Read Mokpwe Yòwanìrzɛ̀ 4 Bible Online

Yòwanìrzɛ̀ 4 - Mokpwe bible

Yòwanìrzɛ̀ 4

¹Yerzù a mà hwiya ema Ihvàlìrzàyì hwà mà hwèya nanù ema mɔ̀ à hwèlì a lùwa na lì lùhwìrzɛ̀ rzayì-rzayì ja hwà-òkòwèlì lì aka Yòwanìrzɛ̀.

²(Tɔ̀ nɛ e rzi hwɛ ema Yerzù mɔ̀ ŋmìti ndi à mà hwɛ lì lùhwìrzɛ̀, Hwà-òkòwèlì hwa eni wɔ̀ ndi hwà mà hwɛ lì lùhwìrzɛ̀ hwatò).

³Nà òma Yerzù à mà hwèye nanù, à mà anjiiya ò erzòòkà ya Jùdeyà, rzìi a tìmba hvɛ ò erzòòkà ya Galìlì.

⁴O mɔ̀ lì uka ò Galìlì à mà hwɛnɛ lì akeyà ò èrzòòkà ya Rzàmàrìyà.

⁵O èŋge èrzòòkà ya Rzàmàrìyà à mà uka mbòwà hvɔ̀kɔ ema e hwɛ̀lɛ̀hwɛ̀ Rzika. Ène mbòwa e ma kòmbɛ̀nɛ̀ mɔ̀nyɛ̀ ema Jèkɔ̀bù à mà ŋgbe è ŋmanà wa eni Jòrzɛ̀hvù na e kòòhwa.

⁶O mòŋgò mɔ̀nyɛ̀ ò mà hwɛ ehvɔ̀ndi ya malìhwa. Ène ehvɔ̀ndi ya malìhwa ema hwɛ ndi e ya ama Jèkɔ̀bù. Yerzù mɔ̀ hvɛ na lìŋgi lìyɔ̀tɛ̀ la arzɛ la èŋge yɔ̀ndɔ̀, rzìi a lìya ò rze ò tòŋgòŋgò ya èŋge ehvɔ̀ndi ya malìhwa. O ma hwɛ ndi eyà ya kɔ̀rzì yà ŋmèrze.

⁷Ò mà ja mòlanà mɔ̀kɔ wa Rzàmàrìyà à mà jà ò lì kòòhwa malìhwa, Yerzù rzìi a mò òhweyà nanù ema, “O nò ŋgbe malìhwà mà lì nyɔ.”

⁸(Liŋgi lìrzakò ò ma Hwà-òkòwèlì hwà mà Yerzù hwà mà ɛndɛ ò mbòwà ò lì anda mòlelì).

⁹Oŋgò mòlanà wa Rzàmàrìyà rzìi a mò alàhwɛ̀ nanù ema, “O hwèlì ndi mòtò wà Yudà, imba hvɛ mòlanà wa Rzàmàrìyà. Nɛ rzɔ ò wa ò tànɛyi lì nò ijòwa ema na ò ŋgbee malìhwà mà lì nyɔ e?” (Èhwanja hwatò hwa Yudà hwa rzi lɛ̀ŋgɛ na hwatò hwa Rzàmàrìyà).

¹⁰Yerzù rzìi a mò alàhwɛ̀ nanù ema, “O hwìiyàyì tɛ jàhwèyà ja ama Lohwɛ̀, rzìi ò hwiya hvɛ njɛnɛ ema a òhweyà à mà ò nò ŋgbe malìhwà mà lì nyɔ, ò ma ò wa ò nò ijò malìhwa. Ndèŋgàna ò ma imba na ò ŋgbèelì malìhwa ema mà ŋgba lòŋgɛ.”

