Read Mokpwe Hwègbèèlì 20 Bible Online

Hwègbèèlì 20 - Mokpwe bible

Hwègbèèlì 20

¹È hvònda ema eŋge kanjɛ-kanjɛ e ma ùke ò lìrzukù. Pàwolò à mà òma à mà hwa mò hwɛlɛlɛ̀ hwàlòkèlì, rzì a hwa ètìrzɛ̀ mèèmà. È hvònda à mà kulɛ lì hwa ètìrzɛ̀ mèèmà rzìi a hwa àkpànɛ̀ɛ, a ɛ̀ndɛ ò erzòòkà ya Màrzèdonìyà.

²Nà òma à mà akeyà hwèŋge hwèrzòòkà hwe arzɛ, à mà òhwa rzayi-rzayi ja hweyà ò lì ètìrzɛ̀ mèèmà me hwàlòkèlì hwa eŋge erzòòkà, rzìi a ɛ̀ndɛ ò èkòmè ya Àkayiyà.

³A ma lìya ŋgbɛ̀ndɛ iyàwò ò èkòmè ya Àkayiyà. A ma hwɛ lì wòŋgirzɛnɛ ò lì ɛndɛ ò èkòmè ya Rzìrìyà aŋga ndi à mà rzɔ̀ŋgìtɛ̀nɛ̀ nanù ema lòŋgò la hwatò hwa wònyà Yudà hwà mà lìyà wùndɛ̀ ya lì mò òŋwa. Aŋga ndi à mà wòŋgirzɛnɛ ò lì timba lì akeyà ò erzòòkà ya Màrzèdonìyà.

⁴Hwatò ema hwa mà mò òŋgama hwà mà hwɛ ndi Rzòpatà e ŋmanà hwa ama Hvìrzùrzì ema à mà uwɛ̀lɛ̀lɛ̀yi ò mbòwà ndɛ̀ɛndɛ̀ ya Bèrìyà, Arìrztàkùrzì na Rzèkùndùrzì ema hwà mà uwɛ̀lɛ̀lɛ̀yi ò e mbòwà ndɛnɛ ya Tɛ̀rzàlònìkà. Gàyiyùrzì ema à mà uwɛ̀lɛ̀lɛ̀yi ò mbòwà ndɛnɛ ya Dɛ̀bì, Tìmòtì, na Tàyìchìkùrzì na Tlòhvìmùrzì ema hwà mà uwɛ̀lɛ̀lɛ̀yi ò erzòòkà ya Èrzìyà.

⁵Hwanu wùnyànà hwà mà ɛ̀ndɛ ò wòrzò rzìi hwa jò ambɛ̀lɛ ò mbòwà ndɛnɛ ya Trɔ̀wàrzì.

⁶O mburza e Ndema ya Hwèhvòòtò ema hwe rza òhvɛ hwindi, irzɔ i ma kpèeyà ò melì me ŋmànja ò mbòwa ndɛnɛ ya Hvìlìpì ò mburza mèenyà meta i ma hwa ùŋmànɛ̀lɛ̀ ò mbòwa ndɛnɛ ya Trɔ̀wàrzì ema irzɔ i ma hwɛ mèenyà lìrzàmbà.

⁷Ŋgombe hvɔ̀kɔ ya rzàtelì, irzɔ hwa arzɛ i ma arzàŋgànɛlɛ èki yɔ̀kɔ ò lì laa ò lì uŋmɛ̀lɛ̀ e ndìŋgɛ ya ama e Rzàŋgò. Pàwolò à mà wòteyà lì òhwirzɛnɛ hwatò, a hwa òhwirzɛnɛ natɛ̀ɛ na ò e kɔrzi ya wuu, èhwanja mɔ̀ à mà hwɛnɛ lì endɛ ò enɛyi eka ya elele.

⁸Hwà mà hvàalɛ̀ rzayi-rzayi ja hwètùlù ò tu ya e ŋmanyu ya e ndawò ya ndɛki ema irzɔ i ma arzaŋganɛ.

