Read Mokpwe Yòwanìrzɛ̀ 7 Bible Online

Yòwanìrzɛ̀ 7 - Mokpwe bible

Yòwanìrzɛ̀ 7

¹O mburzà hwenè hweyà, Yerzù à mà lìŋgòwa hweki nà hweki ò erzòòkà ya Galìlì. A rza arze lì ɛndɛ ò erzòòkà ya Jùdeyà èhwanja lìkànèyà la wònyà Yudà lì ma kàkɛ̀nɛ̀ lì mò òŋwa.

²Nàŋgɛ è Ndema yà Mawòòndò[2] ya wònyà Yudà ema kòmbɛ̀nɛ̀.

³O èŋgànɛ̀lɛ̀ Yerzù wònyanyàŋgò hwa eni hwa mò òhweyà nanù ema, “Anjiya anù, ò ɛ̀ndɛ̀ ò erzòòkà ya Jùdeyà, aŋga nanù hwatò ema hwa ò òŋgama hwa ɛnɛ hwèwòlò hwe mànyakà ema ò gbeyà.

⁴Tɔ mòtò a rzà gbeyà èwòlò ò jututa e hwèlì tɛ ema arza ema e hwiyahwe. Nà òma ò gbeyà hwene hweyà hwe arzɛ ò gbeye è rze ya arzɛ e hwiye.”

⁵(Yerzù wònyanyàŋgò hwa eni hwa rzi mò lòkɛ̀).

⁶Yerzù rzìi a hwa timbirzɛlɛlɛ nanù ema, “È hvònda ya ami e rzi uki. Ndi inyɔ è hvònda ya anyu e hwèlì ndi tɔ̀ ima hvònda.

⁷È rze e rza tànɛyi lì e kɔ̀u ndi è nò kɔwu imba èhwanja nà è rzàmbà nanù ema è gbeyà wòhwe.

⁸Inyɔ è ɛ̀ndɛ ò ndèma. Imba nà rza ɛ̀ndɛ èhwanja è hvònda ya ami e rzi uki.”

⁹Yerzù à mà kulɛ lì òhwa nanù àma lìya ò Galìlì.

¹⁰Ndi ò mburzà hvònda ema Yerzù wònyanyàŋgò hwa eni hwa mà ɛ̀ndɛ ò Ndèma ya Mawòòndò, mɔ̀ hvɛ rzìi a ɛ̀ndɛ aŋga. Ndi a rza uŋmɛ̀lɛ̀ mɔ̀ ŋmìti. A ma ɛndɛ nyayi ema hwatò hwa rzi hwiye e nyayi ya mòtò ema mò a hwèlì.

¹¹Lìkànèyà la wònyà Yudà lì ma hwɛ lì mò àrza ò ndèma, rzìi hwaà wòteya lì ijòwa nanù ema, “One mɔ̀ à hwèlì e?”

¹²O ìtììtènì ja eŋge ŋgindi ema e mà hwɛ ò ndèma lòŋgò la hwatò hwa mà hwɛ lì òhwa nanù ema, “À hwèlì ndi mòtò wà gbamù,” ndi hwahvɛhvɛ hwà mà òhwa nanù ema, “Jàyɛ̀, a ɔnjɔ ndi hwatò.”

¹³Ndi tɔ̀ mɔ̀kɔ wa awu a rzi tànɛyi lì òhwa tɔ̀ eyà lì mò hvòmɛ̀nɛ̀, èhwanja hwà mà òka lìkànèyà la wònyà Yudà wɔ̀ŋgɔ̀.

¹⁴È ndèma e ma kòmbɛnɛ lì uka ò ìtììtènì, Yerzù à mà ɛ̀ndɛ ò Ndawò yà Lohwà rzìi a wòteya lì òkòlɛ̀.

¹⁵Lìkànèyà là ama wònyà Yudà lì ma tameya hwèyòkòlèlì hwe eni. Rzìi hwa ijòwa nanù ema, “Nɛ a hwiyelì hwenè hweyà hwa arzɛ ema a rza ɛndɛ ò rzukulu ya mbenda e?”

¹⁶O èŋgànɛ̀lɛ̀ Yerzù à mà hwa alàhwɛ̀ nanù ema, “Hwèyòkòlelì ema na òkòlɛ hwe rza enje e hwe ami, ndi e uwɛ̀lɛ̀lɛ̀yi ndi na e mɔ̀ ema a nò òmi.

