Read Mokpwe Hwègbèèlì 14 Bible Online

Hwègbèèlì 14 - Mokpwe bible

Hwègbèèlì 14

¹Nàa ɛ̀ɛ̀mɛ̀ ya awu Pàwolò na Bànàbàrzì hwà mà kpèeyà ò e ndawò ya màkanɛ̀ ya wònyà Yudà ò mbòwà ya Ikɔ̀nìyùmì. Hwà mà òhwa ŋmɛ̀ndì mò gbamù lì hvòmɛ̀nɛ̀ Yerzù aŋga nyayi ema rzayi-rzayi ja hwatò hwa wònyà Yudà na hwaŋga hwatò ema hwa rza enje wònyà Yudà hwà mà lòkɛ̀ Yerzù.

²Ndi lòŋgò la wònyà Yudà ema hwà mà rzɔ̀rzɔ̀ ò lì lòkɛ̀, hwà mà hvuŋguwa hwaŋga hwatò ema hwa rza enje wònyà Yudà, rzìi hwa hwà hvaŋga mèèmà me awu ò lì teŋgɛ̀nɛ̀ hwàlòkèlì hwa ama Yerzù.

³O èŋgànɛ̀lɛ̀ Pàwolò na Bànàbàrzì hwà mà akɛlɛ hvònda rzayi-rzayi aŋga, hwa rza òke tɔ̀ wɔ̀ŋgɔ̀ ò lì òhwa lì hvòmɛ̀nɛ̀ hweyà hwe gbamù ema Lohwɛ̀ a gbèelì hwatò hwa eni. Rzàŋgò Yerzù e ma gbeyà hwà mà uŋmɛ̀lɛ̀ hwèmɛ̀nɛ̀nì na lì gbeyà hweyà hwe mànyàka rzayi-rzayi, ò lì uŋmɛ̀lɛ̀ nanù ema hweyà ema hwà-òkòwèlì hwa eni hwà mà hwɛ lì òhwa ò lì hvòmɛ̀nɛ̀ e ndèli ya eni, hwe hwèlì ndi e jɔ̀kɛ̀.

⁴Hwàtò hwa èŋge mbòwà ndɛ̀nɛ hwà mà akahwanɛ mòòŋgò ma hwàkɛ. Lòŋgò la hwatò hwà mà timbana wònyà Yudà e mburza hwanɛyi hwatò wɔ̀ hvɛ I àpɔ̀rzìtòlò.

⁵Ndi lòŋgò la hwatò ema hwa rza enje wònyà Yudà na lòŋgò la hwatò hwa wònyà Yudà, na hwàtìmbèlì hwa awu hwà mà kima nanù ema hwa hwɛni lì tàkirzɛ Pàwolò na Bànàbàrzì ndèŋganɛlɛ hwa hwà àŋgba mayanyi.

⁶Ndi e hvònda ema Pàwolò hwà mà ayembɛ nanù, hwà mà hwaŋga rzìi hwa ɛ̀ndɛ ò erzòòkà ya Lìkònìyà rzìi hwa kpèeyà ò imbowà ndɛ̀nɛ ja Lìrzìtìrà na Dɛ̀bì na ò hweŋge hweki ema hwe ma hwɛ ò tòŋgòŋgò.

⁷Èma wɔ̀ hwà mà ɛ̀ndɛnɛ hweyòhwèlì hwe ŋmɛ̀ndì mò gbamù ò wòrzò ò eŋge èki ya arzɛ.

⁸O ma hwɛ mùnyanà mɔ̀kɔ wa mbòkò ò mbòwa ya Lìrzìtìrà ema à mà hwɛ mbòkò lì wòteya ò hwèŋyàyèlì hwe eni, ema a rza ɛndi yɔ̀ndɔ̀ tɔ̀ wùnyà.

⁹A ma hwɛ lì òkànèyà na òma Pàwolò à mà hwɛ lì òhwa ŋmɛ̀ndì mò gbamù. Pàwolò a mò rzòke mìirzɔ̀, rzìi a ɛnɛ nanù ema òŋgò mòtò a hwɛnì lìlòkɛ̀ nanù ema a ò wɔ̀wìrzɛ̀hwɛ.

¹⁰Pàwolò rzìi a òhwa na lìlò lì karzami nanù ema, “Tɛmɛ̀ ò ŋmanyu.” Oŋgò mòtò rzìi a hvanja ò ŋmanyu rzìi a wòteya lì ɛndɛ.

