Read Mokpwe Hwègbèèlì 1 Bible Online

Hwègbèèlì 1 - Mokpwe bible

Hwègbèèlì 1

¹Ìi Tìyòhvilɔ̀rzì: Ò e kààtì ya ami yà wòrzò ema nà mà lòme lì ò tìleya, nà mà tìla lì hvòmɛ̀nɛ̀ hweŋge hweyà hwe arzɛ, ema Yerzù à ma hwɛ lì gbeyà na ò lì òkòlɛ̀ hwatò. A ma gbeyà ndi hwene hweyà hwe arzɛ lì wòteyà e hvònda ema a wòtelì èwòlò ya eni,

²natɛ̀ɛ na e hvònda ema Lohwɛ̀ a mà mò gbeeyà ò lì ɛndɛ ò ŋmanyu yà lohwà. Ndèŋgàna a e ɛndɛ ò ŋmanyu yà lohwà, a mà gbeyàna e ŋginyà ya èlìŋgɛ̀ yà wòtani, ò lì òhweyà hwatò ema à mà hvɔ̀rzè nàa i àpɔ̀rzìtòlò ja eni hweyà ema hwà mà aŋgàmɛ̀nɛ̀yi lì gbeyà.

³Lìwòteyà e hvònda ema Yerzù à mà ŋwe, ò lì uka meni menii me mèenyà à mà àwuŋmɛ̀lɛ̀ i àpɔ̀rzìtòlò ja eni mɔ̀ ŋmìti ŋgèlì rzayì-rzayì, ò lì uŋmɛ̀lɛ̀ nanù ema ò jɔ̀kɛ̀ a hwèlì lòŋgɛ. Hwà mà mò ɛnɛ a òhwa lì hvòmɛ̀nɛ̀ lìkànèyà là ama Lohwɛ̀.

⁴Ò wùnyà wɔ̀kɔ ema hwa mà arzàŋgànɛ, ò hwèlèèlì hwe awu nà mɔ̀, rzìi à hwa kòkòhwɛ̀lɛ̀ kɔ̀yi-kɔ̀yi nanù ema, “È rzi keka lì anjiya anù mbòwà ya Jèrurzalɛ̀mù, ndi e ambɛ̀lɛ̀ natɛ̀ɛ è lùwa jàhwèyà ema Tatɛ̀ wa ami à mà è kàkɛ̀nɛ̀. Iŋgi jàhwèyà ndi nà mà lòme lì è òhwèyà.

⁵Yòwanìrzɛ̀ à mà lùhwìrzɛ̀ ndi nà malìhwa ndi ò ŋgùrzu jà mèènyà ema mè ò jɛ̀ɛ̀ è lùhwìrzɛ̀hwɛ̀ ndi nà Èlìŋgɛ̀ yà Wòtani.”

⁶Wùnyà wɔ̀kɔ Yerzù nà I àpɔ̀rzìtòlò hwa mà arzàŋgànɛ ekì yɔ̀kɔ. Rzìi hwa ijòwa Yerzù nanù ema, “Ìi Rzàŋgò è hvònda ene ema o ò gbèèyɛ̀ hwatò hwa Irzàyɛ̀lì ò lì òhva è ŋginyà ò lì atimbanɛ wɔ̀ hwiti hvɛ e?”

⁷Yerzù rzìi a hwa timbirzɛlɛ nanù ema, “È Tatɛ̀ mɛnɛ ndi à gbeyàna e ŋginyà ya eni ò lì rzekeya màrzàkò na ihvònda, ndèŋgànɛlɛ inyɔ e rza òhvi wònjà ò lì hwiya e hvònda ema hwene hweyà hwe arzɛ hwe ò gbèyɛ̀nɛ.

⁸Ndi inyɔ e ò luwa màyìmbì e hvònda ema Èlìŋgɛ̀ yà Wòtani ye e rzihweyà, eŋge hvònda ɔ̀ndi hweyà hwe arzɛ ema e ma nò ɛnɛnɛ e ò hwe òhweyà hwatò ò e mbòwa ya Jèrurzalɛ̀mù, ò hwèrzòòkà hwe Jùdeyà na Rzàmàrìyà na ò màrzuku ma e rze ya arzɛ.”

