Read Mokpwe Lukàrzɛ̀ 3 Bible Online

Lukàrzɛ̀ 3 - Mokpwe bible

Lukàrzɛ̀ 3

¹È hvònda ema è mòkànèlì Tìbɛ̀rìyàrzì a mà hwɛ è Kàyìrzà yà Ròmànì, ò hvòkà yà lìyòmɛ̀ la meya nà meta me lìkànèyà la eni, Eyà ya Lohwà e mà jèeya Yòwanìrzɛ̀, è ŋmanà wà ma Rzàkàriyà è hvònda ema a mà hwɛ ò mòrzanjɛ̀. Èŋge hvònda ndi Pòntìyùrzì Pìlatò a mà hwɛ è mòkànèlì hwà Jùdeyà. Hɛ̀rɔ̀dì mɔ̀ hvɛ ndi à ma hwɛ è mòkànèlì wà èkòmè ya Galìlì, ndèŋgà ŋmanyàŋgò Hvìlìpì hvɛ è mòkànèlì hwà èkòmè ya Ìturèyà nà èkòmè ya Tràkònitìrzì. Lìrzànìyàrzì hvɛ è mòkànèlì wa èkòmè ya Àbilɛ̀nì. Èŋge hvònda mɛnɛ ndi Anàrzì nà Kàyìhvàrzì hwa mà hwɛ Ipìlìrzì ì Karzamì.

³Yòwanìrzɛ̀ a mà ɛ̀ndɛ èki ya arzɛ ema e ma tòŋgà mòrzò mò Jɔdànì. Nà òmà a mà hwɛ lì ɛ̀ndɛ, à mà òhweyà hwatò nanù ema, “È rzɔ̀njɛlɛ hwègbèèlì hwe anyu hwe wòhwe, e lùhwìrzɛ̀hwɛ̀, aŋga nanù Lohwɛ̀ a è làkìrzɛ̀ wòhwe wò anyu.”

⁴Ènè eyà ndi è òndìrzɛ̀, mamɛ è tìlàhwì ò kaàtì yà hweyà hwe ama è Mòòhwèlì wà èlìŋgɛ̀ Àyìrzayà, nanù ema, “Mòrzeya mò mà hweyàhwà ò mòrzanjɛ̀ nanù ema, È rzèkeyà hwèjèelì hwe ama è Rzàŋgò. È tɛnɛ̀nɛ̀ ì njìya ja hweyàkèlì hwe eni.

⁵Ìnyɔ è òndìrzɛ̀ ì wàŋga ja àrzɛ. Ì hvàko nà meyòlì mè àrzɛ mè rzìhwìrzɛ̀hwɛ̀ hwɛ̀tɛhwɛtɛ. Ì njìya jè eŋgàmi ì tɛ̀nɛ̀nɛ̀hwɛ̀. È jɔ̀ ja kpàkpàtè hvɛ ì jììrzɛ̀hwɛ̀ tàlìì.

⁶Àŋga ndi è mòtò wà àrzɛ à ɛnɛ nà òmà Lohwɛ̀ a òŋgìrzɛ hwatò hwa eni.”

⁷Yòwanìrzɛ̀ à mà ijòwa è ŋgìndì ema è ma jà ema a hwa lùhwìrzɛ̀ nanù ema, “Inyɔ hvèyi! Njɛnɛ à è kòkòwɛ̀lɛ̀ nanù ema e hwaŋgè è kɔ̀kìrzɛ̀ yà ama Lohwɛ̀ ema e jà e?

⁸Inyɔ e ɛndɛ e gbèèye hweyà ema hwe uŋmɛ̀lɛ̀ nanù ema e ma rzɔnjɛ̀lɛ̀ wòhwe wò anyu, rzèketɛ ò lì òhwà ò mèèmà me anyu nanù ema, ‘Ì hwèlì ndi hwàànà hwà mà Abràhamù, ò eŋgànɛ̀lɛ̀ ì rza tànɛ̀yi lì kɔ̀kìrzɛ̀hwɛ.’ Ndi nà è òhweyà ema Lohwɛ̀ à tanɛyi lì gbeyàna manù màŋyàyi ò lì ma gbeyà emà mà hwɛ hwàanà hwa ama Abràhamù.

⁹Nàŋgɛ yòòndò e ma màà lì naŋga ò meyaŋga me màyi. O èŋgànɛ̀lɛ̀ tɔ̀ ima gbèe ema wò rza ŋyàayi hwehvùma hwe gbamù, wò hwɛnì lì kɛ̀ɛ̀hwɛ̀ lì hvimbahwa ò mùnya.”

