Read Mokpwe Lukàrzɛ̀ 9 Bible Online

Lukàrzɛ̀ 9 - Mokpwe bible

Lukàrzɛ̀ 9

¹Yerzù a mà hwɛlɛ lìyòmɛ̀ la hwà-òkòwèlì la eni nà hwàhwàkɛ̀ èki yɔ̀kɔ. Rzìi à hwa ŋgba è ŋginyà nà wònjà ò lì hvayà hwèlìŋgɛ̀ hwe wòhwe, nà ò lì wɔ̀wìrzɛ̀ hvɛ ì nyàmbɛ ja arzɛ.

²Rzìi à hwa òma ema hwa ɛ̀ndɛ hwa òhwe Ŋmɛ̀ndì mò Gbamù mò Lìkànèyà là ama Lohwɛ̀, nà lì wɔ̀wìrzɛ̀ hvɛ hwatò.

³Yerzù à mà hwa òhweyà nanù ema, “È rzì kèka lì wòwà tɔ̀ yòmà nà òmà e ɛ̀ndɛ̀ yɔ̀ndɔ̀ ya anyu. È rzì wòwà tɔ̀ èèyè ya lì atìmbòwànɛ̀ tɔ̀ lìkpà, tɔ̀ mòlelì, tɔ̀ wòlì, è rzì wòwà hvɛ mààtù màhwàkɛ̀.

⁴Tɔ̀ ima ndawò hvɛ ema e kpèèlì, e lìyà e hwɛ aŋga natɛ̀ɛ e ànjìyà ò eŋge mbòwà ndɛnɛ.

⁵È hwèlì hvɛ tɛ ema hwa rzà è kàrzɛ̀ tɛ, tɔ̀ ima mbòwà è uki e anjìyè aŋga e hvùhvùhwè irzɔ̀hwɛ̀ ema jè hwèlì ò màtàŋgà ma anyu, ò lì uŋmɛ̀lɛ̀ nanù ema, wòhwe wò awu wò hwèlì nà wɔ̀.”

⁶È hvònda ema Yerzù a mà kulɛ̀ lì òhwà, rzìi Hwà-òkòwèlì wa eni hwa wòteyà ò lì ɛ̀ndɛ mbòwà nà mbòwà tɛ. Hwà mà hwɛ lì òhwa Ŋmɛ̀ndì mò Gbamù, nà lì wɔ̀wìrzɛ̀ hvɛ hwatò, èki ya arzɛ.

⁷Hɛ̀rɔ̀dì ema à ma hwɛ è mòkànèlì wà èkòme yà Galìlì à mà hwèya mamɛ ya arzɛ ema e ma gbèyɛnɛ. Ŋmèèmà mò eni mò mà mò tàkirzɛ èhwanja lòŋgò la hwatò hwa mà hwɛ ndi lì òhwa nanù ema, Yòwanìrzɛ̀ è Mòlùhwìrzèlì mɔ̀ ndì à mà hvùmùwɛ̀.

⁸Hwahvɛhvɛ hwatò hwa mà hwɛ ndi lì òhwà nanù ema Èlàyijà mɔ̀ ndì à mà tìmbɛ̀ɛ̀ ò rze. Hwanɛ̀yi hvɛ̀ hwa mà hwɛ ndi lì òhwà nanù ema mòohwà hwèlìŋgɛ̀ mɔ̀kɔ wà kòhwaa mɔ̀ ndì à tìmbi lòŋgɛ.

⁹Hɛ̀rɔ̀dì à mà òhwa nanù ema, “Nà mà gbeyà ema hwa rzènjòwè mòòhvò mò ama Yòwanìrzɛ̀, njɛnɛ hvɛ a hwèlì ònò mòtò ema na hweya ema à gbeyà hwenè hweyà e?” O èŋgànɛ̀lɛ̀ à mà hwɛ lì kèka ò lì ɛ̀nɛ̀ Yerzù.

