Read Mokpwe Hwègbèèlì 10 Bible Online

Hwègbèèlì 10 - Mokpwe bible

Hwègbèèlì 10

¹O ma hwɛ munyanà mɔ̀kɔ wa Ròmànì ò mbòwa ya Kàyìrzèrìyà à mà hwɛ̀lɛ̀hwɛ̀ Kɔ̀nɛlìyurzi. A ma hwɛ ndi mòkànèlì ema à mà hwɛ lìkànèyà lìtuta lɔ̀kɔ la egbe yɔ̀kɔ ya hwàanà njuma ema lì ma hwɛ̀lɛ̀hwɛ̀ nanù ema, “Lìtuta lɔ̀kɔ la egbe yɔ̀kɔ ya hwàanà njuma ò èkòmè ya Itàlì.”

²Kɔ̀nɛlìyurzi à mà hwɛ̀ ndi mòtò ema à mà hwɛ lì òŋgama hweyà hwe ama Lohwɛ̀. Mɔ̀ na lìtumba la eni la arzɛ hwà mà gbèeyà Lohwɛ̀. A ma òŋgòwàna mèlìrza me hwatò me wònyà Yudà. A ma kanɛ̀ hvɛ Lohwɛ̀ ihvònda ja arzɛ.

³Ò lìrzakò là ŋgɛ̀ŋgi iyàwò ŋmèrze mɔ̀kɔ, rzìi mɔ̀ à ɛnɛ jɛ̀nɛ̀nì. Ò iŋgi jɛ̀nɛ̀nì, mɔ̀ à mà ɛnɛ è aŋgèlì yà ama Lohwɛ̀. Èŋge aŋgèlì è mà hwɛlɛ nanù ema, “Ìi Kɔ̀nɛlìyurzi.”

⁴Onò mòtò rzìi à inja eŋge aŋgèlì nà wɔ̀ŋgɔ̀ rzìi à è ijòwa nanù ema, “Ìi Rzàŋgò mamɛ e hwèlì e?” Èŋge aŋgèlì rzi e mò alàhwɛ̀ nanù ema, “Lohwɛ̀ à mà hweyà lìkànɛ la aŋgɔ̀, ndèŋgànɛ̀lɛ̀ à mà ɛnɛ ŋmèma mò aŋgɔ̀ mò gbamù. Ndeŋgànɛ̀lɛ̀ mɔ̀ à wòŋgirzɛnɛ ò lì alàhwɛ̀ lìkànɛ la aŋgɔ̀.

⁵O naŋgɛ nanù, òma lòŋgò la hwatò ò mbòwà ya Jopà ò ma mòtò mɔ̀kɔ ema lìinà la eni lì hwèlì ndi Rzìmɔ̀nì Pètrò.

⁶A hwèlì ndi ŋmɛ̀nì ò ndawò ya ama e mòtò ema èwòlò ya eni e hwèlì ndi ò lì rzèeyà mèyòwò me nyàmà, lìinà la eni lì hwèlì ndi Rzìmɔ̀nì, a lìya ndi ò rzààwà ya ŋmanjà.”

⁷Nà òma e aŋgèlì ema e ma hwɛ lì mò òhwirzɛnɛ e ma ɛndɛ, Kɔ̀nɛ̀lìyùrzì rzìi a hwɛlɛ hwàgbèèlì hwa eni hwahwàkɛ na ŋmanelì mɔ̀kɔ wa njuma ema mɔ̀ hvɛ à mà hwɛ lì òŋgama hweyà hwe ama Lohwɛ̀, ndèŋgànɛ̀lɛ̀ à mà hwɛ hvɛ ndi ŋmànèlì wa njuma ema à mà hwɛ lì ɔŋgeya Kɔ̀nɛ̀lìyùrzì.

⁸Mɔ̀ à mà hwa òhweyà mamɛ̀ ema e ma gbèyɛ̀nɛ, rzìi a hwa òma ò mbòwa ya Jopà.

⁹Ò wònɛ̀yi wùnyà, ò yɔ̀ndɔ̀ yà awu nà òma hwa mà kòmbɛnɛyi Jopà, Pètrò à mà agba ò ŋmanyu yà ndawò ò lì kanɛ̀. Ène hvònda è mà hwɛ ndi kɔ̀rzi yà ŋmèrze.

