Read Mokpwe Hwègbèèlì 12 Bible Online

Hwègbèèlì 12 - Mokpwe bible

Hwègbèèlì 12

¹O ene hvònda ɔ̀ndi kiŋgɛ̀ Hɛ̀rɔ̀dì à mà wòteya lì tàkìrzɛ̀ lòŋgò la hwatò hwa ŋmèmba.

²A ma gbeyà ema hwà mà ŋgbaŋgɛ Jèmìrzì, Yòwanìrzɛ̀ ŋmanyàŋgò wa eni, rzìi hwà mà òŋwàna na e rzɔ̀lɔ̀.

³Nà òma kiŋgɛ̀ Hɛ̀rɔ̀dì à mà ɛnɛ na òma ene eyà e ma lìŋgìrzɛ hwatò hwa Yudà, àŋga ndi à ɛndɛ ò wòrzò hvɛ ò lì ŋgbaŋgɛ Pètrò. Ène eyà hvɛ e ma gbèyɛ̀nɛ ndi ò e hvònda ya è Ndèma yà Èhvòòtò ema e rza hwɛnɛ Èhwindi.

⁴Nà òma à mà mò ŋgbaŋgɛ rzìi a mò aŋgba ò hwèwòwà. Rzìi à ika ŋgìndì inɛyi ja hwàanèlì hwa njuma ò lì mò ɔŋgeya. Ngìndì tɛ e ma hwɛnɛ hwàanèlì hwa njuma hwànìi. Hɛ̀rɔ̀dì à mà kima ò lì kàyìrzɛ̀ Pètrò ò mòte, ò mburzà ya è Ndèma yà lì Akà Ɔnɛ̀yi.

⁵O èŋgànɛ̀lɛ̀ Pètrò à mà aŋgɛhwɛ ò hwèwòwà, ndi ŋmèmba mò hwatò hwa Krirztò mò ma hwɛ lì mò kanɛ̀lɛ̀lɛ̀.

⁶Hɛ̀rɔ̀dì à mà arza lì jànà Pètrò elele ò marzò ma hwatò. O wòŋgò wuu mɛnɛ ema Hɛ̀rɔ̀dì à mà ika ò ŋmèma mò eni nanù ema a jàneyà hwatò Pètrò ò wònɛyi wùnyà, Pètrò à mà hwɛ ò ijɔ ò ìtììtènì ja hwàanà njuma hwahwakɛ. A ma kakahwa na ŋgɔ̀kɔ̀hwi ò hwèhvàrzù hwe eni hwe nyò hwe ahwakɛ, ndèŋgànɛ̀lɛ̀ hwahvɛhvɛ hwàanèlì hwa njuma hwà mà tɛ̀mɛ̀ ò lì ɔŋgeya hwèkpèèlì hwe e ndawò ya hwèwòwà.

⁷O lìwòkimɛnɛ e aŋgèlì ya ama e Rzàŋgò e ma mò wurzeya rzìi ŋmàye mò ònda ò èŋge tùu ya hwèwòwà ema à mà hwɛ. Èŋge aŋgèlì rzìi e nyìŋgìrzɛ̀nɛ̀ Pètrò ò etulì ya eni, ò lì mò imòlɛ ò ijɔ. Rzìi e aŋgèlì e òhwa nanù ema, “Tɛmɛ̀ karzi.” Iŋgi ŋgɔ̀kɔ̀hwi rzìi i rzòlòhweya jò unda ò meyɔ mo eni.

⁸È aŋgèlì rzi e mò òhweyà nanù ema, “Kaka e ŋgòlì ya aŋgɔ̀ gbamù, ò wɔte hvɛ hwetambi hwe aŋgɔ̀.” Pètrò à mà gbeyà mamɛ ya arzɛ ema à mà òhwahwɛlɛ ò lì gbeyà. È aŋgèlì rzìi e mò òhweyà nanù ema, “Wɔtɔ̀ e kòti ya aŋgɔ̀, ò nò òŋgame.”