¹¹È hvònda e ŋgìndì e ma ɛnɛ eyà Pàwolò a gbèyi, hwà mà tɛ ò mbɔrzi ya hwatò hwa Lìkònìyà nanù ema, “Mòhwà ma mà jà ò rze ndèŋganɛlɛ hwà mà timba hwatò hwa hwènàmà ò lì jò òŋgòwànà.”

¹²Hwa mà kpɛ̀ Bànàbàrzì lìinà nanù ema mɔ̀ ndi à hwèlì lòòhwà ema hwa hwɛlɛ nanù ema Rzɛ̀yùrzì rzìi hwa hwɛlɛ Pàwolò nanù ema mɔ̀ ndi à hwèlì lòòhwà ema hwa hwɛlɛ nanù ema Hɛ̀mɛ̀rzì èhwanja mɔ̀ ndi à mà hwɛ e mòòhwèlì wa awu.

¹³È pìlìrzì ya lòòhwà Rzɛ̀yùrzì, à mà jànà inyàkà na imbònji ò lìyòhva la kɔ̀tɔ̀ la e mbòwa ndɛnɛ. A ma gbeyà ndi nanù èhwanja mɔ̀ na e ŋgindi hwà mà arza lì ŋgba Pàwolò na Bànàbàrzì màhwèyà. Mòòkà mò ama lòohwà Rzɛ̀yùrzì mò mà hwɛ ndi ò mburza kɔ̀tɔ̀ ya e mbòwa ndɛnɛ.

¹⁴Ndi na òma Bànàbàrzì na Pàwolò hwà mà hweye hweyà ema hwaŋga hwatò hwà mà arze lì gbeyà, hwà mà nyàawa màatù me awu, hwa hwaŋga ò ìtììtènì ya e ŋgìndì na merzeya nanù ema,

¹⁵“Mamɛ ndèŋgàtɛ è gbeyà nanù e? Irzɔ hvɛ ì hwèlì ndi hwatò hwa hwènàmà nà òma è hwèlì. Irzɔ ì mà jà anu ò lì è òhweyà ŋmɛ̀ndì mò gbamù mò ama Yerzù, aŋga nanù è hwɛ̀mɛ̀ hwenè hweyà ema hwe hwèlì ŋgundu, aŋga nanù è òŋgama Lohwɛ̀ là lòŋgɛ ema mɔ̀ ndi à hwèki è ŋmanyu nà è rze nà ŋmàànjà nà hwèèmà hwe arzɛ ema hwe hwèlì ò tènì yà awu.

¹⁶Ò màrzàlɛ̀ Lohwɛ̀ à mà gbeyà hwatò hwa arzɛ ò lì gbeyà mamɛ ema hwa lìŋgàni.

¹⁷Ndi tɔ nanù, mɔ̀ à mà uŋmɛ̀lɛ̀ hwèmɛ̀nɛ̀nì nanù ema à hwèlì, ò hweyà hwe gbamù ema mɔ̀ à gbeyà. À è yɔ̀lìrzɛ̀lɛ̀lɛ̀ è mbuwà ema è uwɛ̀lɛ̀lɛ̀yi ò ŋmanyu yà lohwà, ndèŋgànɛ̀lɛ̀ à mà è ŋgba hvɛ è mbòtà ò hvònda yà jɔ̀kɛ̀. À è ŋgba mòlelì rzìi à è òndìrzɛ̀ mèèmà mè anyu nà mɔ̀nyɛ̀ŋgì.”

¹⁸Tɔ̀ nà òma Pàwolò nà Bànàbàrzì hwa mà òhwe hwene hweyà hwe arzɛ nanù, è mà hwa ambana ò wɔ̀ lì tɛ̀mìrzɛ̀ è ŋgìndì nanù ema hwa rzi hwa ŋgba màŋga màhwèyà ema hwa mà arza lì ŋgba.