⁹Mbèrza hvɔ̀kɔ ema e ma hwɛ̀lɛ̀hwɛ̀ Yùtìkùrzì e ma lìya ò hvànàmà, ijɔ i ma hwɛ lì mò kòòwà tenyi-tenyi ehwànja à mà òhva ijɔ ò mirzɔ̀. Nà òma Pàwolò à mà wàhwirzɛ̀ e mbɔrzi ya eni rzìi e Yùtìkùrzì a rzɔ̀ ò ijɔ, à mà hvòkòwa ò ŋmanyu ya eŋge hvànàmà ya eŋge tùu ya eŋge ndɛki ema e ma ùkirzɛ̀ iyàwò ja eŋge ndawò rzìi a unda ò rze ya mɔ̀nyɛ̀. Nà òma hwà mà ɛndɛ lì mò wòwa, hwa ùŋmànɛ̀lɛ̀ nanù ema à mà màa lì ŋwa.

¹⁰Ndi Pàwolò mɔ̀ à mà rzihwa ò rze ya eŋge ndawò rzìi a mò gbiyama ò nyò rzìi a mò rzɛhwɛ. A hwa òhweyà nanù ema, “È rza atàkìrzɛ̀, mɔ̀ à e hwèlì ò lòŋgɛ.”

¹¹Pàwolò rzìi a timba lì agba ò ŋmanyu ya eŋge ndawò ya ndɛki. O mburza hvònda ema mɔ̀ à mà kande èhvòòtò mɔ̀ na hwàlòkèlì rzìi hwa laa, à mà hwa òhwirzɛnɛ natɛ̀ɛ wuunyà wò yahwa. Rzìi à ɛndɛ.

¹²Wɔ hwà mà ɛ̀ndɛ̀nɛ̀ eŋge mberza ò ndawò ema e hwèlì lòŋgɛ. Hwàŋga hwatò hwà mà lìŋga rzayi-rzayi.

¹³Irzɔ i ma ɛndɛ ò wòrzò ò lì kpèeyà ò tenì ya melì me ŋmànja, rzi ja akeyà ò ŋmànja lì ɛndɛ lì uka ò mbòwa ndɛnɛ ya Arzɔ̀rzi. Aŋga ndi i ma àŋgàmɛ̀nɛyi lì wòwa Pàwolò. Mɔ̀ à mà òhwa nanù ema je ɛndɛ ò wòrzò, èhwanja mɔ̀ à mà ɛndɛ ndi yɔ̀ndɔ̀ ya ŋmindi.

¹⁴Nà òma mɔ̀ à mà jò ùŋmànɛ̀lɛ̀ ò mbòwa ndɛnɛ ya Arzɔ̀rzi i ma mò hwanɛ ò melì me ŋmànja rzi je ɛndɛ na mɔ̀ ò mbòwa ndɛnɛ ya Mitilɛni.

¹⁵O wònɛyi wùnyà, irzɔ i ma ɛndɛ yɔ̀ndɔ̀ ya ŋmànja lì anjiya aŋga, rzìi jò uka e rzàawà ya ŋmànja ya e mbòwa ndɛnɛ ya Kiyɔ̀rzi. O wònɛyi wùnyà hvɛ irzɔ i ma uka ò e rzàawà ya ŋmànja ya e mbòwa ndɛnɛ ya Rzàmɔ̀rzì, ò wònɛyi wùnyà hvɛ i ma uka ò e rzàawà ya ŋmànja ya e mbòwa ndɛnɛ ya Milɛturzi.

¹⁶Pàwolò mɔ̀ à mà kulɛ ndi nanù ema, i hwɛni lì hvanja e mbòwa ndɛnɛ ya Ɛ̀hvɛ̀rzɔ̀rzì ò ŋmanyu aŋga nanù i rza hvaŋga hvònda ò lì uka ò erzòòkà ya Èrzìyà. A ma hwɛ lì ahwèŋgɛ̀ ò lì uka ò mbòwa ndɛɛndɛ ya Jèrurzalɛ̀mù, ò wùnyà wò Pɛ̀ntìkɔ̀rzì à mà atanɛ tɛ.

¹⁷Nà òma i ma uke mbòwa ndɛnɛ ya Milɛturzi, Pàwolò à mà òma ŋmɛ̀ndì ò hwàtimbelì hwa ŋmèmba mò Ɛ̀hvɛ̀rzɔ̀rzì nanù ema hwa jèe hwa mò ùŋmànɛ̀lɛ̀ ò Milɛturzi.