¹¹Oŋgò mòlanà rzìi a òhwa nanù ema, “Ìi Rzàŋgò kòkò, ò rza òhvi tɔ̀ yòma ò lì tɔ̀ɔ̀lɛ̀nɛ̀ malìhwa, ndèŋgànɛ̀lɛ̀ hvɛ ehvɔ̀ndi ya malìhwa e rzɔ̀ŋgɔ̀wu. Ima èki rzɔ ò wa ò lùwa manù malìhwa ema mà ŋgba lòŋgɛ e?

¹²È mbamba ya arzu Jèkɔ̀bù hwa kòòhwa mɔ̀ ndi à mà jò lìiya ene ehvɔ̀ndi ya malìhwa. Mɔ̀ hvɛ ŋmìti, hwàanà hwa eni, na hwèembè hwa eni hwe arzɛ anu ndi hwà mà nyɔ̀yèya malìhwa. O èŋgànɛ̀lɛ̀ rzɔ ò arza lì òhwa nanù ema ò wa ò akayi Jèkɔ̀bù e?”

¹³Yerzù rzìi a mò alàhwɛ̀ nanù ema, “Tɔ̀ ima mòtò ema a nyɔ̀lì manù malìhwa, a ò hwɛnɛ nyìrzɛ hvɛ.

¹⁴Ndi tɔ̀ njɛnɛ ema a nyɔ̀lì malìhwa ema imba na mò ŋgba, a rza ò hwɛnɛ ahwɛ̀nɛ̀ nyìrzɛ hvɛ. Maŋga malìhwa ema imba na mò ŋgba, ma hwɛ ndi ò tenì ya eni nàa itùŋgu ema i rza hwànja. Maŋga malìhwà mà mò ŋgba lòŋgɛ la gbìndèyà.”

¹⁵Oŋgò mòlanà à mà òhweyà Yerzù nanù ema, “Ìi Rzàŋgò kòkò, ò nò ŋgbè manù malìhwa, aŋga nanù na rza hwɛnɛ nyìrzɛ na lì jà hvɛ anu ò lì kòòhwa malìhwa.”

¹⁶Yerzù à mà mò òhweyà nanù ema, “Ɛndɛ, ò hwɛlɛ e mòjòmɛ̀ wa aŋgɔ e timbe e jèe anù.”

¹⁷Oŋgò mòlanà à mà mò timbirzɛlɛlɛ nanù ema, “Nà rza òhvi tɔ̀ mòjòmɛ̀” Yerzù à mà mò òhweyà nanù ema, “O hvòmɛ̀nɛ̀yi na òma ò òhwi ema ò rza òhvi tɔ̀ mòjòmɛ̀.

¹⁸È jɔ̀kɛ̀ e hwèlì ndi nanù ema, ò wa ò ma lòma lì òhva mejòmɛ meta. È mùnyanà hvɛ ema òhvi nàŋgɛ a rza enje mòjòmɛ̀ mò aŋgɔ. Mamɛ ema ò uhwa lì òhwa nàŋgɛ nanù e hwèlì ndi e jɔ̀kɛ̀.”

¹⁹Oŋgò mòlanà à mà hweye nanù rzìi a òhweyà Yerzù nanù ema, “Ìi Rzàŋgò kòkò, na ɛnɛ ema ò hwèlì ndi mòòhwèlì wà èlìŋgɛ̀.

²⁰Irzàŋgo ja arzù ima kànɛlɛlɛ ndi ò ŋmanyu ya ene hvàko, ndi inyɔ hwatò hwa Yudà e òhwa ema èki e ma e hwɛnì lì kànɛlɛlɛ mɛnɛ e hwèlì ndi ò Jèrurzalɛ̀mù.”

²¹Yerzù rzìi a mò òhweyà nanù ema, “Mòlanà kòkò rzɔ̀ŋgìtɛ̀nɛ̀ gbamù mamɛ ema na òhweyà. È hvònda yò ò jà ema inyɔ e rza ò kànɛlɛlɛ Tatɛ̀ ò ene hvàko tɔ̀ ò Jèrurzalɛ̀mù.