⁹Pètrò à mà mò òŋgama rzìi hwa hwɛ̀mɛ̀ è ndawò yà hwèwòwà. Ndi ò ene hvònda ya arzɛ mɔ̀ à mà ɔ̀ŋgɛ̀lɛ̀ ndi nanù ema a hwèlì ndi lì ɛnɛ jɛ̀nɛ̀nì, a rzìi hwiye nanù ema eyà ema è hwèlì è mò gbèyɛ̀nɛ.

¹⁰Hwa mà aka ò èki yà hwà-ɔ̀ŋgèlì hwa hwèwòwà yà wòrzò nà è yɔ̀ ema è mà ùkirzɛ̀ hwehwàkɛ, rzìi hwa uka ò lìyòhva là kɔtɔ̀ là hwɛ̀ɛkɛ là mbòwà. Lìni lìyòhva lì ma alìhvòwɛ lìti. O èŋgànɛ̀lɛ̀ wɔ̀ hwa mà lì akeyà rzìi hwa wòteya lì ɔ̀ndɔ̀ e njiya ya arzɛ. Nà òma hwà mà hwɛ lì ɛndɛ nanù, ò lìwòkimɛnɛ è aŋgèlì rzìi è hwɛmɛ Pètrò.

¹¹Àŋga ndi Pètrò lìhwiyè la eni lì ma timbe rzìi a òhwa nanù ema, “Nàŋgɛ ndi na hwi na e jɔ̀kɛ̀ nanù ema eyà e gbèyɛ̀nɛ. Rzàŋgò a nò òmelì e aŋgèlì ya eni, ndèŋgànɛ̀lɛ̀ mɔ̀ à nò kɔ̀ti ò màà mà ama Hɛ̀rɔ̀dì, ndèŋgànɛ̀lɛ̀ mɔ̀ à mà nò ulɛ ò màlùtèyà ma arzɛ ema hwatò hwa wònyà Yudà hwà mà arze lì nò gbeyàna.”

¹²Nà òma Pètrò à mà àyɛ̀mbɛ̀ mamɛ ema e ma mò gbèyɛ̀nɛ, rzìi a ɛ̀ndɛ ò màandà mà ama Màlìyɛ̀, e nyàŋgò ya ama Yòwanìrzɛ̀ ema à mà hwɛ̀lɛ̀hwɛ̀ hvɛ Màkòrzì. Anù ndi rzayì-rzayì ja hwatò hwà mà arzàŋgànɛ ò màkanɛ̀.

¹³Nà òma Pètrò à mà uke aŋga, rzìi a kumba lìyòhva la kɔ̀tɔ̀, rzìi e ŋmanà mòkutu wa ŋgɔ̀ndɔ̀ ema lìinà la eni lì ma hwɛ ndi Rhòda à mà ɛndɛ ò lì ɛnɛ e mòtò ema a kumba lìŋgi lìyòhva la kɔtɔ̀.

¹⁴Nà òma à mà embe lìlò la ama Pètrò, mɔ̀nyɛ̀ŋgì mò ma mò aka ò mɔ̀ lì lìhvòhwa lìyòhva, ndi à mà timba ndi ò lì kpèeyà ò tenì ya ndawò, rzìi a òhweyà hwatò hwa arzɛ nanù ema, “Pètrò a hwèlì ò ewòka.”

¹⁵Hwà mà mò alàhwɛ̀ nanù ema, “O kpanyi!” Nà òma à mà hwɛ ndi lì tinɛlɛ nanù ema e hwèlì ndi e jɔ̀kɛ̀, rzìi a òhwa nanù ema, “Nànù ò ma e aŋgèlì ya eni.”

¹⁶Ndi Pètrò mɔ̀ à mà lìmeya ndi ò lì kumba nanù mɛnɛ natɛ̀ɛ hwa mò lìhvòweya lìyòhva. Nà òma hwà mà lìhvòhwè lìyòhva rzìi hwa mò ɛnɛ, hwà mà tàmà.

