Read Mokpwe Yòwanìrzɛ̀ 9 Bible Online

Yòwanìrzɛ̀ 9 - Mokpwe bible

Yòwanìrzɛ̀ 9

¹Nà òma Yerzù à mà hwɛ lì ɛ̀ndɛ, à mà ɛnɛ mòtò mɔ̀kɔ ema à mà hwɛ ndima lì wòteya ò hwè ŋyàawèlì hwe eni.

²Hwà-òkòwèlì hwa eni rzìi hwa mò ijòwa nanù ema, “Ìi Mòòkòlèlì, wòhwe wò ama njɛnɛ wò gbèyi ndèŋgàtɛ̀ ònò mòtò à mà ŋyàahwànà e ndima e? È ma hwɛ ndi wòhwe wò eni, ŋga e wò ama e rzàŋgò ya eni na e nyàŋgò ya eni ndèŋgàtɛ̀ à mà ŋyàahwà nanù e?”

³Yerzù rzìi a hwa alàhwɛ̀ nanù ema, “Rzeketɛ wòhwe wò eni tɔ̀ na e wò ama rzàŋgò wa eni na e nyàŋgò ya eni ndèŋgàtɛ̀ a ŋyàahwi nanù. A ma ŋyàahwà ndi na ndima aŋga nanù e ŋginyà ya ama Lohwɛ̀ e ɛneya ò lòŋgɛ la eni.

⁴Nà òma ŋmerze mò wùùnya wò hwèlì nanù, irzɔ hwa arzɛ i hwɛnì lì gbeyà èwòlò e jò ŋgbàahwì na e mɔ̀ ema a nò òmi. Nàŋgɛ ema wùùnya wa a kɔ ema tɔ̀ mòtò a rza tanɛ lì gbeyà èwòlò.

⁵Nà òma na hwèlì anu rze, imba ndi na hwèlì ŋmàye mò rze.”

⁶Ò mburza hwene hweyà, à rzɔ hwèyɔlì ò rze, à tuka hwèyɔlì hwe eni ò mɔ̀nyɛ̀ rzi hwe tìmba lìrzanja. À wòwa lìŋgi lìrzanja à nyàlɛ̀ òŋgò mòtò wà ndima ò mirzɔ̀.

⁷Rzìi Yerzù à mò òhweyà ama, “Ɛndɛ ò rzòrze wòrzò wò aŋgɔ̀ ò ituŋgu ja Rzìlàwòmi” (jànda ja Rzìlàwòmi i hwèlì ndi nanù ema, “Lì òma.”) O èŋgànɛ̀lɛ̀ òŋgò mòtò à mà ɛ̀ndɛ rzìi a rzòrza mìirzɔ̀ ma eni, à mà tìmba, rzìi a ɛnɛ.

⁸Hwatò ema hwà mà lìya lì mò kòmbɛ̀nɛ̀ ema hwà mà mò ɛnɛ nanù ema à mà hwɛ ndi mòtò wa ndima, hwà mà àyijòwànɛ̀ mɔ̀kɔ na ɔ̀nɛyi nanù ema, “Rzeke ònò mòtò ònò ema a yɔki lì lìya lì ɔmbɔɔ e?”

⁹Lòŋgò la hwatò hwa òhwa nanù ema, “Mɔ̀,” hwanɛ̀yi hvɛ hwà mà òhwa nanù ema, “Jàyɛ̀! Rzeketɛ mɔ̀, a mò àkɛ̀nɛ̀ lì àkɛ̀nɛ̀.” Rzìi òŋgò mòtò mɔ̀ ŋmìti à mà òhwa nanù ema, “Imba.”

¹⁰Hwà mà mò ijòwa nanù ema, “Mamɛ e gbèyɛ̀nɛ, ema ò ma wòteyà lì ɛnɛ e?”

¹¹A ma hwa òhweyà nanù ema, “È mòtò ema hwa hwɛlɛ Yerzù a tùki marzanja rzìi à nò nyàlɛ̀ è mɔ̀ ò mìirzɔ̀ mà ami,” rzìi à nò òhwèlì nanù ema, “Ɛ̀ndɛ ò ituŋgu jà malìhwa mà Rzìlàwòmi ò rzòrze wòrzò wà aŋgɔ̀, nà mà ɛ̀ndɛ rzìi nà wò rzòrza, rzìi nà wòteyà lì ɛnɛ.”

¹²Hwa mò ijòwa hvɛ nanù ema, “One Yerzù mɔ̀ à hwèlì?” Rzìi à hwa alàhwɛ̀ nanù ema, “Imba na rza hwi.”

¹³Hwà mà wòwa òŋgò mòtò ema à mà ŋyahwana ndima rzìi hwa mò ɛ̀ndɛ̀nɛ̀ òma Ihvàlìrzàyì.

¹⁴Wùùnyà ema Yerzù à mà gbeyàne marzanja ò lì mò wɔ̀wìrzɛ̀ wò ma hwɛ ndi Wùnya wò lì Arzìyòlɛ̀.

