Read Mokpwe Hwègbèèlì 2 Bible Online

Hwègbèèlì 2 - Mokpwe bible

Hwègbèèlì 2

¹Nà òma e ndèma ema e hwɛ̀lɛ̀hwɛ̀ Pɛ̀ntìkɔ̀rzì e ma uke, hwalòkelì hwa ama Rzàŋgò hwà mà arzàŋgànɛ ò èki yɔ̀kɔ.

²O lìwòkimɛnɛ mɔ̀tɔ̀wù mò ma uwɛ̀lɛ̀lɛ̀yi ò ŋmanyu ya lohwà. È ma hwɛ ndi nàa mbɛ̀hvɛ̀nì ndɛnɛ ema e ma hwɛ lì aka. Rzìi mò ònda e ndawò ya arzɛ ema hwà mà hwɛ.

³Aŋga ndi wɔ̀ hwà mà ɛnɛ hwema nàa mùnya ema mò ma ayèkɛnɛ̀ mekakò me tɛmi ò mèyòhvò me tɔ̀ ima mòtò.

⁴Wɔ̀ hwa arzɛ hwà mà ònda na Èlìŋgɛ̀ yà Wòtani, rzìi hwa wòteya lì òhwa imbɔrzi ja hwahvɛhvɛ hwatò ema hwa rza òkòwɛ. Èlìŋgɛ̀ yɔ ndi e ma hwa lìyɛlɛ ò lì òhwa mamɛ ema hwà mà hwɛ lì òhwa.

⁵O eŋge hvònda, wònyà Yudà ema hwà mà hwɛ lì kanɛ̀ Lohwɛ̀ hwà mà hwɛ ò Jèrurzalɛ̀mù. Hwanu hwatò hwà mà uwɛ̀lɛ̀lɛ̀yi hwehvɛhvɛ hweki ò e rze yà mɔ̀nyɛ̀.

⁶Nà òma wɔ̀ hwà mà hweye mònò mɔtɔwu, ŋgindi ndɛnɛ ya hwatò e ma arzaŋganɛ ò eŋge èki ema hwalòkelì hwà mà hwɛ. Tɔ̀ ima mɔ̀ wa awu à mà jeja èhwanja na òma hwàlòkèlì hwà mà hwɛ lì òhwa, wɔ̀ hwa arzɛ hwà mà emba imbɔrzi ja awu ja mbòwa.

⁷O hwetamirzelì rzìi hwa ijòwa nanù ema, “Rzeke hwanù hwatò hwa arzɛ ema hwa òhwa nanù, hwa hwèlì ndi hwatò hwa erzòòkà ya Gàlìlì e?

⁸Nɛ rzɔ irzɔ i hwa hweyàna na òma wɔ̀ hwa òhwa ò imbɔrzi ja awu ja mbòwa e?

⁹O ìtììtènì ja arzu, lòŋgò la hwatò hwa mà uwɛ̀lɛ̀lɛ̀yi ndi ò èkòmè ya Pàtìyà, Mediya na Èlàmi; ò èkòmè ya Mèrzòpòtemìyà, Jùdeyà, Kapadorzìyà; O hwèkòmè hwe Pòntìyùrzì, na Èrzìyà,

¹⁰ò hwèkòmè hwe Hvrìgìyà na Pàmhvilìya, ò èkòmè ya Ìjiptò na lòŋgò la hwèhvàrzù ò èkòmè ya Lìbiya, ò tòŋgòŋgò ya Rzirènè, lòŋgò la hwa irzɔ jò uwɛ̀lɛ̀lɛ̀yi ndi ò mbòwa ya Ròmànì.

¹¹O ìtììtènì ja hwanu hwatò hwa arzɛ, lòŋgò hwa uwɛ̀lɛ̀lɛ̀yi ndi ò mòtende mò wònyà Yudà hwanɛyi hvɛ hwa hwèlì ndi hwatò ema hwa rza enje wònyà Yudà, ndi hwa òŋgami lìlòkɛ̀ là wònyà Yudà. Lòŋgò la arzu jò uwɛ̀lɛ̀lɛ̀yi ndi ò èkòmè ya Krɛ̀tɛ na ò èkòmè ya Arèbìyà, ndi tɔ̀ nanù, tɔ̀ ima mɔ̀ wa arzu a hwèya na òma hwa òhwa ò imbɔrzi ja arzu hweyà hwe ndɛnɛ ema Lohwɛ̀ à mà gbeyɛ.”

