Read Mokpwe Hwègbèèlì 15 Bible Online

Hwègbèèlì 15 - Mokpwe bible

Hwègbèèlì 15

¹Lòŋgò la hwatò hwà mà uwɛ̀lɛ̀lɛ̀yi ò erzòòkà ya Jùdeyà rzìi hwa jà lì uka ò mbòwa ndɛnɛ ya Antìyɔ̀kì. Hwa wòteya lì òkòlɛ̀ hwàlòkèlì nanù ema, “Mòtò a rza endàhwi tɛ na òma e mbenda ya ama Mòrzè ya arza, a rza tanɛ a rzùŋgàhwà.”

²Ène eyà e ma jàneyà Pàwolò na Bànàbàrzì hvenda ndɛnɛ natɛ̀ɛ wɔ hwà mà imanɛlɛ nanù ema Pàwolò, Bànàbàrzì na hwahvɛhvɛ hwatò hwa ɛndɛ ò Jèrurzalɛ̀mù, ò lì ɛndɛ lì ɛnɛ i àpɔ̀rzìtòlò na hwàtimbèlì hwa ŋmèmba lì hvòmɛ̀nɛ̀ ene eyà.

³Hwàtò hwa ŋmèmba hwà mà ɛndɛ lì hwa lìyɛlɛ ò njiya. Nà òma wɔ̀ hwà mà akeyà ò hwèrzòòkà hwe Hvɔ̀nìrzìyà na Rzàmarìyà hwà mà nɔ̀ŋgeyà hwatò nɛ hwaŋga hwatò ema hwa rza enje wònyà Yudà hwà mà tikòwahwɛ ò lì timbeya Lohwɛ̀. Mònò ŋmɛ̀ndì mò ma lìŋgirzɛ hwàlòkèlì hwa arzɛ.

⁴Nà òma Bànàbàrzì na Pàwolò hwà mà ùke ò Jèrurzalɛ̀mù, ŋmèmba ema mò ma hwɛ aŋga, i àpɔ̀rzìtòlò, na hwàtimbèlì hwa ŋmèmba hwà mà hwa arzàŋgànɛ̀lɛ̀. Pàwolò na Bànàbàrzì hwà mà hwa òhweyà hweyà hwe arzɛ ema Lohwɛ̀ à mà gbèyɛ ò lì akeyà na wɔ.

⁵Ndi tɔ̀ nanù, lòŋgò la hwàlòkèlì ema hwà mà hwɛ ò ehvehva ya Hvàlìrzàyì hwà mà tɛ̀mɛ̀ ò ŋmanyu rzìi hwa òhwa nanù ema, “Hwàŋga hwatò ema hwa rza enje wònyà Yudà ema hwa lòkɛ̀ Yerzù, hwa àŋgàmɛ̀nɛyi lì endàhwa, na lì òhwahwɛlɛ ò lì ika imbenda ja ama Mòrzè.”

⁶Ène eyà e ma gbeyà ema I àpɔ̀rzìtòlò na hwàtimbèlì hwa ŋmèmba hwà mà taneya ò lì chakumɛlɛ ene mbɔrzi.

⁷O mburzà lì chakumɛlɛ ema lì ma wawa, Pètrò rzìi a tɛ̀mɛ̀ ò ŋmanyu rzìi a hwa òhweyà nanù ema, “Ìi wònyànyàŋgò ami kòkò, e hwi nanù ema Lohwɛ̀ à mà nò hvɔ̀rzɔ̀ ò ìtììtènì ja anyu, ò lì òhweyà hwatò ema hwa rza enje wònyà Yudà Ŋmɛ̀ndì mò Gbamù aŋga nanù wɔ̀ hwa mò hweyà rzìi hwa mò lòkɛ̀.

⁸Lohwɛ̀ ema a hwi mèèmà me hwatò, à mà uŋmɛ̀lɛ̀ nanù ema à mà ŋgba hwaŋga hwatò ema hwa rza enje wònyà Yudà è wònjà ò lì lòkɛ̀, na òma à mà hwa ŋgbe Èlìŋgɛ̀ yà Wòtani, ŋgàna hvɔ̀kɔ mɛnɛ na òma à mà jò ŋgbe irzɔ hvɛ e yɔ.