²²Inyɔ hwatò hwa Rzàmàrìyà e kànɛlɛlɛ mamɛ ema e rza hwiyɛ. Ndi irzɔ wònyà Yudà i kànɛlɛlɛ mamɛ ema irzɔ i hwi. Èhwanja lì òŋgirzɛhwɛ lì uhwɛlɛlɛyi ndi na hwatò hwa Yudà.

²³Ndi tɔ̀ nanù, e hvònda e hwèlì e jà, ndèŋgànɛ̀lɛ̀ e ma màa lì jà, ema hwàkànɛ̀lèlì hwa jɔ̀kɛ̀ hwa ò kànɛlɛlɛ Tatɛ̀ ò Èlìŋgɛ̀ na ò jɔ̀kɛ̀. Lini lìtumba la hwatò lɔ̀ ndi Lohwɛ̀ a arza nanù ema hwa mò kànɛlɛlɛ.

²⁴Lohwɛ̀ a hwèlì ndi Èlìŋgɛ̀ ndèŋgànɛlɛ hwàkànɛ̀lèlì hwa eni hwa àŋgàmɛ̀nɛ̀yi ndi lì mò kànɛ ò Èlìŋgɛ̀ na e jɔ̀kɛ̀.”

²⁵Oŋgò mòlanà rzìi a òhwàna Yerzù nanù ema, “Nà hwi ema è mɔ̀ ema à Ɔ̀kirzɛ̀hwɛ̀yi a hwɛnì lì jà. Mɔ̀ a jelì tɛ, a jò telɛlɛ hweyà hwe arzɛ.”

²⁶Yerzù rzìi a mò òhweyà nanù ema, “Imba ema na ò òhwìrzɛ̀nɛ̀ nanù, na hwèlì ndi mɔ̀.”

²⁷Liŋgi lìrzakò mɛnɛ Hwà-òkòwèlì hwà mà Yerzù, rzìi hwa tìmba ò lì mò ùŋmanɛlɛ. Wɔ̀ hwà mà tàmà ò lì ùŋmanɛlɛ Yerzù mɔ̀ ndi à hwèlì a òhwìrzɛ̀nɛ̀ e mòlanà. Ndi tɔ̀ mɔ̀kɔ wa awu a rzi ijòwe nanù ema, “Mamɛ ò arza e?” Tɔ̀ “Mamɛ ndeŋgatɛ ò òhwìrzɛ̀nɛ̀ ònò mòlanà e?”

²⁸Oŋgò mòlanà rzìi, a rzɔnjɛ̀lɛ̀ itɛŋgɛ ja eni ja malìhwa aŋga. A tìmba lì ɛ̀ndɛ ò mbòwà rzìi a òhweyà hwatò nanù ema,

²⁹“È jèe, è ɔ̀ŋgɔ è mòtò ema à mà nò òhweyà tɔ̀ ima eyà ema nà mà gbeyɛ. Rzeke è Mɔ̀ ema à Ɔ̀kirzɛ̀hwɛ̀yi ònò ema jà ambɛ̀lɛ e?”

³⁰Hwatò hwa mà anjiya ò mbòwà rzìi hwa tòmba ò lì ɛnɛ Yerzù.

³¹Ò ene hvònda Hwà-òkòwèlì hwa eni hwa mà hwɛ lì mò rzòrzòmeyà nanù ema, “Ìi Mòòkòlèlì, làa yòma.”

³²Ndi mɔ̀ à mà hwa alàhwɛ̀ nanù ema, “Nà òhvi mòlèlì mò lì làa, ema inyɔ è rza hwiyɛ hvɛ tɔ̀.”

³³Hwà-òkòwèlì hwa eni rzìi hwa òhwanɛ̀lɛ mɔ̀kɔ nà ɔ̀nɛyi nanù ema, “Ò hwèlì mòtò ema à mò jànèlì mòlelì e?”