¹²O lì jeja la awu na hwètàmirzelì rzìi hwa a ijòwanɛ mɔ̀kɔ na ɔ̀nɛyi nanù ema, “Mamɛ e hwèlì jànda ja enè eyà e?”

¹³Ndi tɔ̀ nanù, lòŋgò hwà mà hwɛ lì kikòwa hwàlòkèlì rzìi hwa a òhwa nanù ema, hwa kulɛ ndi lì nyɔ mimba.

¹⁴Pètrò rzìi a tɛ̀mɛ̀nɛ ò ŋmanyu ò ìtììtènì ja lìnɛyi lìyòmɛ̀ la àpɔ̀rzìtòlò na mɔ̀kɔ, à mà karzɛ lìlò la eni ò ŋmanyu, rzìi a òhweyà e ŋgìndì nanù ema, “Ìi wònyamòwè hwa wònyà Yudà, na inyɔ hwa arzɛ ema e lìya ò mbòwa ya Jèrurzalɛ̀mù, e kòŋgɛ matò, inyɛ na e telɛlɛ mamɛ e hwèlì jànda ja ene eyà.

¹⁵Hwanu hwatò hwa rza nyɔlì ndi mìimbà na òma inyɔ e ɔ̀ŋgɛ̀lɛ̀. È hvònda e hwèlì ndi luuwa la ŋgɛ̀ŋgì mɛnɛ la elele.

¹⁶Jàyɛ̀, ene eyà e gbèyɛ̀nɛ ndi ò lì òndìrzɛ̀ jòòhwì ja ama e mòòhwèlì wà èlìŋgɛ̀ Jòhwɛlì à mà òhwe nanù ema,

¹⁷Lohwɛ̀ à mà òhwa nanù ema, ‘O mèenyà me lìrzukù, imba na òma Èlìŋgɛ̀ ya ami ya Wòtani ndèŋgànɛ̀lɛ̀ e jèeya tɔ̀ ima mòtò. Hwaana hwa anyu hwa wunyanà na e wɔ̀ hwa hwalana, hwa ò òhwa hweyà ema hwe ò gbèyɛ̀nɛ ò e hvònda ema e ò jɛ̀ɛ̀. Imberza ja anyu jò ò ɛnɛ jɛ̀nɛ̀nì ema jò uwɛ̀lɛ̀lɛ̀yi ò mba ami, hwàmbaki hwa anyu hvɛ hwa ò ɔ̀tɔ̀ indɔ̀tɔ̀.

¹⁸Nànù mɛnɛ ndi imba na gbèyà. O mèŋge mèenyà mɛnɛ, na òma èlìŋgɛ̀ ya ami ya Wòtani e ò rzihweyà hwàgbèèlì hwa ami, hwa wunyanà na hwalana, ndèŋgàna wɔ̀ hwa ò òhwa hweyà ema hwe uwɛ̀lɛ̀lɛ̀yi ò mba ami ndèŋgànà hwa ò òhwa hvɛ hweyà ema hwe ò gbeeyɛnɛ ò e hvònda ema e ò jɛ̀ɛ̀ ò wòrzò.

¹⁹Imba na ò uŋmɛ̀lɛ̀ hweyà hwe mànyakà ò ŋmanyu yà lohwà, ndèŋgànɛ̀lɛ̀ na uŋmɛ̀lɛ̀ hwembànèlì ò rze ya mɔ̀nyɛ̀. Màyìjà mò ò rzòweya, mùnya mò òŋwa na yutùtù hvɛ e wurza.

