Read Mokpwe Lukàrzɛ̀ 24 Bible Online

Lukàrzɛ̀ 24 - Mokpwe bible

Lukàrzɛ̀ 24

¹O ekpaàrzɛ ya wùnyà, wò Màrzò lìzàmba, hwalanà hwa mà akɛlɛ ò rzɔ̀ŋgɔ̀ nà hweŋge hwèlòŋgirzanì hwe awu.

²Hwa mà ùŋma lìŋyàyi ema hwa mà hwàndane hwèkpèèlì hwe è rzɔ̀ŋgɔ̀ lì mà tindàhwa, èhvàrzù yɔ̀kɔ.

³Hwàŋga hwalanà hwa mà kpèeyà ò tenì yà èŋge rzɔ̀ŋgɔ̀, ndi hwa rzi ùŋmà ŋmìmbà mò ama Rzàŋgò Yerzù.

⁴Hwa mà wòteya lì lùteya mamɛ e ma gbèyɛnɛ nà mòŋgò ŋmìmbà. Lìwòkìmɛnɛ wùnyànà hwàhwàkɛ̀ ema hwà mà wɔtɔ̀ mbɔ̀mi ja ŋgɛ̀ŋgɛ̀lɛ-ŋgɛ̀ŋgɛ̀lɛ, hwa mà hwa wurzeya.

⁵Hwanù hwalanà hwa mà lɛ̀mbeya mòkambiya rzìi hwa rzùma màrzò ma awu ò rze. Hwàŋga hwatò hwa mà hwa ijòwa nanù ema, “Mamɛ ya àrzeyà è mɔ̀ ema a hwèlì lòŋgɛ ò tenì yà mèlìmà e?

⁶À rza enje anù, à ma hvùmùwa! È rza ɔ̀ŋgɛlɛ mamɛ ema a mà è òhweyà ò Galìlì e?

⁷À mà òhwa nanù ema, ‘È Ŋmanà wà è Mòtò wà Hwènàmà à hwɛnì lì ŋgbààhwà ò màà mà hwatò hwa wòhwe. À wòmàyilɛhwɛ̀ ò mbarza, à ŋwa. O mèenyà meyawò à hvùmùwà.’”

⁸Aŋgà ndi hwaŋga hwalanà, hwa a ɔ̀ŋgɛ̀lɛ mamɛ a mà hwa òhweyà.

⁹Nà òma hwaŋga hwalanà hwa mà uhwɛlɛlɛ ò rzɔ̀ŋgɔ̀, hwa mà ɛ̀ndɛ lì òhweyà lìnɛyi lìyòmɛ̀ la hwà-òkòwèlì hwà mà Yerzù nà mɔ̀kɔ, nà hwanɛ̀yi hwa àrzɛ, mamɛ ema e ma gbèyɛnɛ.

¹⁰Màlìyɛ̀ Màdalenà, Yòwanà, Màlìyɛ̀ ema à ma ŋya Jèmìrzì, nà hwanɛ̀yi hwalanà, wɔ̀ ndi hwà mà òhweyà I àpɔ̀rzìtòlò hwene hweyà.

¹¹Iŋgi Àpɔ̀rzìtòlò ì rzi lòkɛ̀ hwaŋga hwalanà. Hwa mà òhwa nanù ema hwaŋga hwalanà hwa òhwa ndi èchɔlɔ ya mbɔrzi.

¹²Ndi Pètrò à mà tɛ̀mɛ̀ rzìi à hwaŋga lì ɛ̀ndɛ ò rzɔ̀ŋgɔ̀ ò lì ɔŋgɔ̀. Nà òmà a mà ùke aŋga, à mà ujama rzìi a ɔ̀ŋgɔ ò tenì yà èŋge rzɔ̀ŋgɔ̀. À mà ɛnɛ ndi lìhwàtù ema hwa mà lìŋgɛ̀lɛ̀nɛ Yerzù. À mà tìmbana hwètàmirzelì.

