Read Mokpwe Yòwanìrzɛ̀ 21 Bible Online

Yòwanìrzɛ̀ 21 - Mokpwe bible

Yòwanìrzɛ̀ 21

¹O mburzà hwenè hweyà hwe arzɛ, Yerzù à mà wurzeya Hwà-òkòwèlì hwa eni hvɛ ò mòkòkò mò yulu ya Tibɛlìya. Nànù ndi e ma gbèyɛ̀nɛ,

²Rzìmɔ̀nì Pètrò, Tɔ̀màrzi (e mɔ̀ hwà mà hwɛlɛ Mayɛrzɛ), Nàtaniyɛlì (ema à mà uwɛ̀lɛ̀lɛ̀yi ò mbòwà yà Kèna ò erzòòkà ya Galìlì), hwàànà hwa ama Rzɛ̀bɛ̀dì, na hwahvɛhvɛ Hwà-òkòwèlì hwahwakɛ hwa ama Yerzù hwà mà arzaŋganɛ wɔ̀ hwa arzɛ èki yɔ̀kɔ.

³Rzi Rzìmɔ̀nì Pètrò a hwa òhweyà nanù ema, “Imba na ɛ̀ndɛ ò mòrzòmbò” rzìi wɔ̀ hvɛ hwa mò òhweyà nanù ema, “I ja na ò wa.” Rzìi hwa kpèeyà ò tenì ya wɔlɔ lì ɛ̀ndɛ ò mòrzòmbò ndi wòŋgò wu wa arzɛ hwa rzi lɛ̀mbɛ tɔ̀ yòma.

⁴Nà òma igbe i ma hwɛ lì agba, Yerzù à mà tɛ̀mɛ̀ ò rzàawà ya malìhwa ndi Hwà-òkòwèlì hwa rzi hwiye nanù ema mɔ̀ ndi à tɛmi aŋga.

⁵Yerzù rzìi a hwa ijòwa nanù ema, “Ìi mbunda ja ami, e rzi lɛmbi tɔ̀ yòma e?” Rzìi hwa mò alàhwɛ̀ nanù ema, “Jàyɛ̀, i rza lɛmbi tɔ̀ yòma.”

⁶Rzìi à hwa òhweyà ama, “È aŋgbe e mbunja ya anyu ò èhvàrzù ya anyu ya mòmɛ̀ ya wɔlɔ e lɛ̀mbɛ lòŋgò la nyàmà.” Rzìi hwa aŋgba e mbunja ò eŋge èhvàrzù. Hwa rzi tànɛyi lì rzìima eŋge mbunja èhwanja hwà mà lɛ̀mbɛ nyàmà ja malìhwa rzayì-rzayì.

⁷È Mòòkòwèlì ema Yerzù à mà lìŋgàne, rzìi a òhwà nanù ema, “È hwèlì ndi Rzàŋgò!” È hvònda Rzimɔ̀ni Pètrò à mà hweye nanù ema Rzàŋgò òŋgò, à mà wɔtɔ̀ mòŋgòmbè mò eni (Èhwanja à mà ulɛ màatù ma eni). Rzìi à hvanja, a unda ò tenì ya malìhwa.

⁸Hwanɛyi Hwà-òkòwèlì hwa ama Yerzù hwà mà jà ò rzàawà ya malìhwa na mɔɔlɔ̀ ma awu, rzìi hwa rzìima e mbunja ya awu. Èŋge mbunja e ma ònda na nyàmà ja malìhwa. Èki ema hwà mà wurze na wɔ̀ɔlɔ̀ ò lì uka ò mòkòkò ò rzi rzɔlɛnɛ. È ma hwɛ eyà ya egbe ya mɛta.

⁹È hvònda hwà mà ùke ò rzàawà, hwà mà ɛnɛ mùnya mò kòtahwi na hvindi. Hwà mà ùŋma hvɛ hwèhvòòtò na nyàmà ja malìhwa ò ŋmanyu ya wèkaandò.

¹⁰Yerzù rzìi a hwa òhweyà nanù ema, “È jàne lòŋgò la nyàmà ja malìhwa ema e ma lɛ̀mbɛ.”

¹¹Rzìmɔ̀nì Pètrò à mà kpèeyà ò wɔlɔ rzìi a rzìima èŋge mbunja ò rzàawà. È ma ònda na nyàmà ja malìhwa ndɛnɛ. Iŋgi nyàmà ja malìhwa i ma kòka lì uka egbe na menìmeta me nyàmà ja malìhwa na iyàwò. Tɔ̀ nɛ i ma aka lì kòka, e mbunja e rzi nyàaweya.

¹²Yerzù à mà hwa òhweyà nanù ema, “È je ònò e le.” Tɔ̀ Mòòkòwèlì wa eni mɔ̀kɔ a rzi keke tɔ̀ lì mò ijòwa nanù ema, “Njɛnɛ ò wa ò hwèlì e?” Èhwanja hwà mà hwiya nanù ema mɔ̀ à hwèlì ndi Rzàŋgò.

¹³O èŋgànɛ̀lɛ̀ Yerzù à mà ɛ̀ndɛ aŋga rzìi a wòwa iŋgi nyàmà ja malìhwa na hwèŋge hwèhvòòtò, rzìi a hwa ŋgbà.

¹⁴Ène ŋgèlì ndi e ma ùkirzɛ̀ ŋgèlì iyàwò ema Yerzù à mà wurzeya Hwà-òkòwèlì hwa eni ò mburza ya hwèhvùmùwèlì hwe eni.