¹⁰È ŋgìndì rzìi e mò ijòwa nanù ema, “Mamɛ rzɔ ì tànɛyì lì gbeyà nàŋgɛ e?”

¹¹Yòwanìrzɛ̀ à mà alàhwɛ̀ nanù ema, “Tɔ̀ njɛnɛ ema à hwɛnì mèŋgòmbè mehwàkɛ a ŋgbè mɔ̀kɔ òma òŋgò ema à rza òhvɛ̀ɛ, òŋgò hvɛ ema à òhvi mòlelì a ŋgbè hwaŋga ema hwa rza òhvɛ̀.”

¹²Hwarzàŋgèlì hwa njàŋge yà lìkànèyà wɔ̀ hvɛ hwa mà jà ema a hwa lùhwìrzɛ̀. Rzìi hwa mò ijòwa nanù ema, “Ìi Mòòkòlèlì mamɛ ì tànɛyì lì gbeyà e?”

¹³Rzìi à hwa òhweyà nanù ema, “È rzì kèka lì wòwà lì akà mamɛ ema e arzahwa.”

¹⁴Lòŋgò la hwàànèlì hwa njùma hvɛ hwa mà mò ijòwa nanù ema, “Mamɛ irzɔ hvɛ ì gbeyà e?” Yòwanìrzɛ̀ à mà hwa alàhwɛ̀ nanù ema, “È rzì ɔ̀njɔnɔ hwatò màlì. È rzì òhwa ema hwatò hwa gbèyi hweyà ema hwa rzà gbèyɛ ndi e òke mɔ̀nyɛ̀ŋgì nà mamɛ ema e lùwa nàa etàŋgì ya anyu.”

¹⁵Hwàŋga hwatò ema hwà mà ambɛlɛlɛ nà nyìrzɛ̀ yà mèèmà, hwa mà hwɛ aŋga nà nyìrzɛ̀, nà hwètàmirzelì, ò mèèmà me awu, ò lì hwiyà ŋgà Yòwanìrzɛ̀ ndi à hwèlì òŋgò ema à Ɔ̀kirzɛ̀hwɛ̀yi nà Lohwɛ̀.

¹⁶Yòwanìrzɛ̀ rzìi à hwa alàhwɛ̀ hwa arzɛ nanù ema, “Nà è lùhwìrzɛ̀ naŋgɛ nà màlìhwa, ndi òŋgò ema à kàrzàmi lì nò aka à ò jà, ema nà rzà ukì hvɛ tɔ̀ òŋgò ema à tànɛyì lì wùnduwa mèèrzìŋgà mè hwètàmbì hwe eni. Mɔ̀ à è ò lùhwìrzɛ̀ ndi nà Èlìŋgɛ̀ yà Wòtani nà mùnya.

¹⁷Ɛ̀rzɛ̀ŋgbɛ̀nì ema è hwèlì ò lìya là eni, ò lì rzɛŋgbɛnɛ hweyàrzà ò hvɔ̀ŋgɔ̀ ema ì hwèlì ò kɛ̀lɛ. À kulɛ tɛ lì rzɛ̀ŋgbɛ, à rzàŋgà ì hvɔ̀ŋgɔ̀ jà gbamù, à ji ùtà. Rzìi à rzàŋgà hvɛ hweyàrzà, à hwe rzòwà ò mùnya ema mò rza lìma.”

¹⁸Yòwanìrzɛ̀ à mà kòkòwɛ̀lɛ̀ hwatò nà ìhvɛhvɛ mbɔrzi rzayì-rzayì, rzìi a hwa òhweyà meyàŋgò me gbamù.

¹⁹Yòwanìrzɛ̀ à mà kànja hvɛ Hɛ̀rɔ̀dì è mòkànèlì, èhwanja à mà gbeyà wòhwe ò lì hwàà Hɛ̀ròdìyàrzì è mòlanà wà ama ŋmanyàŋgò, nà hwehvɛhvɛ hweyà hwe wòhwe ema a mà gbèye.

²⁰O ŋmanyu yà wòhwe wò eni hwe àrzɛ ema a mà gbèye, Hɛ̀rɔ̀dì à mà aŋgɛ Yòwanìrzɛ̀ ò hwèwòwà.

²¹Nà òmà Yòwanìrzɛ̀ à mà lùhwìrzɛ̀ hwatò hwa arzɛ, Yerzù mɔ̀ hvɛ, à mà jà ema a mò lùhwìrzɛ̀. Nà òmà Yerzù a mà lùhwìrzɛ̀hwɛ̀, rzìi a kanɛ̀. Nà òmà a mà hwɛ ò lì kanɛ̀, è ŋmanyu è mà lìhvòweya.