¹³O wòŋgò wùnyà mɛnɛ hwà-òkòwèlì hwa ama Yerzù hwahwàkɛ, hwa mà hwɛ lì ɛ̀ndɛ mbòwà hvɔ̀kɔ ema è mà hwɛ̀lɛ̀hwɛ̀ Ɛ̀màyɔ̀rzì. Èŋge mbòwà è mà hwɛ eyà yà màlɔ̀ŋgì lìrzàmba ò lì anjiya ò è mbòwà yà Jèrurzalɛ̀mù.

¹⁴Nà òmà hwa mà hwɛ lì ɛ̀ndɛ, hwà mà hwɛ lì tuhwà mendèŋgà lì hvòmɛ̀nɛ̀ mamɛ ema e ma gbèyɛnɛ.

¹⁵O tenì yà mèndèŋgà me awu. Yerzù à mà jà lì hwa ùŋmanɛlɛ, rzìi à ɛ̀ndɛlɛnɛ nà wɔ̀.

¹⁶Hwa rzi mò èmbè èhwanja mìirzɔ̀ mà awu mà ma umbahwa.

¹⁷Yerzù rzìi a hwa ijòwa nanù ema, “Ì ma nyàyi yà mèndèŋgà menè e tuhwa nanù ò njiya e?” Hwa mà tɛ̀mɛ̀ tòlòlòlò rzìi hwa nyùkɛ marzò.

¹⁸Mɔ̀kɔ wà awù ema à mà hwɛ̀lɛ̀hwɛ̀ Klèyòpàrzì à mà mò ijòwa nanù ema, “Ò hwèlì ndi ŋmɛ̀ni ò ène mbòwà yà Jèrurzalɛ̀mù e? O rza hwi hwenè hweyà hwe àrzɛ ema hwe gbèyɛnɛ menè mèenyà e?”

¹⁹Yerzù rzìi a hwa ijòwa nanù ema, “Ì ma nyayi ja hweyà e?” Rzìi hwa mò alàhwɛ nanù ema, “Jò òhwà ndi hweyà hwe ma gbèyɛnɛ lì hvòmɛ̀nɛ̀ Yerzù wà Nàrzàrɛ̀tì. À mà hwɛ ndi Mòòhwèlì wà Èlìŋgɛ̀ èma à ma gbeyà hweyà hwe mànyàka. À mà hwɛ ndi Mòòkòlèlì à Kàrzàmi. À mà ŋgbàahwa èluhwe nà Lohwɛ̀ nà hwatò.

²⁰Ndi Ipìlìrzì ndɛnɛ ja arzu, nà hwànɛ̀yi hwàtìmbèlì hwa e mbòwà hwa mà mò ŋgba ò maà ma hwàkànèlì ema hwa ŋgbè e mbakò nanù ema hwa mò òŋwe. Rzìi hwa mò wòmeyà ò mbarza.

²¹Ì mà àhvìtɛ̀ nanù ema, mɔ̀ ndì à ò òŋgìrzɛ̀ wònya Irzàyɛ̀lì. Lì aka hvɛ tɔ̀ nanù, yàwònò ndi ò gbèyi mèenyà meyàwò ema enè eyà è mà gbèyɛ̀nɛ.

²²Lì aka hvɛ tɔ̀ nanù, lòŋgò là hwalanà ò ìtììtènì ja arzu, hwa akɛ̀lèyayi ò mòlìmà mò eni enè ekpààrzɛ̀. Hwa tìmbani ŋmɛ̀ndì mò hwètàmìrzèlì ema jò òhwa.

²³Hwàŋga hwalanà hwa rza ɛni ŋmìmbà mò eni. Hwa timbi lì òhwà ema hwa ɛni ndi jɛ̀nɛ̀nì jà i aŋgèlì. Iŋgi aŋgèlì ì mà hwa òhweyà ema Yerzù à hwèlì lòŋgɛ.

²⁴Lòŋgò la wunyanà hwa lìtuta lì arzu wɔ̀ hvɛ hwa ɛndeyàyì ò mòlìmà, rzìi hwa ùŋmayi nà è jɔ̀kɛ̀ mamɛ hwalanà hwa òhweyàyi, ndi hwa rzà ɛni Yerzù.”

²⁵Yerzù à mà hwa timbirzɛlɛlɛ nanù ema, “È hwèlì ndi mɛ̀lɔ̀kɔ̀rzɔ̀ me hwatò. È rza tànɛyi lì lòkɛ̀ mamɛ Hwà-òhwèlì hwa Hwèlìŋgɛ̀ hwa kòhwaa hwa mà òhwe!