¹⁵Ihvàlìrzàyì rzìi ji ijòwa òŋgò mòtò ema à mà ŋyaahwɛnɛ e ndima nanù ema, “Mamɛ e gbèyɛ̀nɛ e ma ò wòtelì lì ɛnɛ e?” A ma hwa òhweyà nanù ema, “A nò nyàlɛ marzanja ò mìirzɔ̀ ma ami, nà mà rzòrze wòrzò wò ami rzìi na wòteyà lì ɛnɛ.”

¹⁶Lòŋgò la Ihvàlìrzàyì rzìi hwa wòteya lì òhwa nanù ema, “È mòtò ema a gbèyi ene eyà a rza tànɛyi lì uwɛ̀lɛ̀lɛ̀yi òma Lohwà, èhwanja a rza ika e mbenda ya Wùnyà wò lì Arzìyòlɛ̀.” Rzìi hwanɛ̀yi hwa wòteya lì òhwa nanù ema, “Nɛ mòtò ema a hwèlì mòtò wa wòhwe a tànɛyi lì gbeyà ini nyayi ja mànyakà ma eyà e?” Hwà mà akahwanɛ̀ wɔ̀ na wɔ̀.

¹⁷Ihvàlìrzàyì rzìi hwa ijòwa òŋgò mòtò hvɛ nanù ema, “O òhwi nanù ema a ò wɔ̀wìrzɛ̀ e ndima ya aŋgɔ̀. O èŋgànɛ̀lɛ̀ mamɛ ò tànɛyi lì òhwa lì mò hvòmɛ̀nɛ̀ e?” Oŋgò mòtò rzìi a hwa alàhwɛ̀ nanù ema, “Yerzù a hwèlì ndi Mòòhwèlì wà èlìŋgɛ̀.”

¹⁸Hwatò hwa wònyà Yudà hwa rzìi lòkɛ̀ nanù ema òŋgò mòtò à mà lòma lì hwɛ ndima. Ène eyà e ma gbeyà ema hwa hwɛlɛ e rzàŋgò na e nyàŋgò ya eni.

¹⁹Rzìi hwa hwà ijòwa nanù ema, “È ŋmanà hwa anyu wa mùnyanà ònò ema inyɔ e òhwa nanù ema à mà ŋyàahwɛnɛ ndima e? Nɛ rzɔ e hwɛlɛlɛyi nanù ema a ɛnɛ nàŋgɛ e?”

²⁰Rzàŋgɛ na nyàŋgɛ wa eni rzìi hwa alàhwɛ̀ nanù ema, “I hwi nanù ema a hwèlì ndi e ŋmanà hwa arzu wa mùnyanà, i hwi hvɛ nanù ema à mà ŋyàahwàna ndima.

²¹Ndi i rza hwi mamɛ e gbèyɛ̀nɛ ndèŋgàtɛ̀ a ɛnɛ nàŋgɛ, i rza hwi hvɛ tɔ̀ njɛnɛ a mò wɔ̀wìrzɛ̀yi ò e ndima ya eni. È mò ijòwe a uki mòkèka ema a tanɛ lì alàhwɛ̀ mɔ̀ ŋmìti.”

²²Rzàŋgò na nyàŋgò wa eni hwà mà òhwa ndi nanù èhwanja hwà mà òka hwatò hwa lìkànèyà là wònyà Yudà wɔ̀ŋgɔ̀. Hwatò hwa wònyà Yudà hwà mà òhwa nanù ema tɔ̀ ima mɔ̀ ema a òhwi nanù ema Yerzù ndi à hwèlì è Mɔ̀ ema à Ɔ̀kirzɛ̀hwɛ̀yi, hwa mò hvaya ò ndawò ya màkanɛ̀.

²³Ɔ̀ndeŋgàtɛ̀ rzàŋgò ya eni na nyàŋgò ya eni hwà mà òhwa nanù ema, “A ma uka mòkèka ema a tànɛyi lì alàhwɛlɛ mɔ̀ ŋmìti!”

²⁴È ŋgèlì e ùkirzɛ̀ ihwàkɛ rzìi hwaŋga hwatò hwa wònyà Yudà hwa hwɛlɛ hvɛ òŋgò mòtò ema à mà ŋyàahwàna e ndima, rzìi hwa mò òhweyà nanù ema, “O lìna la ama Lohwɛ̀ òhwa e jɔ̀kɛ̀ ya aŋgɔ̀. I hwi nanù ema ònò mòtò ema a ò wɔ̀wìrzɛ̀ a hwèlì ndi mòtò wa wòhwe.”

²⁵Òŋgò mòtò rzìi a hwa alàhwɛ̀ nanù ema, “Nà rza hwi ŋga ònò mòtò a hwèlì ndi mòtò wa wòhwe tɔ̀ a rza enje mòtò wa wòhwe. Èya yɔ̀kɔ ema na hwi e hwèlì ndi nanù ema, nà mà hwɛ ndima ndì ò nàŋgɛ nanù na ɛnɛ.”

