Read Mokpwe Yòwanìrzɛ̀ 12 Bible Online

Yòwanìrzɛ̀ 12 - Mokpwe bible

Yòwanìrzɛ̀ 12

¹Hweyu hwàmbi ndèŋgàna è Ndèma yà lì Akà Ɔ̀nɛ̀yi e uka, Yerzù à mà ɛ̀ndɛ ò Bɛ̀tanì, èki ema Làrzàrɔ̀rzì à mà lìya, e mòtò ema à mà hvùmùlɛ̀ ò kpelì.

²Hwà mà mò wòŋgìrzɛ̀nɛ̀ jùùmɛ̀ ja lì làa, ema iyɛ Mata à mà òŋgòwànè lì hwa hvùrzùhweyà. Làrzàrɔ̀rzì mɔ̀hvɛ à mà hwɛ mɔ̀kɔ wà awu ema à mà hwɛ èki ya hwèlèelì na Yerzù.

³Rzìi Màlìyɛ̀ à wòwa ilùka rzùrzu jà lìyɔ̀kì là hvɛ̀ɛ̀hvɛ̀ lì andahwɛnɛyi nà wòlì ema wò kòki. Liŋgi lìyɔ̀kì lì mà gbeyàhwɛlɛ ndi nà nàdì.[3] À mà lì nyàlɛ̀ là arzɛ ò matàŋga mà ama Yerzù, rzìi à tìtòwa mataŋgà mà ama Yerzù nà lìhvumbu là eni là mòhvò. Èŋge èrzunju yà hvɛ̀ɛ̀hvɛ̀ è mà nyàlà ò è ndawò yà arzɛ.

⁴Jùdàrzì Ìrzìkalìyɔ̀tɛ̀ mòòkòwèlì mɔ̀kɔ wà ama Yerzù ema mɔ̀ndi à mà hwɛnɛ lì mò àhwirzɛ̀ rzìi à òhwa nanù ema,

⁵“Mamɛ ndèŋgàtɛ̀ hwa rzìi àhwirzɛ̀ lìni lìyɔ̀kì, rzìi hwa wòwa iŋgi kahvà lì ɛndɛ lì ŋgbà mèlìrza mè hwatò e? Ò mà lìni lìyɔ̀ki lì wurzi wòlì wò lì taŋgeya mòtò mɔ̀kɔ ò ŋma mɔ̀kɔ.”

⁶À rzìi òhwe ndi ene eyà èhwanja à mà lutaneya mèlìrza me hwatò gbamù, ndi èhwanja à mà hwɛ ndi ŋmìhwɛ̀. Mɔ̀ ndi à mà òhva lìyamba la wòlì, à mà hwɛ lì a òŋgòwanɛ mɔ̀ ŋmìti na wòŋgò wòlì.

⁷Ndi Yerzù à mà òhwa nanù ema, “Ò mò hwɛ̀mɛ̀ hviyàyii! À ute lìyɔ̀kì ema lì lìyelì, aŋga nanù lì ò gbeyànɛ̀hwɛ̀ ò wùnyà ema nà ò imàyɛ̀lɛ̀hwɛ̀.

⁸Mèlìrza mè hwatò hwa hwèlì nà inyɔ hvònda tɛ, ndi imba nà rza hwɛ nà inyɔ hvònda tɛ.”

⁹Ŋgindi ndɛnɛ ya wònyà Yudà e ma hwèya nanù ema Yerzù a hwèlì ò e mbòwà ya Bɛ̀tanì. O èŋgànɛ̀lɛ̀ hwà mà ɛ̀ndɛ aŋga. Rzekɛ hvɛ tɛ ema Yerzù a hwèlì aŋga ndi ò lì ɛnɛ Làrzàrɔ̀rzì ema Yerzù à mà timbirzɛ ò lòŋgɛ.

¹⁰O èŋgànɛ̀lɛ̀ Ipìlìrzì ndɛnɛ i ma weka ŋmanò ò lì òŋwa hvɛ Làrzàrɔ̀rzì.

¹¹Èhwanja hwatò rzayi-rzayi hwa wònyà Yudà hwà mà hwɛ lì hwa kumbɛ imburza ò lì lòkɛ̀ Yerzù wɔ̀ hwà mà lòkɛ̀ Yerzù lì hvòmɛ̀nɛ̀ mamɛ ema e ma gbèyɛ̀nɛ Làrzàrɔ̀rzì.

¹²O ɛnɛyi eyu, e ŋgìndì ndɛnɛ ema e ma ja ò Ndema ya lì Akà Ɔnɛyi e ma hwèya nanù ema Yerzù a hwèlì a ja ò mbòwà ya Jèrurzalɛ̀mù.