¹⁰È njàwò è mà mò lɛmbɛ, rzìi à arza yòma yà lì làa. Nà òma hwa mà hwɛ lì wòŋgirzɛnɛ mòlelì, rzi à ɛnɛ jɛ̀nɛ̀nì.

¹¹A ma ɛnɛ e ŋmanyu yà Lohwà e lìhvòwelì, rzi yòma e jà ema e ma hwɛ ndi nàa erzanja ndɛnɛ, ema e ma hwɛ ndi nàa ò a ɛnɛ òma màrzuku màaniyɛ ma eŋge erzanjà ma mà lɛmbɛhwɛ ò lì ɔ̀ndirzɛ̀lɛ̀lɛ̀ ò rze ya mɔ̀nyɛ̀.

¹²Ò tenì yà eŋge erzànja inyàmà jà arzɛ ì mà hwɛ aŋga; iŋgi ema je ɛ̀ndɛ̀nɛ̀ màtàŋga mà awu màànìyɛ̀, è jɔ̀ ema i kòòhwà màwùŋgà ò rze yà mɔ̀nyɛ̀ nà hwènɔ̀nì hwe arzɛ hwe ŋmanyu.

¹³Rzìi à hweyà lìlò lì mò òhweyà nanù ema, “Ìi Pètrò tɛ̀mɛ̀nɛ̀ ò ŋmanyu, òŋwa ini nyàmà ò lèè.”

¹⁴Ndi Pètrò mɔ̀ à mà òhwa nanù ema, “Ìi Rzàŋgò, ò jɔ̀kɛ̀, jàyɛ̀. Imba nà rzi lelì tɔ̀ yòma ema è mbenda è òhwa nanù ema hwa rza làa, tɔ̀ ema è rza rzàŋgɛ ò wòrzò wò ama Lohwɛ̀.”

¹⁵Lìŋgi lìlò rzi lì mò òhweyà hvɛ nanù ema, “O rzi wòwà tɔ̀ yòma tɔ̀ yɔ̀kɔ ema Lohwɛ̀ a òhwi nanù ema e rzàŋgì nanù ema e rza rzàŋgì.”

¹⁶Ène eyà è mà gbèyɛ̀nɛ̀ ŋgèlì iyàwò, rzìi eŋge erzanja è wòwàhwà ò ŋmanyu yà Lohwà.

¹⁷Pètrò mɔ̀ à mà hwɛ ò lì lùteyà jànda jà ini jɛ̀nɛ̀nì ema mɔ̀ à ɛni. Tɛ òma ò ene hvònda hwatò ema Kɔ̀nɛlìyurzi mɔ̀ à mà òme, hwa mà awùlùwɛ èki ema è ndawò yà ama Rzimɔ̀ni è hwèlì. Ò eŋgànɛ̀lɛ̀ rzɔ wɔ̀ hwa mà tɛ̀mɛ̀ ò wòrzò wò lìyòhva là kɔtɔ̀.

¹⁸Wɔ̀ hwà mà kàrzɛ malò ma awu, ò lì ijòwa nanù ema, “O hwèlì ŋmɛ̀nì anu ema a hwɛ̀lɛ̀hwɛ̀ Rzimɔ̀ni Pètrò e?”

¹⁹Pètrò mɔ̀ à mà hwɛ ò lì kèka ò lì rzɔ̀ŋgìtɛ̀nɛ̀ mamɛ iŋgi jɛ̀nɛ̀nì ì hwèlì, ɔ̀ndi Èlìŋgɛ̀ yà wòtani è à mò òhweyà nanù ema, “Rzimɔ̀ni, ò hwèlì hwatò hwàyàwò anu ema hwa ò arza.

²⁰Ò eŋgànɛ̀lɛ̀ rzɔ wòŋgirzɛnɛ, ò rzihwe ò ŋmanyu yà è ndawò yà ndɛ̀ki, ò rzi hwaŋga ò lì ɛndɛ nà wɔ̀, èhwanja imba ndi nà hwa òmi.”