⁹Ò mburza hvònda ema à mà òhwe nanù, rzìi Lohwɛ̀ à gbeyà à ɛndɛ ò ŋmanyu yà lohwà. Nà òma wɔ̀ hwa mà hwɛ lì mò ɔ̀ŋgɔ, lìmbaki rzi lì mò lìŋgà ò eŋgànɛ̀lɛ̀ hwa rzi mò ɛnɛ hvɛ.

¹⁰Hwà-òkòwèlì hwa mà lìmeyà ò lì mò ɔŋgɔ̀ nà òma à mà agba ò ŋmanyu, lìwòkimɛnɛ wunyanà hwahwàkɛ ema hwa mà wɔtɔ̀ mbɔ̀mi hwa hwà wurzeya, rzìi hwa hwà tɛ̀meyà ò tòŋgòŋgò yà awu.

¹¹Hwàŋga wunyanà hwa ahwakɛ rzìi hwa ijòwa hwà-òkòwèlì nanù ema, “Ìi hwatò hwa Galìlì, mamɛ è tɛ̀mèlì anù è ɔŋgɔ̀ ò ŋmanyu e? Onò Yerzù ema Lohwɛ̀ à mà gbeyɛ nanù ema à è akakòwɛ, ndèŋgànà à mà ɛndɛ ò ŋmanyu yà Lohwà, à ò tìmba hvɛ nyayi hvɔ̀kɔ nà òma inyɔ è ɛni à agba ò ŋmanyu.”

¹²I àpɔ̀rzìtòlò rzi jà anjiya ò mòòlì mò Njàhwɛ̀, lì tìmba ò mbòwà yà Jèrurzalɛ̀mù, yɔ̀ndɔ̀ yà èhvàrzù yà màyilì.

¹³Nà òma hwa mà kpèeyà ò mbòwa, rzìi hwa agba ò ŋmanyu è ndawò yà ndɛkì ò tùù ema hwa mà hwɛ lì lìya. Iŋgi àpɔ̀rzìtòlò ì mà hwɛ ndi, Pètrò, Yòwanìrzɛ̀, Jèmìrzì nà Àndèlè. Hvìlìpì nà Tɔ̀màrzì, Bàtòlomìyò nà Matìyò, Jèmìrzì è ŋmanà wà ama Alìhvìyòrzɛ̀, Rzìmɔ̀nì mòtò ema lì emeyà là eni lì rza à àyèŋgòwɛ̀ nà Jùdàrzì è ŋmanà wà ama Jèmìrzì.

¹⁴Wɔ̀ hwa arzɛ, nà hwàalanà nà Màlìyɛ̀ è nyàŋgò yà ama Yerzù, nà Yerzù wònyanyàŋgò hwa eni hwa mà hwɛ lì arzàŋgànɛ̀ hvònda tɛ ò màkanɛ̀.

¹⁵Ò eŋge hvònda, hwatò ema hwa mà lòkɛ̀ Yerzù hwa mà arzaŋganɛ ekì yɔ̀kɔ. Hwa mà hwɛ eyà ya hwègbe hwehwakɛ. Pètrò rzìi à tɛ̀mɛ̀ ò ŋmanyu ò ìtììtènì jà awu rzìi à òhwà nanù ema,

¹⁶“Ìi wònyamòwè kòkò, hweyà ema hwe mà tìlahwa ò kààtì yà Lohwà hwe mà hwɛnɛ lì òndìrzɛ̀hwɛ. Èlìŋgɛ̀ yà wòtani è mà lòma lì òhwa ò wàna yà ama Dàhwitì lì hvòmɛ̀nɛ̀ Jùdàrzì ema à mà tìmba hwatò ò lì ɛndɛ lì ŋgbaŋgɛ Yerzù.

¹⁷Jùdàrzì à mà hwɛ ndi mɔ̀kɔ ò ìtììtènì jà arzu, Yerzù à mà mò hvɔ̀rzɔ̀ ò lì gbeyà ene èwòlò mòndèŋge nà irzɔ.”