¹⁷Ndi tɔ̀ ima mɔ̀ ema arza lì gbeyà lì emeyà lì ama Lohwɛ̀ a ò hwiya ŋga hwèyòkòlèlì hwe ami hwe uwɛ̀lɛ̀lɛ̀yi ndi òma Lohwɛ̀, ŋga ò è wònjà ya amì.

¹⁸Tɔ̀ ima mòtò ema a òhwà na è wònjà ya eni a gbeyà ndi nanù ò lì arzɛlɛ èluhwe na mɔ̀ ŋmìti. Ndi e mɔ̀ ema a arza èluhwe ya e mɔ̀ ema a mò òmi, a hwèlì ehve-ehve a rza enje mòtò ema a kɔwu hweyà.

¹⁹È rza enje e jɔ̀kɛ̀ nanù ema Mòrzè à mà e ŋgba imbenda e? Tɔ̀ nɛ tɔ̀ mɔ̀kɔ wa anyu a rza ika ini mbenda. Mamɛ rzɔ ndèŋgàtɛ̀ e arza lì nò òŋwa e?”

²⁰Rzìi e ŋgìndì e timbirzɛlɛlɛ nanù ema, “Yerzù ò òhvi èlìŋgɛ̀ ya wòhwe! Hwa njɛnɛ hwa arza lì ò òŋwa e?”

²¹Yerzù rzi a hwa òhweyà nanù ema, “Nà mà gbeyà eyà ya mànyakà yɔ̀kɔ ndi inyɔ hwa arzɛ e ma nò tàmeyà.

²²Mòrzè à mà e ŋgba mbenda à mà e endà hwàanà hwa anyu (Tɔ̀ nɛ e rza enje nanù ema Mòrzè mɔ̀ ndi à mà e wòteyà. Imbamba ja anyu jɔ ndi i ma e wòteyà). O èŋgànɛ̀lɛ̀ e ende hwatò ò Wùnya wò lì Arzìyòlɛ̀.

²³È hwèlì tɛ ema mòtò à endàhwà ò wùnyà wò lì arziyòlɛ, aŋga nanù ò ma hwà mà unda e mbenda yà ama Mòrzè. Yaa mamɛ ndèŋgàtɛ̀ e nò tatana èhwanja na wɔ̀wìrzɛ̀ mòtò ò wùnyà wò lì arziyòlɛ e?

²⁴È rzìi kàyìrzɛ̀ tɔ̀ mamɛ ema na gbeyà na òma e ɛni, ndi e kàyìrzɛ̀ na òma e arzahwɛlɛ.”

²⁵Lòŋgò là hwatò ema hwà mà hwɛ lì lìya ò Jèrurzalɛ̀mù rzìi hwa wòteya ò lì àyijòwànɛ̀ mɔ̀kɔ na ɔ̀nɛyi nanù ema, “Rzekɛ ònò mòtò ndi hwa hwèlì lì keka ò lì òŋwa e?

²⁶Ɔ̀ŋgɔ a tɔ̀yìrzɛ na hwatò ò mòtèyi, ndi hwàmbaki hwa hwatò hwa rza mò òhwìrzɛ̀nɛ̀ tɔ̀ eyà. Ŋga hwa hwi na e jɔ̀kɛ̀ nanù ema mɔ̀ ndi à hwèlì è Mɔ̀ ema à Ɔ̀kirzɛ̀hwɛ̀yi!

²⁷Ndi e rza tànɛyi lì hwɛ mɔ̀, èhwanja i hwi nanù ema e hvònda ema è Mɔ̀ ema à Ɔ̀kirzɛ̀hwɛ̀yi à ò jɛ̀ɛ̀, tɔ̀ mòtò a rza ò hwiya èki ema a ò uwɛ̀lɛ̀lɛ̀yi. I hwi òne ònò mòtò a uwɛ̀lɛ̀lɛ̀yi.”

