùu ndɛnɛ̀ ema è ma màa lì rzeyàhwɛlɛ. Èŋge tùu è hwèlì ndi ò ŋmanyu yà è ndawò yà ndɛkì. È rzɛ̀ŋgɛ̀nɛ̀ hwèlèèlì hwe arzu aŋgà.”

¹³Pètrò nà Yòwanìrzɛ̀ hwa mà ɛ̀ndɛ rzì hwa ùŋmanɛlɛ hweyà hwe àrzɛ nà òmà Yerzù a mà hwa òhweyà, rzìi hwa rzɛ̀ŋgɛnɛ hwèŋge hwèlèèlì hwe è ndèma yà lì Akà Ɔnɛ̀yi aŋga.

¹⁴Èŋge hvònda yà è ndèma yà lì Akà Ɔnɛ̀yi e mà ùke, Yerzù nà lìyòmɛ̀ la eni la hwà-òkòwèlì nà hwàhwàkɛ̀ hwa mà lìya ò lì làa mòŋgò mòlelì.

¹⁵Yerzù rzìi a hwa òhweyà nanù ema, “Nà mà òhva nyìrzɛ̀ rzayì-rzayì, ò lì làa mònò mòlèlì mò lì Akà Ɔnɛ̀yi nà inyɔ ndèŋgàna nà e taka.

¹⁶Nà è jɔ̀kɛ̀ nà è òhweyà naŋgɛ ema nà rza mò làa hvɛ, natɛ̀ɛ na e hvònda ema hwe òndìrzɛ̀hwɛ̀ ò Lìkànèyà là ama Lohwɛ̀.”

¹⁷Yerzù rzìi a wòwa lìwòndè la hwènyɔ̀ɔ̀nì, a ŋgbà Lohwɛ̀ jekà rzìi a òhwa nanù ema, “È wòwè e nyɔ mɔ̀kɔ nà ɔ̀nɛ̀yi.

¹⁸Nà è òhweyà ema lì wòteya nàŋgɛ̀, nà rza nyɔ hwenè hwènyɔ̀ɔ̀nì hvɛ natɛ̀ɛ Lìkànèyà là ama Lohwɛ̀ lì jà.”

¹⁹Rzìi à wòwa èhvòòtò, a ŋgbà Lohwɛ̀ jekà, à è kàhwà. Rzìi à è ŋgba hwà-òkòwèlì hwa eni, a òhwa nanù ema, “È nyò ya amì ene ema, yè è ŋgbààhwì. È gbèyè nanù ò lì nò ɔ̀ŋgɛlɛ.”

²⁰È hvònda ema hwa mà kulɛ̀ ò lì làa, nyayi hvɔ̀kɔ mɛnɛ, à hwà ŋgbà lìwònde rzìi à òhwa nanù ema, “lìni lìwònde là mimba, lì hwèlì ndi yòòmbò è hvènya lì hvòmɛ̀nɛ̀ Lohwɛ̀ nà inyɔ, è hweyi yà màyija mà ami, ema mà hwɛnì lì è rzòweyà ò nyòla ya ànyu.

²¹Ndi è ɔ̀ŋgɔ tɛ è mɔ̀ ema à ò nò ahwìrzɛ̀ à hwèlì anù, à làa nà ìmba.

²²È Ŋmanà wà è Mòtò wà Hwènàmà à hwɛnì lì ŋwa nà òmà è mà tìlahwe, ndi èwòma nà òŋgò mòtò ema à mò àhwìrzɛ̀.”

²³Aŋgà ndi hwà-òkòwèlì hwa mà wòteyà lì àyijòwànɛ̀ mɔ̀kɔ nà ɔ̀nɛ̀yi, njɛnɛ wà awu à tànɛyi lì gbeyà ène nyàyi yà eyà.

²⁴Hwà-òkòwèlì rzii hwa wòteya èhvèyìŋgòwèlì wɔ̀ nà wɔ̀, ò lì àrza lì hwiya njɛnɛ wà àwu a ò hwɛ̀ɛ è mòtimbelì.

²⁵Yerzù a mà hwa òhweyà nanù ema, “Ì kiŋgɛ̀ ja ène rze, ì tumirzɛ̀ hwatò hwa awu mòkambiya. Hwàkànèlì hwa ahwɛlɛ wɔ̀ hwìti nanù ema, ‘Hwatò hwa gbamù.’

²⁶Ndi e rzà hwɛnì lì hwɛ nanù nà inyɔ. O ìtììtènì ja anyu, è mɔ̀ ema a tìmbà a hwɛ ndi nàa e mɔ̀ ema a utu. È mòtimbèlì hvɛ à hwɛnì ndi lì hwɛ nàa mògbèèlì.