²⁶Rzeke e mà hwɛ ndi nanù ema, è Mɔ̀ ema à Ɔ̀kirzɛ̀hwɛ̀yi à ò lùwa mene mètàkà me arzɛ, ndèŋgàna à ò lùwa èluhwe ya eni.”

²⁷Yerzù rzìi a hwa ɔ̀ŋgɛ̀lɛ̀nɛ hwetìlelì hwe ama Mòrzè, nà hwà-òhwèlì hwa hwèlìŋgɛ̀ hwa àrzɛ hwa kòhwaa. À mà hwa telɛlɛ mamɛ ya àrzɛ e ma tìlahwa ò Kààtì yà Lohwà lì mò hvòmɛ̀nɛ̀.

²⁸O lìnì lìrzàkò hwà mà kòmbɛ̀nɛ̀ è mbòwà yà Ɛ̀màyɔ̀rzì, lìrzukù la awu la yɔ̀ndɔ̀. Yerzù à mà àrza lì ɛ̀ndɛ ò wòrzò.

²⁹Ndi hwa mà mò rzòrzòmeyà rzìi hwa òhwa nanù ema, “Ja anù ò lìyà nà irzɔ, èhwanja ò mà hwɛ ndi è ŋgòmbe yà lohwà ò hwèkɔ̀ɔ̀yèlì hwe wùnyà.” Aŋgà ndi à ɛ̀ndɛ ò ndawò nà wɔ̀.

³⁰Nà òmà hwa mà lìya ò lì làa, à mà wòwa èhvòòtò, rzìi à è nàmìrzɛ̀, à mà kanda èhvòòtò, rzìi a hwa ŋgbà e yɔ.

³¹O wòtɛmɛ̀tɛmɛ̀, mìirzɔ̀ ma awu, ma mà lìhvòhweyà rzìi hwa mò èmba, rzìi a hwa nyɔ̀ŋgeya ò mìirzɔ̀.

³²Hwa mà àyijòwànɛ̀ mɔ̀kɔ nà ɔnɛ̀yi nanù ema, “Rzèke ì mà hweyà ndi mèèmà ò tenì jòlì-jòlì, nà òmà a mà jò òhwìrzɛ̀nɛ̀ ò njìya nà lì jò tèlɛ̀lɛ̀ e kààtì yà Lohwà e?”

³³O wòtɛmɛ̀tɛmɛ̀ hwa mà tìmba ò Jèrurzalɛ̀mù. Aŋgà ndi hwà mà ùŋmanɛlɛ lìyòmɛ̀ la hwà-òkòwèlì nà mɔ̀kɔ la ama Yerzù hwa arzàŋgànɛ nà hwanɛ̀yi.

³⁴Rzìi hwa hwà òhweyà nanù ema, “Nà è jɔ̀kɛ̀ Rzàŋgò a hvùmù, a wùrzèlì Rzìmɔ̀nì Pètrò!”

³⁵Hwàŋga hwaahwàkɛ hwa mà hwa òhweyà mamɛ e ma gbèyɛnɛ ò njìya yà Ɛ̀màyɔ̀rzì, nà òmà hwa mà èmbe Yerzù lìrzàkò ema a mà hwa kandeya èhvòòtò.

³⁶Nà òmà hwaŋga hwaahwàkɛ hwa mà hwɛ lì hwa òhweyà enè eyà, ò wòtɛmɛ̀tɛmɛ̀ Yerzù à mà hwa wurzeya, rzìi à hwa òhweyà nanù ema, “Ɛ̀yɔ̀lɛ̀ è hwɛ nà inyɔ!”

³⁷Hwa mà òka wɔ̀ŋgɔ̀ rzayì-rzayì, hwa mà lùteya nanù ema hwà mà ɛnɛ ndi mùu.

³⁸Yerzù à mà hwa ijòwa nanù ema, “Mamɛ ndeŋgàtɛ e jejì e? Mamɛ ndeŋgàtɛ mèèmà me anyu me òndì nà hwàmɛ e?