¹⁸(O wòŋgò wòlì ema Jùdàrzì à mà luwe, nàa mòrzawèlì mò eni ò wòhwe ema à mà gbeye à mà wò àndana mɔ̀nyɛ̀. Aŋga ndi à mà kpe na wòrzò wò eni, lùuŋga la eni rzìi lì mbuma meya me eni me kùwa lì wurza ò èwòka.

¹⁹Hwàtò hwa arzɛ hwa Jèrurzalɛ̀mù hwà mà hweyà lì hvòmɛ̀nɛ̀ e kpelì ya eni, ò èŋgànɛ̀lɛ̀ rzɔ hwa hwɛlɛ èŋge èki ò e mbɔrzi ya awu nanù ema, Akɛ̀ldàmà, jànda ja eni i hwèlì ndi, “Mɔnyɛ mò màyija.”)

²⁰Pètrò rzìi a tòmbana e mbɔrzi ya eni ò wòrzò, a òhwa nanù ema, “Ène eyà e gbèyɛ̀nɛ na òma e tìlahwì ò kààtì ya mɛ̀rzɔ̀kɔ̀ me ama Lohwɛ̀ nanù ema, ‘Inyɛ̀ e ndawò ya eni e timbe èkpàkpà, inyɛ tɔ̀ mòtò a rza òŋga ndawò aŋga.’ È tìlahwì hvɛ nanù ema, ‘Inyɛ̀ òhvɛhvɛ mòtò a wòwe ekì ya eni ya èwòlò.’

²¹“O èŋgànɛ̀lɛ̀ rzɔ i hwɛnì lì hvɔ̀rzɔ̀ munyanà mɔ̀kɔ. Oŋgò mòtò a hwɛni ndi lì hwɛ mòtò ema à mà hwɛ̀ɛ na irzɔ ihvònda ja arzɛ ema irzɔ na Rzàŋgò wa arzu Yerzù Krirztò i ma hwɛ lì awa e ekì ya arzɛ,

²²lìwòteyà e hvònda ema Yòwanìrzɛ̀ à mà hwɛ lì lùhwìrzɛ̀ hwatò lì uka e hvònda ema Lohwɛ̀ à mà gbeye Yerzù a ɛndɛ ò ŋmanyu ya Lohwà. Mɔ̀ hvɛ a hwɛni ndi lì hwɛ mòtò ema à mà tɛ̀mɛ̀ mbòŋgi ò hwèhvùmùwèlì hwe ama Yerzù.”

²³Aŋga ndi hwa a hvɔ̀rzɔ̀ hwatò hwahwàkɛ, Jòrzɛ̀hvù ema à mà hwɛ̀lɛ̀hwɛ̀ Bàrzabàrzì (ema à mà hwɛ̀lɛ̀hwɛ̀ hvɛ Jùrzìtùrzì) na Màtìyàrzì.

²⁴Rzi hwa kànɛ nanù ema, “Rzàŋgò, ò hwi ŋmèma mò tɔ̀ ima mòtò tɛ. O jò uŋmɛ̀lɛ̀ ò hwanù hwahwàkɛ e mɔ̀ ema ò hvɔ̀rzì,

²⁵ò lì hwɛ̀ɛ e àpɔ̀rzìtòlò ò lì timbana èki ya ama Jùdàrzì, mɔ̀ ema à mà màa lì ɛndɛ ò èki ema e mò lɔ̀ɔnì.”

²⁶Aŋga ndi hwa àŋgbà lìnjàŋgà ò lì uŋmɛ̀lɛ̀ e mòtò ema a ò hvɔ̀rzɔ̀wɔ̀. Lìnjàŋga rzìi lì hwa uŋmɛ̀lɛ̀ nanù ema hwa hvɔ̀rzè Màtìyàrzì. O eŋgànɛ̀lɛ̀ rzɔ, à mà hwàtɛ̀hwɛ̀ ò lìnɛ̀yi lìyòmɛ̀ la àpɔ̀rzìtòlò na mɔ̀kɔ.