²⁰Igbèyi jò ò timba jìtìtì, ŋmɛ̀ɛlì hvɛ mò ayeŋgòwɛ̀ teeyi nàa màyija. Hwene hweyà hwe arzɛ hwe ò gbèyɛ̀nɛ ndèŋgànà hwejèelì hwe Wùnyà wò ndɛnɛ na èluhwe ya ama Rzàŋgò hwe ò jɛ̀ɛ̀.

²¹O eŋge hvònda tɔ̀ njɛ̀nɛ̀ ema a hwɛlɛyi Rzàŋgò nanù ema a mò òŋgòwane, a ò rzùŋgàhwa.’”

²²Petrò rzìi a ɛ̀ndɛ̀nɛ̀ e mbɔrzi ò wòrzò rzìi a òhwa nanù ema, “Hwàtò hwa Irzàyɛ̀lì, e òkànèyà kɔ̀yi-kɔ̀yi ò hweyà ema na arza lì òhwa. Lohwɛ̀ à mà gbeyà Yerzù mòtò wa e mbòwa ya Nàrzàrɛ̀tì ò lì gbeyà hweyà hwe ndɛnɛ hwe mànyakà na hwembànèlì ò lì e uŋmɛ̀lɛ̀ nanù ema mɔ̀ ŋmitɛ-ŋmitɛ ndi à mò òmi. Inyɔ hwiti e hwi nanù èhwanja eŋge eyà e ma gbèyɛ̀nɛ ndi ò ìtììtènì ja anyu.

²³Lohwɛ̀ à mà lòma lì hwiya nanù ndèŋgànɛ̀lɛ̀ mɔ̀ à mà tɛ̀yirzɛ nanù ema, e hwɛni lì òŋwa Yerzù ò lì mò akɛlɛ ò màà mà hwàkɔ̀yèlì ema hwa mò wòmeyà ò mbarza.

²⁴Ndi tɔ̀ nanù Lohwɛ̀ à mà mò hvùmùlɛ̀ ò kpelì, a mò rzòlohwà hvɛ ò mòrziyò mò kpelì èhwanja e ma ambana e kpelì ò lì mò lɛmbɛ nàa mòtò wa hwèwòwà.

²⁵Kìŋgɛ̀ Dàhwitì à mà òhwa ò lì mò hvòmɛ̀nɛ̀ nanù ema, ‘Nà mà hwɛ lì ɛnɛ Rzàŋgò ò wòrzò wa ami i hvònda jà àrzɛ̀. Nà rza unda ŋgèŋgè èhwanja à hwèlì ò lìiya la ami la mòme.

²⁶O eŋgànɛlɛ rzɔ ŋmèma mò ami mò òndi na mɔ̀nyɛ̀ŋgì, ndèŋgànɛlɛ hvɛ imba na òhwa ŋmɛ̀ndì na mɔ̀nyɛ̀ŋgì. È nyò ya ami yɔ hvɛ e ò hwɛnɛ lìhvìtà na òma na hwèlì lòŋgɛ.

²⁷Nà àrzìyòlɛ̀ ò lìhvìta èhwanja à rza ò kìnyɛ̀lɛ̀ èlìŋgɛ̀ yà ami ò èkòmè ya kpelì, ndèŋgànɛ̀lɛ̀ ò rza ò emeyà nanù ema èèmbè yà ama è mògbèèlì wà aŋgɔ̀ ema à ò gbèeyà nà ŋmèma mɔ̀kɔ ò lì rzɔ̀mbeyà ò tenì ya rzɔ̀ŋgɔ̀.

²⁸O ma nò uŋmɛ̀lɛ̀ injiya ema i jànà lòŋgɛ̀, ndèŋgànɛlɛ na òma o ò hwɛ ò tòŋgòŋgò ya ami na ò lìŋga.’”

²⁹Petrò rzìi a òhwa hvɛ nanù ema, “Ìi wònyamòwè kòkò, na e òhweyà kɔ̀yi-kɔ̀yi nanù ema, e mbamba ya arzu Kiŋgɛ̀ Dàhwitì e ma ŋwa. A ma imayɛhwɛlɛ ndèŋgàna mòlìma mò eni mò hwèlì anu na irzɔ natɛ̀ɛ na e wò yawònò.