¹⁰È hvònda ema hwà-òkòwèlì hwa mà tìmbe, hwa mà òhweyà Yerzù mamɛ ya arzɛ ema hwa mà gbèyè. Yerzù rzìi a hwa wòwà a hwa ɛ̀ndɛnɛ tòŋgòŋgò hvɔ̀kɔ, ò mbòwà yà Bɛ̀trzàyìdà ò lì hwɛ wɔ̀ hwìti.

¹¹Nà òmà è ŋgìndì e mà hweye nanù, hwa mà mò òŋgama aŋga rzìi hwa mò ùŋma. Yerzù à mà hwa karzɛ. À mà hwa òhweyà lì hvòmɛ̀nɛ̀ Lìkànèyà la ama Lohwɛ̀. Nà lì wɔ̀wìrzɛ̀ hvɛ è wɔ̀ ema hwà mà àrza lì wɔ̀wìrzɛ̀hwɛ.

¹²È hvònda wùùnyà wò mà wòteyà lì àhva, Hwà-òkòwèlì hwa ama Yerzù, hwa mà mò òhweyà nanù ema, “Hwɛ̀mɛ hwanù hwatò hwa ɛndɛ̀ ò màmbòwà ema mà kòmbɛ̀nɛ̀, ò lì àrza mamɛ hwa làa, nà hwèki e ma hwa tànɛyi lì nàŋgeya. Èhwanja ò rzà ènje mòlelì, nà èki ya hwenaŋgèlì anù.”

¹³Yerzù rzìi à hwa alàhwɛ̀ nanù ema, “Inyɔ mɛnɛ è hwa ŋgbe mamɛ ema hwa tànɛ̀yi lì làa.” Hwa mà mò òhweyà nanù ema, “Jò òhvi ndi hwèhvòòtò hweta nà nyàmà jà malìhwa ihwàkɛ. Ndi ò àrzà ema Jɛ̀ndɛ ì ànde mòlelì mò lì lìrzɛ̀ ène ŋgìndì e?”

¹⁴Hwatò è mà hwa mà hwɛ aŋga hwa mà hwɛ eyà yà hwèkòlì hweta. Ndi Yerzù à mà òhweyà Hwà-òkòwèlì hwa eni nanù ema, “È lììlɛ̀ hwanù hwatò hwa arzɛ ò ŋgìndì jà mènìmeta, mènìmeta.”

¹⁵Hwà-òkòwèlì hwa ama Yerzù, hwa mà gbeyà nà òmà à mà hwa òhweyà, hwatò hwa arzɛ hwa mà lìya ò rze.

¹⁶Yerzù rzìi à wòwà hwèŋge hwèhvòòtò hwe atànɛ nà iŋgi nyàmà jà malìhwa jà awàkɛ, à ɔ̀ŋgɔ ò ŋmanyu yà Lohwà, à eka Lohwɛ̀, à kàhwa hwehvòòtò nà ìnyàmà jà malìhwa. À tɛ̀tìrzɛ̀ Hwà-òkòwèlì hwa eni ema hwa hwe kahweyà è ŋgìndì.

¹⁷Hwatò hwa arzɛ hwa mà làa natɛ̀ɛ hwa mà ujà. Hwà-òkòwèlì hwà mà Yerzù hwa mà rzàŋgà mamɛ ya arzɛ ema e ma lìiya, lìyòmɛ̀ la ŋgàta nà ihwàkɛ ì mà ònda.

¹⁸Wùnyà wɔ̀kɔ nà òmà Yerzù a mà hwɛ lì kanɛ̀ ŋmìti, rzìi Hwà-òkòwèlì hwa eni hwa jà ò lì mò ùŋma. Rzìi à hwa ijòwa nanù ema, “Njɛnɛ hwatò hwa òhwa ema nà hwèlì e?”

¹⁹Hwà mà mò alàhwɛ̀ nanù ema, “Lòŋgò hwa òhwa ndi ema ò hwèlì ndi Yòwanìrzɛ̀ è Mòlùhwìrzèlì. Lòŋgò hvɛ hwa ma, ò hwèlì ndi Èlàyijà. Hwahvɛhvɛ hwa òhwa ema, ò hwèlì ndi Mòòhwèlì mɔ̀kɔ wà Èlìŋgɛ̀, wa kòòhwa ema à tìmbi ò lòŋgɛ.”

