Read Mokpwe Yòwanìrzɛ̀ 3 Bible Online

Yòwanìrzɛ̀ 3 - Mokpwe bible

Yòwanìrzɛ̀ 3

¹O ma hwɛ mòtìmbèlì mɔ̀kɔ wa wònyà Yudà ema mɔhvɛ à mà hwɛ ndi mòtò wa ehvehva ya Hvàlìrzàyì, à mà hwɛ̀lɛ̀hwɛ̀ ndi Nikòdemòrzi.

²Wuu wɔ̀kɔ à mà ɛ̀ndɛ lì ùŋmanɛlɛ Yerzù rzìi a mò òhweyà nanù ema, “Ìi Mòòkòlèlì, irzɔ i hwi nanù ema ò hwèlì ndi Mòòkòlèlì ema a òmahwi na Lohwɛ̀. O rza enje tɔ̀ mòtò tɔ̀ mɔ̀kɔ ema a tànɛyi lì gbeyà manù mànyakà ma arzɛ ema ò gbeyà e hwèlì tɛ ema Lohwɛ̀ a rza enje na mɔ̀.”

³Yerzù rzìi à mò alàhwɛ̀ nanù ema, “Imba nà ò òhweyà ndi è jɔ̀kɛ̀ ema ò rza enje tɔ̀ mòtò tɔ̀ mɔ̀kɔ ema à ò kpèeyà ò lìkànèyà là ama Lohwɛ̀ à rza ŋyààhwì tɛ mòhvènya.”

⁴Nikòdemòrzi rzìi à mò ijòwa nanù ema, “Nɛ èkòka yà mòtò è ŋyàahwa hvɛ mòhvenyɛ̀hvènyɛ̀ e? A rza tànɛyi lì kpèeyà hvɛ ò ewòni ya ama e nyàŋgò ya eni ò lì ŋyàahwà hvɛ e ŋgèlì e ùkirzɛ̀ ihwàkɛ!”

⁵Yerzù rzìi à mò alàhwɛ̀ nanù ema, “Nà ò òhweyà è jɔ̀kɛ̀ nanù ema, ò rza enje tɔ̀ mòtò ema à tànɛ̀yi lì kpèeyà ò lìkànèyà là ama Lohwɛ̀ natɛ̀ɛ à ŋyàahwà ò malìhwa nà ò Èlìŋgɛ̀.

⁶È mɔ̀ ema à ŋyàahwi nà è nyàmà yà nyò yà mòtò à hwèlì ndi mòtò wà hwènàmà ndèŋgàna è mɔ̀ ema à ŋyàahwi nà Èlìŋgɛ̀ yà Lohwɛ̀ à hwèlì ndi èlìŋgɛ̀.

⁷È rzi tàmà nà òma nà òhweyàyi nanù ema, ‘Mòtò à hwɛnì lì ŋyàahwa hvɛ mòhvènya.’

⁸È mbɛ̀hvɛ̀nì è uŋgɛlɛ èki ema è lìŋgàni. È hwèya nà òma è uŋgɛ̀lɛ̀ ndi è rza tànɛyi lì hwiya òne è uhwɛlɛlɛyi tɔ̀ òne è ɛndɛ. Nànù ndi è hwèlì hvɛ nà tɔ̀ ima mɔ̀ ema à ŋyààhwì nà Èlìŋgɛ̀ yà ama Lohwɛ̀.”

⁹Nikòdemòrzi rzìi à mò ijòwa nanù ema, “Nɛ ene nyayi yà eyà è tànɛyi lì gbèyɛ̀nɛ e?”

¹⁰Yerzù rzìi à mò alàhwɛ̀ nanù ema, “O wa ò hwèlì ndi Mòòkòlèlì mò ndɛnɛ wa wònya Irzàyɛ̀lì ndi ò wa ò rza rzɔ̀ŋgìtɛ̀nɛ̀ hwenè hweyà e?

¹¹Nà e òhweyà e jɔ̀kɛ̀ nanù ema irzɔ jò òhwa ndi mamɛ ema i hwi. I tɛ̀mɛ̀ mbòŋgi ò mamɛ ya arzɛ ema irzɔ i ma ɛnɛ. Ndi tɔ̀ nanù, tɔ̀ mɔ̀kɔ hwa anyu a rzi imanɛlɛ ò lìlòkɛ̀ hweyà ema i hwèlì jò òhwa.

