Read Mokpwe Hwègbèèlì 21 Bible Online

Hwègbèèlì 21 - Mokpwe bible

Hwègbèèlì 21

¹O mburza hvònda ema i ma hwa àkpànɛ rzìi ja anjiya. I ma kpèeyà ò melì me ŋmànja. Irzɔ i ma ɛndɛ yɔ̀ndɔ ya arzu ya ŋmànja e rzi hwɛ lì tɛ̀mɛ̀ tɔ èki, natɛ̀ɛ jò ò uka ò mbòwa ya Kɔ̀rzì. O wònɛyi wùnyà rzi jò uka ò mbòwa ya Lòdɛ̀rzì. Lì anjiya aŋga rzi je ɛndɛ ò mbòwa ya Pàtàrà.

²Aŋga ndi i ma ùŋmànɛ̀lɛ̀ melì me ŋmànja ema me ma hwɛ lì ɛndɛ ò erzòòkà ya Hvɔ̀nìrzìyà. Irzɔ i ma kpèeyà ò tenì ya meŋge melì me ŋmànja rzìi i wòteyà lì ɛndɛ yɔ̀ndɔ ya arzu ya ŋmànja.

³I ma uka èki ema i ma hwɛ lì ɛnɛ èkòmè ya Rzàyìprɔ̀rzì ema e ma hwɛ ò tenì ya ŋmànja. Rzìi i wòwa ehvàrzu ya mbɛŋgɛ ò lì ɛndɛ lì uka ò erzòòkà ya Rzìrìyà. I ma uka ò mbòwa ya Tàyi rzìi i rzihwa ò melì me ŋmànja ehwànja aŋga ndi hwà mà hwɛnɛ lì rzihwirzɛ miiyuna ema me ma hwɛ ò tenì ya melì me ŋmànja.

⁴I ma a ahvùlùhwɛ lòŋgò la hwàlòkèlì aŋga. Rzi i lìya na wɔ ò mèenyà lìrzàmba. O e ŋginyà ya Èlìŋgɛ̀ yà Wòtani, wɔ hwà mà òhweyà Pàwolò nanù ema a rzi keka lì ɛndɛ ò Jèrurzalɛ̀mù.

⁵Ndi na òma e hvònda ya arzu na wɔ e ma ɔ̀lɛ irzɔ i ma hwa lìiya aŋga, rzi je ɛndɛ e ya arzu. Wɔ hwa arzɛ na i jòjìyɛ̀ ja awu na hwàanà hwa awu, hwà mà jò lìyɛlɛ ò lì wurza ò tenì ya eŋge mbòwa ndɛnɛ. I ma hwɛmɛ e mbòwa rzìi jò uka ò rzàawà. Irzɔ hwa arzɛ i ma rzuma màwɔ̀ŋgɔ̀ŋgɔ̀ ma arzu ò mòkòkò rzi i kànɛ.

⁶O mburza hvònda ema i ma àkpànɛ mɔ̀kɔ na ɔ̀nɛti, rzi i kpèeyà ò tenì ya melì me ŋmànja rzìi wɔ hwa timba ò mandawò ma awu.

⁷Irzɔ i ma ɛ̀ndɛ̀nɛ̀ yɔ̀ndɔ̀ ya arzu ya malìhwa ò wòrzò, ò lì anjiya ò mbòwa ya Tàyi rzi jò uka ò mbòwa ya Tòlɛmàyìrzì. Nà òma i ma uke aŋga, i ma kɔ̀mɔ hwàlòkèlì hwa ama Krirztò, i ma lìya na wɔ eyù yɔ̀kɔ.

⁸O wònɛyi wùnyà irzɔ i ma anjiya ò mbòwa ya Tòlɛmàyìrzì rzi jò uka ò mbòwa ya Kàyìrzèrìyà. Nà òma i ma uke aŋga, i ma kpèeyà ò e ndawò ya ama Hvìlìpì e mòòhwèlì wà ŋmɛ̀ndì mò gbamù, rzi i lìya na mɔ̀. Mɔ̀ à mà hwɛ ndi mɔ̀kɔ wà lìrzàmba la wunyanà ema hwà mà hvɔ̀rzɔ̀wɔ̀ nàa hwà-òŋgòwànèlì ò ŋmèmba mò Jèrurzalɛ̀mù.