²⁷O hwèlì tɛ hwatò hwàhwàkɛ̀, mɔ̀kɔ ema à lìyayi ò tehwèlì, nà ɔ̀nɛ̀yi ema à hwèlì lì mò gbèeyà, njɛnɛ à akayi ɔ̀nɛ̀yi e? Rzekɛ è mɔ̀ ema à lìyayi ò tehwèlì e? Ndi ìmba nà hwèlì anù nà inyɔ nàa mògbèèlì wà ànyu.

²⁸Inyɔ è nò àjùlɛ̀nɛ̀yi metàkà me ami me àrzɛ.

²⁹Nà òmà Tatɛ̀ wà amì a nò ŋgbelì è wònjà yà lìkànèyà, nanù ndi ìmba hvɛ na è ŋgbà.

³⁰Ène e gbeyà è hwɛnì lì làa nà lì nyɔ nà ìmba èki yɔ̀kɔ ò lìkànèyà la amì. È ò lìya hvɛ ò mbòkò ja màkànèyà ò lì kàyìrzɛ̀ lìyòmɛ̀ la matumba nà mahwàkɛ ma wònyà Irzàyɛ̀lì.

³¹“Rzìmɔ̀nì e, ìi Rzìmɔ̀nì e, òkànèyà tɛ! Mòkarzɛ̀ à lu wònjà ò lì e kèkirzɛ nà ò lì e kakòwa. À ikà e hwa gbamù nà è hwa wòhwe. Nà òmà mòtò a rzɛ̀ŋgbɛ ì mbàrzi ò lì ulɛ hweyarza.

³²Ndi nà ma ò Kanɛ̀lɛ̀lɛ̀ nanù ema lìlòkɛ̀ lì aŋgɔ̀ lì rzà kpa. È hvònda ema ò nò tìmbeyà hvɛ, ò ètirzɛ hvɛ wònyanyàŋgò hwa aŋgɔ̀.”

³³Pètrò à mà mò alàhwɛ̀ nanù ema, “Rzàŋgò nà wòŋgìrzɛ̀nɛ̀ ò lì òŋgama, tɔ̀ hwa ò ɛ̀ndɛnɛ ndi ò hwèwòwà, tɔ̀ hwa àrza ndi lì ò òŋwa.”

³⁴Yerzù rzìi à mò òhweyà nanù ema, “Pètrò nà ò òhweyà ema è mòme wà wuhwà à è tòŋgà wònò wùù, ò nò rzɔ̀rzɔ̀ ŋgèlì iyàwò.”

³⁵Yerzù à ma ijòwa hwà-òkòwèlì hwa eni nanù ema, “Nà òmà na mà è òme, ema è rzì lɛ̀mbɛ tɔ̀ ekpà ya wòlì, tɔ̀ lìkpà, tɔ̀ hwetambi, è mà tàkeya yòmà e?” Hwa mà mò alàhwɛ̀ nanù ema, “Tɔ̀ yòmà.”

³⁶Yerzù rzii a hwa òhweyà nanù ema, “Ndi nàŋgɛ nanù è mɔ̀ ema à òhvi ekpa ya eni ya wòlì, tɔ̀ lìkpa la eni, a lì òhve ò nyò. È mɔ̀ ema à rza òhvɛ̀ rzɔ̀lɔ̀, a àhwìrzɛ̀ mòŋgòmbè mò eni, a ànde rzɔ̀lɔ̀.

³⁷Nà è òhweyà nanù ema, è kaàtì yà Lohwà è òhwa nanù ema, ‘À mà wòwahwa ndi nàa ŋmìhwɛ̀.’ Nànù ndi e hwɛnì lì nò gbèyɛnɛ. Ndèŋgàna e hwɛnì lì òndìrzɛ̀hwɛ̀.”

³⁸Hwà-òkòwèlì hwa eni hwa mà mò alàhwɛ̀ nanù ema, “Rzàŋgò ɔ̀ŋgɔ tɛ, jò òhvì rzɔ̀lɔ̀ ihwàkɛ anù nà irzɔ.” Yerzù à mà hwa timbirzɛlɛlɛ nanù ema, “È hwɛ̀mɛ̀ nanù.”

³⁹Yerzù a mà ànjiye ò èŋge tùu nà hwà-òkòwèlì hwa eni, rzìi hwa ànjiya èŋge mbòwà, hwa àgba ò mòòlì mò Njàhwɛ̀, nàa ɛ̀ɛ̀mɛ̀ ya eni.

⁴⁰Nà òmà hwa mà ùke aŋga, rzìi a hwa òhweyà nanù ema, “È kanɛ̀ e rzì jà lì hwɛ ema è unda ò màkèkìrzɛ̀nɛ̀.”