²⁸Nà òma Yerzù a mà hwɛ lì òkòlɛ̀ ò Ndawò yà Lohwà, rzìi a kàrzɛ lìlò la eni a òhwa nanù ema, “Ɛ̀ɛ e nò hwi jɔ̀kɛ̀-jɔ̀kɛ̀, rzi e hwi hvɛ èki ema nà uwɛ̀lɛ̀lɛ̀yi. Ndi nà rza jelì anù ò imba mbiti. È mɔ̀ ema a nò òmi à hwèlì è jɔ̀kɛ̀. È rza mò hwi,

²⁹Ndi nà mò hwi èhwànja nà uwɛ̀lɛ̀lɛ̀yi ndi ò mbe eni, mɔ̀ ndi à nò òmi.”

³⁰Nà òma à mà òhwe nanù, hwa keka ò lì mò ŋgbaŋgɛ, ndi tɔ̀ mɔ̀kɔ à rzi mò hwàkɛ lìya ò nyò ya eni, èhwanja è hvònda ya eni e rzi ùke.

³¹Ndi tɔ̀ nanù rzayì-rzayì ja hwatò ò ìtììtènì ja èŋge ŋgìndì hwa mà mò lòkɛ̀. Wɔ̀ hwà mà hwɛ lì òhwa nanù ema, “È Mɔ̀ ema a Ɔ̀kirzɛ̀hwɛ̀yi a jelì tɛ, a ò gbeyà hwèmbànèlì hwe mànyakà ema hwe ò aka hwenè hweyà ema ònò mòtò amà gbeyà e?”

³²Ihvàlìrzàyì hwà mà hweye na òma hwatò hwa àyiŋgòwɛ̀ ò lì òhwa hwene hweyà lì hvòmɛ̀nɛ̀ Yerzù. O èŋgànɛ̀lɛ̀ wɔ̀ na Ipìlìrzì ndɛnɛ hwà mà òma hwakutu hwa e Ndawò yà Lohwà ò lì ŋgbaŋgɛ Yerzù.

³³Ndi Yerzù à mà hwa òhweyà nanù ema, “Nà hwèlì nà inyɔ ndi ŋmanà mbɔ, na timba òma e mɔ̀ ema à nò òmi.

³⁴Ò mburza hvònda è ò nà àrzà, ndi è rza ò nò ɛnɛ, ndèŋgànɛlɛ èki hvɛ ema nà ò hwɛ̀ɛ è rza ò tànɛyi lì uka aŋga.”

³⁵Èŋge eyà è mà gbeyà hwatimbelì hwa wònyà Yudà hwa ijòwànɛ̀ mɔ̀kɔ nà ɔ̀nɛyi nanù ema, “One ònò mòtò à arza lì ɛndɛ ema irzɔ ì rza ò tànɛyi lì mò ɛnɛ e? À arza ndi lì ɛndɛ ò èkòmè yà Grìki ema hwatò hwa arzu hwa hwèlì e? Ò lì òkòlɛ hwatò hwa Grìki e?

³⁶À òhwi ama jò ò mò arza ndi ì rza ò mò ɛnɛ. Ndèŋgana ì rza ò tànɛyi lì uka ò èki ema mɔ̀ à ò ɛndɛ. Mamɛ mɔ̀ à ɔ̀ŋgɛ̀lɛ̀ e?”

³⁷Wùnyà wò lìrzukù wò e ndèma ema wò ma hwɛ wùnyà wò menya wò ma uka. Yerzù à mà tɛ̀mɛ̀nɛ ò ŋmanyu rzìi a òhwa na lìlò lì karzami nanù ema, “Tɔ̀ ima mɔ̀ ema a hwèya e nyìrzɛ̀ ya malìhwa, a nò jèeya a nyɔ.

³⁸È mɔ̀ ema a nò lòkɛ̀ è Kààtì ya Lohwà e òhwi nanù ema, ‘Merzò me malìhwà mà lòŋgɛ me ò mò wurza ò tenì ya eni.’”

³⁹Yerzù à mà hwɛ ndi lì òhwa, lì hvòmɛ̀nɛ̀ Èlìŋgɛ̀ yà Wòtani. Èŋge Èlìŋgɛ̀ yà Wòtani yɔ ndi hwaŋga hwatò ema hwà mà mò lòkɛ̀yì hwà mà hwɛnɛ lì ŋgbahwa. O lìŋgi lìrzakò ò ma Èlìŋgɛ̀ yà Wòtani e rzi hwa ŋgbàhwi èhwanja ò lìŋgi lìrzakò ò ma Lohwɛ̀ a rzi uŋmɛ̀lɛ̀ èluhwe ya ama Yerzù.