⁹A ma òhva hwàna hwànìi ema hwà mà hwɛ ndi mèyɔ̀mbɔ̀ me ŋgɔ̀ndɔ̀, ema hwà mà hwɛ lì òhwa hweyà ema hwe ma uwɛ̀lɛ̀lɛ̀yi ò ma Lohwɛ̀.

¹⁰O mburza hvònda ema irzɔ i ma akɛlɛ ŋgurzu ja mèenyà aŋga, mòòhwèlì mɔ̀kɔ wa èlìŋgɛ̀ ema à mà hwɛ̀lɛ̀hwɛ̀ Agàbùrzì rzìi a ɔ̀ndɔ̀ yɔ̀ndɔ̀ lì anjiya ò erzòòkà ya Jùdeyà ò lì jò jèeya.

¹¹Nà òma à mà jèe lì jò uŋmànɛlɛ, a wòwa e ŋgòlì ya ama Pàwolò, rzi a e kakana màa na meende me eni, rzi a òhwa nanù ema, “Èlìŋgɛ̀ ya wòtani e òhwi nanù ema e mòhwɛnɛ wa ene ŋgòlì, a ò kakahwa na wònyà Yudà ò Jèrurzalɛ̀mù, rzi hwa mò akɛlɛlɛ hwaŋga hwatò ema hwa rza enje wònyà Yudà.”

¹²Nà òma irzɔ i ma hweye nanù, irzɔ na hwahvɛhvɛ hwatò hwa eŋge mbòwa ema hwà mà hwɛ aŋga, i rzòrzòmeya Pàwolò nanù ema mɔ̀ à rzi ɛndɛ ò Jèrurzalɛ̀mù.

¹³Ndi Pàwolò à mà alàhwɛ̀ nanù ema, “Mamɛ inyɔ e hwèlì e gbeyà nanù e? O lì eyà nanù rzi ya a nò tùlɛ ŋmèma e? Nà wòŋgìrzɛ̀nɛyi rzeketɛ ò lì kakahwa mɛnɛ, ndi tɔ̀ ò lì ŋwèeyà ò Jèrurzalɛ̀mù, ehwànja na gbèeyà Rzàŋgò Yerzù.”

¹⁴Kànàtɛ irzɔ i rzi tanɛ lì mò tikòwa ŋmèma ò eŋgànɛ̀lɛ̀ i ma hwɛmɛ rzi jò òhwa nanù ema, “Inyɛ̀ lì emeyà la ama Lohwɛ̀ lì gbèyɛ̀nɛ.”

¹⁵O mburza mene mèenyà me arzɛ, irzɔ i ma wòŋgirzɛnɛ rzi i wuŋguhweyà ò lì agba ò Jèrurzalɛ̀mù.

¹⁶Lòŋgò la hwà-òkòwèlì ema hwà mà uwɛ̀lɛ̀lɛ̀yi ò e mbòwa ya Kàyìrzèrìyà wɔ hvɛ hwà mà ɛndɛ na irzɔ. Rzìi hwa jò ɛ̀ndɛ̀nɛ̀ ò e ndawò ya ama Nàrzɔ̀nì ema aŋga ndi i ma hwɛnɛ lì lìya. Nàrzɔ̀nì à mà uwɛ̀lɛ̀lɛ̀yi ndi ò èkòmè ya Rzàyiprɔ̀rzì ndèŋgànɛlɛ a hwèlì ndi mɔ̀kɔ ema à mà lòma lì lòkɛ̀ Krirztò.

¹⁷È hvònda ema irzɔ i ma uke ò Jèrurzalɛ̀mù, hwàlòkèlì hwa ama Krirztò ema hwa hwèlì aŋga, hwà mà jò kàrzɛ na mɔ̀nyɛ̀ŋgi.