¹⁷Pètrò a hvɛ̀tɛ̀lɛ̀ lìya la eni lì hwa uŋmɛ̀lɛ̀ nanù ema hwa lìya ŋmɛ̀ɛ, rzìi a hwa òhweyà nɛ Rzàŋgò a mò timbi ò lì anjiya ò hwèwòwà. A hwa òhweyà nanù ema, “È òhweyà Jèmìrzì nà hwanɛ̀yi hwatò ema hwa lòkɛ̀ Krirztò mamɛ ema e ma gbèyɛ̀nɛ.” Rzìi à hwa hwɛmɛ, a ɛ̀ndɛ ò èhvɛhvɛ èki.

¹⁸Nà òma wùùnya wò ma yahwe, hwaŋga hwàànà njuma ema hwà mà hwɛ lì ɔŋgeya Pètrò hwà mà tàmà ò màlùtèyà ma awu èhwanja hwa rzi hwiye mamɛ ema e ma gbèyɛ̀nɛ Pètrò.

¹⁹Kìŋgɛ̀ Hɛ̀rɔ̀dì ama òhwa à mà hwa tòòwè gbarzi wò kɔ̀yi-kɔ̀yi ò lì arza Pètrò. Nà òma hwa rzìi tanɛ lì mò ɛnɛ, Hɛ̀rɔ̀dì rzi a kàyìrzɛ̀ hwaŋga hwàanà njuma, a hwa akɛlɛlɛ e mbàkò ya kpelì. O mburzà hvònda Hɛ̀rɔ̀dì à mà anjiya ò Jùdeyà ò lì ɛ̀ndɛ lì lìya ŋmana hvònda ò mbòwà ya Kàyìrzèrìyà.

²⁰O nàŋgɛ̀ rzɔ Kìŋgɛ̀ Hɛ̀rɔ̀dì à mà hwɛnɛ hwetàtò rzayì-rzayì na hwatò hwa imbowà ja Tàyi na Rzidònì. O èŋgànɛ̀lɛ̀ hwatò hwà mà hwɛmɛ iŋgi mbòwa ja ahwakɛ ò lì ɛndɛ lì mò ɛnɛ. È mòtò wa wòrzò ema hwà mà ɛndɛ ò lì ùŋmànɛ̀lɛ̀ aŋga nanù à mà hwɛ ò ɛ̀yɔ̀lɛ̀ na e kiŋgɛ à mà hwɛ ndi Blàrzìtùrzì. Blàrzìtùrzì à mà hwɛ ndi mòkutu ò e ndawò ya ama kiŋgɛ. Hwà mà gbeyà ndi nanù èhwanja mòlelì mò awu mò ma uwɛ̀lɛ̀lɛ̀yi ndi ò èkòmè ya ama Hɛ̀rɔ̀dì.

²¹O wùnyà ema wò ma hvɔ̀rzɔ̀wɔ̀ Hɛ̀rɔ̀dì à mà wɔtɔ̀ lìwɔti la eni la Kìŋgɛ̀. A lìya ò kònda ya eni ya lìkànèyà rzìi a wòteyà lì hwa òhweyà hweyà.

²²Nà òma à mà kulɛ lì òhwa, hwaŋga hwatò rzìi hwa wòteyà lì tɛɛ nanù ema, “Lohwɛ̀ mɔ̀ ŋmìti ndi à òhwa nanù rzeketɛ mòtò wa hwènàma.”

²³O lìwòkimɛnɛ, e aŋgèlì ya ama Rzàŋgò a mò ɛrzɛ na mòrziyò. Èhwanja mɔ̀ à rzìi ŋgbe Lohwɛ̀ èluhwe. O èŋgànɛ̀lɛ̀ melɔmbi me ma mò laa ò tenì natɛ̀ɛ a ŋwa.

²⁴Ndi tɔ̀ nanù, eyà ya Lohwà e ma hwɛ ndi lì nyàla lì ɛ̀ndɛ ò wòrzò.

²⁵Nà òma Bànàbàrzì na Rzàwòlò hwà mà kulɛ èwòlò ya awu ò Jèrurzalɛ̀mù, wɔ̀ hwà mà tìmba. Hwà mà tìmbana hvɛ Yòwanìrzɛ̀ ema lìnɛyi lìnà la eni hvɛ lì hwèlì ndi Màkòrzì.