Read Mokpwe Yòwanìrzɛ̀ 16 Bible Online

Yòwanìrzɛ̀ 16 - Mokpwe bible

Yòwanìrzɛ̀ 16

¹“Nà e òhwèlì ndi hwenè hweyà hwe arzɛ aŋga nanù e rza timbeya ò mburza.

²Wɔ̀ hwa ò e hvaya ò tenì ya e ndawò ya màkanɛ̀. Ò jɔ̀kɛ̀, o ò ja hvònda ema tɔ̀ ima mɔ̀ ema a ò e òŋwɛ, a ò ɔ̀ŋgɛ̀lɛ̀ ndi ema a gbèeyà ndi Lohwɛ̀ èwòlò.

³Wɔ̀ wò ò gbeyà ndi hwèŋge hweyà èhwanja, wɔ̀ hwa rzi hwi Tatɛ̀ tɔ̀ imba.

⁴Nà e òhwèlì ndi ene eyà, aŋga nanù, e hvònda e jelì tɛ ema hwene hweyà hwe ò gbèyɛ̀nɛ òma ema ɔ̀ŋgɛ̀lɛ̀ ema nà mà e kòkòwɛlɛ. “Nà rzi lòme lì e òhweyà hwenè hweyà ò hwewòtelì, èhwanja, nà mà hwɛ na inyɔ.

⁵O nàŋgɛ imba na ɛ̀ndɛ òma e mɔ̀ ema à mà nò òma. Ndi tɔ̀ mɔ̀kɔ wa anyu a rzi nò ijòwi ema, ‘One ò ɛ̀ndɛ e?’

⁶È òndi na ndùtù èhwanja na e òhwèlì hwenè hweyà.

⁷Ndi na e òhweyà ndi e jɔ̀kɛ̀. È hwèlì gbamù nanù ema, imba na ɛ̀ndɛ. Èhwanja imba na rza ɛ̀ndi tɛ nanù òma e Moòŋgòwànèlì a rza e jèeyà. Ndi na ɛndi tɛ, na e òmeya e mɔ̀.

⁸Ndì Mɔ̀ a jelì tɛ a e uŋmɛ̀lɛ̀ hwatò hwa ene rze ema lì rzɔŋgìtɛ̀nɛ̀ la awu lì hvòmɛ̀nɛ̀ lì gbeyà la wòhwe na lì gbeyà la hweyà hwe jɔ̀kɛ̀ hwe rza lɔ̀wu. Ndèŋgana wɔ̀ hwa rza ò rzɔŋgìtɛ̀nɛ̀ hwèkayirzelì hwe ama Lohwɛ̀.

⁹Li rzɔ̀ŋgìtɛ̀nɛ̀ lì awu la wòhwe lì rza hvòmɛ̀nɛ̀, èhwanja hwatò hwa rza nò lòkɛ̀.

¹⁰Hwa tòni lì hvòmɛ̀nɛ̀ hweyà ema hwe hwèlì jɔ̀kɛ̀, èhwanja imba na ɛ̀ndɛ òma Tatɛ̀, ndèŋgàna inyɔ e rza ò nò ɛnɛ hvɛ.

¹¹Ndèŋgànɛ̀lɛ̀ hwa tòni hvɛ o lì o hwàanà hwèkàyìrzèlèlì, hwe ama Lohwɛ̀ èhwanja mɔ̀ à mà màa lì kàyìrzɛ̀ e mòkànèlì wà ene rze.”

¹²“Nà hwɛnɛ rzayì-rzayì ja hweyà ò lì e òhweyà, hwe akayi tɔ̀ mamɛ ema e rza tànɛyi lì hwanɛ.