¹⁸O wònɛyi wùnyà Pàwolò à mà ɛndɛ na irzɔ ò lì ɛnɛ Jèmìrzì. Hwàtimbèlì hwa arzɛ hwà mitèlì, hwà mà ukeya aŋga.

¹⁹Pàwolò à mà hwa kɔ̀mɔ̀. O mburza ìikɔ̀mi ja eni rzìi a hwa telɛlɛ kɔ̀yi-kɔ̀yi hweyà ema Lohwɛ̀ à mà gbeye ò ìtììtènì ja hwatò ema hwa rza enje wònyà Yudà lì akeyà ò èwòlò ema mɔ̀ Pàwolò à mà gbeyɛ.

²⁰O mburza hvònda ema wɔ hwà mà hweyɛ mamɛ Pàwolò à mà òhwe, rzìi hwa eka Lohwɛ̀. Rzìi hwa òhweyà Pàwolò nanù ema, “Ŋmànyàŋgò wa arzu kòkò, ò wa ò tanɛyi lì ɛnɛ na òma ò hwèlì hwekòlì, na hwekòlì hwe hwatò hwa wònyà Yudà, ema hwe ma jɛ̀ɛ̀ hwàlòkèlì ndèŋgànɛ̀lɛ̀ wɔ hwa arzɛ hwa ikayi e mbenda ya ama Mòrzè na nyɔ̀ŋgi ndɛnɛ.

²¹Wɔ hwà mà òhwahwɛlɛ lì hvòmɛ̀nɛ̀ ò wa nanù ema, ò òkòlɛ wònyà Yudà hwa arzɛ ema hwa lìya ò hwèkòmè hwe hwaŋga hwatò ema hwa rza enje wònyà Yudà, nanù ema wɔ̀ hwa rza oŋgàmà e mbenda ya ama Mòrzè. Wɔ hwa òhwa nanù ema, ò wa ò hwa òhweyà nanù ema hwa rzi enda hwàanà hwa awu, ndèŋgàna hwa rza òŋgama ɛ̀ɛ̀mɛ̀ ya wònyà Yudà.

²²Ndèŋgàna wɔ̀ hwa àŋgàmɛ̀nɛyi lì hwiya nanù ema ò ma jà. Nɛ irzɔ i gbeyà nàŋgɛ e?

²³O eŋgànɛ̀lɛ̀ rzɔ ò gbeye mamɛ ema jò òhweyà. O hwèlì wunyanà hwànìi anu ema hwà mà ààtɛ̀ e hweyi.

²⁴O ɛndɛ na wɔ̀, ò atànìrzɛ̀ ndeŋgànɛlɛ ò hwa taŋgeya hweyàrzèlì hwe awu hwe arzɛ. O eŋge hvònda ndi wɔ̀ hwa tànɛ ò lì rzòòwa mahvumbu ma awu. Ène ŋgànà rzɔ, e gbeyà tɔ ima mòtò ò lì hwiya nanù ema, hweyà ema hwa òhwa ò lì ò teŋgɛ̀nɛ̀ hwe rza enje e jɔ̀kɛ̀. Ndèŋgànɛlɛ wɔ̀ hvɛ hwiti hwa hwi nanù ema ò wà witi ò gbeyà ndi hweyà na òma e mbenda ya ama Mòrzè e arza.

²⁵Ndi lì hvòmɛ̀nɛ̀ hwatò ema hwa rza enje wònyà Yudà, ema hwà mà tikòwɛ ò lì jà hwàlòkèlì, irzɔ i ma hwa òmeya itita nanù ema, irzɔ i ma kùlɛ̀ nanù ema, wɔ hwa rza àŋgàmɛ̀nɛ̀yi lì laa tɔ mòlèlì ema mò ma ŋgbààhwɛ̀ mahvɛhvɛ mòòhwà, tɔ̀ hwa rzi nyɔ màyija, ndèŋgànɛ̀lɛ̀ hwa rzi laa hwèembè ema hwe ŋwelì mòtìmà, ndèŋgànɛ̀lɛ̀ hwa rzi gbeyà hvɛ hweyà hwe mòrzònje.”