⁴¹À mà hwa akakòwɛ eyà ya ŋgùrzù jà màtàŋgà, rzìi à rzùma màwɔ̀ŋgɔ̀ŋgɔ̀ mà eni ò rze, rzìi à wòteyà lì kanɛ̀ nanù ema,

⁴²“Ìi Tatɛ̀, ò lìŋgànì tɛ, ò nò ulɛ̀lɛ̀ mònò mòtàkà mò ŋginyà. Ndi rzèkɛtɛ ò hwèlìŋgànèlì hwe amì, ndi ò hwèlìŋgànèlì hwe aŋgɔ̀.”

⁴³Nà òmà Yerzù à mà hwɛ lì kanɛ̀, è aŋgèlì è mà uhweyà ò ŋmanyu yà Lohwà ò lì mò embɛ̀.

⁴⁴À mà kànɛ ije-ije, nà òmà à mà òhve, è ndùtù ò ŋmèma, etòkò ema è mà hwɛ lì mò wurzà, è mà tɔ̀ ndi nàa màtɔ̀ mà màyija ò mɔ̀nyɛ̀.

⁴⁵Nà òmà à mà kulɛ lì kànɛ̀, à mà tɛ̀mɛ̀ rzìi à tìmba ò lì ùŋma hwà-òkòwèlì hwa eni. À mà hwa ùŋma ndi ò ìjɔ, èhwanja, è ndùtù è mà hwa rzɔkɔ ò mèèmà.

⁴⁶À mà hwa ijòwa nanù ema, “Mamɛ ndeŋgàtɛ è lìmelì ndi ò ìjɔ e? È tɛ̀mɛ̀ ò ŋmanyu, e kanɛ̀, è rzì jà lì unda ò màkèkìrzɛ̀nɛ̀.”

⁴⁷Nà òmà Yerzù à mà hwɛ lì òhwà, ŋgìndì ndɛnɛ̀ è mà jà. È mòtò ema à mà hwa tìmba à mà hwɛ ndi Jùdàrzì, mɔ̀kɔ hwà lìyòmɛ̀ la hwà-òkòwèlì wà eni nà hwàhwàkɛ̀. Jùdàrzì à mà ɛ̀ndeya Yerzù, rzìi à mò arzàŋgànɛ̀lɛ̀.

⁴⁸Yerzù rzii à mò ijòwa nanù ema, “Jùdàrzì, nɛ ò wà ò tànɛyi lì àhwirzɛ̀ è Ŋmanà wà è Mòtò wà Hwènàmà nà lì arzàŋgànɛ̀lɛ̀ e?”

⁴⁹Nà òmà hwanɛ̀yi hwà-òkòwèlì ema hwa mà hwɛ nà Yerzù, hwa mà ɛ̀nɛ mamɛ è mà àrza lì gbèyɛnɛ, rzìi hwa mò ijòwa nanù ema, “Ìi Rzàŋgò ì tànɛyi jà àna na ì rzɔ̀lɔ̀ ja arzu e?”

⁵⁰Mòòkòwèlì mɔ̀kɔ rzìi à rzenjòwa lìtò là mòmɛ̀ là ama è mògbèèlì wà è Pìlìrzì è kàrzàmi.

⁵¹Yerzù à mà hwa òhweyà nanù ema, “È hwɛ̀mɛ̀ nanù!” Rzìi à tɔ̀tɔ̀ lìŋgi lìtò là ama òŋgò mòtò, à mò wɔ̀wìrzɛ̀.

⁵²Yerzù rzii à ijòwa iŋgi Ipìlìrzì ndɛnɛ̀ nà hwatimbèlì hwa merzenja hwa è Ndawò yà Lohwà, nà hwatimbèlì hwa mbòwà ema hwa mà jà lì mò ŋgbàŋgɛ̀ nanù ema, “Nà hwèlì ndi ŋmìhwɛ̀, ema è nò jàneyà ìrzɔ̀lɔ̀ nà metɔ̀nì ò lì nò ŋgbàŋgɛ̀ e?

⁵³Mamɛ ndeŋgàtɛ è rzi nò ŋgbàŋgɛ̀ ò Ndawò yà Lohwà e? Ì mà hwɛ ò Ndawò yà Lohwà wùnyà tɛ, ndi è rzi nò lɛ̀mbɛ̀, ndi lìrzàkò là anyu lì mà uka naŋgɛ. Jììtìtì ndi ì kànèyà naŋgɛ.”

⁵⁴Rzìi hwa mà ŋgbaŋgɛ Yerzù. Hwa mà mò tìmba rzìi hwa mò ɛ̀ndɛnɛ ò ndawò yà ama è Pìlìrzì è kàrzàmi. Pètrò hvɛ à mà hwɛ lì hwa òŋgama ò mburzà, eyà yà ehvòwa màtaŋga.

