Read Mokpwe Yòwanìrzɛ̀ 19 Bible Online

Yòwanìrzɛ̀ 19 - Mokpwe bible

Yòwanìrzɛ̀ 19

¹Pìlatò rzìi a òhwa à mà hwa ɛndɛ hwa tiye Yerzù.

²Hwàànà njùma rzi hwa lìŋgɛ̀lɛ̀ hwèkɔ̀kɔ̀ hwe mayi è mà hwe mà òhva ì njenje, rzìi hwa wèka tamba ema è mà àyɛ̀kɛ̀nɛ̀ ekòòtò rzìi hwa mò wɔ̀tìrzɛ̀ è yɔ̀ ò mòhvò. Rzìi hwa mò wɔ̀tìrzɛ̀ hvɛ mòŋgòmbè mò teya ema mò mà àyɛ̀kɛ̀nɛ̀ mòŋgòmbè mò ama kiŋgɛ̀.

³Hwa mà hwɛ lì ɛndɛ lì mò kòmbɛnɛ, rzìi hwa à mò òhweyà nanù ema, “Kìŋgɛ wà wònyà Yudà Èluhwe è hwɛ nà ò wà.” Hwa mà hwɛ hvɛ lì mò rzama màwumbɛ.

⁴Pìlatò rzìi à wurza hvɛ ò èwòka rzìi à òhweyà hwaŋga hwatò hwa arzɛ nanù ema, “Nà è wùrzìrzɛ̀lɛ̀ è mɔ̀ nàŋgɛ, ndi è hvɔ̀ŋgɛ̀ kɔ̀yi-kɔ̀yi nanù ema nà rza mò lùwànì tɔ̀ njɔ̀mì.”

⁵Yerzù rzìi à wurza ò èwòka nà è tamba yà njenje ò mòhvò mò eni nà mòŋgòmbè mò teya ema hwa mà mò wɔ̀tìrzɛ̀. Pìlatò rzìi à òhwa nanù ema, “È ɔ̀ŋgɔ tɛ è mòtò mɔ̀ ònò!”

⁶Nà òma Ipìlìrzì ndɛnɛ nà hwàgbèèlì hwa Ndawò yà Lohwà hwa mà mò ɛnɛ rzìi hwa wòteyà lì tɛɛ nanù ema, “È mò wòmeyà ò mburza! È mò wòmeyà ò mbarza!” Pìlatò rzi à hwa alàhwɛ̀ nanù ema, “Inyɔ hwiti è mò wòwe è ɛ̀ndɛ, è mò wòmeyà ò mbarza, èhwanja nà rza mò lùwànì tɔ̀ njɔ̀mì.”

⁷Hwàŋga hwatò rzìi hwa tìmbìrzɛ̀lɛ̀lɛ̀ Pìlatò nanù ema, “Ì òhvi mbenda ema jo òhwa nanù ema à hwɛni lì ŋwa èhwanja à òhwa nanù ema mɔ̀ ndi à hwèlì è Ŋmanà wà ama Lohwɛ̀.”

⁸Nà òma Pìlatò à mà hwèye ene eyà à mà lɛ̀mbeya mòkambiya lì aka lìmɛni.

⁹Pìlatò ama timba hvɛ ò mààndà mà eni, rzìi à ijòwa Yerzù nanù ema, “One ò uwɛ̀lɛ̀lɛ̀yi e?” Yerzù à mà kina e ya eni.

¹⁰Pìlatò rzìi à mò ijòwa hvɛ nanù ema, “Ò rza arza lì nò alàhwɛ̀, ò rza embi nanù ema nà hwɛnì wònjà ò lì òhwa ema hwa ò hwɛmɛ e? Tɔ̀ lì òhwa nanù ema hwa ò wòmeyà ò mbarza e?”

¹¹Yerzù à mà alàhwɛ̀ nanù ema, “Ò rza hwɛnì wònjà ò ŋmanyu yà ami natɛ̀ɛ Lohwɛ̀ à ò ŋgbà eŋgè wònjà. Ò èŋgànɛ̀lɛ̀ rzɔ è mɔ̀ ema à nò àkɛ̀lɛ̀lɛ̀ ò màa aŋgɔ̀ à gbèyi wòhwe wò ndɛnɛ.”

