Read Mokpwe Yòwanìrzɛ̀ 14 Bible Online

Yòwanìrzɛ̀ 14 - Mokpwe bible

Yòwanìrzɛ̀ 14

¹Yerzù rzìi a òhweyà Hwà-òkòwèlì hwa eni nanù ema, “È rzi keka lì tàkirzɛ mèèmà me anyu. È lòkɛ̀ Lohwɛ̀, e nò lòkɛ̀ imba hvɛ.

²O ndawò ya ama Tatɛ̀ wa ami i tùu i kòki aŋga. Ndèŋgana na ɛ̀ndɛ aŋga ò lì e rzèkeya èki. È rzi hwɛ tɛ nanù, ò ma na rza e òhweyà nanù ema na ɛndɛ lì e rzèkeya èki.

³Ndèŋgana na ɛndi tɛ ò lì e rzèkeya èki ya anyu, na ò tìmba hvɛ ò mburzà ò lì e wòwa ema e hwɛ na imba. Àŋga nanù inyɔ hvɛ e hwɛ ò èki ema na hwèlì.

⁴Inyɔ e hwi e njiya ya èki ema na ɛ̀ndɛ.”

⁵Tɔ̀màrzì à mà ijòwà Yerzù nanù ema, “Ìi Rzàŋgò, irzɔ irza hwi èki ema ò ɛ̀ndɛ, nɛ rzɔ irzɔ i tànɛyi lì hwiya e njiya ema e ɛndɛ aŋga e?”

⁶Yerzù rzìi a alàhwɛ̀ nanù ema, “Imba ndi na hwèlì e njiya ema e ɛndɛ òma Tatɛ̀ wa ami, e jɔ̀kɛ̀ e uwɛ̀lɛ̀lɛ̀yi ndi na imba, imba hvɛ ndi na ŋgbà lòŋgɛ. Tɔ̀ mòtò tɔ̀ mɔ̀kɔ a rza tànɛyi lì jà òma Tatɛ̀ wa ami ema a rza akelɛ na imba.”

⁷Yerzù rzìi a òhweyà hwà-òkòwèlì hwa eni nanù ema, “Nàŋgɛ ema e ma nò hwiyɛ, e hwi hvɛ e Tatɛ̀ ya ami. Liwòteya nàŋgɛ lì ɛ̀ndɛ ò wòrzò, e ma mò hwiya, ndèŋgànɛ̀lɛ̀ hvɛ e ma mò ɛnɛ.”

⁸Hvìlìpì à mà òhwa nanù ema, “Ìi Rzàŋgò, ò jò uŋmɛ̀lɛ̀ Tatɛ̀ èŋge mɛnɛ ndi e jò lòŋgamɛnɛ.”

⁹Yerzù rzìi a mò alàhwɛ̀ nanù ema, “Ìi Hvìlìpì, ò rza nò hwi e? Tɔ̀ nɛ na hwèlì ò ìtììtènì ja anyu ene hvònda ya arzɛ e? È mɔ̀ ema à mà nò ɛnɛ, à mà ɛnɛ Tatɛ̀. Nɛ rzɔ ò wa ò tànɛyi lì tɛ̀mɛ̀ nàŋgɛ rzìi ò òhwa òma, ‘O jò uŋmɛ̀lɛ̀ Tatɛ̀ e?’

¹⁰O rza lòkɛ̀ nanù ema imba na hwèlì ò tenì ya ama Tatɛ̀, ndèŋgànɛ̀lɛ̀ hvɛ Tatɛ̀ mɔ̀ hvɛ a hwèlì ò tenì ya ami e?” Yerzù rzìi a òhweyà hvɛ hwà-òkòwèlì hwa eni nanù ema, “È mbɔrzi ema na e òhweyà e rza uwɛ̀lɛ̀lɛ̀yi na imba. È mbɔrzi ya ami e hwèlì ndi ya ama Tatɛ̀, ema a hwèlì ò tenì ya ami, ema a gbeyà èwòlò ya eni.

¹¹È nò lòkɛ̀yi, na òhwi tɛ nanù ema na hwèlì ò tenì ya ama Tatɛ̀ ndèŋgànɛ̀lɛ̀ hvɛ Tatɛ̀ a hwèlì ò tenì ya ami. È lòkɛ̀yi tɛ eŋge e lòkɛ̀ hvɛ hweyà hwe mànyakà ema na gbeyà.

¹²Nà e òhweyà ndi e jɔ̀kɛ̀. Tɔ̀ ima mɔ̀ ema a nò lòkɛ̀yì, a ò gbeyà hweyà ema na gbeyà. Mɔ̀ a ò gbeyà tɔ̀ hweyà ema hwe akayi hwenè hweyà. Èhwanja imba na ɛ̀ndɛ òma Tatɛ̀.

¹³Ndèŋgànɛ̀lɛ̀ hvɛ, imba na ò gbeyà tɔ̀ mamɛ ema ò ijò ò lìna lì ami, aŋga nanù Tatɛ̀ a ò luwa èluhwe lì akeyà è Ŋmanà wà Munyanà wa eni.

¹⁴È ijòwi tɛ tɔ̀ ima lìtumba la eyà ò lìna là ami, imba na e ò gbeyà e yɔ.”

¹⁵Yerzù rzìi a òhwa hvɛ nanù ema, “È hwèlì tɛ ema e nò lìŋgàni, e hwɛnì lì ika imbenda ja ami.