¹⁸È hvònda ema hwà mà uke, rzìi mɔ̀ à hwa òhweyà nanù ema, “Inyɔ hwiti e hwi na òma imba nà mà lìya lìrzakò la arzɛ ema nà mà hwɛ na inyɔ, lì wòteyà wùnyà wò wòrzò ema imba nà mà tɛ̀yirzɛ lìtaŋga ò erzòòkà ya Èrzìyà.

¹⁹Nà ma gbèeyà e Rzàŋgò na lì arzirzɛ lì ndɛnɛ, na mirzɔ̀lì, na màkèkìrzɛ̀nɛ̀ ema me ma nò gbeeyɛnɛ, ehwànja wònyà Yudà hwà mà nò kimeya.

²⁰Inyɔ hwiti e hwi nanù ema e hvònda ema nà mà hwɛ lì e òhweyà ŋmɛ̀ndì mò gbamù, nà mà hwɛ ndi lì e òkòlɛ ò mòte, na ò mandawò ma anyu, na rzi e uteya tɔ̀ eyà tɔ̀ yɔ̀kɔ ema e ma hwɛnɛ lì e òŋgòwàna.

²¹Nà ma kòkòwɛ̀lɛ̀ hwatò hwa wònyà Yudà na hwatò ema hwa rza enje wònyà Yudà nanù ema wɔ hwa hwɛni lì tikòwa ò lì anjiya ò wòhwe wò awu lì timbeya Lohwɛ̀ na lì lòkɛ̀ hvɛ e Rzàŋgò ya arzu Yerzù.

²²Ndeŋgànɛ̀lɛ̀ ò naŋgɛ, na òma èlìŋgɛ̀ e nò lìyɛlɛ, na àŋgàmɛ̀nɛyi lì ɛndɛ ò mbòwa ndɛɛndɛ ya Jèrurzalɛ̀mù tɔ̀ nɛ na rza hwiyɛ mamɛ ema e ò nò gbèyɛ̀nɛ aŋga.

²³Nà hwi ndi nanù ema ò tɔ ima mbòwa ndɛnɛ ema na ɛndɛ, Èlìŋgɛ̀ yà Wòtani e nò kòkòwɛ̀lɛ̀ nanù ema hwèwòwà na mètàkà me hwèlì me nò ambɛ̀lɛ̀.

²⁴Ndi imba na rza wòwi lòŋgɛ la ami nàa tɔ̀ eyà. Aŋga nanù imba na kulɛ èwòlò ya ami, na èwòlò ema e Rzàŋgò Yerzù e ma nò ŋgbɛ. Èwòlò ya ami e hwèlì ndi ò lì òhwa Ŋmɛ̀ndì mò Gbamù lì hvòmɛ̀nɛ̀ e ndèli ema Lohwɛ̀ à mà uŋmɛ̀lɛ̀ hwatò hwa hwènàmà.

²⁵“Nà ma hwɛ na inyɔ, rzìi na a e òhweyà lì hvòmɛ̀nɛ̀ lìkànèyà la ama Lohwɛ̀. O naŋgɛ na hwi nanù ema tɔ mɔ̀kɔ wa anyu a rza ò nò ɛnɛ hvɛ.

²⁶O eŋgànɛ̀lɛ̀ rzɔ na e kòkòwɛ̀lɛ̀ yawònò nanù ema tɔ̀ ima mɔ̀ wa anyu a wɔ̀lɛ̀nɛ̀ tɛ lòŋgɛ la eni, a hwiye nanù ema imba rza enje aŋga.

²⁷Èhwànja ò rza enje tɔ̀ eyà ema imba na kiyi lì e òhweyà lì hvòmɛ̀nɛ̀ hweyà hwe arzɛ ema Lohwɛ̀ a kimi lì gbeyà.