²⁶Rzìi hwa mò ijòwa nanù ema, “Mamɛ à mà gbeye rzìi ò wòteyà lì ɛnɛ e?”

²⁷Rzìi à hwa alàhwɛ̀ nanù ema, “Nà ma lòma lì e òhweyà, ndi e rzi nò lòkɛ̀. Mamɛ ndèŋgàtɛ̀ e arza lì hwèya hvɛ e? Inyɔ hvɛ e arza lì hwɛ Hwà-òkòwèlì wa eni e?”

²⁸Rzìi hwa mò hwɛnyɛ yòlì rzìi hwa òhwa hvɛ nanù ema, “O wa ndi ò hwèlì e mòòkòwèlì wa ama òŋgò mòtò, ndi irzɔ i hwèlì ndi Hwà-òkòwèlì hwa ama Mòrzè.

²⁹I hwi nanù ema Lohwɛ̀ à mà òhwìrzɛ̀nɛ̀ Mòrzè, ndi i rza hwi òne ònò mòtò a uwɛ̀lɛ̀lɛ̀yi.”

³⁰Oŋgò mòtò a hwa alàhwɛ̀ nanù ema, “Rzekɛ eyà ya hwètàmirzelì ene! È rza hwi òne a uwɛ̀lɛ̀lɛ̀yi ndi à nò wɔ̀wìrzɛ̀ ò ene ndima yà ami!

³¹I hwi nanù ema Lohwɛ̀ a rza alàhwɛ̀ màkanɛ̀ ma hwatò hwa wòhwe, ndi à alàhwɛ̀ ndi màkanɛ̀ ma hwatò ema hwa mò ŋgba èluhwe na lì gbeyà mamɛ ya arzɛ ema a arza.

³²Liwòteya ò hwewòtelì hwe ene rze, e rzi hweyàhwì tɔ̀ wùnyà ema ò hwèlì mòtò ema a wɔ̀wìrzɛ̀ mòtò ema a ŋyàhwɛ̀nɛ̀yi ndima.

³³Onò mòtò ema a nò wɔ̀wìrzɛ̀yi a rzi hwɛ tɛ mòtò wa Lohwà òma a rza tànɛyi lì gbeyà ene nyayi ya eyà.”

³⁴Iŋgi Ihvàlìrzàyì rzìi ì mò alàhwɛ̀ nanù ema, “O ma ŋyàahwà ndì ò wòhwe rzì ò òŋgeya hvɛ ò tenì ya wòhwe, rzìi nàŋgɛ wa arza lì jò òkòlɛ̀ e?” Rzìi hwa mò hvaya ò ndawò ya màkanɛ̀.

³⁵È hvònda ema Yerzù à mà hweyà nanù ema hwà mà hvaya òŋgò mòtò ema à mà wɔ̀wìrzɛ̀ ò e Ndawò ya màkanɛ̀, rzìi a mò arza. Nà òma à mà mò ɛnɛ, rzìi a mò ijòwa nanù ema, “O lòkɛ̀ è Ŋmanà wà è Mòtò wà Hwènàmà e?”

³⁶Oŋgò mòtò rzìi a mò alàhwɛ̀ nanù ema, “Rzàŋgò kòkò, njɛnɛ a hwèlì è Ŋmanà wà è Mòtò wà Hwènàmà ònò òhweyà aŋga nanù imba na mò lòkɛ̀.”

³⁷Yerzù rzìi a òhwa nanù ema, “Ò mà màa lì mò ɛnɛ, mɔ̀ ndi à ò òhwìrzɛ̀nɛ̀ nàŋgɛ nanù.”

³⁸Oŋgò mòtò rzìi a mò timbirzɛlɛlɛ nanù ema, “Ìi Rzàŋgò na lòkɛ̀yì,” rzìi a rzùmeya Yerzù màwɔ̀ŋgɔ̀ŋgɔ̀ ò wòrzò ò lì mò ŋgbà èluhwe.

³⁹Yerzù a òhwa nanù ema, “Imba na jelì ndi anù rze lì kaya, aŋga nanù i ndima ja ɛnɛ, rzìi hwaŋga ema hwa ɛnɛ hwa hwɛ ndima.”

⁴⁰Lòŋgò là Ihvàlìrzàyì hwà mà hwɛ aŋga na mɔ̀, hwà mà hwèya na òma Yerzù à mà òhwe hwenè hweyà rzìi hwa mò ijòwa nanù ema, “I lòkɛ̀ nanù ema jànda ja ene mbɔrzi i rza òhwi ndi nanù ema irzɔ hvɛ i hwèlì ndima e?”

⁴¹Yerzù rzìi a alàhwɛ̀ nanù ema, “È ma hwɛ tɛ ndima, òma e rza òhva wòhwe, ndi na òma e alɛ̀ŋgɛ ema e ɛnɛ, e uŋmɛ̀lɛ̀ ndi nanù ema e òhvi wòhwe nanù mɛnɛ.”