¹⁶Nà òhweyà Tatɛ̀, ndèŋgànɛ̀lɛ̀ mɔ̀ à e ò ŋgbà ò hvɛhvɛ Moòŋgòwànèlì ema a ò hwɛ na inyɔ ihvònda ja arzɛ.

¹⁷Oŋgò Mòòŋgòwànèlì ndi à hwèlì Èlìŋgɛ̀ ema e wurzirzɛ e jɔ̀kɛ̀ ya ama Lohwɛ̀. Hwatò hwa rze hwa rza tànɛyi lì mò emeyà, èhwanja wɔ̀ hwa rzìi mò ɛnɛ, ndèŋgànɛlɛ hvɛ hwa rza mò hwi. Ndi inyɔ e mò hwi, èhwanja a hwèlì na inyɔ, ndèŋgànɛ̀lɛ̀ hvɛ a ò hwɛ ò tenì ya anyu.[4]

¹⁸Nà ɛndi tɛ, na rza e lìya nàa nyùhwè. O èŋgànɛ̀lɛ̀ na e timbeya.

¹⁹O rza wòwa hvònda hvɛ, e rze e rza ò nò ɛnɛ hvɛ. Ndi inyɔ e nò ɛnɛ. Èhwanja na hwèlì lòŋgɛ, inyɔ hvɛ e ò hwɛ lòŋgɛ.

²⁰Wòŋgò wùnyà wò uki tɛ e ò hwiya nanù ema imba na hwèlì ndi ò tenì ya ama e Tatɛ̀ wa ami, ndèŋgànɛ̀lɛ̀ inyɔ hvɛ e ò hwɛ ndi ò tenì ya ami, nyayi hvɔ̀kɔ na òma imba hvɛ na hwèlì ò tenì ya anyu.

²¹Tɔ̀ njɛnɛ ema a lu imbenda ja ami rzìi a i ika, ò ma mɔ̀ ndi à nò lìŋgàni. È mɔ̀ ema a nò lìŋgàni, a ò lìŋganahwa na Tatɛ̀ wa ami. Imba hvɛ na ò mò lìŋgana, ndèŋgànɛ̀lɛ̀ hvɛ na mò awuŋmɛ̀lɛ̀ imba mbiti.”

²²Jùdàrzì rzìi (rzeketɛ Jùdàrzì Ìrzìkalìyɔ̀tɛ̀) a òhwa nanù ema, “Ndi, ìi Rzàŋgò, mamɛ ndeŋgatɛ ò jò àwuŋmɛ̀lɛ̀ ò wà witi ndi ò rza ò awuŋmɛ̀lɛ̀ e rze e?”

²³Yerzù rzìi a alàhwɛ̀ nanù ema, “Tɔ̀ ima mòtò ema a nò lìŋgàni, a ika hwèyòkòlelì hwe ami. È Tatɛ̀ ya ami e mò lìŋgana, imba na Tatɛ̀ wa ami i mò jèeyà rzìi i lìiya na mɔ̀.

²⁴È mɔ̀ ema a rza nò lìŋgànɛ a rza ika hwèyòkòlèlì hwe ami. Hwenè hwèyòhwèlì ema e hwèya, hwe rza enje e hwe ami. Hwe hwèlì ndi e hwe ama Tatɛ̀ ema à mà nò òma.”

²⁵“Nà e òhweyà hwene hweyà hwe arzɛ na òma na e hwèlì na inyɔ.

²⁶È Moòŋgòwànèlì, Èlìŋgɛ̀ yà Wòtani, ema Tatɛ̀ a e òmeya ò lìna lì ami, a ò e òkòlɛ̀ hweyà hwe arzɛ. Ndèŋgànɛ̀lɛ̀ hvɛ a ò gbeyà e ò ɔ̀ŋgɛ̀lɛ̀ hweyà hwe arzɛ ema nà mà lòmɛ lì e òhweyà.

²⁷Nà e lìyani ɛ̀yɔ̀lɛ̀, ɛ̀yɔ̀lɛ̀ ya ami ndi na e ŋgbelì. Nà rza e ŋgbelì na òma e rze ye e ŋgbà. È rzi keka lì tàkirzɛ mèèmà, ndèŋgàna e rzìi òka wɔ̀ŋgɔ̀.

²⁸È ma hwèya na òma na òhwa nanù ema, ‘Nà e lìyà ndi na e timbeya hvɛ.’ È ma nò lìŋgana tɛ, òma e òki mɔ̀nyɛ̀ŋgì ema, imba na ɛ̀ndɛ ò ma Tatɛ̀, èhwanja Tatɛ̀ ndi à Olò lì nò aka.

²⁹Nà e òhwèlì naŋgɛ ndèŋgàna ye e gbèyɛ̀nɛ, aŋga nanù e gbèyɛ̀nɛ tɛ, ye ò lòkɛ̀yì na lì òhva lì lòkɛ̀ na imba.

³⁰Nà rza òhwa hvɛ na inyɔ hvònda ema e wawi, èhwanja e mòkànèlì wà ene rze a hwèlì a ja. Mɔ̀ a rza nò hwɛnelì tɔ̀ ŋginyà.

³¹Ndi e rze, e hwɛnì lì hwiya ema na lìŋgàni Tatɛ̀ wa ami, ɔ̀ndeŋgàtɛ̀ na hwɛnì ndi lì gbeyà mamɛ ya arzɛ e ma Tatɛ̀ wa ami à mà nò kànèyà ema na gbeye. “È je ja anjiye anù naŋgɛ.