²⁰Yerzù rzìi a hwa ijòwa hvɛ nanù ema, “Njɛnɛ inyɔ hwìti e òhwa nanù ema na hwèlì e?” Pètrò rzìi a alàhwɛ̀ Yerzù nanù ema, “O hwèlì ndi è Mɔ̀ ema à Ɔ̀kirzɛ̀hwɛ̀yi wà ama Lohwɛ̀.”

²¹Yerzù rzìi a hwa kòkòwɛ̀lɛ̀ nà ŋginyà ema, hwa rzì keka lì wulùhweyà mòtò enè eyà.

²²Yerzù à mà òhweyà hvɛ hwà-òkòwèlì hwa eni nanù ema, “È Ŋmanà wà è Mòtò wà Hwènàmà, à hwɛnì lì lùwa mètàkìrzɛ̀nɛ̀ rzayì-rzayì, à hwɛnì lì rzɔ̀rzɔwɔ na hwàmbaki hwa mbòwà, Ipìlìrzì ndɛnɛ, nà hwà-òkòlèlì hwa mbenda. À hwɛnì lì òŋwàhwà. O mburzà menya meyàwò à ò hvùmùwà.”

²³Yerzù rzìi à hwa òhweyà wɔ̀ hwa arzɛ nanù ema, “Tɔ̀ ima mòtò ema a àrza lì nò nɔ̀ŋgɔ à hwɛnì lì awɛmɛ̀ mɔ̀ ŋmìti ema à rza enje tɔ̀ mòtò. Òŋgò mòtò à hwɛnì hvɛ lì hwànɛ è mbarza yà èni wùnyà tɛ ò lì nò òŋgama.

²⁴Èhwanja tɔ̀ ima mòtò ema arza lì rzùŋga lòŋgɛ là eni, à lì wɔ̀lɛ̀nɛ̀. Tɔ̀ njɛnɛ hvɛ ema à wɔ̀lɛ̀nɛ̀ lòŋgɛ là eni ò nyòla yà amì à lì rzùŋgà.

²⁵Mamɛ mòtò à tànɛyi lì yàlɛ̀, à lù tɛ mɔ̀rzɛ̀ŋgì mò arzɛ mò rze, rzi à wɔlɛ̀nɛ̀ hwe arzɛ, tɔ̀ èlìŋgɛ̀ yà eni e?

²⁶Mòtò à nò òkanì tɛ ìrzɔnì nà hweyòhwèlì hwe amì, È Ŋmanà wà è Mòtò wà hwènàmà mɔ̀ hvɛ à mò òkànà ìrzɔnì lìŋgi lìrzàkò ema à tìmba ònò nà wòtani wà eni, nà è wɔ̀ hwa ama è Rzàŋgò yà enì, nà i aŋgèlì ja wòrzaŋgi.

²⁷Nà è òhweyà ndi è jɔ̀kɛ̀ nanù ema lòŋgò la anyu è hwèlì anù, è rza ŋwa natɛ̀ɛ è ɛnɛ̀ Lìkànèyà là ama Lohwɛ̀.”

²⁸O mburzà yà mèènyà wàmbì ema Yerzù a mà òhwe nanù à mà àgbana Pètrò, Yòwanìrzɛ̀, nà Jèmìrzì ò mòòlì, ò lì kanɛ̀.

²⁹Nà òmà a mà hwɛ lì kanɛ̀, wòrzò wa eni wò mà ayèŋgòwɛ̀. Mòŋgòmbè mò eni hvɛ mò mà ayèŋgòwɛ̀ mbɔmi yà ŋmàye mò rzɛ̀ŋgɛ-rzɛ̀ŋgɛ.

³⁰Lìwòkìmɛnɛ wùnyànà hwàhwàkɛ̀ rzìi hwa mò wurzeyà hwa wòteya ò lì kòwa nà mɔ̀. Hwàŋga wùnyànà hwa mà hwɛ ndi Mòrzè nà Èlàyijà.