¹²Nà òma Pìlatò à mà hwèye nanù rzìi à wòteyà lì arza nɛ à rzòlòhweyà Yerzù ndì hwaŋga hwatò hwa mà tɛ̀ɛ̀ nanù ema, “Ò rzòlòhwì tɛ ònò mòtò, nanù òma ò rza enje yòrza yà ama Kàyìrzà. Tɔ̀ njɛnɛ à ahwɛlɛyi ŋmìti Kìŋgɛ òma à teŋgɛ̀nɛ̀yi Kàyìrzà.”

¹³Nà òma Pìlatò à mà hweye nanù rzìi a wurzana Yerzù ò ewòka rzìi Pìlatò a lìya ò kònda ya lìkànèyà. Èki ema à mà lìya e hwɛ̀lɛ̀hwɛ̀ ndi Maanda ema mà òŋgahwi na Màŋyàyi. O mbɔrzi ya wònyà Hibrù e hwɛ̀lɛ̀hwɛ̀ ndi Gabata.

¹⁴Ène hvònda e ma hwɛ ndi e yaa kɔrzi ya ŋmerze wùùnya ema hwà mà wòŋgìrzɛ̀nɛ̀ è Ndèma yà lì Akà Ɔ̀nɛ̀yi. Pìlatò rzìi a òhweyà hwaŋga hwatò nanù ema, “È Kiŋgɛ ya anyu ene!”

¹⁵Hwàŋga hwatò hwa tɛ nanù ema, “È mò òŋwe! È mò òŋwe! È mò wòmeya ò mbarza.” Pìlatò rzìi a hwa ijòwa nanù ema, “Nà wòmeya e kìŋgɛ ya anyu ò mbarza e?” Ipìlìrzì ndɛnɛ rzìi i tɛ ò ŋmanyu nanù ema, “I rza òhvi ehvɛhvɛ kiŋgɛ̀ lì aka tɛ Kàyìrzà.”

¹⁶Pìlatò rzìi a hwa ŋgbà Yerzù à mà hwa ɛ̀ndɛ hwa mò wòmeya ò mbarza. Àŋga ndi hwà mà wurzana Yerzù.

¹⁷Yerzù ŋmitɛ-ŋmitɛ à mà hwanɛ̀ e mbarza rzìi a e ɛ̀ndɛnɛ èki ema e hwɛ̀lɛ̀hwɛ̀, nanù ema, “Èki ya ekeke ya mèyòhvò” eŋge èki e hwɛ̀lɛ̀hwɛ̀ ndi Gòlgotà ò mbɔrzi ya Hibrù.

¹⁸Àŋga ndi hwa mà mò wòmeyà ò mbarza. Ò mà hwɛ hvɛ hwahvɛhvɛ hwatò hwahwàkɛ̀ ema hwa mà wòmàhwɛlɛ ò mbarza nà mɔ̀. Mɔ̀kɔ è èhvàrzù yɔ̀kɔ ɔ̀nɛyi hvɛ enɛyi è èhvàrzù Yerzù ò ìtììtènì jà awu.

¹⁹Pìlatò rzìi à tìla mòtìla ò ehwambò rzìi à è wòmeyà ò mbarza, ò ŋmanyu teŋyi lì aka èki ema mòòhvò mò ama Yerzù mò mà hwɛ. Mòtìla mò mà hwɛ nanù ema, “Yerzù mòtò wà è mbòwa yà Nàrzarɛ̀tì è Kìŋgɛ yà wònyà Yudà.”

²⁰Èki ema hwa mà wòmeyà Yerzù ò mbarza è mà kòmbɛ̀nɛ̀ è mbòwà ndɛnɛ yà Jèrurzalɛ̀mù. Mòŋgò mòtìla mò mà tìlahwa ndi ò mbɔrzi yà Hibrù, ò mbɔrzi yà Latìnì nà ò mbɔrzi yà Grìki. Ò èŋgànɛ̀lɛ̀ rzayi-rzayi jà hwatò hwa mà laŋga mamɛ ema è mà tìlahwà.

²¹Ipìlìrzì ndɛnɛ rzi ì òhweyà Pìlatò nanù ema, “Ò rzi tìla nanù ema, ‘Kiŋgɛ yà wònyà Yudà,’ ò tìle ndi òma, ‘Onò mòtò à òhwi nanù ema, imba ndi nà hwèlì è Kìŋgɛ yà wònyà Yudà.’”

²²Pìlatò rzìi à timbirzɛlɛ nanù ema, “Nà mà màa lì tìla mamɛ ema nà tìli.”