⁵⁵Hwa mà kòta mùùnya ò ìtììtènì jà èwòka, rzìi hwatò hwa mò à a tòŋgɛ, Pètrò mɔ̀ hvɛ à mà lìya aŋga.

⁵⁶Mògbèèlì mɔ̀kɔ wà ŋmanà ŋgɔ̀ndɔ̀, à mà ɛ̀nɛ Pètrò à lìyayi ò tòŋgòŋgò yà mòŋgò mùnya. À mà mò ɔ̀ŋgɔ kòò, rzìi a mò òhwàna nanù ema, “Ònò mòtò mɔ̀ hvɛ à mà hwɛ nà Yerzù.”

⁵⁷Pètrò à mà hvèyìŋgòwa, rzìi à òhwa nanù ema, “Ìi mòlanà, nà rza mò hwi à hwiyà.”

⁵⁸Ò rza ayikòlɛ̀nɛ̀, rzìi òhvɛhvɛ mòtò à ɛnɛ Pètrò. À mò òhwàna nanù ema, “Ò wà hvɛ ò hwèlì ndi mɔ̀kɔ wà awu.” Pètrò rzìi à alàhwɛ̀ nanù ema, “Jàyɛ̀ ŋmàyi rzeketɛ ìmba.”

⁵⁹Ò mburzà awà hvɔ̀kɔ, ò hvɛhvɛ mòtò à mà tìnɛlɛ nà ŋginyà, rzìi a òhwa nanù ema, “Nà rza tanɛ̀yi lì hwamɛ̀ nanù ema, ònò mòtò à rzi hwɛ nà Yerzù èhwanja mɔ̀ hvɛ à hwèlì ndi mòtò wà Galìlì.”

⁶⁰Pètrò à mà alàhwɛ̀ nanù ema, “Ŋmàyi kòkò nà rza hwi à hwiya mamɛ ema ò òhwa nanù.” Lìwòkìmɛnɛ rzìi è mòmɛ̀ wà wùhwà è tòŋgà.

⁶¹Ò lìŋgi lìrzàkò mɛnɛ Rzàŋgò rzìi à ayeŋgòwɛ̀ɛ, à ɔ̀ŋgɔ Pètrò. Pètrò rzìi à ɔ̀ŋgɛlɛ mamɛ Rzàŋgò à mà mò òhweyà nanù ema, “Ndèŋgàna è mòmɛ̀ wà wùhwà à è tòŋgà yàwònò ò nò rzɔ̀rzɔ̀ ŋgèlì iyàwò.”

⁶²Pètrò à mà ànjiya èŋge èwòkà rzìi a wumɛnɛ lùwa la ije-ije.

⁶³È wɔ̀ ema hwà mà hwɛ lì mò ɔ̀ŋgeyà hwa mà mò kikòwa nà lì mò ànana.

⁶⁴Hwa mà mò kaka mìirzɔ̀, rzìi hwa mò ijòwa nanù ema, “O jò òhweyà njɛnɛ à ò hvahvi e?”

⁶⁵Hwa mà mò rzɔ̀rzɛlɛ ì nyayi ja hweyòlì ja àrzɛ.

⁶⁶Nà òmà wùùnya wò mà yahwe, hwàmbaki hwa hwatò hwa Irzàyɛ̀lì, Ipìlìrzì ndɛnɛ̀, nà hwà-òkòlèlì wa mbenda hwa mà hwɛnɛ hwèlìyelì, rzìi hwa jànà Yerzù ò hwèkàyìrzèlì hwe ndɛnɛ̀.

⁶⁷Rzìi hwa ijòwa Yerzù nanù ema, “O jò òhweyà tɛ, ò wa ndi ò hwèlì è Mɔ̀ ema à Ɔ̀kirzɛ̀hwɛ̀yi e?” Yerzù rzìi a hwa alàhwɛ̀ nanù ema, “Nà è òhwèlì tɛ è rza nò lòkɛ̀.

⁶⁸Nà è ijòwi tɛ eyà è rza nò alàhwɛ̀.

⁶⁹Ndi è hvònda è mà ukà, ema è Ŋmanà wà è mòtò wà Hwènàma, à lìya ò lìya là mòmɛ̀ là ama Lohwɛ̀ là Ŋginyà.”

⁷⁰Rzìi hwa àrzɛ hwa mò ijòwa nanù ema, “Ò wà ndi ò hwèlì è Ŋmanà wà ama Lohwɛ̀ e?” À mà hwa alàhwɛ̀ nanù ema, “Inyɔ mɛnɛ e ma òhwa nanù ema nanù ndi na hwèlì.”

⁷¹Rzìi hwà mà òhwa hvɛ nanù ema, “Ima lìtìŋgà hvɛ ja àrza e? Irzɔ hwa àrzɛ ì hweyi nà òmà mɔ̀ ŋmìti a òhwì nà è wàna yà èni.”