Read Mokpwe Yòwanìrzɛ̀ 13 Bible Online

Yòwanìrzɛ̀ 13 - Mokpwe bible

Yòwanìrzɛ̀ 13

¹O ma kòmbɛ̀nɛ̀ ndi e hvònda ya è Ndèma yà lì Akà Ɔ̀nɛ̀yi. Yerzù à mà hwiya ema e hvònda ya eni e ma kòmbɛnɛ ò mɔ̀ lì hwɛmɛ ene rze, ò lì tìmba ò ma Tatɛ̀. À mà lìŋgàna hwatò hwa rze ema hwà mà mò lòkɛ̀yi. À mà hwa uŋmɛ̀lɛ̀ e ndìŋgɛ natɛ̀ɛ na ò lìrzùkù.

²Yerzù na hwà-òkòwèlì hwa eni hwà mà hwɛ lì laa Mòlèlì mò ŋgòmbe. Mòkarzɛ̀ à mà hwɛ à mà màa lì ika màlùtèyà ma wòhwe ò ŋmèma mo ama Jùdàrzì Ìrzìkalìyɔ̀tɛ̀ ò lì àhwirzɛ̀ Yerzù. Jùdàrzì Ìrzìkalìyɔ̀tɛ̀ à mà hwɛ ndi e ŋmanà wa mùnyanà wa ama Rzìmɔni.

³Yerzù à mà hwiya nanù ema Tatɛ̀ wa eni à mà màa lì mò ika hweyà hwe arzɛ ò màa me eni. A ma hwiya ama à mà uwɛ̀lɛ̀lɛ̀yi ndi ò ma Lohwɛ̀ ndèŋgàna à mà hwɛnɛ ndi lì tìmba òma Lohwɛ̀.

⁴Nà òma hwà mà hwɛ ò lì làa Yerzù rzìi a tɛ̀mɛ̀nɛ ò ŋmanyu, rzìi a ulɛ e kòti ya eni, rzi a akpatɛ nà e tawelì ò wòluwe wò eni.

⁵O mburzà ya nanù, rzìi a rzɔlɛ malìhwa ò tenì ya ewòki ndɛnɛ. Yerzù rzìi a wòteya lì rzòrza mataŋgà mà ama Hwà-òkòwèlì hwa eni. Rzìi à titòwa mataŋgà mà awu na e tawelì ema à mà tìŋgɛ̀ ò wòluwe wò eni ò lì ma embirzɛ.

⁶A ma ùke ò ma Pètrò, rzi Rzìmɔ̀nì Pètrò a mò ijòwa nanù ema, “Ìi Rzàŋgò kòkò, ò arza ndi lì nò rzòrza mataŋgà mà ami e?”

⁷Yerzù rzi a mò alàhwɛ̀ nanù ema, “O nàŋgɛ nanù ò rza tànɛyi lì rzɔŋgìtɛ̀nɛ̀ mamɛ ema na gbeyà, ndi ò mburza hwene hweyà hwe arzɛ o ò rzɔ̀ŋgìtɛ̀nɛ̀.”

⁸Rzìmɔ̀nì Pètrò rzìi a mò timbirzɛlɛlɛ nanù ema, “Jàyɛ̀, Rzàŋgò ò rza tànɛyi lì nò rzòrza mataŋgà mà ami.” Yerzù rzìi a mò òhweyà ama, “Nà rza ò rzòrzi tɛ mataŋgà mà ɔ̀ŋgɔ, ò rza hwɛnɛ tɔ̀ eyà ò lì no gbeyàna imba.”

⁹Rzìmɔ̀nì Pètrò rzìi a timbirzɛlɛlɛ nanù ema, “È hwèlì tɛ nanù Rzàŋgò kòkò, ò rza rzòrza ndi mataŋgà mà ami mɛnɛ, ò rzòrza hvɛ màa na mòòhvò mò ami!”

¹⁰Yerzù rzìi a òhwa nanù ema, “È mòtò ema à mà màa lì ɔkɔ, e nyò ya eni ya arzɛ e rzaŋgi, a rza àŋgàmɛ̀nɛ̀yi lì ɔkɔ hvɛ, e hwɛ ndi ema a rzòrza ndi mataŋgà mà eni mɛnɛ. È ma màa lì rzaŋga ndi rzeketɛ inyɔ hwa arzɛ ndi e rzaŋgi.”

¹¹Yerzù à mà hwiya e mòtò ema à mà hwɛnɛ lì mò àhwirzɛ̀, ɔ̀ndeŋgàtɛ̀ mɔ̀ à mò òhwa ama, rzeketɛ inyɔ hwa arzɛ ndi e rzaŋgi.