⁹Lohwɛ̀ a rzi gbèye tɔ̀ ndandò ò wɔ̀ tɔ̀ irzɔ, èhwanja mɔ̀ à mà hwa làkirzɛ wòhwe wò awu lì akeyà na lìlòkɛ̀ la awu.

¹⁰Nàŋgɛ̀ rzɔ mamɛ ndèŋgàtɛ inyɔ e keka ò lì kèkirzɛ Lohwɛ̀ e? O lì gbeyà nanù ema hwatò ema hwa lòkɛ̀ Yerzù hwa hwànɛ miyuna ema imbamba ja arzu tɔ̀ irzɔ i rza tanɛ lì hwanɛ̀ e?

¹¹Jàyɛ̀! Irzɔ i lòkɛ̀ ndèŋgànɛ̀lɛ̀ i rzùŋgàhwi lì akeyà na e ndèli ya ama e Rzàŋgò ya arzu Yerzù nyayi hvɔ̀kɔ na òma wɔ̀ hvɛ hwa rzùŋgàhwi.”

¹²Èŋge ŋgindi ya arzɛ e ma hwɛ ndi lì òkànèyà ŋmɛ̀ɛ, na òma Bànàbàrzì na Pàwolò hwà mà hwɛ lì hwa òhweyà hwèèmbanelì na mànyàka ema Lohwɛ̀ à mà gbeye lì akeyà na wɔ ò ìtììtènì ja hwaŋga hwatò ema hwa rzi hwɛ wònyà Yudà.

¹³Lirzakò ema hwà mà kulɛ lì òhwa, Jèmìrzì rzìi a òhwa nanù ema, “Wònyànyàŋgò hwa ami e nò òkànèyà tɛ!

¹⁴Rzimɔ̀ni mɔ̀ à mà jò uŋmɛ̀lɛ̀ naŋgɛ nɛ Lohwɛ̀ à mà wòteyà lì uŋmɛ̀lɛ̀ hwatò ema hwa rza enje wònyà Yudà, ŋmèma mò eni mò gbamù. È mòhvɔ̀rzèlì wà hwatò ò ìtììtènì ja awu ò lì hwɛ hwatò hwa eni.

¹⁵Ène eyà e gbeyi hwèyòhwèlì hwe hwà-òhwèlì hwa hwèlìŋgɛ̀ hwe òndìrzɛ̀hwɛ. È tìlahwì nanù ema,

¹⁶‘Imba Rzàŋgò na òhwa nanù ema, ene eyà e akayi tɛ, na tìmba lì jà hvɛ, Nà òŋga e ndawò ya ama Dàhwitì hvɛ ema e ma wùùlɛ̀hwɛ̀. Nà ò òŋga hwèèmà hwe arzɛ ema hwe ma wùùlɛ̀hwɛ̀ ndèŋgànɛ̀lɛ̀ na ò hwe timbirzɛ na òma hwe ma lòme lì hwɛ.

¹⁷Aŋga nanù hwanɛyi hwatò hwa e rze ya arzɛ hwa ò nò jèeya, nà mà hvɔ̀rzɔ̀ hwatò ema hwa rza enje wònyà Yudà ò lì hwɛ hwatò hwa ami. Imba e Rzàŋgò ndi òhwi nanù.

¹⁸Imba ndi nà mà gbeyà hwenè hweyà hwe arzɛ hwe ma hwiyahwe natɛ̀ɛ na e hvònda ya kòhwa.’”

¹⁹Jèmìrzì à mà ɛndɛ ò wòrzò hvɛ ò lì òhwa nanù ema, “È mbakò ya ami e hwèlì ndi ema irzɔ i rza tàkirzɛ hwanù hwatò ema hwa rza enje wònyà Yudà ema hwà mà àyìŋgòwɛ̀lɛ̀lɛ̀ Lohwɛ̀.