²³Nà òma hwàanelì hwa njuma hwa mà kulɛ lì wòmeyà Yerzù ò mbarza hwa wòwa ì mbɔti jà eni hwa jì kahwa mòŋgò mànìì mòtò tɛ à wòwa lòŋgò lɔ̀kɔ. Hwa mà wòwa hvɛ è mbɔti ema à mà wɔ̀te ò tenì. Liŋgi lìhwatù lì rzi kɔlɔhwe tɔ̀ èki. Liŋgi lìhwatù lì rzi latahwe lì wòteyà ò ŋmanyu natɛ̀ɛ nà ò rze.

²⁴Àŋga ndi hwa òhwalɛnɛ nanù ema, “I rza lì ŋyàawà. Ja aŋgbe ndi lìnjaŋgà jò ɔ̀ŋgɔ njɛnɛ a lì kùwàna.” Ène ema gbèyɛ̀nɛ ndi ò lì òndìrzɛ̀ mamɛ ema e ma tìlahwa ò Kaàti ya Lohwà nanù ema, “Wɔ̀ hwiti hwà mà a kahwɛnɛ̀ màatù ma ami. Rzi hwa aŋgbaanɛ hvɛ lìnjaŋgà ò lì kawa mòŋgòmbè mò ami.” O èŋgànɛ̀lɛ̀ nanù ndi hwaŋga hwàanà njuma hwà mà gbèye.

²⁵Yerzù nyàŋgɛ, nà nyàŋgɛ ŋmanyàŋgò wà eni, Màlìyɛ̀ jòjìyɛ̀ jà ama Klòpàrzì nà Màlìyɛ̀ Màdàlènì hwa mà tɛ̀mɛ̀ lì kòmbɛ̀nɛ̀ è mbarza yà ama Yerzù.

²⁶Nà òma Yerzù à mà ɛnɛ nyàŋgò yà eni nà è mòòkòwèlì ema à mà lìŋgàne hwa tɛ̀mì aŋga rzìi à òhweyà nyàŋgɛ nanù ema, “Iyàkà è ŋmanà wà aŋgɔ̀ òŋgò.”

²⁷Rzi à òhweyà hvɛ òŋgò mòòkòwèlì wà eni mɔ̀ hvɛ nanù ema, “Nyɔ̀ŋgɛ òŋgò.” Lìwòteyà èŋge hvònda òŋgò mòòkòwèlì à mà wòwa Yerzù nyàŋgɛ ò ndawò yà eni.

²⁸O mburza nanù Yerzù à mà hwiya ema hweyà hwe arzɛ hwe ma kùwa. O lì òndìrzɛ̀ mamɛ e ma tìlahwa ò Kaàti ya Lohwà rzìi mɔ̀ à òhwa nanù ema, “Nà hwèya e nyìrzɛ̀.”

²⁹O ma hwɛ kòmbò aŋga ema e ma ònda na mèkàkò me mimba. Rzìi hwa wòwà e kùcha hwa e ina ò tenì ya màŋga mimba hwa e lìŋgɛlɛ ò wòrzò wò ɛkɔ̀kɔ̀ ya hìrzɔ̀pì rzìi hwa mò rzɔ̀rzɛ̀lɛ̀ eyɔ ò wàna.

³⁰Nà òma Yerzù à mà nyɔ hweŋge hwèkàkò hwe mimba, rzi a òhwa nanù ema, “O ku.” Rzìi à ujɛ mòòhvò rzìi a undɛnɛ.

³¹Wòŋgò wùnyà wò ma hwɛ ndi wùùnya wò mòòŋgòlelì mò Wùnyà wò lì Arziyòlɛ. Wònya Yudà hwa rzi arze nanù ema mòŋgò mìimba mò hwɛ ò mbarza ò Wùnyà wò lì Arziyòlɛ, rze hvɔni na òma wòŋgò wùnyà wò ma hwɛnɛ èluhwe ya tòwòtòwò. Àŋga ndi hwa uŋma Pìlatò nanù ema a hwa ŋgbe wònja ò lì hwɛndɛ meende me hwaŋga hwatò ema hwà mà wòmahwɛlɛ ò mbarza na lì hwa ulɛ ò mbarza.

³²O èŋgànɛ̀lɛ̀ hwàanà njùma rzìi hwa ɛndɛ hwa hwɛndɛ meende me hwaŋga hwatò ema hwà mà wòmahwɛlɛ na Yerzù ò mbarza. Hwà mà lòma lì hwɛndɛ ŋmeende mò mòtò mɔ̀kɔ ndèŋgàna hwa ɛndɛ hvɛ lì hwɛndɛ hvɛ ŋmeende mò ma ɔ̀nɛyi mòtò.