²²Èlìŋgɛ̀ yà Wòtani rzìi e uhweyà ò ŋmanyu lì ayèkɛnɛ̀ nàa mbèŋgà rzì e rzìhwà, e mò tɛ̀mɛ̀ ò mòhvò. Rzìi lìlò lì uwɛ̀lɛ̀lɛ̀ ò ŋmanyu yà lohwà lì òhwa nanù ema, “O wà ndì ò hwèlì è Ŋmanà wa amì wà ndìŋgɛ ya màlìŋgò, nà òki mɔ̀nyɛ̀ŋgì nà ò wa rzayì-rzayì.”

²³Yerzù à mà hwɛ eyà ya rzayiyàyò yà meya ema a mà wòteyà èwòlò ya eni. Hwatò hwa mà mò ɛ̀nɛ ndi nàa è ŋmanà wà ama Jòrzɛ̀hvù. Jòrzɛ̀hvù à mà hwɛ ndì è ŋmanà wa ama Èlì.

²⁴Èlì à mà hwɛ ndi è ŋmanà wà ama Màtatì. Màtatì à mà hwɛ ndi è ŋmanà wà ama Lɛ̀hvì. Lɛ̀hvì à mà hwɛ ndi è ŋmanà wà amà Mɛ̀lkì. Mɛ̀lkì à mà hwɛ ndi è ŋmanà wà amà Jànayì. Jànayì à mà hwɛ ndi è ŋmanà wa ama Jòrzɛ̀hvù,

²⁵Jòrzɛ̀hvù à mà hwɛ ndi è ŋmanà wà ama Màtatiyàrzi. Màtatiyàrzi à mà hwɛ ndì è ŋmanà wà ama Èmɔ̀rzi. Èmɔ̀rzi à mà hwɛ ndi è ŋmanà wà ama Nàhumi. Nàhumi à mà hwɛ ndi è ŋmanà wà ama Ɛ̀rzlì. Ɛ̀rzlì à mà hwɛ ndi è ŋmanà wà ama Nàgayì

²⁶Nàgayì à mà hwɛ ndi è ŋmanà wà ama Matì. Matì à mà hwɛ ndi è ŋmanà wà ama Màtàtiyàrzì. Màtàtiyàrzì à mà hwɛ ndi è ŋmanà wà ama Rzɛ̀mɛ̀yìnì. Rzɛ̀mɛ̀yìnì à mà hwɛ ndi è ŋmanà wà ama Jòrzɛ̀kì. Jòrzɛ̀kì à mà hwɛ ndi è ŋmanà wà ama Jòdà.

²⁷Jòdà à mà hwɛ ndi è ŋmanà wà ama Yòwànànì. Yòwànànì à mà hwɛ ndi è ŋmanà wà ama Lɛ̀rzà. Lɛ̀rzà à mà hwɛ ndi è ŋmanà wà ama Rzèrubàbɛ̀lì. Rzèrubàbɛ̀lì à mà hwɛ ndi è ŋmanà wà ama Rzɛ̀yàltìyɛ̀lì. Rzɛ̀yàltìyɛ̀lì à mà hwɛ ndi è ŋmanà wà ama Nɛ̀lì.

²⁸Nɛlì à mà hwɛ ndi è ŋmanà wà ama Mɛ̀lkì. Mɛ̀lkì à mà hwɛ ndi è ŋmanà wà ama Adì. Adì à mà hwɛ ndi è ŋmanà wà ama Kòrzami. Kòrzami à mà hwɛ ndi è ŋmanà wà ama Ɛ̀lmadàmi. Ɛ̀lmadàmi à mà hwɛ ndi è ŋmanà wà ama Ɛ̀rzì.

²⁹Ɛ̀rzì à mà hwɛ ndi è ŋmanà wà ama Jòrzùwà. Jòrzùwà à mà hwɛ ndi è ŋmanà wà amà Ɛ̀lìyɛ̀rzà. Ɛ̀lìyɛ̀rzà à mà hwɛ ndi è ŋmanà wà ama Jòlìm. Jòlìm à mà hwɛ ndi è ŋmanà wà ama Màtatì. Màtatì à mà hwɛ ndi è ŋmanà wà ama Lɛ̀hvì

³⁰Lɛ̀hvì à mà hwɛ ndi è ŋmanà wà ama Rzimìyɔ̀nì. Rzimìyɔ̀nì à mà hwɛ ndi è ŋmanà wà ama Judà. Judà à mà hwɛ ndi è ŋmanà wà ama Jòrzɛ̀hvù. Jòrzɛ̀hvù à mà hwɛ ndi è ŋmanà wà ama Jònàmì. Jònàmì à mà hwɛ ndi è ŋmanà wà ama Èlìyakìmi.