³¹Hwa mà ɛ̀neya wòtani wò ŋgɛ̀ŋgɛlɛ nà òmà hwa mà òhwìrzɛ̀nɛ̀ Yerzù. Hwa mà hwɛ lì òhwà nɛ Yerzù a òndìrzɛ ŋmanò mò ama Lohwɛ̀ lì hvòmɛ̀nɛ̀ è kpelì yà èni ò Jèrurzalɛ̀mù.

³²Pètrò nà hwanɛ̀yi hwaahwàkɛ hwa mà hwɛ ndi lì rzìrza. Nà òmà hwa mà imòwe ò ìjɔ rzìi hwa ɛnɛ wòtani wò ama Yerzù, nà hwahvɛhvɛ hwatò hwàhwàkɛ̀ ema hwà mà tɛ̀mɛ̀ nà mɔ̀.

³³Nà òmà hwàŋgà hwatò hwààhwàkɛ hwa mà hwɛ lì hwɛ̀mɛ Yerzù, Pètrò rzìi a òhweyà Yerzù nanù ema, “Rzàŋgò wà àrzu kòkò, ò lɔ̀wu ema ì hwèlì anù. Inyɛ̀ jò òŋge màwòndò màyàwò anù. Ò wa lɔ̀kɔ, Mòrzè lɔ̀kɔ Èlàyijà mɔ̀ hvɛ̀ lɔ̀kɔ.” Pètrò à rzi hwiye hvɛ tɔ̀ mamɛ a mà hwɛ lì òhwa.

³⁴Nà òmà Pètrò a mà hwɛ lì òhwa, lìmbàkì lì mà jà rzìi lì hwa lìŋgà. Hwa mà lɛ̀mbeya wɔ̀ŋgɔ̀.

³⁵Hwa mà hwèya lìlò ema lì ma wurza ò lìŋgi lìmbàkì lì mà òhwa nanù ema, “È Ŋmanà wa amì ònò. Mɔ̀ ndì na hvɔ̀rzì. È mò òkànèyà ndi mɔ̀.”

³⁶O mburzà hwèyòhwèlì hwe lìnì lìlò, rzìi hwa ɛnɛ ema Yerzù à lìyelì ndi àŋga ŋmìti. Hwàŋga hwà-òkòwèlì hwa eni, hwa mà ùta hwenè hweyà hwe àrzɛ ò mèèmà me awu, hwa rzì hwilɛ tɔ̀ mòtò, mamɛ ema hwà mà ɛnɛ.

³⁷O wònɛyi wùnyà, hwa mà rzìhwa mòŋgò mòòlì. Ŋgindi ndɛnɛ̀ è mà jà lì ùŋma Yerzù.

³⁸Rzìi mùnyanà mɔ̀kɔ ò tenì yà èŋge ŋgìndì à tɛ̀ɛ̀ nanù ema, “Ìi Mòòkòlèlì kòkò nà ò rzòrzòmelì, wà ɔ̀ŋgɔ tɛ è mbèrzà yà amì. Èhvòwà yà ami yà ŋmanà enè ema nà hwɛnì.

³⁹Èlìŋgɛ̀ ya wòhwe e yɔki lì mò tàkirzɛ. È mò lɛ̀mbi tɛ, a tɛɛ, a kpa ò rze, e mò nyìŋgìrzɛ̀nɛ̀ natɛ̀ɛ ì njɔ̀ŋgɔ̀ ì mò wurzà ò wàna. È rza mò hwɛmɛ natɛ̀ɛ à kùwà lì hwèna.

⁴⁰Nà ma mò jàneya Hwà-òkòwèlì hwa aŋgɔ̀ nà hwa atɛkɛ ema hwa hvaye èŋge èlìŋgɛ̀ ò nyò yà èni ndi hwa rzi tanɛ̀.”