²⁸È àwòŋgòhwɛlɛ inyɔ hwiti, na lìhwemba la hwatò ema Èlìŋgɛ̀ yà Wòtani ye e ŋgbelì ò rze ya anyu ò lì ɔŋgeya. È hwɛ nàa hwà-ɔ̀ŋgèlì hwa mɛ̀lɛ̀ŋgù e ɔŋgeya hwatò hwa ama Lohwɛ̀. A ma gbeyà ŋmèmba mò eni ò lì hwɛ e mò eni lì akeyà na e kpelì ema è Ŋmanà wà eni a ŋwelɛlɛyi ò mbarza.

²⁹Nà hwi nanù ema, imba nà mà ɛndɛ tɛ, hwatò hwa ò e jà ò ìtììtènì ja anyu ŋgànà hvɔ̀kɔ na òma mòkanyi mò njuwɛ mò kpèeyà ò lìhwemba la mbòlì. Ndeŋgànɛ̀lɛ̀ hwa rza o tànɛ lì ɛndɛ ema hwa rza e hvàŋgelɛ̀ ŋmèmba mò anyu.

³⁰O ò jà hvònda ema hwatò hwa ò uwɛ̀lɛ̀lɛ̀yi ò ìtììtènì ja anyu, ema hwa ò rzɛŋgɛnɛ hweyà hwe lì kɔ, aŋga nanù hwatò ema hwa lòkɛ̀ Yerzù hwa ò hwa òŋgama.

³¹O eŋgànɛ̀lɛ̀ rzɔ inyɔ e wòwe hvònda ò lì ɔ̀ŋgɛ̀lɛ̀ nanù ema nà mà hwɛ lì òkòlɛ inyɔ hwa arzɛ ò tenì ya ŋmerze na wuu, ò hvòka ya meya meyawò ò tenì ya lìtake.

³²O naŋgɛ nanù na e lì ò màà mà ama Lohwɛ̀ nanù ema a e ɔŋgeya. Ŋmɛ̀ndì ema nà mà e òhweyà lì hvòmɛ̀nɛ̀ e ndèli ya ama Lohwɛ̀ mò e òŋgòwàna. Nà hwɛni ŋginyà ò lì e ètìrzɛ̀ ndèŋgànɛ̀lɛ̀ na e ŋgba e ndèli ema Lohwɛ̀ à mà rzekeya hwatò hwa eni.

³³Nà rzi òhve tɔ̀ nyɔ̀ŋgi ò lì wòwàna tɔ mòtò tɔ mɔ̀kɔ e rzìlìhwà tɔ̀ e gòòlù ya eni tɔ lìwɔti.

³⁴Inyɔ hwiti e hwi nanù ema, nà mà gbeyà èwòlò na manù màà mà ami, rzìi na luwa wòlì ema irzɔ na hwatò hwa ami ema i ma hwɛ lì gbeyà èwòlò i ma àndane tɔ mamɛ ema i ma arze.

³⁵O tenì ya hwene hweyà hwe arzɛ, imba nà mà e uŋmɛ̀lɛ̀ nanù ema, ò lì gbeyà èwòlò na ŋginyà ò ene ŋgana, aŋga nanù inyɔ e òŋgòwàna hwà-òkèlì na lì ɔ̀ŋgɛ̀lɛ̀ e mbɔrzi ema Rzàŋgò Yerzù a ma òhwe nanù ema, ‘O hwèlì mònàmɛ̀ rzayi-rzayi ò lì ŋgbàà lì aka ò lì wòwa.’”

³⁶È hvònda ema Pàwolò à mà kulɛ lì òhwa, à mà rzuma màwɔ̀ŋgɔ̀ŋgɔ ma eni ò rze na wɔ hwa arzɛ rzi hwa kànɛ.

³⁷Wɔ hwa arzɛ hwà mà hwɛ ndi ò lùwa, na òma hwà mà mò arzàŋgànɛ̀lɛ̀ na ò lì mò kɔmɔ, ò lì mò akpanɛ ò yɔ̀ndɔ̀ ya eni.

³⁸Mamɛ ema e ma hwa lɛmbirzɛ ndùtù rzayi-rzayi, e ma hwɛ ndi e mbɔrzi ema Pàwolò à mà òhwe nanù ema, wɔ hwa rza ò mò ɛnɛ hvɛ. O eŋgànɛ̀lɛ̀ rzɔ hwà mà ɛndɛ ò lì mò lìyɛlɛ ò lì kpèeyà ò melì me ŋmànja.