³⁹È ɔŋgɔ̀ tɛ màa nà matàŋgà ma ami. È ɛnɛ ema ìmba mɛnɛ ònò! È nò mɔ̀me ò màa òma e ma hwiya nanù ema, mùu à rza hwɛnɛ ŋmìta, nyàmà nà hwèerze. Nà òmà e ɛnɛ, ìmba nà hwɛnì.”

⁴⁰Nà òma à mà kulɛ lì òhwa nanù, à mà hwa uŋmɛ̀lɛ̀ maà nà matàŋgà mà eni.

⁴¹Nà òmà hwa mà tɛ̀mɛ̀ aŋga, tɔ̀ nɛ hwa mà mò hwamɛ, hwa mà hwɛnɛ mɔ̀nyɛ̀ŋgì nà hwètàmirzelì. Yerzù rzii a hwa ijòwa nanù ema, “È òhvi yòma ya lì làa anù, òma e?”

⁴²Hwa mà mò ŋgbà ŋmanà nyàmà yà màlìhwa ema e mà tumbɛhwɛ.

⁴³À mà è wòwa, rzìi a è làa, ò màrzò ma awu.

⁴⁴Rzìi à hwa òhweyà nanù ema, “Èŋge hvònda na mà hwɛ nà inyɔ, nà mà è òhweyà ema hweyà hwe arzɛ ema hwe gbèyɛ̀nɛ lì nò hvòmɛ̀nɛ̀, nà òma e tìlahwì ò kààtì yà è mbenda yà ama Mòrzè, nà ò kààtì yà hwà-òhwèlì hwa hwèlìŋgɛ̀, nà ò kààtì ya Mɛ̀rzɔ̀kɔ̀.”

⁴⁵Rzìi à hwa lìhvòhwa mɔ̀ŋgɛ̀lɛ̀ ma awu aŋga nanù hwa rzɔ̀ŋgìtɛ̀nɛ̀ e kààtì yà ama Lohwɛ̀.

⁴⁶À mà hwa òhweyà nanù ema, “È tìlahwi ò e kààtì ya Lohwɛ̀ nanù ema, è Mɔ̀ ema à Ɔ̀kirzɛ̀hwɛ̀yi à hwɛnì lì tàka rzìi a ŋwa, rziyàyò à hvùmùwa.

⁴⁷È tìlahwì nanù ema, hwatò hwa òhwe Ŋmɛ̀ndì mò Gbamù ò hwekòmɛ̀ hwe àrzɛ ema, hwatò hwa ayèŋgòwɛ̀ ò wòhwe wò awu ò lìinà la ama Yerzù, aŋga nanù Lohwɛ̀ a hwà làkìrzɛ̀ wòhwe wò awu. Hwa wòteya lì òhwa Ŋmɛ̀ndì mò Gbamù ò Jèrurzalɛ̀mù.

⁴⁸È hwèlì ndi mbòŋgi ò hwenè hweyà hwe àrzɛ.

⁴⁹Nà è òmeyà mamɛ ema Tatɛ̀ wà ami à mà kàkɛ̀nɛ̀. Inyɔ è lìyà ò ène mbòwà, è ambɛ̀lɛ̀ natɛ̀ɛ yò òndìrzɛ̀hwɛ̀ nà è ŋginyà e uhweyà ò ŋmanyu yà lohwà.”

⁵⁰Yerzù à mà hwa tìmba lì anjiya ò èŋge mbòwà, natɛ̀ɛ ò lì kòmbɛ̀nɛ̀ è mbòwà yà Bɛ̀tanì. À mà kàrzɛ maà ma eni ò ŋmanyu rzìi a hwa nàmìrzɛ̀.

⁵¹Nà òmà a mà hwɛ lì hwa nàmìrzɛ̀, rzìi hwa lìiya aŋga, à kòhwà ò ŋmanyu yà Lohwà.

⁵²Hwa mà mò kànɛ̀ rzìi hwa tìmbana mɔ̀nyɛ̀ŋgì rzayì-rzayì ò Jèrurzalɛ̀mù.

⁵³Hwà-òkòwèlì hwa eni hwa mà hwɛ ò Ndawò yà Lohwà ihvònda jà arzɛ, ò lì ekà Lohwɛ̀.