⁴¹Yerzù rzìi a alàhwɛ̀ nanù ema, “Bɔ̀ɔ! Inyɔ ene nyɔ̀ŋgɔ̀nì yà wòhwe ema è rza hwɛ̀nɛ̀yi lìlòkɛ̀, nà hwɛ nà inyɔ natɛ̀ɛ nà rzìtii e? Nà è ajùlɛ̀nɛ̀ hvɛ natɛ̀ɛ nà ima hvònda e? È nò jàneya òŋgò ŋmanà anù.”

⁴²Nà òmà òŋgò ŋmanà a mà hwɛ lì ɛ̀ndɛ ò lì ùŋma Yerzù, rzìi èŋge èlìŋgɛ̀ ya wòhwe e wòteya lì mò tàkirzɛ rzìi e mò kpirzɛ̀, rzì a hvòkòwa. Yerzù rzìi a lòmeya èŋge èlìŋgɛ̀ ya wòhwe, rzìi à wɔ̀wìrzɛ̀ òŋgò ŋmanà, rzìi a mò tìmbirzɛlɛlɛ è rzàŋgò yà èni.

⁴³Hwatò hwa arzɛ hwa mà tàmà, ò lì ɛnɛ̀ mànyàkà mà amà Lohwɛ̀ a mà gbèye. Tɔ̀ nɛ hwa mà hwɛ ò hwètàmirzelì lì hvòmɛ̀nɛ̀ mamɛ ema Yerzù a mà gbèye, Yerzù à mà òhweyà Hwà-òkòwèlì hwa eni nanù ema,

⁴⁴“È nò òkànèyà, è rzi hvòŋgà hvɛ mamɛ na àrza lì è òhweyà. È Ŋmanà wà è Mòtò wà Hwènàmà à hwɛnì lì ŋgbààhwà ò màà mà hwatò hwa hwènàma.”

⁴⁵Ndi Hwà-òkòwèlì hwa eni, hwa rzi rzɔ̀ŋgìtɛ̀nɛ̀ mamɛ a mà òhwe. È mà hwɛ ndi nàa ŋmàna ema hwa rzi tanɛ̀yi lì rzɔ̀ŋgìtɛ̀nɛ̀. Hwà mà òka hvɛ wɔ̀ŋgɔ̀ ò lì mò ijòwà.

⁴⁶Hwà-òkòwèlì hwa ama Yerzù, rzìi hwa wòteya è hvèndà ò lì hwiyà njɛnɛ wà awu à ò hwɛ è mòmbaki.

⁴⁷Ndi Yerzù à mà ayèmbɛ mɔ̀ŋgɛ̀lɛ̀ mà awu. Rzìi à wòwa jùma ŋmanà, a mò ìka ò tòŋgòŋgò yà èni.

⁴⁸Yerzù rzìi à hwa òhweyà nanù ema, “Tɔ̀ ima mòtò ema à kàrzɛ̀ jùma ŋmanà nàa ònò nanù, ò lìnà là amì, ò ma ìmba ndi à kàrzɛ̀yi! Tɔ̀ njɛnɛ hvɛ ema à nò kàrzɛ̀yi, òma à kàrzɛ̀yi ndi Lohwɛ̀ ema à nò òmi. O èŋgànɛ̀lɛ̀ rzɔ, tɔ̀ ima mɔ̀ ema à atìmbìrzɛ̀ nàa jùma ŋmanà ò ìtììtènì ja anyu, mɔ̀ ndì à hwɛ̀ɛ̀ è mòtìmbèlì.”

⁴⁹Yòwanìrzɛ̀ rzìi a òhwa nanù ema, “Ìi Rzàŋgò, jɛ̀ɛ̀ ɛni mòtò ema à ulɛɛ hwèlìŋgɛ̀ hwe wòhwe ò nyò ja hwatò ò lìna lì aŋgɔ̀. Irzɔ ì ma mò òhweyà nanù ema a hwɛ̀mɛ̀, èhwanja a rza ènje nà ìrzɔ.”

⁵⁰Yerzù à mà hwa òhweyà nanù ema, “È rzì kèka lì mò àya ema à rza gbeyà nanù. Tɔ̀ ima mòtò ema à rza jò teŋgɛ̀nɛ̀, ò ma à hwèlì nà irzɔ.”