²⁶O eŋgànɛ̀lɛ̀ rzɔ ò wònɛyi wùnyà, Pàwolò à mà timba hwaŋga wunyanà à mà gbeyà hweŋge hweyàrzèlì hwe lì atànìrzɛ̀ na wɔ̀. Rzìi à kpeya ò e ndawò yà Lohwà, rzìi a òhwa mɔ̀rzɔ̀ŋgi mò menya ema lì atànìrzɛ̀ lì ò wòwɛ. O mburza nanù ndi hwa hwɛni lì ŋgba làhweyà la tɔ̀ ima mɔ̀ wa awu.

²⁷Nà òma hwèkuhwèlì me meŋge mèenyà lìrzamba me hwètànìrzèlì me ma kòmbɛnɛ, lòŋgò la hwatò hwa wònyà Yudà ema hwà mà uwɛ̀lɛ̀lɛ̀yi ò erzòòkà ya Èrzìyà, hwà mà ɛnɛ Pàwolò ò tenì ya e ndawò yà Lohwà. Hwà mà gbeyà e ŋgindi ò lì kanjeya rzìi e hvɔ̀ɔ̀tɔ̀ Pàwolò.

²⁸Hwa a tɛɛ nanù ema, “Ìi wònyàmòwè hwa Irzàyɛ̀lì, e jò òŋgòwane! È mòtò ònò ema a òkòlɛ hwatò hwa arzɛ ò hweki hwe arzɛ nanù ema hwatò hwa Irzàyɛ̀lì, e mbenda ya ama Mòrzè na e ndawò yà Lohwà hwe rza enje tɔ̀ eyà. Tɔ̀ nàŋgɛ nanù, mɔ̀ à mà jànà lòŋgò la hwatò ema hwa rza enje wònyà Yudà ò tenì ya e ndawò yà Lohwà ndèŋgànà eŋge eyà e ma gbeyà e ndawò yà Lohwà e rza rzàŋgi hvɛ.”

²⁹(Wɔ hwà mà òhwa ndi nanù ehwànja hwà mà ɛnɛ Tlòhvìmùrzì mòtò wa e mbòwa ya Ɛ̀hvɛ̀rzɔ̀rzì na Pàwolò hwa ɛndɛlɛnɛ ò tenì ya mbòwa, ndèŋgànɛ̀lɛ̀ hwà mà ɔ̀ŋgɛ̀lɛ̀ nanù ema Pàwolò à mà mò kpeyaneya ò tenɛ-tenɛ ya e ndawò yà Lohwà).

³⁰È mbòwà ndɛnɛ ya arzɛ e ma kanjeya rzìi hwatò hwa uhweyà ò hwèhvàrzù hwe arzɛ ò lì arzàŋganɛ. Hwa hvɔ̀ɔ̀tɔ̀ Pàwolò rzìi hwa mò wurzana ò tenì ya e ndawò yà Lohwà. Lìwòkimɛnɛ mawòhvà mà e ndawò yà Lohwà ma mà hvendàhwà.

³¹Nà òma hwà mà hwɛ lì keka ò lì òŋwa Pàwolò, rzìi lòŋgò la hwatò hwa ɛndɛ lì òhweyà e mòkànèlì wa hwàanà njuma wa Ròmànì nanù ema kànjɛ-kanjɛ e hwèlì ò tenì ya Jèrurzalɛ̀mù hwa arzɛ.

³²O lìwòkimɛnɛ e mòkànèlì wa hwàanà njuma a rzi hvàŋge tɔ̀ hvònda. A ma hvɔ̀rzɔ̀ hwàànèlì hwa njuma hwa ndɛnɛ na hwarzàlì rzi a ɔ̀ndɔ̀ ò Jèrurzalɛ̀mù na wɔ̀. Nà òma hwatò hwà mà mò ɛnɛ a jà na hwanelì hwa njuma rzìi hwa hwɛmɛ lì anana Pàwolò.