¹³Ndi e Èlìŋgɛ̀ ya jɔ̀kɛ̀ e jelì tɛ, ye e tìmba ò lì hwiya e jɔ̀kɛ̀ ya arzɛ. Mɔ̀ a rza ò òhwa lì hvòmɛ̀nɛ̀ lìkànèyà la eni. Eyà ema hwa mò òhweyà yɔ ndi à ò òhwa, ndèŋgàna a ò e òhweyà hvɛ hweyà ema hwe ò gbèyɛ̀nɛ.

¹⁴Mɔ̀ a nò jàneyà èluhwe ndɛnɛ, èhwanja a ò nò wòwàna mamɛ ema na òhwa rzìi a e òhweyà.

¹⁵Tɔ̀ mamɛ ya arzɛ ema Tatɛ̀ wa ami a òhvi, e hwèlì ndi e ya ami. Ɔ̀ndeŋgàtɛ̀ na e òhweyàyi ema Èlìŋgɛ̀ e ò wòwa mamɛ ema na òhwi rzi a e òhweyà.”

¹⁶“Yerzù rzìi a hwata hvɛ lì òhwa nanù ema, ‘O ŋmanà hvònda e rza ò nò ɛnɛ hvɛ, rzi ò mburzà ŋmanà hvònda hvɛ e ò nò ɛnɛ.’”

¹⁷Lòŋgò la Hwà-òkòwèlì hwa ama Yerzù rzìi hwa ijòwa mɔ̀kɔ na ɔ̀nɛyi nanù ema, “Mamɛ mɔ̀ à ɔ̀ŋgɛ̀lɛ̀ ò lì jò òhweyà nanù ema, ‘O ŋmanà hvònda e rza ò nò ɛnɛ hvɛ, ndèŋgàna ò ŋmanà hvònda hvɛ e nò ɛnɛ.’ Ndèŋgana à mà òhwa hvɛ nanù ema, ‘Èhwanja na ɛ̀ndɛ òma Tatɛ̀.’”

¹⁸Rzi hwa wòteya lì ijòwa nanù ema, “Mamɛ e hwèlì jànda ja mamɛ ema mɔ̀ à òhwa nanù ema, ‘O ŋmanà hvònda e?’ Irzɔ i rza rzɔ̀ŋgìtɛ̀nɛ̀yi mamɛ mɔ̀ à hwèlì a òhwa.”

¹⁹Yerzù à mà àyɛ̀mbɛ̀ ema hwà mà arza ò lì mò ijòwa eyà, ò èŋgànɛ̀lɛ̀ à mà hwa òhweyà nanù ema, “Èya ema na òhwi nanù ema, ‘O ŋmanà hvònda e rza ò nò ɛnɛ hvɛ, ndèŋgànɛ̀lɛ̀, ò mburzà ya ŋmanà ya hvònda hvɛ e ò nò ɛnɛ,’ eyà eŋge ema e hwèlì lì àyijòwànɛ̀ mɔ̀kɔ na ɔ̀nɛyi e?”

²⁰Nà e òhweyà ndi e jɔ̀kɛ̀, e ò èya na lì ɛhwɛ ndi e rze e hwɛ ò mɔ̀nyɛ̀ŋgì. È ò hwɛ ndi rzɔ̀lùu, ndi e rzɔ̀lùu e anyu e ò tìmba ndi mɔ̀nyɛ̀ŋgì.

²¹È mòlanà ema a hwèlì ò lìyalì a arzuumɛ èhwanja e hvònda ya eni ya mòtàkà e ma uka. Ndi e ŋmanà wa eni à mà yahwa tɛ, a ò lìŋga èhwanja ŋmanà a ŋyahwahwi ò rze.

²²Nànu ndi e hwèlì na inyɔ. È arzuumɛ nàŋgɛ ndi na hwɛnì lì e ɛnɛ hvɛ. O eŋge hvònda e òka mɔ̀nyɛ̀ŋgì. Ndèŋgànɛ̀lɛ̀ ò rza enje tɔ̀ mòtò tɔ̀ mɔ̀kɔ ema a wòwa mɔ̀nyɛ̀ŋgì mò anyu.