³³Ndi na òma hwà mà je òma Yerzù hwà mà ùŋmanɛlɛ nanù ema à mà màa lì ŋwa, ò èŋgànɛ̀lɛ̀ hwa rzi mò hwɛndɛ meende me eni.

³⁴Ndi tɔ̀ nanù ŋmanèlì wa njuma mɔ̀kɔ à mà mò uŋmana lìyɔ̀ŋgɔ̀ ò tòŋgòŋgò ya eni. Lìwòkìmɛnɛ rzìi màyija na malìhwa rzìi ma wurza.

³⁵È mòtò ema à mà ɛnɛ hwene hweyà na òma hwe ma gbèyɛ̀nɛ à mà tɛ̀mɛ̀ mbòŋgi, ndèŋgàna e mbòŋgi ya eni e hwèlì ndi e jɔ̀kɛ̀. A hwi nanù ema a òhwa ndi e jɔ̀kɛ̀, ndèŋgàna a òhwa ndi hwene hweyà nanù ema inyɔ hvɛ e lòkɛ̀.

³⁶Hwenè hwèya hwà mà gbèyɛ̀nɛ ndi ò lì òndìrzɛ̀ mamɛ ema e ma tìlahwa ò Kaàti ya Lohwà nanù ema, “Tɔ̀ èerze ya eni yɔ̀kɔ e rza hwɛndɛhwɛ.”

³⁷Ndèŋgana è tìlahwì ò Kaàti yà Lohwà nanù ema, “Hwa ɔ̀ŋgɔ è mɔ̀ ema à uŋmahwi lìyɔ̀ŋgɔ̀.”

³⁸Ò mburza yà nanù, Jòrzɛ̀hvù ema à mà uwɛ̀lɛ̀lɛ̀yi ò mbòwa yà Àrìmàtìyà à mà òhweyà Pìlatò nanù ema à mò ŋgbe wònja ò lì wòwa èèmbè yà ama Yerzù. Jòrzɛ̀hvù à mà hwɛ ndi mòòkòwèlì wà ama Yerzù ndi à rza àwùŋmɛ̀lɛ̀ mɔ̀ ŋmìti èhwanja à mà òka hwatò hwa wònyà Yudà wɔ̀ŋgɔ̀. Pìlatò à mà mò ŋgbà è wònjà ò lì wòwa èèmbè yà ama Yerzù. Ò èŋgànɛ̀lɛ̀ à mà ɛndɛ lì wòwa èèmbè yà ama Yerzù.

³⁹Nikòdemòrzi mɔ̀ hvɛ ema à mà lòma lì ɛndɛ lì ɛnɛ Yerzù wuu ama ɛndɛ nà Jòrzɛ̀hvù. Ndèŋgana hwa e ɛndɛ Nikòdemòrzi a wòwa hwèlòŋgìrzànì ema hwe ma gbeyàhwɛnɛ na mayi na alɔrzi ò lì rzeeya mìimbà. Liŋgi lìyɔki lì ma hwɛnɛ mòrzimbɔ mò eyà ya rzàyiyàwò ja kilò na ita.

⁴⁰Hwa mà wòwa ŋmììmbà mò ama Yerzù rzìi hwa mò lìŋgɛ̀lɛ̀nɛ hweŋge hwèlòŋgìrzànì nà lìhwàtù là mbɔ̀mi. Nànù ndi ɛ̀ɛ̀mɛ̀ yà wònyà Yudà ema hwɛ ò lì rzèeyàneyà èèmbè.

⁴¹Èki hwa mò wòmeyà Yerzù ò mbarza è mà kòmbɛ̀nɛ̀ hvaya. Ò mà hwɛ rzɔ̀ŋgɔ hvènya ò tenì yà eŋge hvaya ema è rzìi ikahwi tɔ̀ èembè aŋga.

⁴²Ò èŋgànɛ̀lɛ̀ rzɔ nà òma wòŋgò wùnyà wò mà hwɛ ndi mòòŋgòlelì mò wùnyà wò lì arziyòlɛ, ndèŋgàna èŋge rzɔ̀ŋgɔ̀ ema kòmbɛ̀nɛ̀ aŋga, hwa mà ika ŋmììmbà mò ama Yerzù aŋga.