²⁰Eyà ema irzɔ i hwɛni ò lì gbeyà e hwèlì ndi ò lì hwa tìleyà kààtì nanù ema, hwa rzi làa tɔ̀ mòlèlì ema mò ŋgbààhwà nàa màhwèyà ò hwèrzùmbù èhwanja mòŋgò mòlèlì mò rza rzàŋgi, hwa kiye mòrzònje, hwa kìye ò lì làa hwèembè ema hwe ŋwelì mòtìmà, ndèŋgànɛ̀lɛ̀ hwa rzi laa hvɛ màyija.

²¹Irzɔ i hwi nanù ema natɛ̀ɛ na e hvònda kòhwa imbenda ja ama Mòrzè i ma làŋgàhwa ò ndawò ya màkanɛ̀ ya wònyà Yudà ò tɔ̀ ima Wùnyà wò lì Arzìyòlɛ̀. Ndeŋgana eŋge mbɔrzi e ma òhwahwa ò tenì ya mambòwà mà ndɛnɛ ma arzɛ.”

²²O èŋgànɛ̀lɛ̀ I àpɔ̀rzìtòlò na hwàtimbèlì hwa ŋmèmba na ŋmèmba mò arzɛ hwà mà kulɛ nanù ema, hwa hvɔ̀rzɔ̀ e hwa awu hwatò rzìi hwà hwa òma ò Antìyɔ̀kì mòndèŋge na Pàwolò na Bànàbàrzì. Wɔ̀ hwà mà hvɔ̀rzɔ̀ Jùdàrzì ema à mà hwɛ̀lɛ̀hwɛ̀ Bàrzabàrzì na Rzàyilàrzì, wunyanà ema hwà mà hwɛ hwàtimbèlì ò tenì ya hwàlòkèlì.

²³È kààtì ema hwà mà hwa òmane ò Antìyɔ̀kì e ma òhwa nanù ema, “Irzɔ I àpɔ̀rzìtòlò, na hwàtimbèlì hwa ŋmèmba, ema i hwèlì wònyànyàŋgò hwa anyu jò e òmelì inyɔ wònyànyàŋgò hwa arzu hwa arzɛ ema e rza enje wònyà Yudà iikɔ̀mi. Inyɔ ema e lìya ò mbòwà ndɛnɛ ya Antìyɔ̀kì ò erzòòkà ya Rzìrìyà na Rzìlirzìyà.

²⁴Irzɔ i ma hweyà nanù ema lòŋgò la hwatò ema hwa uwɛ̀lɛ̀lɛ̀yi ò mba arzu lì e jèeya, wɔ hwa e emirzɛyi na hweyà ema hwa òhwa. Ndi inyɔ e hwɛni lì hwiya nanù ema i rzi hwa ŋgbelì tɔ wònjà ò lì gbeyà nanù.

²⁵Irzɔ i ma lìya ò lì chakumɛlɛ hwenè hweyà, ò èŋgànɛ̀lɛ̀ irzɔ i ma kaka nanù ema, irzɔ je e hvɔ̀rzèyà ŋgurzu ja hwatò ema je e òmeya. Wɔ hwa ɛndɛ na Pàwolò na Bànàbàrzì ema irzɔ i lìŋgàni rzayi-rzayi.

²⁶Wɔ̀ ema hwà mà lòme lì ika mòŋgɛ ma awu ò mbenakò ò lì gbèeyà e Rzàŋgò ya arzu Yerzù Krirztò.

²⁷O èŋgànɛ̀lɛ̀ irzɔ je e òmeya Jùdàrzì na Rzàyìlàrzì wɔ hwa e òhweyà eŋge eyà mɛnɛ ema irzɔ i ma e tìleya.

²⁸Èlìŋgɛ̀ yà Wòtani e ma jò lìyɛlɛ nanù ema i rza e tàkirzɛ na hwehvɛhvɛ hweyà lì aka tɛ hwene hweyà ema hwe hwèlì wòlìtò.