³³È mòkànèlì wa hwàanà njuma rzìi a ɛndɛ lì ùŋmànɛ̀lɛ̀ Pàwolò rzi a mò ŋgbaŋgɛ, rzìi a akɛlɛ lìlò nanù ema hwa mò kàkane ŋgɔ̀kɔ̀hwì ihwakɛ. Rzìi à ijòwa nanù ema, “Njɛnɛ ònò e? Mamɛ mɔ̀ à gbèyi e?”

³⁴Lòŋgò la hwatò ò tenì ya eŋge ŋgindi, hwà mà tɛɛ ehvɛhvɛ eyà, hwanɛyi wɔhvɛ e ya awu. Ndi kànatɛ e mòkànèlì a rzi tanɛ lì luwa e jɔ̀kɛ̀ ehwànja kanjɛ̀-kanjɛ̀, à mà kànèyà nanù ema hwa ɛ̀ndɛ̀nɛ̀ Pàwolò ò ndawò ya ŋguhwa.

³⁵Hwà mà ɛ̀ndɛ̀nɛ̀ Pàwolò natɛ̀ɛ hwa mò ukana ò ŋmèna-ŋmèna mò eŋge ndawò ya ŋguhwa. Ndi na òma hwà mà uke ò lì kpèeyà, hwàanà njuma hwà mà mò hwanɛ ndi lì hwanɛ ehwànja e ŋgindi e ma ambirzɛnɛ.

³⁶È ŋgindi ema e ma hwa ikama ò mburza e ma hwɛ lì tɛɛ nanù ema, “È mò òŋwe!”

³⁷Nà òma hwàànèlì hwa njuma hwà mà arze lì kpeyaneya Pàwolò ò tenì ya eŋge ndawò ya ŋguhwa, rzi mɔ̀ à òhwèyà e mòkànèlì wa hwàanà njuma nanù ema na hwɛni ŋmanà eyà ò lì ò òhweyà. Oŋgò mòkànèlì wa hwààna njuma rzi a mò ijòwa nanù ema, “O eŋgànɛlɛ ò tanɛyi lì òhwa e mbɔrzi ya Grìki e?

³⁸Èŋge ŋgànà e hwèlì ndi nanù ema rzeketɛ ò wa ndi ò hwèlì òŋgò mòtò wa Ìjiptò ema à mà jà anu ò hvònda hvɔ̀kɔ rzìi a jànà lùwànje. Mɔ̀ à mà rzàŋga hwekòlì hweni hwe hwàanà njuma, hwà-òŋwelì hwa hwatò rzìi a hwa ɛ̀ndɛ̀nɛ̀ ò mòrzànjɛ.”

³⁹Pàwolò à mà mò alàhwɛ̀ nanù ema, “Nà hwèlì ndi mòtò wa wònyà Yudà. Nà ŋyàhwɛlɛyi ndi ò mbòwa ndɛɛndɛ ya Tàrzùrzì, ò erzòòkà ya Rzìlìrzìyà, wònja ya e mbòwa ya wòlìtò. Ŋmàyi kòkò inyɛ na òhwirzɛnɛ hwanu hwatò.”

⁴⁰Oŋgò mòkànèlì wa hwàanà njuma à mà mò ŋgbàà e wònja ò lì òhwa eyà. O eŋgànɛ̀lɛ̀ Pàwolò à mà tɛ̀mɛ̀ ò ŋmèna-ŋmèna mò eŋge ndawò ya ŋguhwa, rzìi a hvɛhvɛ lìya la eni ò e ŋgindi nanù ema hwa hwɛmɛ mɔ̀tɔ̀wù. Nà òma hwà mà lìya ŋmɛɛ Pàwolò rzìi a hwa òhwirzɛnɛ na e mbɔrzi ya Hibrù.