¹³Rzìi hwa kɛ̀ inyàŋgò, hwa ɛ̀ndɛ lì mò ùŋmànɛ̀lɛ̀ ò njiya. Hwa mà hwɛ lì tɛ̀ɛ nanù ema, “Hòrzanà! Mònàmɛ̀ nà è mɔ̀ ema à jelì ò lìnà là ama è Rzàŋgò. Mònàmɛ̀ nà è Kìŋgɛ yà hwatò hwa Irzàyɛ̀lì!”

¹⁴Yerzù à mà ɛnɛ ŋgumà jàkarzì rzìi à jì lìya. Ène eyà è mà gbèyɛ̀nɛ̀ nà òma è tìlahwì ò è Kààtì yà ama Lohwà nanù ema,

¹⁵“Hwatò hwa Rzàyɔ̀nì è rza òka wɔ̀ŋgɔ̀, è ɔ̀ŋgɔ tɛ è Kìŋgɛ yà anyu nà òma è jà, à lìyàyi ò ŋgumà jàkarzì.”

¹⁶Nà òma hwene hweyà hwe mà gbèyɛ̀nɛ̀, hwà-òkòwèlì hwa eni hwa rzi hwe rzɔ̀ŋgìtɛ̀nɛ̀. Ndi nà òma Yerzù à mà hvùmùwè nà èluhwe yà ama Lohwà, rzìi hwa ɔ̀ŋgɛ̀lɛ̀ nanù ema hweyà ema hwe mà gbèyɛ̀nɛ̀ lì hvòmɛ̀nɛ̀ Yerzù, hwe mà lòma lì tìlahwa.

¹⁷È ŋgindi ema è mà hwɛ nà Yerzù è hvònda ema à mà hwɛlɛ Làrzàrɔ̀rzì ò rzɔ̀ŋgɔ̀ rzìi à mò timbirzɛ ò lòŋgɛ, wɔ̀ hwa mà hwɛ lì nyàlirzɛ̀ meŋge meyàŋgò.

¹⁸Lìtìŋga lìŋgi ndèŋgàtɛ̀ è ŋgìndì è mà ɛndɛ lì ùŋmanɛlɛ Yerzù èhwanja hwa mà hwèya nanù ema à gbèye manù mànyakà mà hweyà.

¹⁹Ihvàlìrzàyì rzìi i àwòhwànɛ̀lɛ̀ mɔ̀kɔ nà ɔ̀nɛyi nanù ema, “È ɔ̀ŋgɔ tɔ̀ nàŋgɛ nanù ì rza tànɛyi lì gbeyà tɔ̀ eyà. È rze ya arzɛ e hwèlì e mò òŋgama.”

²⁰Lòŋgò la hwatò hwa Grìki hwà mà hwɛ na hwanɛ̀yi hwatò ema hwà mà ɛ̀ndɛ ò Jèrurzalɛ̀mù lì kanɛ̀ ò e hvònda ya è Ndèma yà lì Aka Ɔ̀nɛyi.

²¹Hwà mà ɛ̀ndɛ òma Hvìlìpì. Hvìlìpì à mà uwɛ̀lɛ̀lɛ̀yi ò e mbòwà ya Bɛ̀trzàyìdà e hwèlì ò erzòòkà ya Gàlìlì. Rzìi hwa mò òhweyà nanù ema, “Ìi rzàŋgò kòkò, i arza lì ɛnɛ Yerzù.”

²²Hvìlìpì à mà ɛ̀ndɛ lì òhweyà Àndèlè. Rzìi wɔ̀ hwahwàkɛ hwa ɛ̀ndɛ lì òhweyà Yerzù.

²³Yerzù rzìi a hwa alàhwɛ̀ nanù ema, “È hvònda e ma uka ema èluhwe ya ama è Ŋmanà wà è Mòtò wà Hwènàmà e hwɛni lì ɛnɛhwɛ.

²⁴Nà e òhweyà e jɔ̀kɛ̀ nanù ema, hvɔ̀ŋgɔ̀ ya mbarzi e lìiya ndi èŋge hvɔ̀ŋgɔ̀ ya ahvɔ̀kɛ mɛnɛ natɛ̀ɛ e ònahwa ò mɔ̀nyɛ̀ rzìi e ŋwa. È ŋwelì tɛ èŋge hvònda ndi e ŋya i hvɔ̀ŋgɔ̀ ja mbarzi jɔ̀ɔjɔ̀ɔ.