¹⁵È hvònda hwà mà kulɛ lì làa rzìi Yerzù a ijòwa Rzìmɔ̀nì Pètrò nanù ema, “Rzìmɔ̀nì e ŋmanà wa ama Yòwanìrzɛ̀ ò nò lìŋgàni lì aka hwanù hwà-òkòwèlì hwa arzɛ e?” Rzìi à mò alàhwɛ̀ nanù ema, “Ɛ̀ɛ Rzàŋgò, ò wa ò hwi òma imba na ò lìŋgàni.” Yerzù rzìi a mò òhweyà nanù ema, “Aŋgòhweya iŋguma ja ami ja mɛ̀lɛ̀ŋgù.”

¹⁶Yerzù rzìi a mò ijòwa hvɛ e ŋgèlì e ma ùkirzɛ̀ ŋgèlì ihwàkɛ nanù ema, “Rzìmɔ̀nì e ŋmanà wa ama Yòwanìrzɛ̀ ò nò lìŋgàni e?” Rzìi à mò alàhwɛ̀ nanù ema, “Ɛ̀ɛ, Ìi Rzàŋgò ò hwi nanù ema imba na ò lìŋgàni.” Rzìi Yerzù a mò òhweyà nanù ema, “Aŋgòhweya mɛ̀ɛlɛ̀ŋgù me ami.”

¹⁷Yerzù rzìi a mò ijòwa hvɛ e ŋgèlì e ma ùkirzɛ̀ ŋgèlì iyàwò nanù ema, “Rzìmɔ̀nì e ŋmanà wa ama Yòwanìrzɛ̀ ò nò lìŋgàni e?” Pètrò à mà tuweya ŋmèma èhwanja Yerzù à mà mò ijòwa e ŋgèlì e ma ùkirzɛ̀ ŋgèlì iyàwò nanù ema, “O nò lìŋgàni e?” Rzìi à alàhwɛ̀ Yerzù nanù ema, “Rzàŋgò ò wa ò hwi hweyà hwe arzɛ, ò hwi nanù ema imba na ò lìŋgàni.” Rzìi Yerzù a mò òhweyà nanù ema, “Aŋgòhweya mɛ̀ɛlɛ̀ŋgù me ami.”

¹⁸“Nà ò òhweyà e jɔ̀kɛ̀ nanù ema e hvònda ema ò wa ò ma hwɛ erzɔmbɛ, ò ma yɔ̀kɔ lì àwòŋgìrzɛ̀nɛ̀ lì ɛ̀ndɛ tɔ̀ ima èki ema ò ma lìŋgàne lì ɛ̀ndɛ, ndi e hvònda uuna, ò enyòwa meyɔ me aŋgɔ̀ ò hvɛhvɛ mòtò a ò tìŋgɛ̀ e rzanja, a ò ɛ̀ndɛnɛ tɔ̀ ima èki ema ò wa ò rza lìŋgànɛ lì ɛ̀ndɛ.”

¹⁹(Yerzù à mà òhwa ndì nanù ò lì uŋmɛ̀lɛ̀ e nyayi ya kpelì ema Pètrò a ò ŋwɛ, ò lì uŋmɛ̀lɛ̀ èluhwe ya ama Lohwɛ̀). Yerzù rzìi a mò òhweyà nanù ema, “Ò nò nɔŋge.”

²⁰Pètrò à mà ɔ̀ŋgɔ ò mburza rzìi à ɛnɛ ɔ̀nɛyi Mòòkòwèlì wà ama Yerzù ema Yerzù à mà lìŋgàne à hwa òŋgama. È mɔ̀ ema à mà lììyà Yerzù ò tòŋgòŋgò è hvònda hwa mà hwɛ lì làa è ŋgòmbe. Mɔ̀ hvɛ ndi à mà ijòwa nanù ema, “Ìi Rzàŋgò njɛnɛ à hwɛnì lì ò àhwirzɛ̀ e?”

²¹È hvònda Pètrò à mà mò ɛnɛ rzìi à ijòwa Yerzù nanù ema, “Ìi Rzàŋgò, nɛ ònò mòtò mɔ̀ hvɛ e?”

²²Yerzù rzìi à mò alàhwɛ̀ nanù ema, “Imba nà arza tɛ ema mɔ̀ à hwɛ lòŋgɛ natɛ̀ɛ nà jà, mamɛ èŋge è ò ɔ̀ŋgɔ e? Ò wà ò nò nɔŋge.”

²³Àŋga ndì è mà òhwàhwè ò ìtììtènì jà hwatò ema hwa mà hwɛ lì nɔŋgɔ Yerzù èki yà arzɛ nanù ema òŋgò Mòòkòwèlì wà eni à rza ŋwa tɔ̀ nɛ Yerzù à rzi òhwe nanù ema à rza ŋwa. À mà òhwa ndì nanù ema, “Nà àrzi tɛ ema à hwɛ lòŋgɛ natɛ̀ɛ nà jà mamɛ eŋge yè è ɔ̀ŋgɔ e?”

²⁴È mòòkòwèlì ò nò ema a tɛ̀mɛ̀ mbòŋgi ya hwene hweyà ndèŋgàna mɔ̀ ndì a hwe tilì. Ndèŋgana i hwi nanù ema tɔ̀ mamɛ a òhwi e hwèlì ndi e jɔ̀kɛ̀.

²⁵O ma hwɛ hvɛ hwehvɛhvɛ hweyà hwe rzayi-rzayi ema Yerzù à mà gbeye. È ma òhwahwa tɛ ema hwene hweyà hwe arzɛ hwe tìlahwì yɔ̀kɔ na enɛyi, na ɔ̀ŋgɛ̀lɛ̀ nanù ema ò rza hwɛ ehvòlò ò e rze ya arzɛ ò lì uta ini kààti.