³¹Èlìyakìmi à mà hwɛ ndi è ŋmanà wà ama Mɛ̀leyà. Mɛ̀leyà à mà hwɛ ndi è ŋmanà wa amà Mɛnà. Mɛnà à mà hwɛ ndi è ŋmanà wa amà Màtata. Màtata à mà hwɛ ndi è ŋmanà wà ama Nàtàni. Nàtàni à mà hwɛ ndi è ŋmanà wà ama Dàhwitì

³²Dàhwitì à mà hwɛ ndi è ŋmanà wà ama Jɛ̀rzɛ̀. Jɛ̀rzɛ̀ à mà hwɛ ndi è ŋmanà wà amà Obɛ̀di. Obɛ̀di à mà hwɛ ndi è ŋmanà wà ama Bòwarzì. Bòwarzì à mà hwɛ ndi è ŋmanà wa ama Rzalmɔ̀ni. Rzalmɔ̀ni à mà hwɛ ndi è ŋmanà wà amà Nàrzɔ̀nì.

³³Nàrzɔ̀nì à mà hwɛ ndi è ŋmanà wà ama Àminadàbì. Àminadàbì à mà hwɛ ndi è ŋmanà wà ama Admìni. Admìni à mà hwɛ ndi è ŋmanà wà ama Arni. Arni à mà hwɛ ndi è ŋmanà wà ama Ɛ̀rzɔ̀ni. Ɛ̀rzɔ̀ni à ma hwɛ ndi è ŋmanà wà ama Pɛ̀rɛ̀rzi. Pɛ̀rɛ̀rzi à mà hwɛ ndi è ŋmanà wà ama Judà

³⁴Jèkɔ̀bù à mà hwɛ ndi è ŋmanà wà ama Jèkɔ̀bù. Jèkɔ̀bù à mà hwɛ ndi è ŋmanà wà ama Irzàkì. Irzàkì à mà hwɛ ndi è ŋmanà wà ama Abràhamù. Abràhamù à mà hwɛ ndi è ŋmanà wà ama Tɛrà. Tɛrà à mà hwɛ ndi è ŋmanà wà ama Nàhɔ̀

³⁵Nàhɔ̀ à mà hwɛ ndi è ŋmanà wà ama Rzɛ̀rùgì. Rzɛ̀rùgì à mà hwɛ ndi è ŋmanà wà ama Rzɛwù. Rzɛwù à mà hwɛ ndi è ŋmanà wà ama Pɛ̀lɛ̀gì. Pɛ̀lɛ̀gì à mà hwɛ ndi è ŋmanà wà amà Ɛbà. Ɛbà à mà hwɛ ndi è ŋmanà wà ama Rzɛlà

³⁶Rzɛlà à mà hwɛ ndi è ŋmanà wà ama Kèyinàni. Kèyinàni à mà hwɛ ndi è ŋmanà wà ama Àhvarzadì. Àhvarzadì à mà hwɛ ndi è ŋmanà wà ama Rzɛ̀mì. Rzɛ̀mì à mà hwɛ ndi è ŋmanà wà ama Nòwà. Nòwà à mà hwɛ ndi è ŋmanà wà ama Làmɛ̀kì.

³⁷Làmɛ̀kì à mà hwɛ ndi è ŋmanà wà ma Mèturzɛ̀là. Mèturzɛ̀là à mà hwɛ ndi è ŋmanà wà ama Ɛnɔ̀ki. Ɛnɔ̀ki à mà hwɛ ndi è ŋmanà wà ama Jàrɛ̀dì. Jàrɛ̀dì à mà hwɛ ndi è ŋmanà wà ama Màhalalɛ̀lì. Màhalalɛ̀lì à mà hwɛ ndi è ŋmanà wà ama Kènànì.

³⁸Kènànì à mà hwɛ ndi è ŋmanà wà ama Ɛnɔ̀rzi. Ɛnɔ̀rzi à mà hwɛ ndi è ŋmanà wà ama Rzɛti. Rzɛti à mà hwɛ ndi è ŋmanà wà ama Adàmu. Adàmu à mà hwɛ ndi è ŋmanà wà ama Lohwɛ̀.