³⁴Yerzù rzìi à hwa òhweyà nanù ema, “Mòlèlì mò ami mò hwèlì ndi ò lì gbeyà hwètɛ̀yìrzèlèlì hwa ama è mɔ̀ ema à nò òmi.” Ndèŋgànɛ̀lɛ̀ nà hwɛnì lì kùlɛ̀ èwòlò yà eni.

³⁵Rzeke inyɔ è òhwa nanù ema, “Gbɛ̀ndɛ inɛyi hvɛ, ò mà lì rzàŋga là è mbòtà e? Nà è òhweyà ema è lìhvòhwè mìirzɔ̀ ma anyu, è ɛnɛ nà òma è mbòtà è mà òŋwɛ ò lì rzàŋgahwa ò mèyòndà.

³⁶Tɔ̀ nàŋgɛ nanù, è mòrzàŋgèlì wa mbòtà a lùwa ìitàŋgi ja eni, mɔ̀ à rzàŋga e mbòta ya lòŋgɛ la gbìndèyà, aŋga nanù e mɔ̀ ema a òni e mbòtà, nà è mɔ̀ ema à rzàŋga è mbòtà wɔ̀ hwahwàkɛ hwa ò òka mɔ̀nyɛ̀ŋgì.

³⁷Ɔ̀ndeŋgàtɛ̀ hweyòhwèlì ema hwe òhwa nanù ema, ‘Mɔ̀kɔ à òna ndèŋgàna ɔ̀nɛyi mɔhvɛ a rzàŋga e mbòtà,’ hwe òhwa ndi è jɔ̀kɛ̀.

³⁸Nà ma ò òma ò lì ɛ̀ndɛ lì rzàŋga e mbòtà ema ò rzi òne. Hwahvɛhvɛ hwatò hwa gbeyà èwòlò, ndi ò wa rzɔ ò hwèlì lì lùwa mònàmɛ̀ mò èwòlò ya awu.”

³⁹Hwatò rzayi-rzayi hwa Rzàmàrìyà ema hwa mà uhwɛlɛlɛ ò eŋge mbòwà hwa mà lòkɛ̀ Yerzù èhwanja ò è mbɔrzi yà ama òŋgò mòlanà à mà hwa òhweyà. Oŋgò mòlanà à mà hwa òhweyà nanù ema, “À mà nò òhweyà hweyà hwe arzɛ ema nà mà gbèyɛ.”

⁴⁰Ène ŋgàna è mà gbeyà ema nà òma hwatò hwa Rzàmàrìyà hwa mà mò jèeyà, hwa mò rzòrzòmeyà nanù ema, à jè ò mbòwa yà awu. Ò èŋgànɛ̀lɛ̀ mɔ̀ à mà lìya nà wɔ̀ hweyu hwehwakɛ.

⁴¹Hwahvɛhvɛ hwatò rzayì-rzayì hwa Rzàmàrìyà hwa mà mò lòkɛ̀ èhwanja ò hwèyòkòlèlì hwe eni.

⁴²Wɔ̀ hwa mà òhweyà òŋgò mòlanà nanù ema, “Rzeketɛ ò hweyà mɛnɛ ema ò jò òhwèlì ɔ̀ndeŋgàtɛ̀ ì lòkɛ̀ Yerzù, ndi ì rzɔ hwiti hvɛ ì mà hweyàna nà màtò mà arzu, ndèŋgànɛ̀lɛ̀ hvɛ, ì hwi nanù ema mɔ̀ ndi à hwèlì è Mòrzùŋgèlì wà ene rze yà mɔ̀nyɛ̀.”

⁴³O mburzà hwèŋge hweyu hweahwakɛ Yerzù à mà anjiya ò erzòòkà ya Rzàmàrìyà, a ɛ̀ndɛ ò erzòòkà ya Galìlì.

⁴⁴Yerzù mɔ̀ ŋmìti à mà hwɛ ama òhwa ama mòòhwèlì wà èlìŋgɛ̀ a rza ŋgbààhwà èluhwe ò mbòwà yà èni.