⁴⁰Nà òma lòŋgò la hwatò ò tenì ya eŋge ŋgindi hwà mà hweye hweyà ema Yerzù à mà òhwe, wɔ̀ hwà mà òhwa nanù ema, “Nà è jɔ̀kɛ̀ ònò mòtò a hwèlì ndi e mòòhwèlì wà èlìŋgɛ̀.”

⁴¹Lòŋgò la hwahvɛhvɛ hwatò hwa mà hwɛ ndi lì òhwa nanù ema, “À hwèlì ndi è Mɔ̀ à Ɔ̀kirzɛ̀hwɛ̀yi.” Tɔ nɛ, lòŋgò hvɛ hwà mà hwɛ ndi lì òhwa nanù ema, “Ndi è Mɔ̀ ema à Ɔ̀kirzɛ̀hwɛ̀yi à rza tànɛyi lì uwɛ̀lɛ̀lɛ̀yi ò Galìlì.

⁴²È tìlahwì ò Kaàti ya Lohwà ema, è Mɔ̀ ema à Ɔ̀kirzɛ̀hwɛ̀yi a hwɛnì ndi lì ŋyaahwɛlɛ ò mòtende mò òma Dàhwitì, ò mbòwa ya Bɛtlɛ̀hɛmù ema Dàhwitì a mà uwɛ̀lɛ̀lɛ̀yi.”

⁴³O èŋgànɛ̀lɛ̀ rzɔ e ŋgìndì ema akahwanɛ lì mò hvòmɛ̀nɛ̀.

⁴⁴Lòŋgò la hwatò hwà mà arza lì mò ŋgbaŋgɛ ndi tɔ̀, mòtò a rzi mò hwàkɛ lìyà.

⁴⁵O lìrzùkù hwàkutu hwa è Ndawò yà Lohwà hwà mà tìmbe ò ma e pìlìrzì ndɛnɛ na Ihvàlìrzàyì. Rzìi e pìlìrzì ndɛnɛ na Ihvàlìrzàyì hwa hwà ijòwa nanù ema, “Mamɛ ndeŋgatɛ e rza mò jàni anù e?”

⁴⁶Rzìi hwàkutu hwa e Ndawò yà Lohwà hwa òhwa nanù ema, “I rzi hweyi wùnyà ema mòtò à mà òhwɛ nàa ò nò mòtò a òhwi.”

⁴⁷Rzìi Ihvàlìrzàyì i hwa ijòwa nanù ema, “Ène ŋgàna e hwèlì ndi nanù ema òŋgò mòtò à mà e lukɛlɛ inyɔhvɛ e?

⁴⁸È ma màà lì ɛnɛ mòtìmbèlì mɔ̀kɔ tɔ̀ Hvàlìrzàyì mɔ̀kɔ ema à mò lòkɛ̀ e? Tɔ̀ mɔ̀kɔ a rza mò lòkɛ̀.

⁴⁹Ène ŋgìndì e rza hwi e mbenda ya ama Mòrzè. O èŋgànɛ̀lɛ̀ rzɔ èwòma e hwèlì na wɔ̀.”

⁵⁰Mòtò mɔ̀kɔ wa Hvàlìrzàyì ema à mà hwɛ̀lɛ̀hwɛ̀ Nikòdemòrzi, ema à mà lòma lì ɛndɛ lì ɛnɛ Yerzù rzìi a hwa òhweyà nanù ema,

⁵¹“È mbenda ya arzu e rza jo ŋgbelì wònjà ema i kɔ̀kìrzɛ̀ mòtò ema i rza mò kàyìrzɛ ò lì òkànèyà eyà ema a gbeyi.”

⁵²Rzìi hwa òhwa nanù ema, “Wàhvɛ o uwɛ̀lɛ̀lɛ̀yi ndi ò Gàlìlì e? O arze ò Kààtì ya ama Lohwà ò ɛnɛ ò wà witi ema tɔ̀ Mòòhwèlì wà èlìŋgɛ̀ a rzi uwɛ̀lɛ̀lɛ̀yi ò Gàlìlì.”

⁵³O mburza nanù tɔ̀ ima mòtò à mà timba ò ndawò ya eni.