⁵¹Nàŋgɛ è hvònda ema Yerzù a mà hwɛnɛ lì ɛ̀ndɛ ò ŋmanyu yà lohwà è mà kòmbɛ̀nɛ̀. O èŋgànɛ̀lɛ̀ rzɔ à mà kàkɛ̀nɛ̀ nanù ema à hwɛnì lì ɛ̀ndɛ ò Jèrurzalɛ̀mù.

⁵²Yerzù à mà òma mèèrzènjà ò wòrzò. Hwa mà ɛ̀ndɛ ŋmanà mbòwà mɔ̀kɔ ò Rzàmarìyà, ò lì mò rzèkeya èki.

⁵³È hvònda Yerzù a mà ùke aŋga, hwatò hwa èŋge mbòwà hwa rzi mò kàrzɛ èhwanja Yerzù mɔ̀ à mà wòŋgirzɛnɛ ndi ŋmèma mò eni ò lì ɛ̀ndɛ ŋgèlì hvɔ̀kɔ ò Jèrurzalɛ̀mù.

⁵⁴È hvònda ema Hwà-òkòwèlì hwa eni, Jèmìrzì nà Yòwanìrzɛ̀ hwà mà ɛnɛ nanù, rzìi hwa ijòwa Yerzù nanù ema, “Rzàŋgò, ò arza ema ì yòhwɛ mùùnya ò ŋmanyu yà Lohwà ò lì hvaŋgà hwanù hwatò e?”

⁵⁵Yerzù à mà ayèŋgòwɛ̀ rzìi a hwa kànjà.

⁵⁶Yerzù na hwà-òkòwèlì hwa eni rzìi hwa ɛ̀ndɛ ò èhvɛhvɛ mbòwà.

⁵⁷Nà òmà hwa mà hwɛ lì ɛ̀ndɛ, rzìi mòtò mɔ̀kɔ a òhweyà Yerzù nanù ema, “Imba, nà ò òŋgama tɔ̀ òne.”

⁵⁸Ndi Yerzù à mà mò òhwìrzɛ̀nɛ̀ nanù ema, “I njùhwɛ̀ ja òhvi hvòkò ema i nàŋgeya. Hwenɔ̀ni hwe ŋmanyu hweyɔ hvɛ hwe òhvi màwùmbù, ndi e Ŋmàna wà e Mòtò wà Hwènàmà mɔ̀ à rza òhvi tɔ̀ èki ema a nàŋgɛlɛ mòòhvò mò eni.”

⁵⁹Yerzù à mà òhweyà òhvɛhvɛ mòtò nanù ema, “Jà anù ò nò òŋgame.” Ndi òŋgò mòtò à mà mò alàhwɛ̀ nanù ema, “Ìi Rzàŋgò kòkò, inyɛ na ɛ̀ndɛ na imeyà è rzàŋgò yà amì hvɔ̀ni.”

⁶⁰Yerzù à mà mò alàhwɛ̀ nanù ema, “Hwɛ̀mɛ̀ hwaŋga hwatò ema hwà mà ŋwɛ, hwa ìmeyà hwaŋga hwatò ema hwa ŋwelì. Ò wa ɛ̀ndɛ ò òhwèyà è rze Ŋmɛ̀ndì mò Gbamù mò Lìkànèyà là ama Lohwɛ̀.”

⁶¹Òhvɛhvɛ munyanà rzìi a mò òhweyà nanù ema, “Ìi Rzàŋgò kòkò, ìmba nà ò òŋgama, ndi inyɛ nà ɛndɛ̀ na àkpànɛ lìtumba la amì hvɔ̀ni.”

⁶²Yerzù à mà mò òhweyà nanù ema, “Tɔ̀ ima mòtò ema a wòtelì lì tiyà èki rzìi a hvɛ̀ŋgɛ ò mburzà, à rza tanɛ̀yi lì gbeyà èwòlò ò rze ya lìkànèyà là ama Lohwɛ̀.”