¹²Nà òma Mɔ̀ à mà kulɛ lì hwa rzòrza mataŋgà mà awu, rzìi a timbirzɛ e kòti ya eni ò nyò, a tìmba hvɛ ò hwèlìyelì hwe eni. A ma hwa ijòwa nanù ema, “È rzɔ̀ŋgìtɛ̀nɛ̀yi mamɛ na e gbèelì nanù e?”

¹³Inyɔ e nò hwɛlɛ Mòòkòlèlì, na Rzàŋgò, ndèŋgàna e hvòmɛ̀nɛ̀yi, èhwanja nanù ndi imba na hwèlì.

¹⁴Nàŋgɛ ema imba è Rzàŋgò na e Mòòkòlèlì nà mà e rzòrza mataŋgà mà anyu, inyɔ hvɛ e hwɛni lì arzòrzanɛ mataŋgà mà anyu mɔ̀kɔ na ɔ̀nɛyi.

¹⁵Imba na e ŋgbelì embànèlì e ma e hwɛnì lì gbeyà, na òma imba na e gbèelì.

¹⁶Nà è òhweyà ndi è jɔ̀kɛ̀, ò rza enje tɔ̀ mòkutu ema à akayi è rzàŋgò yà eni, tɔ̀ è mòtò ema à òmahwi à rza akayi è mɔ̀ ema à mò òmi.

¹⁷Nàŋgɛ ema è hwi hwenè hweyà, è hwe gbèyi tɛ è nàmìrzɛ̀hwɛ.

¹⁸“Nà rza è òhwàna inyɔ hwa arzɛ. Ndi nà hwi è wɔ̀ ema nà mà hvɔ̀rzɛ̀. Ndi ene eyà è hwèlì ndi nanù, ò lì òndìrzɛ̀ mamɛ è mà tìlahwa ò Kààtì yà Lohwà. È tìlahwì nanù ema, ‘È mòtò ema irzɔ nà mɔ̀ ì làlɛ̀nɛ̀ à nò àyiŋgòwɛ̀lɛ̀lɛ̀yi.’

¹⁹Nà è òhweyà naŋgɛ ndèŋgàna yè è gbèyɛ̀nɛ. Aŋga nanù è gbèyɛ̀nɛ̀yi tɛ inyɔ è ò lòkɛ̀ nanù ema, ‘Imba Nà Hwelì Ndi Njɛnɛ Èma Nà Hwelì.’

²⁰Nà è òhweyà ndi è jɔ̀kɛ̀, tɔ̀ njɛnɛ ema à emelì tɔ̀ ima mɔ̀ è mà na òmi, òma imba ndi à emelì. Ndèŋgànɛ̀lɛ̀ hvɛ e mɔ̀ ema a nò emelì, òma a emelì ndi e mɔ̀ ema à mà nò òma.”

²¹Yerzù à mà kulɛ lì òhwa hwenè hweyà, à mà òhva ndùtù ò ŋmèma mò eni rzìi a òhweyà hwà-òkòwèlì hwa eni gbèegbèe nanù ema, “Nà e òhweyà ndi e jɔ̀kɛ̀, mɔ̀kɔ wa anyu a hwɛnì lì nò akɛlɛ ò màà mà hwàkɔ̀yèlì hwa ami.”

²²Hwà-òkòwèlì hwa eni rzi hwa àyinjànɛ̀ kɔ̀yi-kɔ̀yi mɔ̀kɔ na ɔ̀nɛyi èhwanja wɔ̀ hwa rzìi hwiye e mɔ̀ ema à mà hwɛ lì òhwa lì hvòmɛ̀nɛ̀.

²³Mɔ̀kɔ wà hwaŋga hwànɔ̀ŋgèlì hwa ama Yerzù ema mɔ̀ à mà lìŋgàne rzìi à lììyà ò tòŋgòŋgò yà eni.

²⁴Rzìmɔ̀nì Pètrò rzìi à mò hvɛ̀ŋgɛ̀ mììrzɔ̀ à òhwà nanù ema, “Ò mò ijòwe njɛnɛ à hwèlì è mòtò.”

²⁵Oŋgò mòòkòwèlì rzìi a rzùrzùhweyà lì kòmbɛnɛ Yerzù, a mò ijòwa nanù ema, “Ìi Rzàŋgò, njɛnɛ a hwèlì òŋgò mòtò e?”