³⁰Dàhwitì à mà hwɛ ndi mòòhwèlì wà èlìŋgɛ̀ ndèŋgànà mɔ̀ à mà hwiya yòòma ema Lohwɛ̀ à mà òhwe nanù ema a mò ŋgba. Lohwɛ̀ à mà aàtɛ yòmbò nanù ema, a ò wòwa ŋmanà ò mòtende mò ama Dàhwitì a ò mò lìirzɛ kiŋgɛ nyayi hvɔ̀kɔ na òma Dàhwitì hvɛ à mà hwɛ kiŋgɛ.

³¹Dàhwitì à mà ɛnɛ̀ hvòò mamɛ Lohwɛ̀ à mà hwɛ̀nɛ̀ lì gbeyà ò wòrzò rzìi à òhwa hweyà lì hvòmɛ̀nɛ̀ hwèhvùmùwèlì hwe ama è Mɔ̀ ema à Ɔ̀kirzɛ̀hwɛ̀yi. A mà òhwa nanù ema, ‘Lohwɛ̀ a rzi emeyà nanù ema mɔ̀ à ò kìnyɛ̀lɛ̀ ò èkòmè ya kpelì, ndèŋgànɛ̀lɛ̀ èèmbè ya eni e rzi rzɔ̀mbeyà ò tenì ya rzɔ̀ŋgɔ̀.’

³²Lohwɛ̀ a mà hvùmùlɛ̀ òŋgò Yerzù ò kpelì ndèŋgàna irzɔ hwa arzɛ i hwèlì mbòŋgi nanù ema à mà hvùmuwa.

³³Lohwɛ̀ à mà mò ŋgba kònda yà èluhwe ò lìya là eni là mòmɛ̀. Ndeŋgànɛ̀lɛ̀ à mà mò ŋgba Èlìŋgɛ̀ yà Wòtani ema à mà òhwe nanù ema à ò mò ŋgba. Yerzù mɔ̀ hvɛ à mà jò ŋgba eŋge èlìŋgɛ̀ ndèŋgànɛ̀lɛ̀ yɔ̀ ndi è gbèyi ema inyɔ è ɛnɛ̀ nà lì hweyà tɔ̀ mamɛ ema è gbèyɛ̀nɛ̀ yàwònò.

³⁴Irzɔ i hwi nanù ema, Dàhwitì mɔ̀ ŋmìti a rzi agbe ò ŋmanyu yà lohwà ndi tɔ̀ nanù, mɔ̀ à mà òhwa nanù ema, ‘Rzàŋgò Lohwɛ̀ à mà òhweyà e Rzàŋgò ya ami nanù ema, Lììyà ò lìya la ami la mòmɛ̀,

³⁵natɛ̀ɛ nà lìrzakò ema nà ò gbeyà ema ò làalè hwàkɔ̀yèlì hwa aŋgɔ̀ nà màtàŋgà ma aŋgɔ̀.’”

³⁶Petrò rzìi a hwatɛ hvɛ ò lì òhwa nanù ema, “O eŋgànɛlɛ rzɔ inyɔ hwa arzɛ hwatò hwa Irzàyɛ̀lì e hwɛni lì hwiye na e jɔ̀kɛ̀ nanù ema, ò nò Yerzù ema inyɔ e ma wòmeyà ò mbarza mɔ̀ ndi à hwèlì e mɔ̀ ema Lohwɛ̀ à mà gbeyɛ, e Rzàŋgò ndèŋgànɛ̀lɛ̀ mɔ̀ ndi à hwèlì è Mɔ̀ ema à Ɔ̀kirzɛ̀hwɛ̀yi.”

³⁷Nà òma hwatò hwà mà hweye mamɛ ema Pètrò à mà òhwe, mèèmà me awu me ma kerzeya. Rzìi hwa ijòwa Pètrò nà inɛyi àpɔ̀rzìtòlò nanù ema, “Ìi wònyàmòwe mamɛ ja àŋgàmɛ̀nɛyi lì gbeyà e?”