¹²Imba Yerzù na ò òhwèlì lì hvomɛ̀nɛ̀ hweyà hwe rze ndi ò rza nò lòkɛ̀, nɛ ò wa ò tànɛyi lì nò lòkɛ̀ na ò òhwèlì tɛ hweyà hwe ŋmanyu yà lohwà e?

¹³O rza enje tɔ̀ mɔ̀kɔ ema à mà ɛ̀ndɛ ò ŋmanyu ya Lohwà lì aka tɛ è Ŋmanà wà è Mòtò wà Hwènàmà ema a uhwɛlɛlɛ ò ŋmanyu ya Lohwà lì jà ò rze ya mɔ̀nyɛ̀.”

¹⁴Nà òma Mòrzè à mà wòmeyà gbàahwà ò lìwòndì rzìi a lì tɛ̀mìrzɛ̀ ò mòrzanjɛ̀, nanù mɛnɛ hvɛ ndi è Ŋmanà wà è Mòtò wà Hwènàmà a ò tɛ̀mìrzɛ̀hwɛ̀.

¹⁵Ène e gbèyɛ̀nɛ nanù, aŋga nanù tɔ̀ ima mɔ̀ ema a mò lòkɛ̀ a luwa lòŋgɛ la gbìndèyà.

¹⁶Lohwɛ̀ a lìŋgàni hwatò hwa ene e rze ya mɔ̀nyɛ̀ rzayì-rzayì. O èŋgànɛ̀lɛ̀, à mà òma ehvòwà ya eni ya Ŋmanà nanù ema, tɔ̀ ima mɔ̀ ema a mò lòkɛ̀ a rza ŋwa ndi à lùwa lòŋgɛ la gbìndèyà.

¹⁷Lohwɛ̀ à rzi òme è Ŋmanà wà eni ò rze yà mɔ̀nyɛ̀ ò lì kàyìrzɛ̀ hwatò. Ndi à mà mò òma ò lì rzùŋgà hwatò.

¹⁸Tɔ̀ ima mɔ̀ ema à mò lòkɛ̀ à rza tùwa ŋmàŋgò ndi tɔ̀ ima mɔ̀ ema à rza mò lòkɛ̀, mɔ̀ à mà màà lì tùwa ŋmàŋgò èhwanja à rza lòkɛ̀ ehvòwà yà Ŋmanà yà ama Lohwɛ̀.

¹⁹Nànù ndi è mbàkò yà ama Lohwɛ̀ è hwèlì: ŋmàye mò mà jà ò rze yà mɔ̀nyɛ̀ ndi hwatò hwa lìŋgàni ndi jììtìtì lì aka ŋmàye, èhwanja hwègbèèlì hwe awu hwe hwèlì wòhwe.

²⁰Tɔ̀ ima mɔ̀ ema à gbèyi eyà yà wòhwe à kɔ̀wu ŋmàye, à rza jà ò ŋmàye èhwanja à òka wɔ̀ŋgɔ̀ ema hwègbèèlì hwa eni hwe ò wùrzirzɛhwɛ ò èwòka.

²¹Ndi tɔ̀ ima mɔ̀ ema à gbeyà hweyà hwe jɔ̀kɛ̀, à jà ò ŋmàye, aŋga nanù hwatò hwa ɛnɛ ema màmɛ ema mɔ̀ à gbeyà, è uwɛ̀lɛ̀lɛ̀yi ndi nà lì emeyà lì ama Lohwɛ̀.

²²Ò mburzà yà hvònda Yerzù nà Hwà-òkòwèlì hwa eni hwa mà ɛ̀ndɛ ò e erzòòkà ya Jùdeyà. Wɔ̀ hwa arzɛ hwà mà akɛlɛ ŋgurzu ja mèenyà aŋga, rzìi a lùhwìrzɛ̀ hvɛ hwatò aŋga.

²³Yòwanìrzɛ̀ mɔhvɛ à mà hwɛ lì lùhwìrzɛ̀ hwatò ò mbòwa ya Ayɛ̀nɔ̀nì ema e ma kòmbɛ̀nɛ̀ e mbòwa ya Rzàlìmì, èhwanja malìhwà ma mà kòka aŋga. Hwatò hwà mà hwɛ lì mò ɛndeya ò lì lùhwìrzɛ̀hwɛ̀.

²⁴Ène eyà e ma gbèyɛ̀nɛ ndèŋga Yòwanìrzɛ̀ a ikahwa ò hwèwòwà.