⁴⁵Nà òma mɔ̀ à mà ùke ò erzòòkà ya Gàlìlì, hwatò hwà mà mò kàrzɛ. Wɔ̀ hwà mà mò kàrzɛ èhwanja hwà mà ɛnɛ mamɛ ya arzɛ ema mɔ̀ à mà gbeye ò ndèma yà lì Akà Ɔnɛ̀yi ò mbòwà ya Jèrurzalɛ̀mù, èhwanja wɔ̀ hvɛ hwà mà ùkeya aŋga.

⁴⁶Ŋgelì hvɔ̀kɔ hvɛ, mɔ̀ à mà jà hvɛ ò mbòwà yà Kenà ò èki ema mɔ̀ à mà eŋgòwe malìhwa ò lì tìmba mimba. Àŋga òma rzɔ, ò mà hwɛ mòkànèlì mɔ̀kɔ wà lìkànèyà, ema è ŋmanà wà eni à mà nàŋgana mòrziyò ò mbòwà yà Kàpɛ̀nàwɔ̀mì.

⁴⁷Nà òma ònò mòtò à mà hwèye ema Yerzù à mà anjiya ò erzòòkà yà Jùdeyà, ema à mà uka ò erzòòkà yà Galìlì, à mà mò ɛndèya, à mò rzòrzòmeyà ema à ɛndɛ nà mɔ̀ à wɔ̀wìrzɛ̀ è ŋmanà wà eni, ema à mà kòmbɛ̀nɛ̀ è kpelì.

⁴⁸Yerzù rzìi à mò òhweyà nanù ema, “È rza lòkɛ̀! Nàtɛ̀ɛ inyɔ hwanù hwatò è ɛnɛ hwèèmbànèlì nà mànyàka.”

⁴⁹Oŋgò mòkànèlì wà lìkànèyà rzìi à òhwa nanù ema, “Ìi Rzàŋgò kòkò, jà, jè ɛndɛ ndèŋgàna è ŋmanà wà ami à è ŋwa”

⁵⁰Yerzù à mà mò alàhwɛ̀ nanù ema, “Ɛ̀ndɛ è aŋgɔ. È ŋmanà wà aŋgɔ wà mùnyanà à ò hwɛ lòŋgɛ.” Onò mòtò à mà lòkɛ̀ Yerzù è mbɔrzi yà eni rzìi à ɛ̀ndɛ è yà eni.

⁵¹Nà òma mɔ̀ à mà hwɛ ò njiya yà eni yà yɔ̀ndɔ yà hwètìmbèlì, à mà tàneyà hwàgbèèlì wà eni ema hwa mà mò òhweyà nanù ema, “È ŋmanà wà eni à hwèlì lòŋgɛ.”

⁵²Àŋga ndi à hwa ijòwa nanù ema, ima lìrzakò ema è ŋmanà wà eni wà mùnyanà à mà amàmùwànɛ̀ e? Hwa mà mò òhweyà nanù ema, “È ŋgɔwu è mà mò hwɛmɛ ŋgɛ̀ŋgi hvɔ̀kɔ yà ŋmèrze mò ŋmɛ̀lɛ ema è mà aka.”

⁵³Àŋga ndi è rzàŋgò yà è ŋmanà à àyɛ̀mbɛ̀ ema lìŋgi lìrzakò mɛnɛ lɔ̀ ndi Yerzù à mà mò òhweyà nanù ema, “È ŋmanà wà aŋgɔ wà mùnyanà à ò hwɛ lòŋgɛ.” Ò èŋgànɛ̀lɛ̀ rzɔ mɔ̀ nà mòndèŋge mò eni mò arzɛ mò è ndawò hwa mà mò lòkɛ̀.

⁵⁴Ène embànelì hvɛ yɔ̀ ndi è mà ùkirzɛ̀ hwèèmbànèlì hwehwakɛ ema Yerzù à mà gbèye, nà òma mɔ̀ à mà uhwɛlɛlɛ ò erzòòkà yà Jùdeyà rzìi à jà ò erzòòkà yà Galìlì.