²⁹È rzi keka lì làa tɔ̀ mòlelì ema mò ma ŋgbààhwɛ̀ hwèrzùmbù. È rzi keka lì laa màyija, e kìye ò lì làa hwèembè ema hwe ŋwelì mòtìmà. È rzi gbeyà mòrzònje. È ò hwɛ gbamù e rza gbèyi tɛ hwene hweyà. Je ahvìtɛ̀ hwèlìyelì hwe gbamù.”

³⁰Nà òma hwà mà kulɛ lì tìla eŋge kààtì, hwà mà ɛndɛ lì lìyɛlɛ hwaŋga hwatò ò njiya ò yɔ̀ndɔ̀ ya awu ò Antìyɔ̀kì. Nà òma hwà mà uke aŋga, hwà mà rzaŋga hwàlòkèlì hwa arzɛ rzìi hwa hwà ŋgba eŋge kààtì.

³¹Nà òma hwaŋga hwatò hwà mà laŋge eŋge kààtì, wɔ hwà mà lìŋga ehwànja ò ma hwɛ ŋmɛ̀ndì ema mò ma lìŋgirzɛ mèèmà me awu.

³²Jùdàrzì na Rzàyìlàrzì, ema wɔ̀ hwiti hwà mà hwɛ ndi hwà-òhwèlì hwa hwèlìŋgɛ̀, hwà mà òhwa rzayi-rzayi ò lì kɔ̀mɛ̀lɛ̀ na lì embɛ hwàlòkèlì.

³³Nà òma hwà mà lìya aŋga ò ŋmanà hvòka hvònda hwàlòkèlì hwà mà ɛndɛ lì hwà lìyɛlɛ na ɛ̀yɔ̀lɛ̀ rzìi hwa timbeya hwatò ema hwà mà hwa òma.[2]

³⁴

³⁵Pàwolò na Bàlabàrzi hwà mà lìya ò Antìyɔ̀kì ò ŋmanà hvòka hvònda. Wɔ̀ na rzayì-rzayì ja hwahvɛhvɛ hwatò, hwà mà òkòlɛ̀ na lì òhwa eyà ya ama Rzàŋgò.

³⁶O mburza hvònda, Pàwolò rzìi a òhweyà Bànàbàrzì nanù ema, “Inyɛ̀ i timbe, ò tenì ya maŋga mambòwà ma ndɛnɛ ma arzɛ ema i ma lòmè lì òhwa eyà ya ama Rzàŋgò, ò lì hvɛ̀hvɛ hwàlòkèlì na ò lì ɛnɛ nɛ hwa hwèlì.”

³⁷Bànàbàrzì à mà arza lì wòwa Yòwanìrzɛ̀ Màkòrzì na wɔ̀,

³⁸Ndi Pàwolò à mà rzɔ̀rzɔ̀ na ŋginyà èhwanja Yòwanìrzɛ̀ Màkòrzì à mà lòma lì hwa kìnyɛ̀lɛ̀ ò mbòwa ndɛnɛ ya Pàmhvilìya ndèŋgànà hwa e kulɛ èwòlò.

³⁹Ène ŋgàna e ma hwa jàneyà mbùnakɛ̀ ya ŋginyà ema e ma hwa kakòhwà. Bànàbàrzì rzi a wòwa Yòwanìrzɛ̀ Màkòrzì na mɔ̀, rzìi hwa ɛ̀ndɛ yɔ̀ndɔ̀ ya malìhwa ò lì aka yùulu rzìi hwa uka ò èkòmè ya Rzàyiprɔ̀rzì.

⁴⁰Pàwolò mɔ̀ à mà hvɔ̀rzɔ̀ Rzàyìlàrzì rzi a ɛ̀ndɛ. Hwàlòkèlì hwà mà hwa kànɛlɛlɛ nanù ema e ndèli ya ama Rzàŋgò a hwa timbe.

⁴¹Pàwolò à mà akànèyà Rzàyilarzì ò erzòòkà ya Rzìrìyà na Rzìlirzìyà, hwà mà hwɛ lì ɛndɛ na lì ètìrzɛ̀ ŋmèmba.