²¹Ò eŋgànɛ̀lɛ̀ rzɔ, Pètrò à mà rzihwa rzi à òhweyà hwaŋga hwatò nanù ema, “Imba ndi nà hwèlì è mòtò ema è hwèlì yà arza. Mamɛ ndeŋgatɛ è jelì e?”

²²Hwà mà mò alàhwɛ̀ nanù ema, “È mòtìmbèlì wa hwàanà njùma Kɔ̀nɛlìyurzi mɔ̀ ndi à jò òmi. A hwèlì ndi mòtò wa gbamù ema a gbèeyà Lohwɛ̀. Ndeŋgànɛ̀lɛ̀ a ŋgbàahwì èluhwe na hwatò hwa arzɛ hwa wònyà Yudà. Aŋgèlì hvɔ̀kɔ ya ama Lohwɛ̀ e ma mò òhweyà nanù ema, a ò yòhwɛ ò ndawò ya eni, aŋga nanù ò ma à mà hweyà mamɛ ò hwɛni lì mò òhweyà.”

²³Pètrò à mà kpɛlɛ hwaŋga hwatò ò ndawò. A hwa talɛlɛ mànɔ̀ŋgɔ̀ ema hwà mà akɛlɛlɛ wuu. O wònɛyi wùnyà, mɔ̀ à mà wòŋgirzɛnɛ rzìi a ɛndɛ na wɔ̀. Lòŋgò la hwàlòkèlì hwa e mbòwa ya Jopà hwà mà ɛndɛ na mɔ̀.

²⁴O wònɛyi wùnyà wɔ̀ hwà mà uka ò mbòwa ya Kàyìrzèrìyà. Kɔ̀nɛlìyurzi à mà hwɛ lì hwa ambɛ̀lɛ̀, ndèŋgànɛ̀lɛ̀ mɔ̀ à mà yòhwɛ hwatò hwa eni hwa lìtumba na imbunda ja eni ema à mà lìŋgane.

²⁵Nà òma Pètrò à mà arze lì kpèeyà ò ndawò, Kɔ̀nɛlìyurzi à mà mò ùŋmànɛ̀lɛ̀, rzìi a mò kpèeya ò matàŋga, rzi a mò rzumeya mòòhvò mò eni ò rze ò lì mò ŋgba èluhwe.

²⁶Ndi Pètrò à mà mò tɛmirzɛ ò ŋmanyu rzìi a mò òhweyà nanù ema, “Tɛ̀mɛ̀nɛ̀ ò ŋmanyu èhwanja tɔ̀ imba hvɛ na hwèlì ndi mòtò wa hwènàmà.”

²⁷Nà òma à mà hwɛ lì òhwa nanù, Pètrò rzìi a kpèeyà ò tenì ya ndawò. A ma ùŋmànɛ̀lɛ̀ ŋgindi ndɛnɛ ya hwatò e arzàŋganɛ ò tenì ya eŋge ndawò.

²⁸A ma òhweyà hwaŋga hwatò nanù ema, “È hwi na e jɔ̀kɛ̀ nanù ema, e teŋgɛ̀nɛ̀yi e mbenda ya arzu nanù ema, mòtò ema a hwèlì wa wònyà Yudà a rza kanɛ̀ lì lata na tɔ̀ ohvɛhvɛ mòtò ema a rza enje wònyà Yudà. Ndi Lohwɛ̀ à mà nò uŋmɛ̀lɛ̀ nanù ema na rza hwɛni lì hwɛlɛ tɔ̀ mòtò tɔ̀ mɔ̀kɔ ema a rza rzaŋgi tɔ̀ nanù ema a hwèlì mbìndò ò wòrzò wò ama Lohwɛ̀.

²⁹O eŋgànɛ̀lɛ̀ rzɔ, na òma ò ma nò yòhwɛ, nà mà tɛ̀mɛ̀nɛ̀ ŋgelì hvɔ̀kɔ ndèŋgànɛ̀lɛ̀ na rzi òhve tɔ̀ lìtiŋga ò lì rzɔ̀rzɔ̀ nanù ema na rza jà. Nà ò ijòwa rzɔ nanù ema, mamɛ ndeŋgatɛ ò ma nò yòhwɛ rzɔ e?”