²⁶Yerzù rzìi à alàhwɛ̀ nanù ema, “È mòtò ema nà ò tɛ̀tìrzɛ̀ ehvòòtò ema nà ini ò tenì yà ewòki òma mɔ̀ òŋgò.” Nà òma à mà tɔ̀te èhvòòtò ò tenì yà ewòki, rzìi à è ŋgbà Jùdàrzì è ŋmanà wà mùnyanà wà ama Rzìmɔ̀nì Ìrzìkalìyɔ̀tɛ̀.

²⁷Nà òma Jùdàrzì à mà wòwe èŋge èhvòòtò, mòkarzɛ̀ rzìi à mò kpèeyà. Yerzù rzìi à mò òhweyà nanù ema, “Mamɛ ema ò kimi ò lì gbeyà, ò è gbèye karzi-karzi.”

²⁸Ndi tɔ̀ mɔ̀kɔ hwa awu ema à mà lìya ò hwèlèèlì à rzìi rzɔŋgìtɛ̀nɛ mamɛ ndeŋgatɛ Yerzù à mà òhwirzɛnɛ Jùdàrzì nanù.

²⁹Kànatɛ̀ Jùdàrzì ndi à mà hwɛ lì uta wòlì, lòŋgò là Hwà-òkòwèlì hwa mà ɔ̀ŋgɛ̀lɛ̀ ndi nanù ema Yerzù à mà hwɛ ndi lì mò òhweyà ema à ande mamɛ ema è mà arzahwa ò ndèma yà lì aka ɔ̀nɛyi. Tɔ̀ ò lì ŋgbà mèlìrza mè hwatò hwema.

³⁰Nà òma Jùdàrzì ama wòwe èŋge èhvòòtò, a wurza ò èwòka. Ène hvònda hvɛ rzɔ, wùùnya wò ma hwɛ wò ma kɔ.

³¹O mburza ema Jùdàrzì à mà ɛ̀ndɛ, rzìi Yerzù a òhwa nanù ema, “Nàŋgɛ ndi èluhwe ya ama è Ŋmanà wà è Mòtò wà Hwènàmà e ɛneya. Èluhwe ya ama Lohwɛ̀ yɔ hvɛ e ɛnɛhwɛ lì akeyà nà è Ŋmanà.

³²È hwèlì tɛ ema Lohwà a lùwà èluhwe lì akeyà nà è Ŋmanà, nanù òma Lohwà mɔ̀ hvɛ a gbeyà èluhwe ya ama e Ŋmanà e ɛnɛhwɛ.

³³Wònyànyàŋgò wà ami kòkò, nà ò hwɛ ndi nà inyɔ ò ŋmanà hvòka wà hvònda mɛnɛ. Ndi nà òma nà mà òhweyà wònyà Yudà, nanù mɛnɛ ndi nà è òhweyà naŋgɛ nanù ema, ‘Èki ema nà ɛ̀ndɛ, inyɔ è rza tanɛ lì uka aŋga.’

³⁴Mbenda hvènya ene ema nà è ŋgbà naŋgɛ, è alìŋgànɛ mɔ̀kɔ nà ɔ̀nɛyi. Nà òma nà mè lìŋganè, ò èŋgànɛ̀lɛ̀ è hwɛnì lì alìŋganɛ̀ mɔ̀kɔ nà ɔ̀nɛyi.

³⁵È alìŋgànɛ tɛ mɔ̀kɔ na ɔ̀nɛyi, hwatò hwa arzɛ hwa ò hwiya ema inyɔ e hwèlì ndi hwà-òkòwèlì hwa ami.”

³⁶Rzìmɔ̀nì Pètrò rzìi a ijòwa Yerzù nanù ema, “Ìi Rzàŋgò òne ò ɛ̀ndɛ e?” Yerzù rzìi a timbirzɛlɛlɛ nanù ema, “Èki ema na ɛ̀ndɛ, ò rza tànɛyi lì nò òŋgama naŋgɛ, ndi o ò nò òŋgama ò mburzà yà hvònda.”

³⁷Pètrò rzìi à ijòwa nanù ema, “Ìi Rzàŋgò, mamɛ ndeŋgatɛ nà rza tànɛyi lì ò òŋgama naŋgɛ e? Imba nà emelì lì ò ŋwèeyà.”

³⁸Yerzù rzìi à mò tìmbìrzɛ̀lɛ̀lɛ̀ nanù ema, “Ò wòŋgìrzɛ̀nɛ̀yi ò lì nò ŋwèeyà e? Nà òhweyà ndi è jɔ̀kɛ̀ ema ndèŋgàna è mòme wà wùhwa à è tòŋga, ò nò rzɔ̀rzɔ̀ ŋgelì iyàwò.”