³⁸Pètrò rzìi a hwa alàhwɛ̀ nanù ema, “Tɔ̀ ima mɔ̀ wa anyu a tikòwe ò hwɛ̀ɛ̀mɛ̀ hwe wòhwe a timbeya Lohwɛ̀ rzìi a lùhwìrzɛ̀hwɛ̀ ò lìna la ama Yerzù Krirztò, aŋga nanù Lohwɛ̀ a e làkirzɛ ò wòhwe wò anyu. Ndeŋgana Lohwɛ̀ a e ŋgba jàhwèyà ja eni ja Èlìŋgɛ̀ yà Wòtani.

³⁹Lini lì kàkɛ̀nɛ̀ lì hwèlì ndi è la anyu na hwàànà hwa anyu na hwaŋga hwatò ema hwa rzɔlɛnɛyi ema hwa rza enje wònyà Yudà. È hwèlì ndi nàa tɔ̀ ima mòtò ema Rzàŋgò ya arzu Lohwɛ̀ à mà hwɛlɛ ò lì hwɛ na mɔ̀.”

⁴⁰Pètrò à mà hwa kòkòwɛ̀lɛ̀ na lì hwa òhweyà ihvɛhvɛ nyayi na nyayi ja hweyà. A ma hwa atɛkɛ nanù ema, “Tɔ̀ ima mòtò arzùŋgɛ̀ lòŋgɛ la eni. È rza enje tɛ nanù Lohwɛ̀ a e kɔ̀kìrzɛ̀ ŋgàna hvɔ̀kɔ na òma a ò kɔ̀kìrzɛ̀ ene nyɔ̀ŋgɔ̀nì ya wòhwe.”

⁴¹Rzayi-rzayi ja hwàtò ema hwà mà lòkɛ̀ eyà ema Petrò à mà òhwe hwà mà lùhwìrzɛ̀hwɛ̀. O wòŋgò wùnyà mɛnɛ, eyà ya hwekòlì hweyàwò hwe hwatò hwe mà ahwatɛ ò Mɔ̀rzɔ̀ŋgi mò hwàlòkèlì hwa ama Krirztò.

⁴²Hwàlòkèlì hwà mà ika mèèmà me awu ò lì òkòwa hweyà ema i àpɔ̀rzìtòlò i ma hwɛ lì hwa òkòlɛ, ndèŋgànɛ̀lɛ̀ hwà mà hwɛ mòndeŋgè na hwatò ema hwa lòkɛ̀ Krirztò. Mɔ̀ na wɔ̀ hwà mà hwɛ lì kànɛ, na lì lalɛnɛ̀ èki yɔ̀kɔ.

⁴³Tɔ̀ ima mòtò à mà jeja, ò nyòla rzayi-rzayi ja hweyà hwe mànyakà na hwembànèlì ema i àpɔ̀rzìtòlò i ma gbeye.

⁴⁴Hwàlòkèlì hwa arzɛ hwà mà hwɛ lì arzàŋganɛ ekì yɔ̀kɔ na ò lì akahwanɛ tɔ̀ mamɛ ema hwà mà òhve.

⁴⁵Hwa mà àhwirzɛ̀ hwerzàŋgò hwe awu, rzìi hwa kahwa lì hvòmɛ̀nɛ̀ hweyàrzèlì hwe tɔ̀ ima mòtò.

⁴⁶Wùnyà tɛ wɔ̀ hwa mà hwɛ lì tàneyà ò Ndawò yà Lohwà ò lì kanɛ̀. Wɔ̀ hwa mà làlɛnɛ̀ ò màndawò mà awu nà mɔ̀nyɛ̀ŋgì mò arzɛ nà ŋmèma mɔ̀kɔ.

⁴⁷Hwa mà hwɛ lì eka Lohwɛ̀ nà ò lì òka là mɔ̀nyɛ̀ŋgì mò hwèhwɛ̀ɛlì hwe gbamù hwe hwatò hwa arzɛ. Ndèŋgana wùnyà tɛ Rzàŋgò à mà hwatɛ ò mòndèŋge mò awu hwaŋga ema hwa mà hwɛ lì rzùŋgàhwà.