³⁰Kɔ̀nɛ̀lìyùrzì rzìi à tìmbìrzɛ̀lɛ̀lɛ̀ nanù ema, “Mèènyà mè iyàwò ema mè mà aka, nà mà hwɛ lì kanɛ̀ ò ndawò yà ami, ò lìni lìrzàkò là ŋgɛ̀ŋgi iyàwò jà ŋmèrze, lìwòkimɛnɛ mòtò ema à mà wɔtɔ̀ lìwɔtì là kɛ̀ŋgɛ̀ŋgɛ̀ rzìi à nò tɛ̀meyà ò wòrzò,

³¹òŋgò mòtò rzìi à òhwa nanù ema, ‘Kɔ̀nɛlìyùrzì, Lohwɛ̀ à mà hweyà lì kanɛ̀ là aŋgɔ̀. Ndeŋgànɛ̀lɛ̀ à mà ɔ̀ŋgɛ̀lɛ̀ hwèwòlò hwe aŋgɔ̀ hwe lì òŋgòwàna la mèlìrza me hwatò.

³²Oma mòtò mɔ̀kɔ ò mbòwà ya Jopà, ò ma mòtò mɔ̀kɔ ema lìinà la eni lì hwèlì ndi Rzìmɔ̀nì Pètrò. A hwèlì ndi ŋmɛ̀nì ò ndawò ya ama Rzìmɔ̀nì ema èwòlò ya eni e hwèlì ndi ò lì rzèeyà mèyòwò me nyàmà. A lìya ndi ò rzààwà ya ŋmanjà.’

³³Ɔ̀ndeŋgàtɛ̀ nà mà ò yòhwɛ ŋgelì hvɔ̀kɔ, ndeŋgànɛ̀lɛ̀ ò gbèyi gbamù ò lì jà. O naŋgɛ nanù, irzɔ hwa arzɛ i hwèlì anu ndèŋgànà Lohwɛ̀ a hwèlì na irzɔ. I hwèlì ò lì ambɛ̀lɛ̀ lì hweyà tɔ̀ mamɛ ema Rzàŋgò Lohwɛ̀ a ò òhwèlì nanù ema ò jò òhweyà.”

³⁴Pètrò rzìi a wòteyà lì òhwa nanù ema, “Nà ma ayembɛ na e jɔ̀kɛ̀ naŋgɛ nanù ema, Lohwɛ̀ a rza uŋmɛ̀lɛ̀ ndandò.

³⁵Ndi mɔ̀ à emeyà ò tɔ̀ ima èkòmè mòtò ema a mò ŋgba èluhwe rzìi a gbeyà hvɛ mamɛ ema e hvòmɛ̀nɛ̀yi.

³⁶Inyɔ e hwi ŋmɛ̀ndì ema Lohwɛ̀ à mà òmeya hwatò hwa Irzàyɛ̀lì. Mòŋgò ŋmɛ̀ndì, mò ma hwɛ ndi lì hvòmɛ̀nɛ̀ hweyòhwèlì hwe Ŋmɛ̀ndì mò Gbamù mò ɛ̀yɔ̀lɛ̀, ema mò ma jɛ̀ɛ̀ ò lì akeyà na Yerzù Krirztò. Mɔ̀ ndi à hwèlì Rzàŋgò ya hwatò hwa arzɛ.

³⁷Ndeŋgànɛ̀lɛ̀ e hwi eyà ema e ma gbèyɛ̀nɛ ò hwèrzòòkà hwe arzɛ hwe Jùdeyà, lì wòteyà ò Gàlìlì. Ène eyà e ma hwɛ ndi ò mburza hvònda ema Yòwanìrzɛ̀ à mà òhweyà hwatò lì hvòmɛ̀nɛ̀ lì lùhwìrzɛ̀.

³⁸Inyɔ e hwi nanù ema Lohwɛ̀ à mà ɔ̀kirzɛ̀ Yerzù, è mòtò wà Nàrzàrɛ̀tì, rzìi à mò ŋgba Èlìŋgɛ̀ yà Wòtani nà è ŋginyà. Yerzù à mà hwɛ lì ɛndɛ ò èki yà arzɛ, rzìi a à gbeyà gbamù. Nà òma Lohwɛ̀ à mà hwɛ na mɔ̀, mɔ̀ à mà wɔ̀wìrzɛ̀ hwatò hwa arzɛ ema hwà mà hwɛ ò rze ya e ŋginyà ya ama Mòkarzɛ̀.