²⁵Hwàŋga hwatò ema hwa lìŋgàni lòŋgɛ là awu wɔ̀ hwa lì wɔ̀lɛ̀nɛ̀. È wɔ̀ ema hwa kɔ̀wu lòŋgɛ là awu anù rze hwa lì uta ò lòŋgɛ là gbìndèyà.

²⁶Tɔ̀ ima mòtò ema à nò gbèeyà à àŋgàmɛ̀nɛ̀yi lì hwɛ è mògbèèlì wà ami. Tɔ̀ ima èki ema nà hwèlì è mògbèèlì wa ami mɔ̀ hvɛ à àŋgàmɛ̀nɛ̀yi lì hwɛ aŋga. Tɔ̀ ima mɔ̀ ema à nò gbèèlì, Tatɛ̀ wa ami à mò ŋgbà èluhwe.

²⁷“Nàŋgɛ nanù nà tàkirzɛ̀hwɛ̀yi ò mèèmà mò ami. Ò èŋgànɛ̀lɛ̀ mamɛ nà hwɛnì lì òhwa e? Nà òhwe ndi nanù ema, ‘Tatà ò rzìi emeyà nanù ema mònò mòtàkà ema mò òŋgòlɛyi mò nò ùŋmànɛ̀lɛ̀.’ Jàyɛ̀! Nà rza òhwa nanù, èhwanja ene hvònda yà mòtàkà è ɔ̀ndi nà jɛ̀lɛ̀lɛ̀yi.

²⁸Ìi Tatà, uŋmɛ̀lɛ̀ èluhwe ò lìnà là aŋgɔ̀!” Rzìi lìlò lì òhwa ò ŋmanyu yà lohwà nanù ema, “Nà ŋgbelì lìinà là ami èluhwe, ò èŋgànɛ̀lɛ̀ nà lì ŋgbà hvɛ èluhwe.”

²⁹È ŋgìndì ema è mà tɛ̀mɛ̀ aŋga è mà hwèya lìŋgi lìlò. Lòŋgò là hwatò hwa mà òhwa ndi nanù ema, è ŋgalà à lohwà ndi è kandèlì nanù. Hwanɛ̀yi hwa mà òhwa hwà ama, aŋgèlì yà ama Lohwɛ̀ ndi è mò òhwàni.

³⁰Yerzù rzìi à hwa òhweyà nanù ema, “Rzekɛtɛ ò nyòla yà ami ɔ̀ndeŋgàtɛ̀ lìni lìlò lì òhwi, ndi ò nyòla yà anyu.

³¹O nàŋgɛ nanù e hvònda ene ema Lohwɛ̀ a kàyìrzɛ ene rze. Nàŋgɛ nanù e mòkànèlì wà ene rze a hweni lì kàyìrzɛ̀hwɛ.

³²Nà mà kàrzɛhwɛ tɛ ò ene rze, na rzìima hwatò hwa arzɛ ò nyò ya ami.”

³³(Yerzù à mà òhwa ndì nanù ò lì uŋmɛ̀lɛ̀ e nyayi ya kpelì ema mɔ̀ à mà hwɛnɛ lì ŋwa).

³⁴È ŋgìndì rzìi e mò alàhwɛ̀ nanù ema, “È mbenda ya arzu e jò òhwèlì nanù ema, ‘È Mɔ̀ ema a Ɔ̀kirzɛ̀hwɛ̀yi à hwɛ natɛ̀ɛ nà ò mòlìkɛ̀.’ Nɛ rzɔ ò wa ò tànɛyi lì òhwa nanù ema, ‘È Ŋmanà wa e Mòtò wa Hwènàmà a àŋgàmɛ̀nɛ̀ lì karzɛhwɛ ò ŋmanyu e?’ Njɛnɛ rzɔ a hwèlì ònò ‘Ŋmanà wà è Mòtò wà Hwènàmà e?’”

³⁵Yerzù rzìi à alàhwɛ̀ nanù ema, “Ŋmaye mò hwɛ na inyɔ ò ŋmana hvòka wa hvònda. È ɛ̀ndɛ ò wòrzò nàŋgɛ ema e òhvi mònò ŋmàye, aŋga jììtìtì i rza e lìŋgɛ̀lɛ̀. È mɔ̀ ema ayɛ̀ndɛya ò jìtìtì a rza hwi èki a ɛ̀ndɛ.

³⁶È lòkɛ̀ ŋmàye, nàŋgɛ ema mò hwèlì na inyɔ, aŋga nanù e hwɛ ndi hwàanà hwa ŋmàye.” O mburza hwèyòhwèlì hwe ama Yerzù, rzìi a anjiya aŋga, a ɛndɛ lì utàmà èki ema hwa rzìi tànɛyi lì mò ɛnɛ.