²⁵O èŋge hvònda mɛnɛ ò ma wurza hvenda lì teŋgɛ̀nɛ̀ lòŋgò la Hwà-òkòwèlì hwa ama Yòwanìrzɛ̀ na mòtò mɔ̀kɔ hwa wònyà Yudà lì hvòmɛ̀nɛ̀ lìrzàŋgìrzɛ̀ la nyɔ nàa ɛ̀ɛ̀mɛ̀ ya wònyà Yudà.

²⁶Hwà mà jèeyà Yòwanìrzɛ̀ rzìi hwa mò òhweyà nanù ema, “Ìi Mòòkòlèlì kòkò, ò ɔ̀ŋgɛ̀lɛ̀ e mòtò ema à mà hwɛ na ò wa ɔ̀nɛyi èhvarzù ya mòrzò mò Jɔdànì e? È mɔ̀ ema ò ma hwɛ lì òhwa hweyà lì mò hvòmɛ̀nɛ̀. Wa ɔ̀ŋgɔ tɛ! Mɔ̀ ndi à lùhwìrzɛ̀ hwatò nanù! Ndeŋgana rzayi-rzayi ja hwatò hwa mò ɛndeya.”

²⁷Yòwanìrzɛ̀ a timbirzɛlɛlɛ nanù ema, “Tɔ̀ mòtò a rza tànɛyi lì lùwa tɔ̀ yòma e rzi hwɛ nanù ema Lohwɛ̀ ndi à mò ŋgbelì.

²⁸Inyɔ hwiti e tànɛyi e tɛ̀mɛ̀ mbòŋgi e ma na òhwi ema rzeketɛ imba ndi na hwèlì è Mɔ̀ ema à Ɔ̀kirzɛ̀hwɛ̀yi. Nà òmàhwi ndi na Lohwɛ̀ ò wòrzò lì jà lì mò rzɛ̀ŋgɛ̀neyà e njiya.

²⁹Mɔ̀ɔ̀mbì mò hwɛnɛhwi ndi na e mòhwɛ̀nɛ̀ wà mɔ̀ɔ̀mbì. È mbunda ya ama e mòhwɛ̀nɛ̀ wà mɔ̀ɔ̀mbì ema a tɛ̀mɛ̀ ò tòŋgòŋgò ya eni ò lì mò òkànèyà a lìŋga a hweyi tɛ lìlò la eni. Ɔ̀ndeŋgàtɛ̀ màlìŋgò ma ami ma òndi nàŋgɛ.

³⁰Mɔ̀ Yerzù, èluhwe ya eni e hwɛnì lì kàrzɛ̀hwɛ ndi imba èluhwe ya ami e hwɛnì lì rzìhwìrzɛ̀hwɛ.”

³¹È mɔ̀ ema a uhwɛlɛlɛ ò ŋmanyu yà Lohwà, a akayi hwatò hwa arzɛ. È mɔ̀ ema a ŋyààhwì anu rze ya mɔ̀nyɛ̀ a hwèlì ndi wa ene rze, ndèŋgàna a òhwa hvɛ ndi hweyà hwe ene rze. È mɔ̀ ema a uhwɛlɛlɛ ò ŋmanyu yà lohwà, a akayi hwatò hwa arzɛ.

³²Hweyà ema a ɛnɛ na mamɛ ema a hweyà ɔ̀ndi mɔ̀ à òhwa ndi tɔ̀ nanù tɔ̀ mòtò a rza mò lòkɛ̀.

³³Tɔ̀ ima mɔ̀ ema a emeyà mamɛ ema a òhwi, nanù ò ma a emelì na ŋmèma mò eni mò arzɛ ema Lohwɛ̀ a hwèlì ndi Lohwɛ̀ na e jɔ̀kɛ̀.

³⁴È mɔ̀ ema Lohwɛ̀ à mà òme a òhwa eyà ya ama Lohwɛ̀, èhwanja Lohwɛ̀ a ŋgbelì mòtò èlìŋgɛ̀ ya eni ema a rza ɔ̀ŋgɔ ò mburza.

³⁵Tatɛ̀ a lìŋgàni è Ŋmanà wà eni rzìi a ikayi hweyà hwe arzɛ ò màà mà eni.

³⁶Tɔ̀ ima mɔ̀ ema a lòkɛ̀yì òŋgò Ŋmanà wa eni a hwɛnɛ lòŋgɛ la gbìndèyà, ndi tɔ̀ ima mɔ̀ ema a rza gbeyà na òma Mɔ̀ a òhwi, a rza luwa lòŋgɛ la gbìndèyà, a ò timba ndi lì luwa hvɛ e kɔ̀kìrzɛ̀ ya ama Lohwɛ̀.