³⁹Irzɔ hwa arzɛ i hwèlì ndi mbòŋgi ò hweyà hwe arzɛ ema mɔ̀ à mà gbeye ò èkòmè ya hwatò hwa Yudà na ò e mbòwa ya Jèrurzalɛ̀mù. Nà òma hwà mà mò wòmeyà ò mbarza à mà ŋwa.

⁴⁰Ndi ò wùnyà ema wò ma ùkirzɛ̀ hweyu hweyàwò, Lohwɛ̀ à mà mò hvùmùlɛ̀ ò kpelì, rzìi a gbeyà hwatò ò lì mò ɛnɛ.

⁴¹Rzeketɛ hwatò hwa arzɛ ndi hwà mà mò ɛnɛ. Hwàtò ema Lohwɛ̀ à mà lòme lì hvɔ̀rzɔ̀ wɔ̀ ndi hwà mà mò ɛnɛ. Èŋge ŋgàna e hwèlì ndi nanù ema, irzɔ ema i ma làlɛnɛ̀ na lì nyɔlɛnɛ na mɔ̀ ò mburza hwèhvùmùwèlì hwe eni hwe kpelì.

⁴²Rzìi mɔ̀ à jò kànèyà nanù ema, jò òhweyà hwatò lì hvòmɛ̀nɛ̀ ŋmɛ̀ndì mò gbamù, ndèŋgànà irzɔ i tɛmi mbòŋgi nanù ema mɔ̀ ndi à hwèlì e mɔ̀ ema Lohwɛ̀ à mà hvɔ̀rzè, ò lì kàyìrzɛ̀ hwatò ema hwa hwèlì lòŋgɛ na e wɔ̀ ema hwà mà ŋwɛ.

⁴³Hwà-òhwèlì hwa hwèlìŋgɛ̀ hwa arzɛ hwa kòhwa hwà ma òhwa lì mò hvòmɛ̀nɛ̀, nanù ema tɔ̀ ima mòtò ema a mò lòkɛ̀yì, Lohwɛ̀ à làkìrzɛ̀ wòhwe wò eni. Ène eyà e ò gbèyɛ̀nɛ ò e ŋginyà ya lìinà la eni.”

⁴⁴Nà òma Pètrò mɔ̀ à mà hwɛ lì òhwa nanù, Èlìŋgɛ̀ yà Wòtani rzi è rzihweyà hwaŋga hwatò hwa arzɛ ema hwa mà hwɛ lì òkànèyà mòŋgò ŋmɛ̀ndì.

⁴⁵Hwàtò hwa Yudà ema hwa mà lòkɛ̀ Yerzù ema hwa mà uwɛ̀lɛ̀lɛ̀yi ò Jopà nà Pètrò, hwa mà tàmà rzayi-rzayi ò lì ɛnɛ nanù ema Lohwɛ̀ à ŋgbelì hvɛ hwatò ema hwa rza enje wònyà Yudà jàhwèyà jà eni jà Èlìŋgɛ̀ yà Wòtani.

⁴⁶Èhwanja hwa mà hweyà nɛ hwaŋga hwatò hwa òhwa jòòhwì na ihvɛ-hvɛ mbɔrzi na lì eka Lohwɛ̀. Pètrò rzìi a òhwa nanù ema,

⁴⁷“Hwanu hwatò hwà mà luwa Èlìŋgɛ̀ yà Wòtani nyayi hvɔ̀kɔ na òma irzɔ hvɛ i ma e luwe. O hwèlì rzɔ tɔ̀ mòtò tɔ̀ mɔ̀kɔ ema a tànɛyi lì hwa tɛmirzɛ nanù ema hwa rzi lùhwìrzɛ̀hwɛ̀ na malìhwa e?”

⁴⁸O eŋgànɛ̀lɛ̀ mɔ̀ à mà hwa kànèyà nanù ema hwa lùhwìrzɛ̀hwɛ̀ ò lìinà la ama Yerzù Krirztò. Rzìi hwa rzòrzòmeya Pètrò ò lì lìya na wɔ̀ ŋgurzu ja mèenyà.