³⁷Tɔ̀ nɛ Yerzù à mà gbeye manù mànyakà ma arzɛ ò marzò ma awu, eŋge ŋgindi e rzi mò lòkɛ̀.

³⁸Ène eyà è mà gbèyɛ̀nɛ ndi ò lì òndìrzɛ̀ hwèyòhwèlì hwe ama è mòòhwèlì wà èlìŋgɛ̀ Àyìrzayà ema hwe òhwa nanù ema, “Rzàŋgò njɛnɛ à lòkɛ̀yi ŋmɛ̀ndì ema irzɔ i mà òhwe e? Njɛnɛ à mà ɛnɛ è ŋginyà yà aŋgɔ rzìi à è embàneyà e?”

³⁹Ò èŋgànɛ̀lɛ̀ hwa rzi tànɛyi lì lòkɛ̀. Àyìrzayà à mò òhwa ò èhvɛhvɛ èki nanù ema,

⁴⁰“Lohwɛ̀ à mà tìmbìrzɛ̀ mììrzɔ̀ mà awu ndima, rzìi à hwa ŋgbà hvɛ mèèmà ema me eti, aŋga nanù hwa rza ɛnɛ, ndèŋgàna hwa rza rzɔ̀ŋgìtɛ̀nɛ̀. Aŋga nanù hwa gbe tɛ nanù hwa nò tìmbeyà òma nà mà hwa wɔ̀wìrzɛ̀.”

⁴¹Àyìrzayà à mà òhwa ndi nanù èhwanja à mà ɛnɛ èluhwe ndɛnɛ yà ama Yerzù ɔ̀ndeŋgàtɛ̀ à mà òhwa lì mò hvòmɛ̀nɛ̀.

⁴²Tɔ̀ nɛ hwatò rzayì-rzayì nà tɔ̀ lòŋgò là hwàmbakì hwa hwatò hwa mà lòkɛ̀ Yerzù. Ndi nà òma hwa mà òke Ihvàlìrzàyì wɔ̀ŋgɔ̀ hwa rzi à uŋmɛ̀lɛ̀ wɔ̀ hwiti, ehwànja hwa mà òka wɔ̀ŋgɔ̀ ema hwa ò hvàyàhwa ò tenì yà è ndawò yà màkanɛ̀.

⁴³Hwa mà hwɛ lì gbeyà nanù èhwanja hwa mà lìŋgàna jeka jà hwatò lì aka è lɔ̀ là ama Lohwà.

⁴⁴Yerzù à mà òhwa ò lìlò lì kàrzami nanù ema, “Tɔ̀ ima mɔ̀ ema à nò lòkɛ̀yì, à rza nò lòkɛ̀yì ndi imba mɛnɛ, ndi à lòkɛ̀yì hvɛ nà e mɔ̀ ema a nò òmi.

⁴⁵Tɔ̀ ima mɔ̀ ema a nò ɛni, a ɛni hvɛ e mɔ̀ ema a nò òmi.

⁴⁶Nà jelì ndi ò rze nàa ŋmàye, aŋga nanù tɔ̀ ima mɔ̀ ema a nò lòkɛ̀yì imba a rzi lììya ò jìtìtì.

⁴⁷Tɔ̀ ima mòtò a hweyi tɛ ŋmɛ̀ndì mò ami, rzìi a rzi mò ika, imba na rza mò kaya èhwanja na rza jelì ndi ò lì kàyìrzɛ̀ e rze ndi na jelì ndi ò lì e rzùŋga hwatò hwa ene rze.

⁴⁸È mòtò ema a nò rzɔ̀rzi rzìi a rzi imanɛlɛ hvɛ ŋmɛ̀ndì mò ami, mɔ̀ à òhvi e mɔ̀ ema a mò kàyìrzɛ̀. È mbɔrzi ema na òhwi yɔ ndi e mò kàyìrzɛ̀ ò wùnyà wò hwèkàyìrzèlèlì.

⁴⁹È ò hwɛ ndi nanù èhwanja na rza òhwa ndi hwene hweyà hwe arzɛ na lìkànèyà la ami. Ndi e Tatɛ̀ ema a nò òmi à mà nò rzèkeya mamɛ ema na hwɛni lì òhwa.

⁵⁰Nà hwi nanù ema tɔ̀ ima lìtumba la eyà ema a nò òhwèlì ema na òhwe lì jànà lòŋgɛ la gbìndèyà. Mamɛ ema na òhwa nanù, e hwèlì ndi mamɛ Tatɛ̀ a nò òhwèlì à mà na òhwe.”