²³Ò wòŋgò wùnyà è rza ò nò ijòwa hvɛ tɔ̀ eyà. Nà è òhweyà ndi è jɔ̀kɛ̀ ema Tatɛ̀ à è ŋgbà ndi tɔ̀ mamɛ ema è ijò ò lìnà là ami.

²⁴Nàtɛ̀ɛ nà nàŋgɛ è rzi mò ijòwi tɔ̀ yomà ò lìnà là ami. E ijòwa Lohwɛ̀, à ò ŋgbà, òma mɔ̀nyɛ̀ŋgì mò anyu mò mà ònda.

²⁵Yerzù rzìi à òhweyà hwà-òkòwèlì hwa eni hvɛ nanù ema, “Tɔ̀ nɛ nàŋgɛ nà è òhwàna ndi nà è mbɔrzi yà meyànà, è hvònda è hwèlì è jà ema nà rza è òhwìrzɛ̀nɛ̀ hvɛ ò ene tumba yà mbɔrzi, ndi nà è òhweyà ndi nà è mbɔrzi yà rzɛŋgɛ-rzɛŋgɛ lì hvòmɛ̀nɛ̀ Tatɛ̀ wà ami è ŋgàna ema è hweni lì rzɔ̀ŋgìtɛ̀nɛ̀.

²⁶Ò wòŋgò wùnyà yò mò ijòwa tɔ̀ mamɛ ò lìnà là ami. Nà rza ò gba à gba è nyò ò lì òhweyà Tatɛ̀ ò lì è ò òŋgòwànà,

²⁷èhwanja, Tatɛ̀ mɔ̀ ŋmìti à è lìŋgàni. À è lìŋgàni èhwanja è nò lìŋgàni, ndèŋgàna è lòkɛ̀ nanù ema nà uwɛ̀lɛ̀lɛ̀yi ndi nà mɔ̀.

²⁸Nà mà uwɛ̀lɛ̀lɛ̀yi ndi òma Tatɛ̀, rzi nà jà ò rze. Nàŋgɛ nanù imba nà è lìya è rze ò lì ɛ̀ndɛ lì tìmba ò mà Tatɛ̀.”

²⁹Hwà-òkòwèlì hwa eni rzìi hwa òhwa nanù ema, “Nàŋgɛ nanù ò òhwa rzɛŋgɛ-rzɛŋgɛ ò rza òhwàna meyàna.

³⁰O naŋgɛ, irzɔ i hwi ema ò hwi hweyà hwe arzɛ, ò èŋgànɛ̀lɛ̀ ò wa ò rza lùwa tɔ̀ mòtò ema a ò ijòwa miijòwelì. Ène eyà yɔ yiti, e jò gbe irzɔ i lòkɛ̀ ema ò wa ò ma uwɛ̀lɛ̀lɛ̀yi ndi òma Lohwɛ̀.”

³¹Yerzù rzìi à mà hwa alàhwɛ̀ nanù ema, “È lòkɛ̀yi naŋgɛ e?

³²È ɔ̀ŋgɔ tɛ, e hvònda e hwèlì e ja, ndèŋgàna e ma màa lì jàa, ema e ò wùhweyà. Tɔ̀ ima mɔ̀ tɛ a ò hwaŋga lì timba ò èki ema a uwɛ̀lɛ̀lɛ̀yi. È ò nò lìya imba mbiti. Ndi tɔ̀ nanù, na rza enje imba mbiti, èhwanja Tatɛ̀ wa ami a hwèlì na imba.

³³Nà e òhwèlì hwene hweyà, aŋga nanù, e hwɛnɛ ɛ̀yɔ̀lɛ̀ na òma e hwèlì na imba. Anu rze e hwɛnɛ ndi ndùtù. Ndi e kake mèèmà! Imba nà mà màa lì aka e rze ya mɔ̀nyɛ̀.”