¹⁹Lòŋgò là hwatò hwa wònyà Yudà hwa mà uwɛ̀lɛ̀lɛ̀yi ò mbòwà ndɛnɛ yà Antìyɔ̀kì ò erzòòkà yà Pìrzìdìyà, ndèŋganɛlɛ hwa mà uwɛ̀lɛ̀lɛ̀yi hvɛ ò è mbòwa ndɛnɛ yà Ikɔ̀nìyùmì rzi hwa uka ò è mbòwa ndɛnɛ ya Lìrzìtìrà. Wɔ̀ hwa mà lɔ̀mbɔ̀ è ŋgindi natɛ̀ɛ wɔ̀ nà è ŋgindi hwa uŋma Pàwolò màŋyàyi, rzìi hwa à mò kòòhwà ò rze, rzìi hwa mò wurzana ò mbòwà ndɛ̀nɛ, èhwanja hwa mà ɔ̀ŋgɛ̀lɛ̀ nanù ema à mà ŋwa.

²⁰Ndi ò mburza hvònda ema hwàlòkèlì hwa mà mò tòŋge, à tɛ̀mɛ̀nɛ̀ ò ŋmanyu rzìi à tìmba ò lì kpèeyà ò tenì yà eŋge mbòwà ndɛnɛ. Nà òma wùnyà wò mà yahwe, mɔ̀ nà Bànàbàrzì hwa mà ɛ̀ndɛ ò mbòwa ndɛnɛ yà Dɛ̀bì.

²¹Pàwolò na Bànàbàrzì hwà mà òhwa ŋmɛ̀ndì mò gbamù mò ama Lohwɛ̀ ò mbòwà ndɛ̀nɛ ya Dɛ̀bì, hwà mà gbeyà rzayi-rzayi ja hwatò ò lì hwɛ hwà-òkòwèlì hwa ama Yerzù. O mburza nanù, hwà mà tìmba ò imbowà ndɛnɛ ja Lìrzìtìrà, Ikɔ̀nìyùmì, na Antìyɔ̀kì ò erzòòkà ya Pìrzìdìyà.

²²Tɔ ima èki ema hwà mà uke, hwà mà hwɛ lì òkòlɛ hwatò ema hwà mà lòkɛ̀ Yerzù na lì etìrzɛ mèèmà me awu aŋga nanù hwa ò alɛ̀mbɛ̀nɛ lì lòkɛ̀ la awu. Hwà mà hwɛ lì hwa òkòlɛ nanù ema, “I hwɛni lì akeyà rzayi-rzayi ja mètàkà ndèŋgàna je e kpèeyà ò lìkànèyà la ama Lohwɛ̀.”

²³O tɔ̀ ima ŋmèmba ema wɔ̀ hwà mà uke, wɔ̀ hwà mà hwɛ lì hvɔ̀rzɔ̀ hwatò ema hwa ò timbàa ŋmèmba mò arzɛ. È hvònda ema hwà mà kànɛ̀ na lì hwɛ ò mòkìyà njàwò, hwà mà ŋgba hwaŋga hwàtimbèlì ò màà mà ama Rzàŋgò ema wɔ̀ hwa ika lìlòkɛ̀ la awu.

²⁴È hvònda hwà mà akeyà ò ìtììtènì ja erzòòkà ya Pìrzìdìyà, rzìi hwa uka ò erzòòkà ya Pàmhvilìya.

²⁵È hvònda ema hwà mà kulɛ ò lì òhwa e eyà ya Lohwà ò mbòwa ndɛnɛ ya Pɛ̀ga, rzìi hwa ɔ̀ndɔ̀ ò mbòwa ndɛnɛ ya Atalìya.

²⁶Nà òma hwà mà uwɛ̀lɛ̀lɛ̀yi ò Atalìya hwà mà aka yulu, rzìi hwa tìmba ò Antìyɔ̀kì, èki ema hwà mà hwa kànɛlɛlɛ nanù ema e ndèli ya ama Lohwɛ̀ e hwa lìyɛlɛ ò èwòlò ema hwà mà kulɛ nàŋgɛ.

²⁷Nà òma wɔ̀ hwà mà uke ò mbòwa ndɛnɛ ya Antìyɔ̀kì, wɔ̀ hwà mà rzaŋga hwatò hwa ŋmèmba èki yɔ̀kɔ rzìi hwà hwa òhweyà mamɛ ya arzɛ ema Lohwɛ̀ à mà gbèyɛ lì akeyà na wɔ̀. Wɔ hwà mà hwa òhweyà nɛ Lohwɛ̀ à mà lìhvòweya e njiya ò hwatò ema hwa rza enje wònyà Yudà, ò lì lòkɛ̀ Yerzù.

²⁸O èŋgànɛ̀lɛ̀ wɔ̀ hwà mà lìya aŋga òma hvònda ema e ma wawa na hwàlòkèlì.